ᐅᖃᖅᑎᑦᓯᔩ,
ᓯᑦᑎᒻᕙ 30−ᒥ, ᖃᑦᓯᑲᓪᓚᐃᑦ ᒥᓂᔅᑕᐃᑦ ᐅᕙᖓᓗ ᐃᓚᐅᓚᐅᖅᐳᒍᒃ ᑲᓇᑕᓕᒫᒥᑦ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᓐᓂᕐᒧᓪᓗ ᐅᓪᓗᖓᓂ ᖃᓄᐃᓕᐅᕐᓂᕐᒧᑦ ᐃᖃᓗᓐᓂ ᐋᖅᑭᒃᓱᖅᑕᐅᓯᒪᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ. ᐅᓪᓗᒥ ᓂᑯᕕᑦᑐᖓ ᐅᐱᒍᓱᒍᒪᓪᓗᖓ ᓄᑕᖅᑲᓂᒃ ᑎᒍᔭᐅᓚᐅᖅᑐᓂᒃ ᐃᓂᑖᖅᑎᑕᐅᓯᒪᑦᓱᑎᓪᓗ ᑲᓇᑕᒥ ᐊᒥᓱᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓂᒃ, ᐊᒻᒪ ᐃᓚᖏᑦ ᓄᓇᓖᓪᓗ.
ᑕᒫᓂ ᓄᓇᓕᐸᐅᔭᕐᒥ, ᐊᒻᒪ ᓄᓇᕘᓕᒫᒥ, ᒫᓐᓇ ᑕᑯᓐᓇᓪᓚᕆᓕᖅᐳᒍᑦ ᑲᓇᑕᒥ ᐅᓪᓗᖓᓂᒃ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᓐᓂᕐᒧᓪᓗ. ᑖᓐᓇ ᒐᕙᒪ ᑲᔪᓯᑎᑦᑎᓚᐅᖅᐳᖅ ᐱᖁᔭᕐᒥᒃ 2022−ᖑᑎᓪᓗᒍ ᓇᓗᓇᐃᖅᓯᓂᕐᒧᑦ ᓯᑦᑎᒻᕙ 30−ᒥ ᓇᓕᒧᓱᑦᑐᒥ ᐊᓯᖏᓐᓄᑦ ᑎᓕᔭᐅᓯᒪᔪᓄᑦ ᐅᓪᓗᕐᓄᑦ.
ᐅᖃᖅᑎᑦᓯᔩ, ᑲᓇᑕᐅᑉ ᒐᕙᒪᒃᑯᖏᑦ ᐱᒋᐊᓚᐅᙱᓐᓂᖏᓐᓂᑦ ᓇᓗᓇᐃᕐᓯᓂᐊᕐᓗᑎᒃ ᑲᓇᑕᐅᑉ ᐅᓪᓗᖓᓂ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᔾᓂᕐᒧᓪᓗ, ᖃᐅᔨᒪᓚᐅᕐᐸᕗᑦ ᐊᐅᐸᔪᒃᑐᒥᑦ ᐅᕕᓂᕈᖅᓯᒪᓐᓇᐅᑉ ᐅᓪᓗᖓᓂᑦ. ᐱᒻᒪᕆᐅᕗᖅ ᐃᖅᑲᐅᒪᔭᕆᐊᒃᓴᖅ, ᐃᓕᑕᖅᓯᓂᕐᒧᓪᓗ ᓴᖅᑭᔮᖅᑎᑦᓯᔪᓐᓇᖅᑐᓂᒃ ᐊᓂᒍᐃᓯᒪᔪᑦ. ᒫᓐᓇ, ᓄᓇᖃᖅᑳᖅᓯᒪᔪᑦ ᐊᒻᒪ ᓄᓇᖃᖅᑳᖅᓯᒪᙱᑦᑐᑦ ᐃᓄᐃᑦ ᐊᑐᐃᓐᓇᖅᑐᑦ ᐊᐅᐸᔪᒃᑐᒥᒃ ᐅᕕᓂᕈᕐᓂᒃ ᓯᑦᑎᒻᕙ 30−ᒥ.
ᕕᓕᔅ ᐅᐃᐊᑉᓯᑕᑦ ᑐᙵᕕᓕᐅᓚᐅᖅᐳᖅ ᐅᓪᓗᒥ ᐃᖅᑲᐅᒪᔾᔪᑕᐅᓂᐊᖅᑐᒥᒃ. ᐊᓪᓚ ᓄᓇᖃᖅᑳᖅᓯᒪᔪᖅ ᐃᓕᓐᓂᐊᕆᐊᖅᐸᓚᐅᖅᓯᒪᔪᖅ ᐊᓂᒍᐃᓯᒪᔪᖅ. ᐊᐅᐸᔪᒃᑐᖅ ᐅᕕᓂᕈᖓ ᑐᓐᓂᖅᑯᓯᐊᖑᓚᐅᖅᐳᖅ ᐊᓈᓇᑦᓯᐊᖓᓂᑦ, ᑎᒍᔭᐅᓚᐅᖅᓯᒪᔪᖅ ᓯᕗᓪᓕᖅᐹᕐᒥ ᐅᓪᓗᖓᓂ ᐃᓕᓐᓂᐊᓇᐅᑉ. ᐊᐅᐸᔪᒃᑐᒥᑦ ᐅᕕᓂᕈᕐᒥᑦ ᓇᓗᓇᐃᒃᑯᑕᓕᒃ, ᐊᓯᖏᓐᓂᓪᓗ, ᐊᓯᐅᔨᕐᔪᐊᕐᓂᖅ.
ᐅᐃᐊᑉᓯᑕᑦ ᐅᖃᐅᓯᖏᑦ, "ᐊᑐᕈᕕᑦ ᐊᐅᐸᔪᒃᑐᒥᒃ ᐅᕕᓂᕈᕐᒥᒃ, ᓲᕐᓗ ᐃᖅᑲᖅᑐᐃᓂᕐᔪᒃᑎᑐᑦ ᐅᕙᑦᑎᓐᓄᑦ ᐊᓐᓇᒃᓯᒪᔪᓄᑦ ᐃᓅᓯᑦᑎᓐᓂ − ᐃᓕᑕᖅᓯᓂᕐᓗ ᐊᑐᖅᑕᐅᓯᒪᔪᒥᒃ ᐊᑐᖅᑕᐅᑎᑦᓯᑲᓐᓂᖅᑎᑦᓯᖏᓐᓂᕐᒧᑦ."
ᐊᒥᓲᓂᖅᓴᐃᑦ ᐃᓄᐃᑦ ᖃᐅᔨᒪᑉᐸᑕ ᖃᓄᐃᓚᐅᕐᒪᖔᑕ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪᓗ ᐅᖓᑖᓄᑦ, ᓴᐳᔾᔨᓂᖅᓴᐅᒍᓐᓇᖅᑐᒍᑦ ᑕᐃᒪᐃᒃᑲᓐᓂᖁᔨᖏᓐᓂᕐᒧᑦ ᐅᕙᑦᓯᐊᕈᓐᓂᓴᕐᓂᒃ.
ᐊᐅᐸᔪᒃᑐᑦ ᐅᕕᓂᕈᐃᑦ ᐃᒪᓐᓇ ᐅᖃᕆᕗᑦ: ᓄᑕᕋᓕᒫᑦᓯᐊᑦ ᐱᒻᒪᕆᐅᒻᒪᑕ. ᐅᖃᖅᑎᑦᓯᔩ, ᑲᑎᖃᑎᖃᕐᓂᖅ ᐊᓯᑦᑎᓐᓂᒃ, ᒪᒃᑯᑦᑐᓂᒃ ᐃᓐᓇᕐᓂᓪᓗ, ᑕᐃᒪᐃᒃᑲᓐᓂᓚᐅᕋᑦᑕ ᓯᑦᑎᒻᕙ 30-ᒥ, ᐃᖅᑲᐃᑎᑦᑎᕗᖅ ᓄᑕᖅᑲᑦᑎᓐᓂᒃ ᐱᒻᒪᕆᐅᓂᖏᓐᓂᒃ.
ᖁᔭᓐᓇᒦᒃ, ᐅᖃᖅᑎᑦᓯᔩ.