Uqaqtittiiji,
Apitilirvik 30 mi, kaffiujut Ministat uvangalu ilaujuguq Kanatami Ubluaganni Itquumanikkut Mamihaidjutiqhanunlu hulijuni Iqalungni upalun’ngaijaqhimajainnik Qikiqtani Inuit Katimajiita. Na’ngiqpunga ublumi nan’ngagiplugit nutaqqat aiqhiqtauvaktut talvunggaqtitauplutiklu Kanatami amigaittuni Aullaqtitauplutik Ilihariaqtitaujaami, tahapkunanutlu ilainnut nunallaatlu.
Hamani kavamaliqijuni, tamaanilu nunaptingni, tadja uvagut takudjutiliqtuguq Kanatami Ubluagani Itquumanikkut Mamihaidjutiqhanunlu. Hamna kavamanga pigiaqtittivagaat maligaliqidjutinut 2022 mi imaa pijaami Saptaippa 30 mi pijaami aadjikkiingniqhamik aadlanut tikkuaqtauhimajut haalatiigutaujunut.
Uqaqtittiiji, pitinnatik Kanatian kavamanga pigiaqtittijaami uqariiqhutik Kanatami Ublua Itquumanikkut Mamihaidjutiqhanunlu, ilihimajuguq Ublugijaraluan’nga Aupajaavjaktumik Akuvguaqaqtuqhatigun. Aqhuungnaktuq puiguqtailijaami, ilitarilugitlu pinahuaqpaktainnik atuqpagainnik annaktauhimajut. Hadja, Nunaqaqqaarhimajut Nunaqaqqaarhimanggittutlu inuit atuqhimmaaqpaktut atuqhutik aupajaavjaktumik akuvruanik Saptaippa 30 mi.
Phyllis Webstad pidjutigijaa tun’ngaviqhaup ubluata puiguqtaililipluni. Inmi Aadlain’ngujuq Aadlait Aullaqtitaupluni Ilihariaqtitauvaktuq annaktauhimaplunilu. Aupajaavjaqtuq akuvruan’nga aittuqtauhimajuq anaanattiamini, pijauhimaplunilu hivulliqpaaqpiami ubluata ilihangnirmun. Aupajaavjaqtuq akuvruanggit ilitturipkaidjutaata, amigaittuni hunavaluinni, an’ngijuaqpiaqtumik tammangnirmun.
Webstad uqarijaminik, “Atihimaguvit aupajaavjaqtumik akuvruamik, imaa ittutun itpaktuq mikijumik maligaliqidjutaujuq annaktauqatitkanut atuqpaktaptingnik inuuhiptingni — ilitaqhimajaamilu auladjutitigut atuqtauvaktut pipkailimaitpiaqtavut atuguminaittut hadjamin hivuniraalurmun”.
Amigaingniqhanut inuit ilitturiligumik qanuqtun pivaktut Aullaqtitauhimajunut Ilihariaqtitauplutik qanuqlu pidjutauvaktut, uvagut aqhut munaqhitijaaqtavut talvamin pittailiffaalimaittaang’ngat in’ngilraangnitatigut.
Aupajaavjaqtumik akuvruamik imaa uqauhiqaqtuqlu: Tamaita nutaqqat ihumagijaujuqhat. Uqaqtittiiji, katimaqatigiplugit aadlat, inuulrammiit inirniqhaatlu, taitai pipluta uvani Saptaippa 30 mi, puiguqtailidjutaujuq nutaqqaptingnut ihumagijaujut.
Quana, Uqaqtittiiji.