ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᑐᓴᖅᑎᑦᓯᒍᒪᓪᓗᖓ ᒪᓕᒐᓕᐅᖅᑎᐅᖃᑎᓐᓂᒃ ᕕᕝᕗᐊᓕ 4 ᑲᓇᑕᒥ ᑲᑐᔾᔨᖃᑎᒌᑦ ᑲᑎᒪᔨᖏᑦ ᑲᑎᒪᑎᓪᓗᒋᑦ ᑕᕐᕆᔭᐅᑎᒃᑯᑦ ᐃᓚᐅᖃᑕᐅᓚᐅᕋᒪ.
ᐅᖃᖅᑎᑦᑎᔩ, ᑲᓇᑕᒥ ᑲᑐᔾᔨᖃᑎᒌᑦ ᑲᑎᒪᔨᖏᑦ ᐱᕕᖃᕐᕕᐅᕙᑦᑐᑦ ᑲᓇᑕᒥ ᓯᕗᓕᖅᑎᖏᑦ ᑲᑎᖃᑦᑕᕈᓐᓇᕐᓗᑎᒃ ᓯᕗᒧᒋᐊᖅᑎᑦᓯᒍᑎᒋᓗᒋᑦ ᓯᕗᓕᐅᑎᒍᒪᔭᖏᓐᓂᒃ, ᐱᓕᕆᖃᑎᒌᓐᓂᒃᑯᑦ ᐱᓗᐊᙳᐊᖅᑐᓂᒃ ᓴᖅᑭᐅᒪᔪᓂᒃ ᐊᑕᖏᖅᑐᓄᑦ ᐊᑦᑐᐃᓂᖃᖅᓯᒪᔪᓂᒃ. ᑲᑎᒪᑎᓪᓗᑕ ᐅᐱᒍᓱᓚᐅᖅᑐᖓ ᑐᓂᓯᒪᓂᖏᓐᓂᒃ, ᐆᒻᒪᕆᓐᓂᖏᓐᓂᒃ, ᑲᔪᖏᕐᓂᖏᓐᓂᓪᓗ ᓯᕗᓕᖅᑎᐅᖃᑎᒃᑲ, ᐊᑐᓂᑦ ᐊᕕᑦᑐᖅᓯᒪᓂᑐᐊᕆᖏᑕᖏᓐᓄᑦ ᑭᓯᐊᓂᑦᑕᐅᖅ ᐊᑦᓱᕈᕐᓇᖅᑐᒃᑰᕈᑕᐅᔪᓂᒃ ᐊᑕᖏᖅᑐᑕ.
ᐅᖃᖅᑎᑦᑎᔩ, ᐅᖃᖃᑎᒌᓐᓂᕗᑦ ᑐᕌᒐᖃᓚᐅᖅᑐᖅ ᑐᐊᕕᕐᓇᖅᑐᒥᒃ ᐱᒻᒪᕆᐅᔪᒥᓪᓗ: ᒪᑭᒪᑦᓯᐊᖅᑎᑕᐅᒋᐊᖃᕐᓂᖓ ᐋᓐᓂᐊᖃᕐᓇᖏᑦᑐᓕᕆᓂᖅ ᑲᓇᑕᓕᒫᒥ.
ᓄᓇᕗᒻᒥ, ᑐᑭᓯᐅᒪᓇᑦᓯᐊᖅᑐᖅ ᐋᓐᓂᐊᖃᕐᓇᖏᑦᑐᓕᕆᔾᔪᑎᕗᑦ ᑐᐊᕕᕐᓇᖅᑐᒃᑯᑦ ᐃᑲᔪᖅᑕᐅᒋᐊᖃᕐᓂᖓᓂᒃ, ᐊᑯᓂᐅᔪᒧᓪᓗ ᓯᕗᓂᑦᓴᑎᓐᓄᑦ ᐋᖅᑭᐅᒪᔾᔪᑎᑦᓴᖃᕆᐊᖃᕐᓂᖓᓂᒃ ᑕᑎᖃᓗᐊᕈᓐᓃᖅᐸᓪᓕᐊᖁᓪᓗᑕ ᖃᓪᓗᓈᓂ ᐋᓐᓂᐊᖃᕐᓇᖏᑦᑐᓕᕆᔾᔪᑎᓂᒃ.
ᓯᕗᓕᖅᑎᐅᖃᑎᒃᑲᓗ ᐊᑕᖏᖅᑐᑕ ᐊᖏᖃᑎᒌᓚᐅᖅᑐᒍᑦ ᑐᑦᓯᕋᕈᒪᓪᓗᑕ ᒐᕙᒪᑐᖃᒃᑯᓐᓄᑦ ᐊᖏᓪᓕᒋᐊᖅᓯᖁᓗᒋᑦ ᐊᑭᓖᖃᑕᐅᖃᑦᑕᕐᓂᖏᓐᓂᒃ ᖃᓪᓗᓈᓂ/ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᑭᓕᖅᓱᕆᐊᓕᓐᓂᒃ ᑲᓇᑕᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᕈᑎᒃᑯᑦ 22 ᐳᓴᓐᑎᕈᔪᖏᓐᓂᒃ 35 ᐳᓴᓐᑎᖏᓐᓄᑦ ᐊᕐᕌᒍᑕᒫᑦ.
ᑲᓇᑕᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᕈᑕᐅᕙᑦᑐᑦ ᖃᑦᓰᓐᓇᐅᒐᓗᐊᖅᑎᓪᓗᒋᑦ ᐳᓴᓐᑎᖏᑦ ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᕆᕙᑦᑕᖏᑕ, ᓄᓇᕗᒻᒥ ᑕᑎᖃᕋᑦᑕ ᑲᑐᔾᔨᖃᑎᒌᓐᓂᕐᒥᒃ ᖃᓪᓗᓈᓂ ᐊᕕᑦᑐᖅᓯᒪᓂᐅᔪᓂ ᓲᕐᓗ ᐋᓐᑎᐅᕆᐅ ᒫᓂᑐᐸᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔨᑦᓯᕋᐅᑎᓄᑦ.
ᐅᖃᖅᑎᑦᑎᔩ, ᐊᑯᓂᐅᔪᒧᑦ ᒪᑭᑕᑎᑕᐅᒋᐊᖃᕐᓂᖓ ᐋᓐᓂᐊᖃᕐᓇᖏᑦᑐᓕᕆᓂᖅ ᓄᓇᕗᒻᒥ ᑲᓇᑕᒥᓗ ᐱᒻᒪᕆᐅᒻᒪᑦ ᖃᓄᐃᑦᑕᐃᓕᑎᑕᐅᓂᖏᓐᓄᑦ ᖃᑭᒪᔪᓐᓇᕐᓂᖏᓐᓄᓪᓗ ᓄᓇᓖᑦ, ᓂᕆᐅᑦᓯᐊᖅᑐᖓ ᐋᖅᑭᐅᒪᑎᑦᓯᒐᓱᐊᕐᓂᕐᒧᑦ ᑐᕌᒐᖃᖅᐸᓪᓕᐊᖏᓐᓇᓂᕐᒥᒃ ᐅᖃᖃᑎᒌᓐᓂᒃᑯᑦ ᒐᕙᒪᑐᖃᒃᑯᓐᓂᒃ ᖃᓪᓗᓈᓂ ᐅᑭᐅᖅᑕᖅᑐᒥᓗ ᐊᕕᑦᑐᖅᓯᒪᓂᐅᔪᓂᒃ ᑲᑐᔾᔨᖃᑎᑦᑎᓐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.