ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔾᔪᑎᖃᖅᑐᖓ ᐅᖃᐅᓯᕆᔪᒪᓪᓗᒍ ᑲᓇᑕᐅᑉ ᐊᖓᔪᖅᑳᖅᔪᐊᖓ ᑲᓇᑕᒧᑦ ᑲᑎᒪᖃᑎᒋᓚᐅᕋᒃᑯ.
ᐃᓚᖃᓚᐅᖅᐳᑐᒍᑦ ᑲᑎᒪᓂᕐᒧᑦ ᑖᒃᑯᓂᖓ ᐊᖓᔪᖅᑳᖅ ᐊᒻᒪ ᑐᒡᓕᖓᓄᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂᒃ ᑭᒡᒐᖅᑐᐃᓪᓗᑎᒃ. ᐅᖃᐅᓯᕆᓚᐅᖅᑕᕗᑦ ᑐᐊᕕᕐᓇᖅᑑᓂᖓᓂᒃ ᓄᓇᕗᒻᒥ ᐃᒡᓗᑭᒃᓴᓗᐊᕐᓂᐅᔪᖅ ᐊᒥᒐᖅᓯᓗᐊᕐᓂᕐᓗ ᑭᐅᔾᔪᑕᐅᔭᕆᐊᖃᕐᓂᖓᓂᒃ. ᓄᓇᕗᒻᒥ ᐃᒡᓗᓂᒃ ᐊᒥᒐᖅᓯᓗᐊᕐᓂᖅ ᑭᐅᔾᔪᑕᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᒥᒃ ᓄᓇᖁᑎᖃᕐᓂᕆᔭᖓᓄᑦ. ᓴᙱᓂᖃᕐᓗᑎᒃ, ᑲᑕᒃᓴᕋᐃᙱᑦᑑᓗᑎᒃ ᓄᓇᓖᑦ ᐃᑲᔪᖅᓯᖅᑕᐅᓯᒪᓗᑎᒃ ᒪᑭᒪᔾᔪᑎᓄᑦ ᓄᓇᖏᑕ ᓱᓇᒃᑯᑖᖁᑎᖏᓐᓄᑦ.”
ᐅᖃᖅᑎᑦᑎᔩ, ᑭᖑᓪᓕᖅᐹᒥ ᐊᖓᔪᖅᑳᖅᔪᐊᖅ ᔭᔅᑎᓐ ᑐᕉᑑ ᐊᐱᕆᓚᐅᖅᓯᒪᖕᒫᖓ ᑕᑯᑎᑕᐅᔪᒪᓪᓗᓂ ᐃᓄᐃᑦ ᑎᒥᖁᑎᖏᓐᓂᒃ ᑲᑐᔾᔨᖃᑎᒌᖕᓂᕐᒧᑦ ᐱᓕᕆᐊᖃᖅᓯᒪᓂᕆᔭᑦᑎᓐᓂᒃ ᐸᕐᓇᐅᑎᑎᒍᑦ ᐃᒡᓗᑖᒃᑲᓐᓂᕋᓱᐊᕐᓂᕐᒧᑦ.
ᐅᖃᖅᑎᑦᑎᔩ, ᑲᑎᒪᖃᑎᒋᓪᓗᑎᒍᑦ ᐊᖓᔪᖅᑳᖅᔪᐊᖅ ᑲᓇᑕᒧᑦ ᐅᖃᐅᑎᓚᐅᖅᓯᒪᔭᕗᑦ: ᐃᒡᓗᑖᒃᑲᓐᓂᕋᓱᐊᕐᓂᕐᒧᑦ ᐸᕐᓇᐅᑎᓕᐊᕆᓯᒪᔭᕗᑦ ᐊᒡᔨᒌᖑᓪᓗᑎᒃ ᐊᑕᐅᓯᐅᔪᖅ.
ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᑕᐅᓯᕐᒥᒃ ᑲᓇᑕᐅᑉ ᐊᖓᔪᖅᑳᖅᔪᐊᖓᓄᑦ ᑎᑎᕋᓚᐅᖅᑐᑦ − ᑐᒃᓯᕋᐅᑎᖃᓚᐅᖅᑐᑦ $500 ᒥᓕᐊᓐᓂᒃ ᐃᓱᒪᒃᓴᖅᓯᐊᖑᖁᓪᓗᒍ ᑭᖑᓪᓕᕐᒥ ᑮᓇᐅᔭᖅᑑᑎᒃᓴᓂᒃ ᐊᕕᒃᑐᐃᓕᖅᐸᑕ ᒐᕙᒪᑐᖃᒃᑯᑦ. ᑖᒃᑯᐊ ᑮᓇᐅᔭᐃᑦ ᐊᕕᒃᑕᐅᓇᔭᖅᖢᑎᒃ ᒐᕙᒪᒃᑯᑦ ᐃᓚᖓᓂᒃ ᐊᒻᒪ ᑐᙵᕕᒃᑯᑦ ᐃᓚᖓᓂᒃ ᐱᔪᐃᓐᓇᐅᓗᑎᒃ ᑕᕝᕙᖓᑦ ᐊᑐᓂᓗ ᑐᕌᕈᑎᖃᖅᑐᒧᑦ−ᐊᑐᖅᑐᒃᓴᒫᖑᔪᒥᒃ ᑮᓇᐅᔭᖅᑖᖅᑐᐃᓐᓇᐅᓗᑎᒃ.
ᐅᖃᖅᑎᑦᑎᔩ, ᐃᒡᓗᑭᒃᓴᓗᐊᕐᓂᖅ ᐱᓕᕆᐊᖑᓂᖓ ᓯᕗᓪᓕᖅᐸᐅᑎᓯᒪᒐᑦᑎᒍᑦ ᒐᕙᒪᐅᓪᓗᑕ ᐅᓪᓗᒥ ᐱᓗᐊᖅᑐᒥ ᑲᑐᔾᔨᓗᑕ ᐱᓕᕆᐊᒃᓴᖓᓂ ᓇᓗᓇᐃᖅᓯᒪᑎᓪᓗᒍ.
ᐊᖏᕐᕋᐃᑦ ᐱᒋᐊᖅᕕᐅᖕᒪᑕ ᐃᓅᑉ ᒪᑭᑕᑦᑎᐊᕐᓂᖓᓄᑦ ᑎᒥᒃᑯᑦ ᐃᓱᒪᒃᑯᓪᓗ ᖃᓄᐃᙱᑦᑎᐊᕐᓂᕐᒥᒃ. ᐊᒥᒐᖅᓯᓗᐊᕐᓂᖅ ᐃᒡᓗᒃᓴᓂᒃ ᐃᑲᔫᑎᖃᕐᓂᐊᕐᒪᑦ ᐃᓕᓐᓂᐊᑦᑎᐊᕐᓂᕐᒧᑦ ᐊᒻᒪ ᐃᓱᒪᔮᕈᑎᖃᙱᑉᐹᓪᓕᕐᓂᕐᒧᑦ. ᐊᖏᕐᕋᒃᓴᖃᑦᑎᐊᓕᖅᐸᑦ ᓄᖅᑲᐃᕚᓪᓕᕋᔭᖅᑐᖅ ᐋᖓᔮᕐᓇᖅᑐᓄᑦ ᐅᐃᕆᔾᔪᑏᑦ, ᖃᑕᙳᑎᒌᑦ ᐋᓐᓂᖅᓱᖃᑦᑕᐅᑎᖃᑦᑕᕐᓂᖏᓐᓂᒃ ᐊᒻᒪᓘᓐᓃᑦ ᐃᓄᖕᓂᒃ ᐃᒻᒥᓃᖃᑦᑕᖅᑐᑦ ᓄᖅᑲᖅᐹᓪᓕᕋᔭᕐᒥᔪᑦ.
ᐅᖃᖅᑎᑦᑎᔩ, ᐃᓄᐃᑦ ᐱᓕᕆᐊᖃᖁᔨᖕᒪᑕ ᓴᖅᑭᑦᑎᖁᔨᔪᑦ. ᒐᕙᒪᒋᔭᕋ ᐊᑮᑦᑐᒧᐊᕋᓗᐊᕐᓗᓂ ᓱᖁᑎᒃᓴᙱᑦᑐᖅ ᑕᒪᓐᓇ ᐊᒥᒐᖅᓯᓗᐊᕐᓂᐊᓗᒃ ᑲᒪᒋᔭᐅᓱᖓᖅᐸᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᑐᐃᓐᓇᐅᓕᖅᑐᑦ ᐃᒡᓗᓕᐅᕈᓐᓇᖅᓯᓪᓗᑎᒃ ᐊᖏᕐᕋᕆᔭᐅᔪᒃᓴᓂᒃ.
ᐅᖃᖅᑎᑦᑎᔩ, ᑲᓇᑕᐅᑉ ᒪᓕᒐᓕᐅᖅᕕᒡᔪᐊᖓᓂ ᐊᖓᔪᖅᑳᖅᔪᐊᖅ ᓄᓇᕗᒻᒧᑦ ᑭᒡᒐᖅᑐᐃᔨ ᓘᕆ ᐃᓪᓚᐅᑦᒥᒃ ᐅᖃᐅᔾᔨᓚᐅᖅᑐᖅ: ᒐᕙᒪᑐᖃᒃᑯᑦ ᑭᐅᔾᔪᑎᖃᕐᓂᐊᖅᐳᑦ ᐃᒡᓗᓕᕆᓂᕐᒥᒃ. ᑕᐃᒪᓕ ᑲᑎᒪᖃᑎᒋᓚᐅᖅᓯᒪᑎᓪᓗᑎᒍᑦ ᐋᑐᕚᒥ ᐅᒃᐱᕈᓱᖕᓂᖃᑦᑎᐊᓕᖅᑐᖓ ᑲᓇᑕ ᐃᑲᔪᖅᓯᕐᓂᐊᕐᓂᖓᓂᒃ ᐅᖃᐅᓯᖏᓪᓗ ᑐᑭᖃᕐᓂᐊᕐᓂᖏᓐᓂᒃ ᐃᒡᓗᖏᑦ ᖁᓕᒃᓴᖃᕐᓂᐊᖅᑐᑦ ᐃᓄᐃᑦ ᐃᓯᕈᓐᓇᕐᓂᐊᕐᒪᑕ.
ᖁᔭᓐᓇᒥᒃ, ᐅᖃᖅᑎᑦᑎᔩ.