2022 ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᓐᓂ ᐅᖃᓕᒫᕈᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᑖᖅᑐᖅ ᐅᖃᐅᓯᐅᓂᖓ

2022 ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᓐᓂ ᐅᖃᓕᒫᕈᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᑖᖅᑐᖅ ᐅᖃᐅᓯᐅᓂᖓ

ᐊᕐᕌᒍᑕᒫᑦ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᑦ ᐅᖃᓕᒫᕈᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᑖᑎᑦᑎᓲᖑᕗᑦ ᖁᕕᐊᓲᑕᐅᕙᒃᖢᑎᒡᓗ ᐱᒻᒪᕆᐅᔪᑦ ᐃᑲᔫᑕᐅᓲᑦ ᐋᖅᑭᒃᑕᐅᕙᒃᖢᑎᒃ ᑲᓇᑕᒥᐅᓄᑦ ᐅᖃᓕᒫᒐᓕᕆᕙᒃᑐᓄᑦ. ᓄᓇᕗᒻᒥ, ᐅᑯᐊ ᐃᓕᑕᕆᔭᐅᔾᔪᑎᑦ ᐃᓕᑕᖅᓯᓲᖑᕗᑦ ᐃᓄᖕᓂᒃ ᐃᑲᔪᖅᑐᐃᔪᓂᒃ ᐊᒻᒪ ᑲᔪᖏᖅᓴᐃᓲᓂᒃ ᐊᓯᒥᓂᒃ ᐃᓄᒃᑎᑐᑦ ᐅᖃᓪᓚᖃᑦᑕᖁᔨᔪᓂᒃ ᐱᕙᓪᓕᐊᑎᑦᑎᖃᑦᑕᖁᔨᔪᓂᒡᓗ ᐅᖃᓕᒫᕈᓐᓇᕐᓂᕐᒧᑦ ᐊᔪᙱᑕᖏᓐᓂᒃ ᐅᖃᓕᒫᕐᓂᒃᑯᑦ, ᑎᑎᕋᕐᓂᒃᑯᑦ ᐅᕝᕙᓘᓐᓃᑦ ᐱᓕᕆᐊᖑᔪᒃᑯᑦ ᐅᖃᐅᓯᐅᔪᑎᒍᑦ.

ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᐱᒍᓱᑦᑎᐊᖅᖢᓂ ᑐᓴᖅᑎᑦᑎᕗᖅ ᓵᓚᒃᓴᓚᐅᖅᑐᖅ 2022-ᒥ ᑲᓇᑕᒥ ᓯᕗᓕᖅᑏᑦ ᑲᑎᒪᔨᖏᓐᓂᒃ ᐅᖃᓕᒫᕈᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᑖᖅᑐᖅ ᔩᓚ ᐸᓪᓗᖅ ᑯᓘᑦᑎᐊᐃ−ᖑᓂᖓᓂᒃ.

ᐅᓇ ᐃᓕᑕᕆᔭᐅᔾᔪᑎ ᐃᓕᑕᖅᓯᔪᖅ ᔩᓚ ᐸᓪᓗᖅ ᑯᓘᑦᑎᐊᐃᑉ ᑕᖃᔪᓐᓇᕋᓂ ᐱᓕᕆᓲᖑᓂᖓᓄᑦ ᐆᒻᒪᖅᑎᑦᑎᒃᑲᓐᓂᕋᓱᒃᖢᓂ ᐃᓄᒃᑎᑐᑦ ᐅᖃᐅᓯᕐᒥᒃ ᐊᕐᕌᒍᒐᓵᓗᖕᓄᑦ. ᖃᖓᑦᑎᐊᓕᓴᐅᓛᖅ, ᐱᕐᔪᐊᕌᓗᖕᓂᒃ ᐃᑲᔫᑎᖃᖃᑦᑕᓚᐅᖅᐳᖅ ᓴᙱᒃᑎᒋᐊᖅᑎᑦᑎᓇᓱᒃᖢᓂ ᐃᓄᒃᑎᑐᑦ ᐅᖃᐅᓯᖅᑕᒥᒃ ᐱᓕᕆᔾᔪᑎᒃᑯᑦ ᐊᑐᖅᖢᓂ ᑐᑭᓕᐅᕆᓪᓗᓂ 11,000 ᐅᖓᑖᓂ ᐅᖃᐅᓯᖅᑕᓂᒃ ᐊᔪᕈᓐᓃᖅᑎᑕᐅᖁᓪᓗᒋᑦ Facebook−ᒃᑯᑦ ᐃᓄᒃᑎᑐᑦ ᑎᑎᕋᕈᓐᓇᖅᓯᓗᑎᒃ. ᐱᓕᕆᖃᑦᑕᖅᓯᒪᖕᒥᔪᖅ ᓈᒻᒪᒋᔭᐅᔪᓂᒃ ᐃᓄᒃᑎᑐᑦ ᐅᖃᐅᓯᒃᑯᑦ ᐊᑐᖅᑕᐅᔪᓐᓇᖅᑐᒃᑯᑦ ᐱᕕᖃᕈᑕᐅᔪᓐᓇᕐᒪᑦ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ ᐊᑐᖅᑕᐅᔪᓐᓇᕐᓗᓂ Microsoft ᑐᑭᓕᐅᕆᔾᔪᑎᓄᑦ.

ᐱᓇᓱᐊᕈᓯᕐᓂᒃ ᐊᒡᒋᖅᑐᓂᒃ, ᔩᓚ ᐸᓪᓗᖅ ᑯᓘᑦᑎᐊᐃ ᑐᓂᔭᐅᓛᖅᑐᖅ ᓇᓗᓇᐃᒃᑯᑦᑎᖅᓯᒪᔪᒥᒃ ᐅᔭᒥᖕᒥᒃ, ᐃᓕᑕᕆᔭᐅᔾᔪᑎᒥᒃ, ᐊᒻᒪ ᐃᓕᓐᓂᐊᕈᑎᒧᑦ ᐊᑭᓕᐅᑎᒃᓴᒧᑦ ᑮᓇᐅᔭᓂᒃ ᓯᕗᓕᖅᑎ ᐊᕿᐊᕈᕐᒥ.

ᐊᓕᐊᓇᐃᒍᓱᖃᑎᒋᕙᑦᑎᒋᑦ ᔩᓚ! ᓂᕆᐅᑦᑎᐊᖅᐳᒍᑦ ᐱᓕᕆᑦᑎᐊᖏᓐᓇᕐᓂᐊᕐᓂᕐᓂᒃ ᓂᕆᐅᒋᑦᑎᐊᖅᐸᒋᓪᓗ ᓴᙱᒃᑎᒋᐊᖅᑎᑦᑏᓐᓇᕐᓂᐊᕋᓱᒋᓪᓗᑎᑦ ᐅᖃᐅᓯᑦᑎᐊᕚᓗᑦᑎᓐᓂᒃ ᐃᓄᒃᑎᑐᑦ ᐅᖃᐅᓯᕐᒧᑦ.