ᐅᖃᖅᑎᑦᑎᔩ,
ᐊᕐᕌᒍᑕᒫᑦ, ᑲᓇᑕᐅᑉ ᓯᕗᓕᖅᑎᖏᑦ ᐃᓕᓴᖅᓯᖃᑦᑕᖅᐳᑦ ᐱᓇᓱᐊᖃᑦᑕᕐᓂᖏᓐᓂᒃ ᐃᓚᒋᔭᐅᔪᑦ ᐊᕕᒃᑐᖅᓯᒪᔪᓂ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᑦ ᐅᖃᓕᒫᕆᐅᖅᓴᑎᑦᑎᒃᑲᓐᓂᕋᓱᐊᖅᖢᑎᒃ. ᓄᓇᕗᒻᒥ, ᓄᓇᓕᖕᒥᐅᑦ ᓂᕈᐊᒐᒃᓴᙳᖅᑎᑦᑎᖁᕙᕗᑦ ᑭᓇᒥᒃᑭᐊᖅ ᐊᔪᙱᓛᖑᔪᒥᒃ ᐃᓄᒃᑐᑦ ᐅᖃᓪᓚᓲᒥᒃ. ᑕᒪᑐᒪᓂ ᐊᕐᕌᒍᒥ, ᐅᓂᒃᑲᐅᓯᖃᕐᓂᐊᖅᑐᖓ ᓄᓇᕗᒻᒥ ᑲᑐᔾᔨᖃᑎᒌᑦ ᑲᑎᒪᔨᖏᑦ ᐅᖃᓕᒫᕈᓐᓇᕐᓂᕐᒧᑦ/ᑎᑎᕋᕈᓐᓇᕐᓂᕐᒧᓪᓗ ᑐᓐᓂᖅᑯᓯᐊᒥᑦ ᔩᓇ ᖃᓪᓗᑦᓯᐊᖅ ᐃᒡᓗᓕᖕᒥᐅᑕᕐᒥᒃ.
ᐅᖃᖅᑎᑦᑎᔩ, ᔩᓇ ᖃᓪᓗᑦᓯᐊᖅ ᓄᑲᖅᖠᖅᐹᓂᒃ ᐃᓕᓐᓂᐊᓕᓵᖅᑐᓂᒃ ᐃᓕᓴᐃᔨᐅᓲᖅ ᖁᕝᕙᓯᖕᓂᓕᖕᓄᑦ 3-ᒧᑦ ᑎᑭᖦᖢᒍ ᐊᑕᒍᑦᑖᓗᒃ ᓄᑲᖅᖡᑦ ᐃᓕᓐᓂᐊᕐᕕᖓᓂ. ᐊᑐᓕᖅᑎᑦᑎᔪᖅ ᐃᓄᒃᑐᑦ ᐅᖃᐅᓯᕐᒧᑦ ᐃᓕᓐᓂᐊᕈᑎᒃᓴᓂᑦ ᐃᓕᓐᓂᐊᕐᕕᐊᕈᓯᓕᒫᖏᓐᓂ. ᐃᓚᒋᔭᐅᓚᐅᖅᑐᖅ ᐱᓕᕆᖃᑎᒌᓄᑦ ᑲᒪᒋᔭᖃᖅᑐᓄᑦ ᓴᖅᑭᑎᑦᑎᓂᕐᒥᒃ ᓂᐱᑦᑎᐊᕙᐃᑦ ᐃᓄᒃᑎᑐᑦ. ᐅᑯᐊ ᑎᑎᕋᕆᐅᖅᓴᔪᓄᑦ ᐅᖃᓕᒫᕆᐅᖅᓴᔪᓄᑦ ᑐᕌᖓᔪᑦ, ᐅᖃᐅᓯᕐᓂᒃ ᖃᐅᔨᓴᕐᓂᕐᒧᑦ, ᐅᖃᐅᓯᓕᕆᓂᕐᒧᓪᓗ ᖃᐅᔨᓴᕐᓂᕐᒧᑦ ᐱᓕᕆᐊᖅ ᓴᖅᑭᖅᑕᐅᓯᒪᔪᖅ ᐃᓄᒃᑐᑦ ᑎᑎᖅᑭᕆᓂᕐᒧᑦ.
ᔩᓇ ᖃᓪᓗᑦᓯᐊᖅ ᑲᔪᖏᖅᓴᐃᔨ ᐊᒻᒪ ᑲᒪᔨᒋᔭᐅᓪᓗᓂ ᐊᓯᖏᓐᓄᑦ ᐃᓕᓴᐃᔨᓄᑦ ᐊᑐᖅᑕᐅᕙᒡᓗᑎᒃ ᐃᓕᓐᓂᐊᖅᑎᑦᑎᔾᔪᑕᐅᕙᒡᓗᑎᒡᓗ ᐃᓄᒃᑎᑐᑦ. ᐃᓐᓇᕐᓂᒃ ᐃᓕᓐᓂᐊᖅᑎᑦᑎᖃᑦᑕᖅᐳᖅ ᐃᓕᓐᓂᐊᕐᕕᐊᕈᓯᕐᒥᓂ. ᐸᕐᓇᐃᕙᒃᖢᓂ ᑲᑎᒪᔾᔪᑕᐅᓂᐊᖅᑐᓂᒃ ᐱᕚᓪᓕᖅᑎᑦᑎᓇᓱᐊᖅᖢᓂ ᐃᓄᒃᑐᑦ ᐅᖃᐅᓯᕐᓂᑦ ᐃᓕᓐᓂᐊᖅᑕᐅᔪᒃᓴᓂᒃ ᑐᓂᐅᖅᑲᐃᕙᒃᖢᓂᓗ ᐃᓕᓐᓂᐊᒐᒃᓴᒃᑲᓐᓂᕐᓂᑦ ᐃᓕᓴᐃᔨᓄᑦ.
ᐅᖃᖅᑎᑦᑎᔩ, ᔩᓇ ᖃᓪᓗᑦᓯᐊᖅ ᐅᐱᒍᓱᓕᒃᑲᓐᓂᖅᑎᑦᑎᕗᖅ ᐃᓄᖕᓂᒃ ᐅᖃᐅᓯᖅ ᐆᒻᒪᖅᑎᑕᐅᒃᑲᓐᓂᖅᑎᓪᓗᒍ. ᐊᔾᔪᒥᓇᑦᑎᐊᖅᑐᖅ ᓴᖅᑭᔮᖅᑎᑦᑎᓂᕐᒧᑦ ᐅᖃᓕᒫᕈᓐᓇᑦᑎᐊᕐᓂᕐᒥᒃ ᓄᓇᓕᖓᓂ, ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ, ᐊᒻᒪ ᓄᓇᕗᒻᒥ.
ᖁᔭᓐᓇᒦᒃ, ᐅᖃᖅᑎᑦᑎᔩ.