ᐅᖃᖅᑎᑦᑎᔩ, ᖁᕕᐊᓱᒃᐳᖓ ᒪᓕᒐᓕᐅᖅᑎᐅᖃᑎᒃᑲ ᑐᓴᖅᑎᑦᑐᒪᓪᓗᒋᑦ ᓄᓇᕗᒻᒥ ᐃᓚᐅᓂᕆᔭᖓ ᐅᑭᐅᕐᑕᖅᑐᒥ ᓯᕗᓕᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᐊᒻᒪ ᐱᖓᖕᓇᖓᓂ ᓯᕗᓕᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᑕᒪᑐᒪᓂ ᐊᕐᕌᒍᒥ ᐱᒋᐊᓵᖅᑎᓪᓗᒍ.
ᐅᖃᖅᑏ, ᓄᓇᑦᓯᐊᑉ ᒐᕙᒪᒃᑯᖏᑦ ᑲᑎᒪᑎᑦᑎᓚᐅᕐᒪᑕ ᐱᖓᓱᓂᒃ ᐅᑭᐅᖅᑕᖅᑐᒥ ᓯᕗᓕᖅᑎᐅᔪᓂᒃ ᐃᓅᕕᖕᒥ ᒪᐃᖑᑎᓪᓗᒍ.
ᓄᓇᕗᑦ, ᓄᓇᑦᓯᐊᖅ, ᔫᑳᓐᓗ ᐊᒥᓱᓂᒃ ᐊᔾᔨᒌᓂ ᐊᒃᓱᕈᕐᓇᖅᑐᖃᕐᐳᐃᑦᒃ ᐱᕕᒃᓴᓂᒡᓗ ᐊᔾᔨᖃᙱᑦᑐᓂᒃ ᐅᑭᐅᖅᑕᖅᑐᒧᑦ,
ᐅᐱᒍᓱᑦᑎᐊᖅᐳᖓᓗ ᐱᓕᕆᖃᑎᖃᕆᐊᒃᓴᖅ ᐃᓕᑦᑎᔪᓐᓇᕋᒥᒡᓗ ᓯᕗᓕᖅᑎ ᑳᒃᕋᓐ ᐊᒻᒪ ᓯᕗᓕᖅᑎ ᐱᓚᐃᒥᒃ ᑕᒪᑐᒪᓂ ᐊᕐᕌᒍᒥ.
ᐊᑕᐅᑦᑎᒃᑯᑦ, ᐱᕙᓪᓕᐊᓂᖃᓚᐅᖅᑐᒍᑦ ᐱᔾᔪᑕᐅᔪᓂᒃ ᐱᒻᒪᕆᐅᔪᓂᒃ ᐅᑭᐅᖅᑕᖅᑐᒥᐅᓄᑦ, ᐃᓚᐅᓪᓗᑎᒃ ᐅᑭᐅᖅᑕᖅᑐᒥ ᒥᐊᓂᖅᓯᓂᖅ ᐊᒻᒪᓗ ᐱᒋᔭᐅᓂᖅ, ᖃᓄᖅᑑᕈᑎᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᖅᑯᑎᖏᑦ, ᐃᖅᑲᓇᐃᔮᖃᕈᓐᓇᖅᑐᑦ ᐊᒻᒪᓗ ᓅᑦᑕᕈᓐᓇᕐᓂᖅ.
ᐅᖃᖅᑏ, ᐃᓚᐅᓕᓚᐅᕋᒪ ᐱᖓᖕᓇᖓᓂ ᓯᕗᓕᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᐅᐃᔅᓗ, ᕗᕆᑎᔅ ᑲᓚᒻᐱᐊᒥ, ᔫᓂᐅᑎᓪᓗᒍ. ᐱᖓᖕᓇᖓᓂ ᓯᕗᓕᖅᑏᑦ ᑭᒡᒐᖅᑐᐃᕗᑦ ᐃᓄᒋᐊᓂᒃ ᐊᔾᔨᒌᓂᒃ ᐱᔾᔪᑎᖃᐅᖅᖢᑎᒃ ᐃᓱᒫᓘᑕᐅᔪᓂᒡᓗ. ᑲᑎᒪᑎᓪᓗᑕ ᐅᖃᐅᓯᖃᓪᓗᐊᑕᓚᐅᖅᐳᒍᑦ ᖃᓄᖅᑑᕈᑎᓂᒃ ᐊᐅᓚᔪᓐᓇᐅᑎᓄᑦ ᐊᖅᑯᑎᓂᒃ, ᐊᒻᒪ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᐅᐃᕆᓯᒪᔪᓄᑦ ᐃᑲᔪᖅᓱᐃᔾᔪᑎᓄᑦ.
ᑕᒪᕐᒥᑦᑎᐊᖅ ᐱᖓᖕᓇᖓᓂ ᓯᕗᓕᖅᑏᑦ ᐊᖏᖃᑎᒌᓚᐅᖅᐳᑦ ᑎᓕᓯᔪᒪᓪᓗᑎᒃ ᐱᓕᕆᔨᑦᑎᓐᓂᒃ ᐱᓕᕆᖃᑎᒌᖁᓪᓗᒋᑦ ᐋᖅᑭᒃᓱᐃᓂᐊᕐᓗᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᐊᖅᑯᑎᒋᔭᐅᕙᒃᑐᒧᑦ ᐸᖕᓇᐅᑎᒥ, ᐊᒻᒪᓗᑦᑕᐅᖅ ᑐᓴᐅᒪᖃᑎᒌᑦᑎᐊᕐᓗᑕ ᐱᐅᓛᓂᒡᓗ ᐊᑐᖅᑕᐅᔪᓐᓇᖅᑐᓂᒃ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᕐᒧᑦ ᐅᐃᕆᓯᒪᔾᔪᑕᐅᓕᖅᑐᓄᓪᓗ ᑲᒪᒋᔭᐅᓂᕐᒥᒃ ᐊᑐᐊᒐᓂᒡᓗ.
ᐅᖃᖅᑏ, ᑖᒃᑯᐊ ᒐᕙᒪᐅᖃᑎᒌᑦ ᑲᑎᒪᓂᖏᑦ ᐱᒻᒪᕆᐅᖕᒪᑕ ᐱᓕᕆᖃᑎᒌᒃᐸᓪᓕᐊᓂᕐᒧᑦ ᐊᓯᖏᓐᓂᒃ ᑲᓇᑕᐅᑉ ᐊᒡᒍᖅᑐᖅᓯᒪᓂᖏᓐᓂ ᐊᒻᒪ ᐅᑭᐅᖅᑕᖅᑐᕐᒥ ᒐᕙᒪᐅᔪᓂᒃ. ᓴᙱᓂᖅᓴᐅᔪᒍᑦ ᐊᑕᐅᑦᑎᒃᑯᑦ, ᓂᕆᐅᒃᐳᖓᓗ ᐱᓕᕆᖃᑎᒌᖏᓐᓇᕆᐊᒃᓴᖅ ᓯᕗᓕᖅᑎᐅᖃᑎᒃᑲ ᑭᒡᒐᖅᑐᐃᑎᓪᓗᑕ ᐱᔪᒪᔭᖏᓐᓂᑦ ᐱᖓᖕᓇᒥ ᐅᑭᐅᖅᑕᖅᑐᒥᓪᓗ ᑲᓇᑕᒥᐅᓂᑦ ᑲᓇᑕᒥᑦ.
ᖁᔭᓐᓇᒥᒃ, ᐅᖃᖅᑎᑦᑎᔩ.