ᐅᖃᖅᑎᑦᑎᔩ,
ᐊᑯᓂ ᐃᖅᑲᐅᒪᒋᔭᐅᖏᓐᓇᕐᓂᐊᓕᖅᑐᖅ ᐊᑎᓕᐅᖅᑕᐅᓚᐅᖅᑎᓪᓗᒍ ᓄᓇᕗᒻᒥ ᓄᓇᓕᕆᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᓇᒻᒥᓂᖅᓱᕐᓂᕐᒧᑦ ᐊᖏᕈᑎ ᔭᓐᓄᐊᓕ 18-ᒥ, ᐊᖏᔪᖅᑳᕐᔪᐊᖅ ᔭᔅᑎᓐ ᑐᕈᑑᓗ ᐅᕙᒍᒃ ᑲᑎᒪᖃᑎᒌᓚᐅᕋᓐᓄᑦ.
ᐅᖃᖃᑎᒌᒍᑎᖃᓚᐅᖅᑐᒍᒃ ᐱᒻᒪᕆᐅᓂᖓᓂᒃ ᓇᒻᒥᓂᖅᓱᕐᓂᕐᒧᑦ ᐊᑎᓕᐅᖅᑕᐅᓂᖓ ᓄᓇᕗᑦ ᓯᕗᓂᑦᓴᖓᓄᑦ. ᐃᓕᖅᑯᓯᓕᕆᓂᕐᒧᑦ ᑕᑯᕋᓐᓈᖅᑎᑦᓯᓂᐅᓚᐅᖅᑐᖅ, ᓴᖅᑭᔮᖅᑎᑦᓯᒍᑕᐅᓚᐅᖅᑐᖅ ᐊᒥᓱᓂᒃ ᐊᔪᖏᑦᓯᐊᖅᑐᓂᒃ ᑕᑯᕋᓐᓈᖅᑎᑦᓯᔨᓂᒃ, ᓴᙱᓂᕆᔭᖏᓐᓂᒃ ᓄᓇᕗᒻᒥᐅᑦ ᓄᓇᕐᔪᐊᒧᑦ.
ᓇᓗᓇᐃᕐᕕᒋᒃᑲᓐᓂᓚᐅᖅᑕᕋ, ᖃᓄᖅ ᐃᓪᓗᓕᕆᓂᖅ ᐃᓱᒫᓘᑎᒋᓂᖅᐹᕆᒐᑦᑎᒍ ᑮᓇᐅᔭᖃᖅᑎᒃᑲᓐᓂᕆᐊᖃᖅᑐᑎᒍᓗ ᒐᕙᒪᑐᖃᒃᑯᓐᓂ ᑲᑐᔾᔨᖃᑎᑦᑎᓐᓂᒃ. ᓄᓇᕗᒻᒥᓕ ᖃᓄᐃᓕᐅᕈᑎᐅᒋᐊᓕᓐᓂᒃ ᐱᓕᕆᒌᖅᓯᒪᓕᕐᖓᑕ ᐃᓪᓗᓕᐅᒃᑲᓐᓂᕆᐊᖃᕐᓂᕐᒧᑦ ᕿᓚᒥᐅᓂᖅᓴᒃᑯᑦ ᑲᑐᔾᔨᖃᑎᒋᓪᓗᒋᑦ ᐃᓄᐃᑦ ᑲᑐᔾᔨᖃᑎᒌᑦ ᑯᐊᐳᕇᓴᖁᑎᖏᓐᓄᑦ, ᑕᐃᒪᓕ ᐋᑐᕚ ᖃᓄᐃᓕᒋᐊᕈᑎᖃᕆᐊᖃᓕᕐᓂᖏᓐᓂᒃ ᓇᓗᓇᐃᕐᕕᒋᓚᐅᖅᑕᕋ. ᓇᓗᓇᐃᕆᐊᒃᑲᓐᓂᕈᓐᓇᖏᑦᑕᕋ ᖃᓄᑎᒋ ᐃᓪᓗᑭᑦᓴᕐᓂᖅ ᐊᑦᑐᐃᓂᖃᖃᑦᑕᕐᓂᖓᓂᒃ ᖃᓄᓕᒫᖅ ᐃᓅᓯᖏᓐᓄᑦ ᓄᓇᕗᒻᒥᐅᑦ − ᐃᓕᓐᓂᐊᖅᑐᓕᕆᓂᕐᒧᑦ ᐃᓱᒪᓕᕆᓂᕐᒧᑦ ᑎᒥᒥᒍᓪᓗ ᖃᓄᐃᑦᑕᐃᓕᒍᑎᖃᕈᓐᓇᕐᓂᒧᑦ.
ᐅᖃᖅᑎᑦᑎᔩ, ᐊᖏᔪᖅᑳᕐᔪᐊᖅ ᐊᖏᖃᑎᖃᓚᐅᖅᑐᖅ ᐱᓕᕆᖃᑎᖃᖅᐸᓪᓕᐊᖏᓐᓇᕈᒪᓂᕐᒧᑦ ᐅᕙᑦᑎᓐᓂᒃ ᑐᙵᕕᓕᐅᕆᐊᒃᑲᓂᕐᓂᕐᒧᑦ ᐅᑭᐅᖅᑕᑐᒥ ᐅᐊᑦᓯᑦᓯᐊᕆᐊᖃᕐᓂᕐᒧᑦ ᓇᒻᒥᓂᕆᔭᐅᓂᖓᓂᓪᓗ ᓇᓗᓇᐃᖅᓯᓯᒪᓂᕐᒧᑦ ᐃᓪᓗᓕᐅᕆᐊᖃᒃᑲᓐᓂᕐᓂᕐᒧᓪᓗ, ᕿᓚᒥᐅᓂᖅᓴᒃᑯᑦ ᓄᓇᕗᒻᒥ.
ᖁᔭᓕᕕᒋᓚᐅᖅᑕᕋ ᑮᓇᐅᔭᖃᖅᑎᑦᓯᓂᕐᒧᑦ ᐃᓐᓇᒻᒪᕆᓐᓄᑦ ᐃᑉᐱᒋᔭᖃᕐᓂᕐᒧᑦ. ᑐᙵᕕᒋᔭᐅᔪᖅ ᑲᑐᔾᔨᓗᑕ ᑐᕌᒐᑦᑎᓐᓂ ᐃᓐᓇᙳᖅᐸᓪᓕᐊᒋᐊᖃᕐᓂᕐᒧᑦ ᐅᐱᒍᓱᓐᓂᖃᕐᓗᑎᒃ, ᐃᓚᒋᔭᐅᓪᓗᓂ ᐃᓐᓇᒻᒪᕆᒋᔭᑦᑎᓐᓂᒃ ᓅᑎᑦᓯᑦᑕᐃᓕᓂᖅ ᓄᓇᕗᒻᒥᒃ.
ᖁᕕᐊᑦᑐᖓ ᐱᕕᖃᓚᐅᕋᒪ ᐅᖃᐅᓯᕆᒍᓐᓇᒃᑲᓐᓂᓚᐅᕋᒃᑭᑦ ᓄᓇᕗᒻᒥ ᓯᕗᓪᓕᐅᑎᑕᐅᒋᐊᓖᑦ ᐊᖏᔪᖅᑳᕐᔪᐊᒧᑦ ᑕᒫᓂ ᓄᓇᕗᒻᒥ.
ᓂᕆᐅᑦᓯᐊᖅᑐᖓ ᑕᑯᒍᓐᓇᖅᓯᓂᐊᕋᑦᑕ ᑮᓇᐅᔭᖃᖅᑎᑕᐅᒃᑲᓐᓂᓂᕐᒧᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᓄᓇᕗᒻᒧᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.