ᐅᖃᖅᑎᑦᑎᔩ,
ᐅᓪᓗᒥ ᓇᖏᖅᓯᔪᖓ ᓇᓗᓇᐃᕈᒪᓪᓗᒍ ᔭᓐᓄᐊᓕ 18, 2024, ᐅᓪᓗᖓ ᓄᓇᕗᑦ ᒐᕙᒪᒃᑯᑦ, ᓄᓇᕗᑦ ᑐᙵᕕᒃᑯᑦ ᒐᕙᒪᑐᖃᒃᑯᓪᓗ ᐊᑎᓕᐅᓚᐅᕐᓂᖏᓐᓂᒃ ᓄᓇᓕᕆᓂᕐᒧᑦ ᐱᕚᓪᓕᕈᑎᑦᓴᓂᓪᓗ ᓇᒻᒥᓂᖅᓱᕐᓂᕐᒧᑦ ᐊᖏᕈᑎᒥᒃ. ᑖᓐᓇ ᐅᓪᓗᖅ ᐱᖃᓯᐅᑎᓕᖅᑐᖅ ᔪᓚᐃ 9, 1993-ᒥ, ᐊᑎᓕᐅᖅᑕᐅᓚᐅᕐᓂᖓᓄᑦ ᓄᓇᕗᑦ ᐊᖏᕈᑎ, ᐊᒻᒪᓗ ᐃᐳᕈ 1, 1999, ᐅᓪᓗᖓ ᓄᓇᕗᙳᕐᕕᐅᓚᐅᖅᑐᖅ.
ᐊᑎᓕᐅᖅᑕᐅᒍᓐᓇᖅᓯᓚᐅᖅᑐᖅ ᐊᑦᓱᕉᑎᖃᖅᓯᒪᓂᖏᓐᓄᑦ ᓯᕗᓕᖅᑎᕗᑦ ᐃᓐᓇᒻᒪᕆᕗᓪᓗ ᑭᖑᓂᑦᑎᓐᓂ, ᑕᖃᒍᓐᓇᕋᑎᒃ ᐊᔩᖅᑎᐅᖃᑦᑕᖅᓯᒪᔪᑦ ᐅᓪᓗᒥᒧᑦ, ᓄᓇᕗᒻᒥᐅᓕᒫᓄᓪᓗ. ᐅᐱᒍᓱᑦᓯᐊᖅᑐᖓ ᓄᓇᕗᒻᒧᑦ ᓄᓇᕗᒻᒥᐅᓄᓪᓗ, ᓇᖏᖃᑕᐅᖅᑐᖓ ᐊᖏᔪᖅᑳᕐᔪᐊᖅ ᔭᔅᑎᓐ ᑐᕈᑐ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᓄᑦ ᐊᓗᑭ ᑰᑦᑎᖅ.
ᑕᐃᑲᓂ, ᐅᖃᖅᑎᑦᑎᔩ, ᑕᑯᒍᒪᓯᒪᔭᖏᑦ ᐃᓐᓇᒻᒪᕆᑦᑕ ᐱᙳᕐᓂᖃᓚᐅᖅᑐᖅ.
ᐊᕐᕌᒍᖓᓃᓕᖅᑎᓪᓗᑕ 25-ᓂᒃ ᐊᕐᕌᒍᓂᒃ ᓇᓪᓕᐅᓂᖅᓯᐅᕐᕕᖓᓂ, ᐃᓱᒪᓕᐅᖅᑎᕈᓚᐅᖅᑐᒍᑦ ᓄᓇᒋᔭᑦᑎᓐᓄᑦ ᐱᕚᓪᓕᕈᑎᑦᓴᐅᓂᖏᓐᓄᓪᓗ ᐅᑎᖅᑎᑦᑐᒍ ᐊᖏᕐᕋᑎᓐᓄᑦ, ᑕᒫᓃᒋᐊᖃᕐᖓᑦ. ᑕᒪᓐᓇ ᑕᒡᒐ ᑕᑯᓐᓇᖑᐊᖅᑕᐅᓚᐅᖅᓯᒪᔪᖅ ᐃᓐᓇᒻᒪᕆᑦᑎᓐᓄᑦ.
ᓇᒻᒥᓂᖅᓱᕐᓂᕐᒧᑦ ᐊᖏᕈᑎ ᓇᓗᓇᐃᖅᓯᒍᑕᐅᔪᖅ ᐊᖏᓂᖅᐹᓄᒥᒃ ᓄᓇᓂᒃ ᓄᑦᑎᖅᑕᐅᓂᖏᓐᓂᒃ ᑲᓇᑕᒥ ᓯᕗᓪᓕᖅᐹᑦᓯᐊᒥ − 2 ᒥᓕᐊᓐ ᓯᒃᑭᑦᑕᑦ ᑭᓛᒥᑕᐃᑦ ᓄᓇᐃᑦ ᑎᒍᒥᐊᕐᓂᐊᓕᖅᑕᖏᑦ ᓄᓇᕗᒻᒥᐅᑦ. ᐱᕚᓪᓕᕈᑎᑦᓴᓂᒃ ᐱᕙᓪᓕᐊᑎᑦᓯᓂᖅ ᐊᔭᐅᖅᑐᖅᑕᐅᓗᓂ ᐊᐅᓚᑕᐅᓗᓂᓗ ᓇᓕᒧᒌᑦᑎᑦᓯᓂᒃᑯᑦ, ᐅᕙᑦᑎᓐᓄᑦ.
ᐱᒋᐊᕐᓂᐊᓕᖅᑐᒍᑦ ᐊᕐᕌᒍᓂᒃ ᐱᖓᓱᓂᒃ ᐃᓂᓪᓚᑦᑎᕆᕙᓪᓕᐊᓂᕐᒧᑦ ᐊᑐᓕᖅᑎᑦᓯᕙᓪᓕᐊᓂᕐᒧᓪᓗ.
ᓄᓇᕗᑦ ᒐᕙᒪᒃᑯᖏᑦ ᑐᙵᕕᓕᐅᖅᐸᓪᓕᐊᓯᒪᔪᑦ ᐊᐅᓚᑦᓯᔨᕈᖔᓛᕐᓂᕐᒧᑦ ᐃᓱᒪᓕᐅᖅᑎᐅᓂᕐᒧᑦ ᓄᓇᓕᕆᓂᕐᒧᑦ ᐊᐅᓚᑦᓯᓂᕐᒧᑦ ᐊᕐᕌᒍᕋᓴᕐᓂᒃ. ᑐᙵᕕᓕᐅᖅᓯᒪᔪᑦ ᐱᓕᕆᖃᑎᒌᑦᑎᐅᑦᓯᐊᕐᓂᕐᒥᒃ ᑲᑐᔾᔨᖃᑎᑦᑎᓐᓄᑦ ᓇᐅᒃᑯᓕᒫᖅ ᐅᐸᓗᖓᔭᖅᑎᓪᓗᑕ.
ᐊᕐᕌᒎᓂᐊᖅᑐᓂᒃ ᐱᖓᓱᓂᒃ, ᑎᒥᐅᔪᑦ ᐊᑐᖃᑦᑕᓂᐊᖅᑐᑦ ᑕᒪᑐᒥᖓ ᐱᓕᕆᖃᑎᒌᑦᑎᐅᓂᕐᒥᒃ ᐱᓕᕆᐊᖃᕐᓗᑎᓪᓗ ᑲᑐᔾᔨᖃᑎᒌᑦᑎᕐᓂᕐᒧᑦ ᐱᔭᕇᖅᑕᐅᒍᓐᓇᖁᓪᓗᒍ ᓄᑦᑎᖅᑕᐅᓂᖏᑦ ᐱᓕᕆᐊᑦᓴᖃᖅᑎᐅᓂᑦᑎᓐᓄᑦ.
ᐃᐳᕈ 1, 2027-ᒥ, ᓄᑦᑎᖅᑕᐅᓪᓚᑦᑖᓚᖅᑐᑦ. ᓂᕆᐅᑦᓯᐊᖅᑐᖓ ᖁᕕᐊᓲᑎᖃᓛᕐᓂᑎᓐᓄᑦ ᑕᐃᑲᓂ ᐅᓪᓗᖓᓂ ᓄᓇᕗᒻᒥᐅᓕᒫᓪᓗ.
ᓴᖅᑭᖅᑎᓐᓂᐊᖅᑕᒃᑲ ᓄᓇᕗᒻᒥ ᓄᓇᓕᕆᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᓇᒻᒥᓂᖅᓱᕐᓂᕐᒧᑦ ᐊᖏᕈᑎ ᓈᒻᒪᓈᓕᖅᑲᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.