Katimadjutit haffumuuna Ukiuqtaqtumi Qajangnaidjutimi Aulapkainiqarnikkullu

Uqaqtittiji, Ublumi uqautigijumajara katimadjutiga haffumunga Angayuqqaryuaq Justin Trudeau, Ministaujuq Kanadami Angujaktiinun Anita Anand, Nunatsiami Hivuliqtia Caroline Cochrane, unalu Yukonmun Hivuliqtia Sandy Silver.

Ilihimajutit uvani Qiqailruq, Hivuliqti Cochrane, Silver, uvangalu titiraqtaptingnik Angjuqaarjuamun titiraqhimajut ihumaaluutivut Ukiuqtaqtumi Qajangnaidjutimi Aulapkainiqarnikkullu. Titirahugit qjuaginaq ihumaliurutit mighaanun Ukiuqtaqtup havaktaujughat katimaqatigilugit inuit Tununganirmiutat. Ukualu, titiraqhugillu ihariahuutit maniliurutigilugu igluqpaghat hakugikhijuumirutighat nunallaanun ihumagilugu nutaanguqtiqhimajuq irghitaarut hamunga Ukiuqtaqtumi Qajangnaidjutimi Aulapkainiqarnikkullu.

Uvani Qitiqqautijuq 4 pijaghaqaqtugut uqautigilugu hapku aihumaaluutit Angajuqaaqjuamun Trudeau unalu Ministaujuq Anand.

Katimadjutini, katimaqatigijatka Tunungani hivuliqtit uqautigiblugit aghuurutinun havaklugit hakugingnikkut mahulingaitut nunallaat ihuaqtumiklu igluqpaghamik Kavamakkut Atanniqtuinniqarniq Angirutiqarnirluuniit Tunungani. Uqautigiblugit angiqatigiigutikput pihimajaangani Tununga Ukiuqtaqtumilu nunallaat aulahimaaqtut, hakugiktut, qajangnaitumiklu. Uqautigiblugillu ihariagijaujut maniliurutit iglutigut, igluqpaktigut, aanniaqtailinirmun ukua ihumamun aanniaqtailinirmun, hilapkua aalanguqpalianiranun.

Angajuqaarjuap qujagijait kavamakput ikajuutait, ukualu ikajuqlugit Ukrainemiutat inuit atuqtut Russiap angujalirutait. Uqautigiblugit tapkua Kavamatkut Kanadami angirutait ikajuqlugit aanniaqtailinirmun, munaridjutait, ukualu nakuunighait Ukiuqtaqtumi hatumiaqhugit Kavamakkut Atanniqtuinniqarniq Angirutiqarnirluuniit havakhimaaqlugit aviktungniini munaridjutit.

Uqaqtittiji, katimadjutini tamangnik Angajuqaarjuaq unalu Minista Anand tutqighaqtait inmi angirutitik aulahimaaqtumik havaqatigiigutighait aviktuqhimajumi kavamat uqautiginirmun Ukiuqtaqtumi Qajangnaidjutimi Aulapkainiqarnikkullu.

Quana, Uqaqtittijii.

Date