ᐅᖃᖅᑎᑦᑎᔩ, ᓇᖏᕐᓯᕗᖓ ᐅᓪᓗᒥ ᐅᖃᐅᓯᖃᕆᐊᖅᑐᕐᖢᖓ ᑲᑎᒪᓂᕆᓚᐅᕐᑕᓐᓂ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ ᔭᔅᑎᓐ ᑐᕉᑑ, ᒥᓂᔅᑕ ᑲᓇᑕᒥ ᐅᓇᑕᖅᑐᒃᓯᓕᕆᓂᖕᒧᑦ ᐊᓃᑕ ᐊᓈᓐᑦ, ᓄᓇᑦᑎᐊᒥ ᓯᕗᓕᖅᑎ ᑭᐅᕈᓚᐃᓐ ᑳᒃᕋᓐ, ᐊᒻᒪᓗ ᔫᑳᓐ ᓯᕗᓕᖅᑎᐊ ᓵᓐᑎ ᓯᐅᓪᕗ.
ᖃᐅᔨᒪᔪᓯ ᒫᑦᓯᒥ, ᓯᕗᓕᖅᑎ ᑳᒃᕆᓐ, ᓯᐅᓪᕗ ᐅᕙᖓᓗ ᑲᑐᔾᔨᓪᓗᑕ ᑎᑎᕋᓚᐅᕐᓯᒪᒐᑦᑕ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᓇᓗᓇᐃᕐᓯᓪᓗᑕ ᐃᓱᒫᓘᑎᑦᑎᓐᓂ ᐅᑭᐅᖅᑕᖅᑐᒥ ᓇᐅᑦᑎᖅᓱᖅᑎᓂ ᓄᓇᖁᑎᖓᓂᓪᓗ. ᐅᖃᓚᐅᕐᑐᒍ ᐃᓱᒪᓕᐅᕐᓂᐊᕐᓕᕌᖓᒥ ᐅᑭᐅᖅᑕᑑᑉ ᒥᒃᓵᓄᑦ ᑐᓴᕋᓱᖃᑦᑕᖁᓪᓗᒋᑦ ᐃᓄᖕᓂᑦ ᐅᑭᐅᖅᑕᖅᑐᒥᑦ. ᐊᒻᒪᓗᑦᑕᐅᖅ, ᓇᓗᓇᐃᕐᓯᓚᐅᕆᕗᒍ ᐱᕈᖅᓴᐃᔭᕆᐊᖃᕐᓂᑦᑎᓐᓂᑦ ᐃᓄᖕᓄᑦ ᒪᑭᒪᐅᑎᓂ ᓴᙱᒃᑎᒋᐊᕐᓂᐊᕐᓗᑎᒍ ᓄᓇᓕᖁᑎᕗᑦ ᐃᓱᒪᒋᓪᓗᒍ ᓄᑖᙳᕆᐊᕐᑐᖅ ᐅᓗᕆᐊᓇᕐᓂᖅ ᐅᑭᐅᖅᑕᑑᑉ ᓄᓇᖓᓄᑦ.
ᐊᐃᕆᓕ 4−ᒥᑦ, ᐱᕕᖃᓚᐅᕋᑦᑕ ᐅᖃᐅᓯᖃᕆᐊᒃᓴᖅ ᐃᓱᒫᓘᑎᓂ ᐅᑯᓂᖓ ᑲᓇᑕᐅᑉ ᐊᖓᔪᖅᑳᕐᔪᐊᖓ ᑐᕉᑑᒧᑦ ᒥᓂᔅᑕᒧᓪᓗ ᐊᓈᓐᑦ.
ᑲᑎᒪᑎᓪᓗᑕ, ᑲᑎᓚᐅᕐᐸᒃᑲ ᐊᓯᖏᑦ ᐅᑭᐅᖅᑕᖅᑐᒥᑦ ᓯᕗᓕᖅᑎᓂᑦ ᓇᓗᓇᐃᕐᓯᓂᖕᓂᑦ ᐱᒻᒪᕆᐅᓂᖓᓂ ᐱᕈᕐᓴᐃᓂᖅ ᓴᙱᔪᒥᑦ ᒪᑭᑲᐅᕐᑐᕈᓐᓇᕐᑐᓂ ᓄᓇᓕᖕᓂᑦ
ᐋᖅᑭᐅᒪᑦᑎᐊᕐᑐᓂᓪᓗ ᒪᑭᒪᐅᑎᓂ ᐱᒋᐊᓪᓚᒃᑎᓐᓂᐊᕐᓗᑎᒍ ᓄᓇᖃᕐᓂᑦᑎᓐᓂᑦ ᐅᑭᐅᖅᑕᖅᑐᒥᑦ. ᐅᖃᐅᓯᕆᓚᐅᕐᑕᕗᑦ ᑕᒪᑦᑕ ᐊᖏᕈᑎᒋᓯᒪᔭᑦᑎᓐᓂᑦ ᐅᑭᐅᖅᑕᖅᑐᒥᐅᑦ ᓄᓇᓕᓪᓗ ᐆᒻᒪᕇᓐᓇᖁᓪᓗᒋᑦ, ᓴᙱᓗᑎᒃ ᐊᑦᑕᕐᓇᖅᑐᒦᙱᓪᓗᑎᒃᓗ. ᐅᖃᐅᓯᖃᓚᐅᕐᒥᔪᒍᑦ ᐱᕈᖅᓴᐃᔭᕆᐊᖃᕐᓂᑦᑎᓐᓂᑦ ᐃᒡᓗᓕᕆᓂᖕᓂᑦ, ᒪᑭᒪᐅᑎᓂᑦ, ᐋᓐᓂᐊᖅᑕᐃᓕᒪᔪᓕᕆᓂᖕᒥᑦ, ᐃᓱᒪᓕᕆᓂᖕᒥᓪᓗ, ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓂ.
ᑲᓇᑕᐅᑉ ᐊᖓᔪᖅᑳᕐᔪᐊᖓ ᖁᔭᓕᓚᐅᕐᑐᖅ ᒐᕙᒪᖁᑎᑦᑎᓐᓂᑦ ᑲᑐᔾᔨᑦᑎᐊᕐᓂᑦᑎᓐᓂᑦ, ᐃᑲᔪᖅᑐᐃᓂᕗᓪᓗ ᔫᒃᕋᐃᓐᒥ ᐃᓄᖏᓐᓂᓪᓗ ᓵᓚᓯᐊᖑᓕᕐᑎᓪᓗᒋᑦ ᕌᓴᒥᐅᓄᑦ. ᐅᖃᓚᐅᕐᒥᔪᖅᑕᖅᐅ ᑲᓇᑕᐅᑉ ᒐᕙᒪᒃᑯᖏᑦ ᐊᖏᕐᓯᒪᐃᓐᓇᕐᑐᑦ ᐃᑲᔪᖅᑐᐃᓂᖕᒥᑦ ᐋᓐᓂᐊᖅᑕᐃᓕᒪᓂᖕᓂᑦ, ᓇᐅᑦᑎᕐᓱᕐᓂᖕᓂᑦ, ᐱᕈᖅᐸᓪᓕᐊᓂᖓᓂᓪᓗ ᐅᑭᐅᖅᑕᖅᑐᖅ ᓴᐳᔾᔨᑎᓪᓗᒋ ᑲᓇᑕᐅᑉ ᓄᓇᖁᑖᓂ ᐱᓯᒪᐃᓐᓇᕐᓯᓂᖕᓂᓪᓗ ᐊᕕᒃᑐᖅᓯᒪᔪᓂ ᓇᐅᑦᑎᕐᓱᐃᓂᖕᓂᑦ.
ᐅᖃᖅᑎᑦᑎᔩ, ᑲᑎᒪᑎᓪᓗᑕ ᑕᒪᖕᒥᑦ ᑲᓇᑕᐅᑉ ᐊᖓᔪᖅᑳᕐᔪᐊᖓ ᒥᓂᔅᑕ ᐊᓈᓐᑦ ᐅᖃᒃᑲᓐᓂᓚᐅᕐᑑᒃ ᐊᖏᕐᓯᒪᓂᖏᓐᓄᑦ ᐱᓕᕆᖃᑎᒌᖕᓂᖕᒥᑦ ᐃᑲᔪᖅᑎᒌᒃᓗᑎᒃ ᐅᑭᐅᖅᑕᖅᑐᑦ ᒐᕙᒪᖏᓐᓂᑦ ᑲᒪᒋᔭᖃᕐᑎᓪᓗᒋᑦ ᐅᑭᐅᖅᑕᖅᑐᒥ ᓇᐅᑦᑎᕐᓱᐃᓂᖕᓂᑦ ᓄᓇᖓᓂᓪᓗ.
ᖁᔭᓐᓇᒦᒃ, ᐅᖃᖅᑎᑦᓯᔩ.