ᐃᓅᖃᑎᒌᓄᑦ ᐃᖃᓗᐃᑦ-ᓂᐊᖁᙴ ᐊᒻᒪ ᓄᓇᕗᖕᒥᐅᓄᑦ, ᐃᓱᒪᒃᓴᕐᓯᐅᕈᑎᒋᑦᑎᐊᓚᐅᕐᑐᒍ ᐊᒻᒪ ᐃᓚᑯᓗᒃᑲ ᐅᖃᖃᑎᒋᑦᑎᐊᓚᐅᕐᑐᒋᑦ, ᐃᓱᒪᑖᕐᓯᒪᓕᕋᒪ ᓂᕈᐊᒐᒃᓴᐅᑲᓐᓂᔮᙱᓂᓐᓂᒃ ᒪᓕᒐᓕᐅᕐᑎᐅᓂᕐᒧᑦ ᓂᕈᐊᖅᑕᐅᕕᖓᓄᑦ ᐃᖃᓗᐃᑦ−ᓂᐊᖁᙴ ᐃᓱᓕᒍᒫᓕᕐᒪᑦ ᓂᕈᐊᖅᑕᐅᓯᒪᕕᕗᑦ ᐅᑭᐊᒃᓴᖑᓂᐊᕐᑐᒥ.
ᐱᔨᑦᑎᕐᑎᐅᓪᓗᓂ ᐃᓄᖕᓄᑦ ᓄᓇᕗᖕᒥᐅᓄᑦ ᐊᒃᓱᒻᒪᕆᐊᓗᒃ ᐅᐱᓐᓇᕐᓯᒪᒻᔪᑦ ᐃᓅᓯᓕᒫᓐᓂ. ᐱᖃᑎᒋᓪᓗᓯ, ᐱᔭᓐᓂᖏᑦᑐᓂᒃ ᑲᒪᓯᒪᒐᑦᑕ --- ᐊᐅᓚᑦᓯᔨᐅᓪᓗᓂ ᓄᓇᕗᖕᒥᒃ ᐊᔾᔨᐅᖏᑦᑎᐊᕐᑐᒥᒃ ᐊᒻᒪ ᓄᓇᖓ ᐊᖏᓛᖑᖃᑕᐅᓪᓗᓂ ᓄᓇᕐᔪᐊᕐᒥ, ᓄᓇᕐᔪᐊᕐᒥ ᓄᕙᓐᓇᕐᔪᐊᖅ ᓯᐊᒻᒪᕐᓯᒪᑎᓪᓗᒍ ᖃᓄᐃᓕᐅᕆᐊᕈᑎᒃᓴᓂᒃ ᑲᒪᓪᓗᓂ, ᐊᒻᒪ ᑲᒪᒋᔭᖃᕐᑐᓂᒃ ᓱᑲᔪᒻᒪᕆᐊᓗᖕᒥᒃ ᐊᓯᔾᔨᐸᓪᓕᐊᑎᓪᓗᒋᑦ ᐃᓅᖃᑎᒌᓄᑦ, ᒐᕙᒪᓕᕆᓂᕐᒧᑦ, ᐊᒻᒪ ᑮᓇᔾᔭᒃᓴᕕᐅᔪᓐᓇᑐᑦ ᐊᓯᔾᔨᐸᓪᓕᐊᑎᓪᓗᒃ ᐱᖃᑕᐅᓪᓗᓂ ᐃᓕᒪᓇᕈᔪᕐᓯᒪᓂᖓ ᐃᓐᓄᐃᓯᒪᓂᑦᑎᒍᑦ ᓄᓇᒋᔭᑦᑎᓐᓂᒃ. ᓴᐱᓕᕐᑕᐃᓕᒪᔭᕆᐊᖃᐃᓐᓇᕐᓯᒪᓇᕐᑐᖅ, ᐃᖕᒥᓂᒃ ᒥᑭᓪᓕᑎᕐᓯᒪᓇᕐᑐᖅ, ᐊᒻᒪ ᐊᓯᔾᔨᐸᓪᓕᐊᒍᑕᐅᔪᓂᒃ ᓱᖏᐅᑎᖃᕆᐊᖃᐃᓐᓇᕆᐊᖃᓐᓇᕐᑐᖅ. ᖃᐅᑕᒫᑦ ᖁᔭᓕᔾᔪᐊᖃᑦᑕᕐᓯᒪᕗᖓ ᓱᓕᔪᕆᔭᐅᓯᒪᓂᓐᓄᑦ ᓄᓇᕗᖕᒥᐅᓄᑦ, ᐊᒃᓱᒻᒪᕆᐊᓗᒃ ᐅᐱᒋᕙᒃᑲ ᐃᓂᕈᓐᓇᕐᓯᒪᔭᕗᑦ ᐱᖃᑎᒋᓪᓗᓯ.
ᐃᓂᕈᓐᓇᕐᓯᒪᔭᒃᑎᓐᓂᒃ ᐱᒻᒪᕆᐅᓛᖑᓯᒪᕗᑦ ᓇᖕᒥᓂᕐᓱᓂᕐᒧᑦ ᐊᖏᕈᑕᐅᓚᐅᖅᑐᖅ, ᓄᓇᕗᖕᒥᐅᑦ ᐊᐅᓚᑦᑎᔾᔪᑎᒋᔪᓐᓇᓕᒃᑲᓐᓂᕐᓂᐊᕐᒪᒍᑦ ᓄᓇᒋᔭᑦᑎᓐᓂᒃ ᐊᒻᒪ ᓄᓇᒥᐅᑕᓂᒃ; ᑲᓇᑕᓕᒫᕐᒥ ᓱᕈᓯᓛᓄᑦ ᐃᓕᓴᐃᓂᕐᒧᑦ ᐊᖏᕈᑎᑦ, ᐃᑲᔪᕐᓯᓂᖃᖅᑐᑦ ᐅᕙᒍᒌᓂᒃ ᐊᒻᒪ ᓱᕈᓯᑯᓗᑎᓐᓄᑦ ᓯᕗᓂᖃᑦᑎᐊᓕᕈᑕᐅᓂᐊᕐᑐᓂᒃ; ᐅᑭᐅᓄᑦ ᖁᓕᓄᑦ (ᐅᑭᐅᑦ 10) $1.5 ᐱᓕᐊᓐ ᓄᑖᙳᕆᐊᕈᑎᑦ ᓄᓇᕗᑦ ᐊᖏᕈᑎᖏᓐᓂᒃ ᐊᑐᓕᕐᑎᑦᑎᓂᕐᒧᑦ ᑲᓐᑐᕌᑦ --- ᖁᓚᓐᓇᐃᕈᑕᐅᒃᑲᓂᕐᑐᑦ ᑲᑐᔾᔨᓂᒃᑯᑦ ᐱᓂᐊᕐᓂᕋᕈᑎᑦᑎᓐᓄᑦ ᐃᓄᐃᑦ ᐃᒻᒥᒃᑯᑦ ᐊᐅᓚᑦᑎᔪᓐᓇᕐᓂᖏᓐᓄᑦ; ᐊᒻᒪᓗ ᓴᖅᑭᑕᐅᓂᕆᔪᔭᖓ ᓄᓇᕗᑦ 3000, ᐸᕐᓇᒍᑎᕗᑦ 3,000−ᓂᒃ ᓇᑉᐸᐃᓂᐊᕐᓂᑎᓐᓂᒃ ᐃᒡᓗᓂᒃ ᓄᓇᕘᓕᒫᕐᒥ. ᓯᕗᓪᓕᐹᑦᑎᐊᖅ ᐊᑐᕐᓯᒪᔭᑦᑎᓐᓂᒃ, ᓇᑉᐸᐃᕙᓪᓕᐊᓯᒪᓕᕐᐳᑦ ᐃᒡᓗᓂᒃ ᑕᒪᐃᓐᓂ ᓄᓇᓕᓖᒫᓂ ᓄᓇᕗᖕᒥ − ᓯᕗᓂᐊᒍᑦ ᑕᐃᒪᓐᓇ ᑲᒪᒋᐊᕈᑎᖃᓚᐅᕐᓯᒪᑎᓐᓇᒍ ᐃᒡᓗᑭᒃᓴᓂᕐᒧᑦ ᑲᒪᒋᐊᕈᑎᓂᒃ ᐊᒻᒪ ᐱᕚᓪᓕᕈᑕᐅᕙᓪᓕᐊᓂᐊᕐᑐᓂᒃ ᐃᓅᓯᖃᑦᑎᐊᓂᕐᒧᑦ, ᐃᓅᓯᒋᑦᑎᐊᕐᓗᑎᒃ ᓄᓇᖅᑲᑎᒌᓄᑦ ᓄᓇᓕᖕᓂ.
ᐊᖅᑯᑎᒋᓪᓗᒋᑦ ᐅᖃᓪᓚᖃᑎᒌᓐᓂᖅ ᑕᒪᐃᑕ ᒪᓕᒐᓕᐅᕐᑎᐅᖃᑕᐅᔪᓕᒫᑦ, ᓯᕗᓕᕐᑎᖏᑦ ᓄᓇᕗᑦ ᑐᙵᕕᒃᑯᑦ, ᐊᒻᒪᓗ ᐱᖓᓱᐃᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᑲᑐᔾᔨᓗᑕ ᐱᓕᕆᐊᒃᓴᓂᒃ ᓇᓗᓇᐃᕈᑦ ᐋᖅᑭᑦᑕᐅᓚᐅᕐᓯᒪᕗᖅ. ᑲᒪᒋᔭᐅᕙᓪᓕᐊᑎᓪᓗᒍ, ᑲᑎᒪᖃᑕᐅᔫᑉ ᐃᓚᖓᑦ ᑎᑎᕋᕐᓯᒪᔪᒥᒃ ᐊᑭᓐᓇᒨᕐᓯᓚᐅᕐᓯᒪᕗᑦ ᐃᒪᐃᓕᖓᔪᓂᒃ “ᐱᕙᓪᓕᐊᖏᓐᓇᓕᖁᓪᓗᒋᑦ ᒪᑭᒪᐃᓐᓇᕈᓐᓇᕐᒧᑦ ᑕᑯᓐᓇᖑᐊᕐᑕᑦ.” ᒪᓕᒐᓕᐅᕐᑎᐅᖃᑎᓐᓄᑦ ᐊᒻᒪ ᒥᓂᔅᑕᓄᑦ, ᖁᔭᓐᓇᒦᒃ ᐊᑐᓕᕐᑎᒍᓐᓇᕐᓯᒪᒐᑦᓯᐅᒃ ᑕᑯᓐᓇᖑᐊᕐᑕᐅᓯᒪᔪᖅ ᐊᒻᒪ ᐱᕆᖃᑎᒌᒍᓐᓇᕐᓯᒪᒐᑦᓯ ᒪᑭᒪᑦᑎᐊᕈᓐᓇᓂᕐᓴᐅᖁᓪᓗᒍ ᓄᓇᕗᑦ. ᐱᓕᕆᖃᑎᒌᓐᓂᒃ ᑐᙵᕕᓕᕈᓐᓇᕐᒪᑦ ᐊᐅᓚᑦᓯᒍᑕᐅᓛᕐᑐᓂᒃ ᓯᕗᓂᕐᒥ.
ᑎᓕᓯᒍᑕᐅᓯᒪᔪᓂᒃ ᑲᑐᔾᔨᖃᑎᒌᒃᑕᒃᑯᒃ, ᓯᕗᓪᓕᕐᐹᖑᑎᓯᒪᒐᒃᑯᑦ ᐱᓕᕆᖃᑎᒋᓗᒋᑦ ᑐᙵᕕᒃᑯᑦ. ᐅᐱᒋᕙᕋ ᐃᖅᑲᒋᖃᑦᑕᐅᑎᑦᑎᐊᓂᒃᑯᑦ ᐱᓕᕆᖃᑎᒌᑦᑎᐊᓕᕈᓐᓇᕐᓯᒪᒐᑦᑕ −−− ᐅᑉᐱᕆᖃᑦᑕᐅᑎᓐᓂᒃᑯᑦ, ᐊᑐᔾᔨᖃᑎᒌᓐᓂᒃᑯᑦ ᐊᑑᑎᖃᕈᑎᑦᑎᓐᓂᒃ, ᐊᒻᒪ ᐱᓂᐊᕐᓂᖃᕈᑎᒋᓯᒪᔭᑦᑎᓐᓂᒃ ᓯᕗᒧᐊᒃᑎᑲᓐᓂᕐᑐᒋᑦ ᐃᓄᐃᑦ ᓯᕗᓪᓕᐹᖑᑎᑕᖏᑦ. ᑲᑐᔾᔨᓪᓗᑕ, ᐱᓕᕆᖃᑎᒌᒃᓯᒪᕗᒍᑦ ᐱᒻᒪᕆᐅᔪᓂᒃ ᑲᒪᒋᔭᐅᔭᕆᐊᓕᖕᓂᒃ ᐱᔪᒪᓯᒪᔭᖏᓐᓂᒃ ᓄᓇᕗᖕᒥᐅᑦ.
ᑕᒪᒃᑯᐊ ᐃᓂᕈᓐᓇᕐᓯᒪᔭᕗᑦ ᑲᔪᓯᓂᖃᕈᓐᓇᕐᓯᒪᕗᑦ ᑮᓯᐊᓂᑦ ᒪᑭᒪᓂᖏᓐᓄᑦ, ᓴᐱᓕᕈᓐᓇᖏᓐᓂᖏᓐᓄᑦ, ᐊᒻᒪ ᐆᒪᔮᕐᑎᐊᕈᓐᓇᕐᓂᖏᓐᓄᒃ ᓄᓇᓕᖕᓂ ᓄᓇᖅᑲᑎᒌᑦ −− ᐊᒻᒪ ᑕᖃᔪᓐᓇᖏᑐᐃᓐᓇᕐᑐᑎᒃ ᐊᔪᐃᓐᓈᕆᔭᐅᓯᒪᓂᖏᓐᓄᒃ ᑭᓇᒃᑯᑐᐃᓐᓇᕐᓂᒃ ᐱᔨᑦᑎᕐᑎᐅᔪᓄᑦ, ᐃᖅᑲᓇᐃᔭᕐᑎᓄᑦ, ᐃᓐᓇᕐᓄᑦ, ᒪᒃᑯᒃᑐᓄᑦ, ᐊᒻᒪ ᓯᕗᓕᕐᑎᓐᓄᑦ ᑕᑯᓐᓇᖑᐊᕐᓯᒪᔪᓄᑦ ᒪᑭᒪᑦᑎᐊᕈᑎᒃᓴᖏᓐᓂᒃ ᓄᓇᕘᑉ. ᑖᒃᑯᐊᓴᐃᓇᐃᑦ ᑕᑯᓐᓇᖑᐊᕐᑕᐅᓯᒪᔪᑦ ᖃᐅᔨᒪᔾᔪᑎᒋᓯᒪᕙᕗᑦ ᓯᕗᓂᕆᓂᐊᕐᑕᑎᓐᓂᒃ.
ᓯᕗᒧᑦ ᑕᑯᓐᓇᕐᓗᑕ, ᐱᓕᕆᖃᑎᒋᓪᓗᒋᑦ ᑐᙵᕕᒃᑯᑦ, ᓯᕗᒧᐊᒃᐸᓪᓕᐊᑎᓯᒪᕙᕗᑦ ᑲᓇᑕᓕᒫᕐᒥᒃ−ᓴᓇᕙᓪᓕᐊᒍᑎᑦ ᐊᑭᑐᔪᓂᒃ ᐊᖃᕐᕆᔾᔪᑎᓂᒃ ᐱᓕᕆᐊᒃᓴᑦ ᑕᑎᖃᒃᑲᓐᓂᕈᑕᐅᔪᑦ ᑲᓇᑕᒥ ᐃᓐᓄᐃᓯᒪᓂᕐᒧᑦ ᐊᒻᒪ ᑲᒪᒋᐊᕈᑕᐅᓪᓗᑎᒃ ᑐᐊᕕᓐᓇᕆᔭᓂᒃ ᓄᓇᓕᖕᓄᑦ ᐱᔭᐅᔭᕆᐊᓕᖕᓂᒃ. ᑖᒃᑯᐊ ᐱᓕᕆᐊᒃᓴᑦ ᓴᖅᑭᓯᒪᕗᑦ ᓲᕐᓗ ᕿᒥᕐᓗᖃᕐᑐᑎᒃ ᓴᖏᓂᕐᓴᓂᒃ, ᓴᐱᕇᒃᑐᓂᒃ ᐅᑭᐅᖅᑕᖅᑐᕐᒥ−− ᒪᙳᖃᕐᑐᑎᒃ ᐃᓄᐃᑦ ᒪᓕᒐᖏᓐᓂᒃ ᐊᒻᒪ ᓴᖅᑭᑕᐅᓯᒪᕗᑦ ᐱᓕᕆᖃᑕᐅᓪᓚᑖᓐᓂᒃᑯᑦ ᑲᓇᑕᒥ.
ᒫᓐᓇᕋᑖᖑᔪᔪᖅ, ᓄᓇᕗᑦ ᒐᕙᒪᒃᑯᖏᑦ ᐊᒻᒪ ᑐᙵᕕᒃᑯᑦ ᑲᑎᒪᑎᑦᑎᔪᒻᒪᑕ ᐅᑭᐅᖅᑕᖅᑐᒥᒃ ᐃᓐᓄᐃᓯᒪᓂᒃᑯᑦ ᓴᐳᑎᓯᓯᒪᓂᕐᒥᒃ −−− ᐱᕕᖃᕈᓐᓇᕈᑕᐅᑦᑎᐊᓚᐅᕐᑐᖅ ᓯᕗᓕᕐᑎᓄᑦ, ᐃᓐᓇᕐᓄᑦ, ᒪᒃᑯᒃᑐᓄᑦ, ᐊᒻᒪ ᒐᕙᒪᐅᔪᓄᑦ ᖃᐅᔨᒪᓂᕐᒥᓂᒃ ᖃᐅᔨᖃᑦᑕᐅᑎᒍᑕᐅᓪᓗᓂ ᐊᒻᒪ ᓇᐅᒃᑰᑐᒃᓴᐅᖕᒪᖔᑦᑕ ᓇᓗᓇᐃᕈᑕᐅᓪᓗᓂ ᓯᕗᓂᕐᒧᑦ ᐊᑐᕐᑕᐅᔪᓐᓇᕐᑐᓂᒃ. ᐱᖃᑎᒋᓪᓗᓯ, ᐱᓕᕆᓯᒪᕗᒍᑦ ᓄᓇᕗᖕᒥ ᓴᖅᑭᑕᓂᒃ ᓄᓇᕗᑦ ᐅᑭᐅᖅᑕᖅᑐᖓᓂᒃ ᐃᓐᓄᐃᓯᒪᓂᕐᒧᑦ ᐊᒻᒪ ᓴᐳᑎᓯᓯᒪᓂᕐᒧᑦ ᐸᕐᓇᒍᑎᓂᒃ −−ᐊᑕᐅᓯᐅᓕᕈᑕᐅᓪᓗᓂ ᓂᐱᑦᑎᓐᓄᑦ ᓄᓇᕗᖕᒥ, ᑲᓇᑕᓕᒫᕐᒥ, ᐊᒻᒪ ᓄᓇᕐᔪᐊᑉ ᐅᑭᐅᖅᑕᕐᑐᓕᒫᖓᓄᑦ.
ᓄᓇᕘᑉ ᐱᕚᓪᓕᐸᓪᓕᐊᓯᒪᓂᖓ ᑲᔪᓯᔪᓐᓇᕐᓯᒪᕗᖅ ᐱᓕᕆᖃᑎᒌᒃᑎᐊᓂᒃᑯᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ. ᐱᓕᕆᖃᑎᖃᕈᓐᓇᕐᓯᓯᒪᕗᖓ ᐱᖃᑎᒋᓪᓗᒋᑦ ᒥᓂᔅᑕᐅᔪᑦ ᐊᒻᒪ ᒪᕐᕉᒃ ᑲᓇᑕᐅ ᐊᖓᔪᖅᑳᕐᔪᐊᖏᒃ ᑲᒪᑦᑎᐊᕈᒪᓯᒪᓂᕐᒥᓂᒃ ᑲᒪᖃᑎᒋᔪᓐᓇᕐᓯᒪᒐᑦᑎᒍᑦ ᓄᓇᕗᖕᒥ. ᖁᔭᓐᓇᒦᒃ ᐱᓂᐊᕐᓂᕋᕈᑎᖃᖅᓯᒪᒍᑎᒋᒐᒃᓯᐅᒃ ᐱᓕᕆᖃᑎᖃᕈᒪᓪᓗᓯ ᓄᓇᕗᑦ ᐱᓪᓗᒍ. ᖁᔭᓐᓇᒦᒃ ᐱᓂᐊᕐᓂᕆᓯᒪᔭᓯ ᐃᑲᔪᕐᓯᓯᒪᒐᑦᓯᐅᒃ ᓄᓇᕗᑦ ᐃᒻᒥᒃᑯᑦ ᐊᐅᑦᑎᔪᓐᓇᕐᓂᖓᓄᑦ ᐊᒻᒪ ᖃᓄᐃᖏᑦᑎᐊᖁᓪᓗᒍ.
ᐊᒃᓱᒻᒪᕆᐊᓗᒃ ᖁᔭᒋᓯᒪᕙᒃᑲ ᓯᕗᓕᕐᑎᐅᖃᑎᒃᑯᑦ −−ᐱᓗᐊᕐᕿᑐᒥᒃ ᐅᑭᐅᖅᑕᖅᑐᒥᒃ ᒐᕙᒪᖃᕐᕕᐅᔪᓄᑦ ᓯᕗᓕᕐᑏᑦ ᐃᑲᔪᕐᓯᓯᒪᒻᒪᑕ, ᖃᓄᖅᑑᕈᕐᓇᓕᕈᒥᓇᐃᓯᒪᒻᒪᑕ, ᐊᒻᒪ ᑐᙵᓇᕐᑐᒥᒃ ᐊᑑᑎᖃᕐᓂᕐᒧᑦ ᐃᒃᐱᓇᕐᓯᒪᓪᓗᑎᒃ. ᐱᔭᓐᓂᖏᑦᑐᓂᒃ ᐊᒻᒪ ᐊᓯᔾᔨᐸᓪᓕᐊᔪᓂᓪᓗ, ᐊᑕᐅᓯᕐᒥᒃ ᓂᐱᖃᕈᓐᓇᕐᓯᒪᒐᑦᑕ ᓂᐱᒋᔭᐅᓪᓗᑕ ᓄᓇᒋᔭᑦᑎᓐᓄᑦ, ᑕᑎᒌᖃᑦᑕᕐᓯᒪᓪᓗᑕ, ᐊᒻᒪ ᐱᕚᓪᓕᕈᑕᐅᓯᒪᓪᓗᓂ ᓄᓇᒋᔭᑦᑎᓐᓄᑦ.
ᓄᓇᓖᑦ ᓄᓇᕗᖕᒥ ᓱᓕᔪᓐᓇᕈᑕᐅᖕᒪᑕ. ᒫᓐᓇᓵᖅ ᐅᑭᐅᓂ ᐊᓂᒍᖅᑐᓂ, ᐱᔭᓐᓂᖏᑦᑐᓂᒃ ᐊᑐᖃᑦᑕᕐᓯᒪᒻᒪᑕ: ᓄᓇᕐᔪᐊᓕᒫᕐᒥ ᓄᕙᔾᔪᐊᓐᓇᖅ, ᓄᓇᖅᑲᑎᒌᑦ ᐊᒃᓱᕈᓐᓇᑐᒃᑰᑎᓪᓗᒋᑦ −− ᐃᒡᓗᓂᒃ ᐃᑯᐊᓪᓚᑐᖃᖃᑦᑕᕐᓯᒪᒻᒪᑦ −− ᐊᒻᒪᓗ ᐃᒪᖃᑦᑎᐊᖏᓐᓂᒃ. ᓄᓇᓕᖕᓂ ᓯᕗᓕᕐᑎᓄᑦ ᐊᒻᒪ ᓯᕗᓪᓕᐹᖑᓲᓄᑦ ᑲᒪᔨᐅᔪᓄᑦ ᓴᐱᓕᕈᓐᓇᖏᓯᒪᒻᒪᑕ ᐊᒻᒪ ᓯᕗᓕᕐᑎᐅᔪᑦ ᑕᐃᒪᓐᓇᐃᑐᒃᑰᑎᓪᓗᒋᑦ, ᐊᒃᓱᕈᓐᓂᕆᓯᒪᔭᓯ ᑲᒪᒋᐊᕈᑎᑦᑎᓐᓄᑦ ᑕᖏᖃᕈᑕᐅᓯᒪᕗᑦ. ᖁᔭᓐᓇᒦᒃ.
ᓄᖅᑲᕈᒪᑲᐃᓐᓇᕐᐳᒐ ᐊᓯᖏᓐᓂᒃ ᑲᒪᔭᕆᐊᖃᕐᒥᒐᒪ. ᓄᖅᑲᑲᐃᓐᓇᕐᐳᖓ ᐅᓇ ᐱᓪᓗᒍ ᓈᖕᒪᓯᖕᒪᑦ ᐃᓚᑯᓗᒃᑲ ᕿᑐᙵᒃᑲᓗ ᓇᔪᓂᕐᓴᕆᔭᕆᐊᖃᕋᒃᑭᑦ ᐃᓐᓇᕈᐊᓚᐅᙱᓐᓂᖏᓐᓂ−− ᓂᕈᐊᖅᑕᐅᓯᒪᓪᓗᓂ ᖁᔭᓈᕐᓯᒪᔫᔮᕆᓱᕆᒐᑦᑎᒍᑦ ᖁᔭᓈᕐᓯᒪᙱᒃᑲᓗᐊᕐᑐᒋᑦ. ᑭᓇᒃᑯᑐᐃᓐᓇᕐᓄᑦ ᐱᔨᑦᑎᕐᑎᐅᖏᓐᓇᕈᒪᓂᖃᕐᐳᖓ ᐊᒻᒪ ᓯᕗᓂᕆᓂᐊᕐᑕᖓᓄᑦ ᓄᓇᕘᑉ, ᐊᒻᒪ ᖃᖓᑐᐃᓐᓇᑎᐊᒃᑯᑦ ᐱᔨᑦᑎᕐᑎᐅᔪᒪᓂᖃᕐᐳᖓᓱᓕ ᐊᒻᒪ ᐊᑑᑎᖃᑦᑎᐊᓂᐊᓂᒃᑯ, ᖃᐅᔨᒪᓇᖏᒃᑲᓗᐊᕐᑎᓪᓗᒍ ᓱᓂᐊᕐᒪᖔᕐᒫ.
ᒪᒃᑯᒃᑐᓄᑦ ᓄᓇᕗᖕᒥ −− ᐱᐅᔪᒥᒃ ᓯᕗᓂᕐᒥᒃ ᑕᑯᓐᓇᕋᒪ. ᓄᓇᒋᔭᕗᑦ ᓄᓇᓖᑦ ᐱᖏᓐᓇᖏᑦᑐᒦᓪᓗᑎᒃ, ᒪᑭᒪᑦᑎᐊᖏᓐᓇᕐᓗᑎᒃ, ᐊᒻᒪ ᐱᕕᒃᓴᖃᕐᕕᓴᐅᖏᓐᓇᐅᔭᕐᓗᑎᒃ. ᓯᕗᓂᕐᒥ ᐃᓕᕝᕕᒋᔪᓐᓇᓂᐊᕐᑕᓯᓐᓂᒃ, ᒪᑭᒪᑦᑎᐊᕐᓗᓯ, ᐃᑲᔪᖃᑕᐅᓗᓯᖅ, ᐊᒻᒪ ᓯᕗᓕᕐᑎᐅᓗᑦ −− ᒪᓕᓪᓗᖏᑦ ᑖᒃᑯᐊᓴᐃᓐᓇᐃᑦ ᒪᓕᒐᕆᓯᒪᔭᖏᑦ ᓯᕗᓕᕆᓚᐅᕐᑕᑦᑕ. ᓇᓗᖅᑯᑎᓇᖓ ᐱᓕᕆᐊᓂᒃ ᕿᒪᐃᕗᖓ ᐃᓱᒪᒋᓪᓗᒋᑦ ᓯᕗᓕᕐᑎᐅᔪᓐᓇᓂᕐᓯᓐᓂᒃ ᐊᒻᒪ ᓯᕗᒧᑦ ᓇᓗᓇᐃᕐᓯᒪᔭᑦᑎᓐᓂᒃ ᐱᖃᑎᒋᓪᓗᓯ.
ᐃᓚᒃᑲᓄᑦ ᐊᒻᒪ ᐃᓚᓐᓇᕆᔭᒃᑲᓄᑦ −− ᓂᓪᓕᖏᒃᑲᓗᐊᕐᑎᓪᓗᓯ ᑕᓯᐅᕐᑎᒋᓯᒪᒐᑦᓯ, ᕿᓄᐃᓵᕈᓐᓇᕐᓂᕐᓯ, ᐊᒻᒪ ᖃᖓᑐᐃᓐᓇᑎᐊᒃᑯᑦ ᐃᑲᔪᕐᓯᓯᒪᖃᑦᑕᓯᒪᓂᕐᓯ ᒪᑭᒪᒍᑎᒋᔪᓐᓇᕐᓯᒪᕙᒃᑲ. ᖁᔭᓐᓇᒦᒃ ᐱᖃᑎᒋᔪᓐᓇᕐᓯᒪᒐᒻᒪ ᑕᒪᐃᓐᓂ ᐊᑐᕐᑕᑎᓐᓂ.
ᐃᖃᓗᐃᒃ−ᓂᐊᖁᙳ ᓂᕈᐊᖅᑕᐅᕕᒋᓯᒪᔭᖓᓂ ᐃᓄᖏᑦ ᐊᒻᒪ ᑕᒪᐃᑕ ᓄᓇᕗᖕᒥᐅ −−− ᖁᔭᓐᓇᒦᒃ, ᒨᕐᓯ, ᖁᐊᓇ. ᖁᔭᓐᓇᒦᒃ ᓯᕗᓕᕐᑎᐅᓂᒃᑯᑦ ᐱᔨᑦᑎᕈᓐᓇᕐᓯᒪᒐᑦᓯ ᐊᒃᓱᒻᒪᕆᐊᓗᒃ ᐅᐱᒍᓱᓐᓇᕐᑐᖅ ᐅᑭᐅᓂ ᓯᑕᒪᓂ ᐊᓂᒍᖅᑐᓂ. ᐊᒃᓱᒻᒪᕆᐊᓗᒃ ᐅᐱᒋᓯᒪᕙᕋ ᐊᒻᒪ ᖁᔭᓕᕐᔪᐊᕐᓯᒪᕗᖓ ᑕᕝᕘᓇ ᐱᕕᖃᕈᓐᓇᕐᓯᑎᑕᐅᓯᒪᒐᒪ.
ᐃᖅᑲᒋᒃᑎᐊᐸᑦᓯ ᐊᒻᒪ ᒥᑭᔫᓕᕐᓯᒪᓇᕐᑐᖅ ᐊᒡᓛᑦ,
ᐱᔭᐃ (ᐸᐅᓗᓯ ᐊᕿᐊᕈᖅ)