ᐅᖃᖅᑎᑦᑎᔩ,
ᖁᕕᐊᓱᒻᒪᕆᑦᑐᖓ ᑐᓴᖅᑎᒍᓐᓇᕋᑦᓯ ᓄᓇᕗᑦ ᐃᒃᓯᕙᐅᑕᐅᓂᐊᕐᖓᑦ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᖓᓄᑦ 2024-ᒥ.
ᑲᑎᒪᓂᖅ ᐱᒋᐊᖅᑎᑕᐅᓚᐅᖅᓯᒪᔪᖅ 2003-ᒥ. ᐃᒃᓯᕙᐅᑕᕈᖃᑦᑕᖅᑐᑦ ᓇᓪᓕᑭᑕᖅᑐᑎᒃ ᔫᑳᓐ, ᓄᓇᑦᓯᐊᖅ, ᓄᓇᕗᓪᓗ.
ᖁᔭᓐᓇᒦᖅᑕᕋ ᓯᕗᓕᖅᑎᖓᑦ ᓄᓇᑦᓯᐊᕐᒥ ᑳᓚᐃ ᑳᒃᑯᕆᓐ ᐃᒃᓯᕙᐅᑕᐅᓚᐅᕐᓂᖓᓄᑦ 2023-ᒥ. ᑐᙵᓱᑦᑎᑕᕋ ᓯᕗᓕᖅᑎᑖᖅᑲᐅᖓᖓᑦ, ᕋᔭᐃ ᓯᒻᑉᓴᓐ ᑲᑎᒪᓂᕐᒧᑦ.
ᑲᑎᒪᓂᖅ ᐱᕕᑦᓴᖃᕐᕕᑦᓯᐊᖑᕙᑦᑐᖅ ᐱᓕᕆᖃᑎᒌᓐᓂᕐᒧᑦ ᓇᓗᓇᐃᖅᓯᓯᒪᓂᕐᒧᑦ ᐊᔾᔨᐅᖏᑦᑐᑦ ᐊᑕᖏᖅᑐᑕᓗ ᐅᑭᐅᖅᑕᖅᑐᒥ ᐱᔭᕆᐊᓕᕗᑦ ᓯᕗᒧᒋᐊᖅᑕᐅᖃᑦᑕᕈᓐᓇᖁᓪᓗᒋᑦ ᐊᑑᑎᖃᑦᓯᐊᖅᑐᒃᑯᑦ. ᐊᑕᐅᓯᐅᖃᑎᒌᓪᓗᑕ ᓂᐱᕗᑦ ᓴᙱᔫᒻᒪᑦ ᓇᓗᓇᐃᖅᓯᒐᓱᐊᕐᓂᒃᑯᑦ ᓱᓕᔪᓂᒃ ᓴᖅᑭᐅᒪᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᖏᓐᓂ. ᑐᙵᓱᑦᑎᑦᓯᔨᐅᓚᐅᖅᑐᖓ
ᐅᖄᓚᐅᑎᒃᑯᑦ ᑲᑎᒪᓂᕐᒥᒃ ᔭᓐᓄᐊᓕ 15-ᒥ ᓯᕗᕐᖓᒍᑦ ᐊᕐᕌᒍᑕᒫᑦ ᑲᑎᓪᓚᑦᑖᕐᓗᑕ ᑲᑎᒪᓂᕆᓛᖅᑕᑦᑎᓐᓄᑦ ᒥᑦᑎᒪᑕᓕᒻᒥ ᒪᐃᖑᓕᖅᑲᑦ.
ᐅᖃᖅᑎᑦᑎᔩ, ᐊᒥᓱᑦ ᓄᓇᕗᒻᒥ ᓯᕗᓪᓕᐅᑎᓯᒪᒍᒪᔭᕗᑦ ᓲᕐᓗ ᐅᑭᐅᖅᑕᖅᑐᒥ ᐊᑦᑕᓇᖅᑐᒦᑦᑕᐃᓕᒪᓂᖅ ᓇᒻᒥᓂᕆᔭᐅᓂᖓᓂᓪᓗ ᓇᓗᓇᐃᖅᓯᓯᒪᓂᖅ, ᐊᑭᑐᔫᑎᓕᕆᓂᖅ, ᐃᓪᓗᓕᕆᓂᕐᓗ ᐊᑕᖏᖅᑐᑕ ᐃᓱᒫᓗᒋᔭᐃᓐᓇᕆᒐᑦᑎᒍ ᔫᑳᓐᒥᓗ ᓄᓇᑦᓯᐊᕐᒥᓗ.
ᐃᖅᑲᓇᐃᔭᖅᑏᑦ ᐊᑕᖏᖅᑐᓂ ᐱᖓᓱᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂ ᐱᓕᕆᖃᑎᒌᖏᓐᓇᕐᓂᐊᖅᑐᑦ ᑕᖅᑭᒐᓚᐅᓂᐊᖅᑐᓂ ᐋᖅᑭᑦᓱᐃᓗᑎᒃ ᑐᙵᕕᖃᑦᓯᐊᖅᑐᒥᒃ ᑲᑎᒪᔾᔪᑎᑦᓴᓂᒃ ᑐᕌᖓᓂᖃᕐᓗᑎᒃ ᐱᔭᕆᐊᖃᓪᓚᕆᑦᑕᖏᓐᓄᑦ ᐅᑭᐅᖅᑕᖅᑐᒥᐅᑕᐃᑦ.
ᓂᕆᐅᒋᑦᓯᐊᕐᒥᔭᕋ ᐱᓕᕆᖃᑎᒋᓂᐊᕋᒃᑯ ᒪᓕᒐᓕᐅᖅᑎᐅᖃᑎᒐ, ᒪᓕᒐᓕᐅᖅᑎ ᓄᑕᒐᖅ, ᕼᐊᒻᓚᒃᑯᖏᓪᓗ ᒥᑦᑎᒪᑕᓕᒻᒥ, ᑕᑯᑎᑦᓯᖃᑎᒋᒍᓐᓇᓛᕋᒃᑭᑦ ᑲᔾᔮᓇᕐᓂᖓᓂᒃ ᓄᓇᖅᑲᑎᒌᑦᓯᐊᕐᓂᖏᓐᓂᓪᓗ ᕼᐊᒻᓚᖓᓂ ᓯᕗᓕᖅᑎᐅᖃᑎᓐᓄᑦ ᐱᖃᓐᓇᕆᔭᑦᑎᓄᓪᓗ ᔫᑳᓐᒥᐅᓂᒃ ᓄᓇᑦᓯᐊᕐᒥᐅᑕᓂᓪᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.