ᐅᖃᖅᑎᑦᓯᔩ,
ᐅᓪᓗᒥ ᓇᖏᖅᓯᔪᖓ ᓇᓗᓇᐃᖅᓯᔪᒪᓪᓗᖓ ᖁᔭᓕᔪᒪᓪᓗᒋᓪᓗ ᒪᓕᒐᓕᐅᖅᑎᐅᖃᑎᒃᑲ
ᑲᑐᔾᔨᓪᓗᑕ ᐋᖅᑭᒃᓱᐃᑎᓪᓗᑕ ᑲᑐᔾᔨᓗᑕ ᐱᓕᕆᐊᒃᓴᖏᓐᓂᒃ, ᓴᖅᑭᔮᑦᑎᐊᕐᓂᐊᕐᓂᕋᐃᓚᐅᖅᐳᒍᑦ ᑕᑎᒋᔭᐅᔪᓐᓇᑦᑎᐊᕐᓂᕋᐃᓪᓗᑕᓗ. ᑖᓐᓇ ᑐᒡᓕᐊᓂ ᐱᕙᓪᓕᐊᓂᕐᒧᑦ ᐅᓂᒃᑳᓕᐊᖅ, ᓱᓕ ᑲᔪᓯᑎᑦᑎᔪᒍᑦ ᐊᖏᕈᑎᒋᓚᐅᖅᑕᑦᑎᓐᓂ.
ᐊᖏᕈᑎᖃᓚᐅᕐᒥᔪᒍᑦ ᐱᓕᕆᖃᑎᒌᒍᒪᓪᓗᑕ. ᐊᑯᓐᓂᖓᓂ ᐱᓕᕆᐊᒃᓴᑦ ᕿᒥᕐᕈᔭᐅᕙᓪᓕᐊᑎᓪᓗᒋᑦ ᑕᑯᑎᑦᑎᓚᐅᖅᐳᒍᑦ ᐃᓛᒃ ᐱᓕᕆᖃᑎᒌᓪᓚᑦᑖᖅᑐᒍᑦ ᓄᓇᕗᒻᒥᐅᓂᒃ ᐱᕚᓪᓕᖅᑎᑦᑎᔪᒪᓪᓗᑕ.
ᐅᖃᖅᑎᑦᑎᔩ, ᒥᓂᔅᑕᐃᑦ ᑐᓵᓚᐅᕋᑦᑎᒍᑦ ᐅᓄᖅᑐᓂᒃ ᑲᔪᓯᑎᑦᑎᓯᒪᓂᖏᓐᓂᒃ ᐊᕐᕌᒍᖕᓄ ᒪᕐᕉᒃ ᐊᑐᖅᑎᓪᓗᒋᑦ ᐸᕐᓇᒃᓯᒪᙱᑦᑐᓂᒃ ᐊᒡᕕᐊᕈᑎᓂᒃ ᐱᑕᖃᕋᓗᐊᖅᑎᓪᓗᒍ ᓲᕐᓗ ᓄᕙᒡᔪᐊᕐᓇᒧᑦ ᒪᑐᔭᐅᓯᒪᓚᐅᖅᑎᓪᓗᒍ ᑎᓯᐱᕆ 2021−ᖑᑎᓪᓗᒍ.
ᐅᖃᐅᓯᖃᓚᐅᕆᕗᒍᑦ ᐊᒃᓱᕈᕐᓇᖅᑐᓂᒃ ᑐᓴᓚᐅᖅᖢᑕᓗ ᐃᓱᒪᒋᔭᐅᔪᓂᒃ ᖃᓄᖅ ᐋᖅᑭᒃᓯᔪᓐᓇᕐᒪᖔᑦ ᓯᕗᓪᓕᐅᑎᔪᒪᔭᑦᑎᓐᓂᒃ ᐅᑭᐅᖕᓄᑦ ᒪᕐᕉᖕᓄᑦ ᑲᑎᒪᔨᑐᐃᓐᓇᕐᓄᑦ. ᑕᒪᓐᓇ ᐱᓕᕆᓂᐅᔪᖅ ᑲᑐᔾᔨᖃᑎᒌᒍᑕᐅᓚᐅᖅᑐᖅ ᐊᒻᒪᓗ ᑕᑯᒃᓴᐅᑎᑦᑎᓪᓗᓂ ᖃᓄᖅ ᐊᖏᖃᑎᒌᖕᓂᒃᑯᑦ ᒐᕙᒪᐅᔪᑦ ᐱᓕᕆᔪᓐᓇᕐᒪᖔᑕ ᐱᔨᑦᑎᑦᑎᐊᕐᓗᑎᒃ ᓄᓇᕗᒻᒥᐅᓂᒃ.
ᐅᖃᖅᑏ, ᖃᐅᔨᒪᖁᕙᒃᑲ ᒪᓕᒐᓕᐅᖅᑎᐅᖃᑎᒃᑲ ᐃᓱᒪᒋᔭᖏᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑕ ᐱᓪᓗᐊᑕᕐᓄᑦ ᓲᕐᓗ ᐱᔨᑦᓯᑦᑎᐊᕐᓂᖅᓴᐅᓂᕐᒧᑦ ᓄᓇᓕᕋᓛᖑᓂᖅᓴᓂᒃ. ᑖᒃᑯᐊ ᑐᑭᓯᒋᐊᕈᑎᒃᓴᐃᑦ ᐃᓱᒪᒃᓴᖅᓯᐅᕈᑕᐅᖁᓂᐊᖅᐸᕗᑦ ᐱᓕᕆᐊᕆᔭᑦᑎᓐᓂ ᑲᔪᓯᓂᐊᖅᑎᓪᓗᑕ ᐊᕐᕌᒎᖕᓄ ᒪᕐᕉᖕᓄᑦ ᑲᑐᔾᔨᓗᑕ ᐱᓕᕆᐊᒃᓴᑦᑎᓐᓂ ᑲᔪᓯᑎᓪᓗᑕ.
ᓂᕆᐅᒃᐳᖓ ᐱᓇᔪᐃᓐᓇᕐᓂᐊᕐᓂᑦᑎᓐᓂᒃ ᑲᔪᓯᑎᑦᑎᔪᒪᓪᓗᑕ ᐱᓕᕆᐊᖑᔪᒪᔪᓂᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐱᓕᕆᐊᒃᓴᑦᑎᓐᓂ ᐊᒻᒪ ᓴᖅᑭᑎᑦᑎᒃᑲᓐᓂᕐᓗᑕ ᐱᕙᓪᓕᐊᓂᑦᑕ ᐅᓂᒃᑳᖓᓂᒃ 2024−ᒥ.
ᖁᔭᓐᓇᒦᒃ ᐅᖃᖅᑎᑦᓯᔩ