ᑲᓇᑕᐅᑉ ᐊᖓᔪᖅᑳᕐᔪᐊᖓ ᑲᑎᒪᖃᑎᒋᔭᐅᕗᖅ ᑲᑐᔾᔨᓗᑕ ᐱᓕᕆᐊᒃᓴᑦ ᐱᔾᔪᑎᒋᓪᓗᒋᑦ

ᐅᖃᖅᑎᑦᑎᔨ, ᐅᓪᓗᒥ ᓇᖏᖅᓯᕗᖓ ᐅᖃᐅᓯᖃᕆᐊᖅᑐᖅᖢᖓ ᖃᖓᑦᑎᐊᖅ ᑲᑎᒪᖃᑎᒋᓚᐅᕋᒃᑯ ᑲᓇᑕᒥ ᐊᖓᔪᖅᑳᕐᔪᐊᖅ ᑲᑐᔾᔨᓗᑕ ᐱᓕᕆᐊᒃᓴᑦ ᐱᔾᔪᑎᒋᓪᓗᑎᒍᑦ.

ᒪᐃ 12−ᖑᑎᓪᓗᒍ, ᑲᑎᖃᑎᒋᔪᓐᓇᖅᓯᓚᐅᕋᒃᑯ ᑲᓇᑕᒥ ᐊᖓᔪᖅᑳᕐᔪᐊᖅ ᐱᖓᔪᒋᓕᖅᑕᖓᓂᒃ ᑕᐃᒪᙵᑦ ᓯᕗᓕᖅᑎᙳᓚᐅᖅᓯᒪᑎᓪᓗᖓ. ᑲᑎᒪᓂᕆᓚᐅᖅᑕᕗᑦ ᑲᒪᒋᓇᓱᒃᖢᑎᒍᑦ ᑲᑐᔾᔨᖃᑎᒌᒍᑎᒋᓗᑎᒍᑦ ᓯᕗᓪᓕᐅᑎᔪᒪᔭᑦ ᓇᓗᓇᐃᖅᑕᐅᓯᒪᔪᑦ ᐱᓕᕆᐊᒃᓴᑦᑎᓐᓂ.

ᐅᖃᖅᑎᑦᑎᔨ, ᑲᑎᒪᑎᓪᓗᑕ ᓇᓗᓇᐃᖅᓯᓚᐅᖅᐳᒍᑦ ᑲᑐᔾᔨᖃᑎᒌᒡᓗᓂ ᐱᒻᒪᕆᐅᓂᖓᓂᒃ ᓄᓇᕗᑦ ᒐᕙᒪᒃᑯᓐᓂ, ᓄᓇᕗᑦ ᑐᙵᕕᒃᑯᓐᓂ, ᐊᓯᖏᓐᓂᒡᓗ ᐃᓄᖕᓂᒃ ᑲᑐᔾᔨᑎᒌᓂᒃ ᐱᔾᔪᑕᐅᓲᓂᒃ ᓲᕐᓗ ᐅᑭᐅᖅᑕᖅᑐᒥ ᐃᒡᓗᓕᕆᓂᖅ. ᑲᓇᑕᒥ ᐊᖓᔪᖅᑳᕐᔪᐊᕐᓗ ᐅᕙᖓᓗ ᐊᖏᖃᑎᒌᓚᐅᖅᐳᒍᒃ ᑐᐊᕕᕐᓇᖅᑑᓂᖓᓂᒃ ᐃᒡᓗᑭᒃᓴᕐᓂᖅ ᓄᓇᕗᒻᒥ
ᐊᒃᑐᐊᓂᖃᕐᓂᖓᓂᒡᓗ ᐊᓯᖏᓐᓄᑦ ᓯᕗᓪᓕᐅᔾᔭᐅᒋᐊᓕᖕᓄᑦ ᓲᕐᓗ ᐋᓐᓂᐊᕕᖕᒥᐅᓄᑦ ᐊᒻᒪ ᐃᓐᓇᐃᑦ ᑲᒪᒋᔭᐅᔾᔪᑎᖏᓐᓄᑦ.

ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒧᐊᖅᑎᑦᑎᑦᑕᐃᓕᓂᖅ ᐊᒻᒪ ᑲᓇᑕᒥᑦ ᑎᒍᒥᐊᖅᑕᐅᔪᑦ ᐅᖃᐅᓯᕆᓚᐅᕐᒥᔭᕗᑦ ᐱᑕᖃᕆᐊᖃᕐᓂᖓᓂᒡᓗ ᐊᒃᑐᐊᓂᓕᖕᓂᒃ ᐊᐅᓚᔪᓐᓇᐅᑎᓄᑦ ᐱᔭᐅᒋᐊᓕᖕᓂᒃ ᓄᓇᕘᓕᒫᒥ. ᐅᔾᔨᕆᔭᐅᓕᖅᑎᓚᐅᕐᒥᔭᕋ ᐅᔾᔨᕐᓇᕐᓂᖓ ᑲᑐᔾᔨᖃᑎᖃᕐᓂᐊᕐᓗᓂ ᐃᓄᖕᓂᒃ ᐅᑭᐅᖅᑕᖅᑐᒥᐅᑕᓂᒃ ᓯᕗᓂᒃᓴᒥ ᑮᓇᐅᔭᓕᐅᕈᑕᐅᔪᓐᓇᓛᖅᑐᓂᒃ ᓄᓇᕗᒻᒥ ᖃᐅᔨᒪᓛᕋᑦᑎᒍᑦ ᖃᓄᐃᓕᖓᓕᕐᓂᖏᑦ ᐱᐅᓯᒋᐊᕈᑕᐅᔪᓐᓇᓛᖅᑐᑦ ᓄᓇᕗᒥᐅᑦ ᐃᓅᓯᖏᓐᓄᑦ.

ᐅᖃᖅᑎᑦᑎᔨ, ᑲᓇᑕᒥ ᐊᖓᔪᖅᑳᕐᔪᐊᕐᓗ ᐅᖃᐅᓯᖃᓚᐅᕐᒥᔪᒍᒃ ᓇᖕᒥᓂᖅᓱᖅᐸᓪᓕᐊᓂᕐᒥᒃ ᓄᓇᕗᒻᒥ ᐱᓕᕆᖃᑎᒌᒋᐊᖃᕐᓂᑦᑎᓐᓂᒡᓗ ᑭᖑᓪᓕᖅᐹᒥ ᐱᓕᕆᐊᕆᓇᓱᒃᑕᕗᑦ ᐱᓕᕆᕙᓪᓕᐊᑎᓪᓗᑎᒍᑦ ᐋᔩᖃᑎᒌᒍᑎᒋᑲᑕᒃᑕᕗᑦ. ᐊᖏᖃᑎᒌᓚᐅᖅᐳᒍᑦ ᐱᕐᔪᐊᓂᒃ ᐱᒻᒪᕆᐅᔪᓂᒃ ᓇᖕᓂᒥᓂᖅᓱᕐᓂᕐᒧᑦ ᓄᓇᕘᒧᑦ ᓴᖅᑭᓚᐅᖅᖢᑎᒍᓪᓗ ᓂᕆᐅᒋᔭᐅᑦᑎᐊᖅᑐᑦ ᐊᖏᖃᑎᒌᒍᑕᐅᔪᓐᓇᖅᑐᑦ.

ᑭᖑᓪᓕᖅᐹᒥ, ᓇᓗᓇᐃᖅᓯᒃᑲᓐᓂᓚᐅᖅᐳᒍᑦ ᐱᓕᕆᐊᑦᑎᓐᓂ ᐱᓕᕆᖃᑎᒌᖏᓐᓇᕐᓂᐊᕐᓂᕋᖅᖢᑕ ᓴᖅᑭᓐᓇᓱᒡᓗᑎᒍᑦ ᐱᓕᕆᐊᕆᔭᑦᑎᓐᓂ ᓯᕗᓪᓕᐅᑎᔪᒪᔭᕗᑦ, ᓲᕐᓗ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪ ᐊᑐᓕᖅᑎᓪᓗᒋᑦ ᒪᑭᒪᔾᔪᑎᓄᑦ ᐊᔾᔨᒌᙱᓐᓂᖏᑦ ᐱᕈᖅᐸᓪᓕᐊᓂᖓᓗ ᓄᓇᕗᒻᒥ.

ᓂᕆᐅᑦᑎᐊᖅᐳᖓ ᑲᑐᔾᔨᖃᑎᖃᐃᓐᓇᕐᓂᐊᕋᓱᒋᓪᓗᖓ ᑲᓇᑕᒥ ᐊᖓᔪᖅᑳᕐᔪᐊᕐᒥ ᒥᓂᔅᑕᐅᖃᑎᖏᓐᓂᒡᓗ.

ᖁᔭᓐᓇᒦᒃ, ᐅᖃᖅᑎᑦᑎᔩ.

Date