WHISTLER, B.C. – ᓯᕗᓕᖅᑏᑦ ᑲᓇᑕᐅᑉ ᐅᐊᖕᓇᖓᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᑲᑎᖦᖢᑎᒃ Whistler−ᒥ ᐅᖃᐅᓯᖃᕐᖢᑎᒃ ᐊᑐᕆᐊᕈᑎᓂᒃ ᐊᔾᔨᒌᙱᕈᓘᔭᖅᑐᓄᑦ ᓴᙱᒃᑎᒋᐊᕐᓗᒍᓗ ᖃᐅᔨᒪᖃᑎᒌᖕᓂᖓ ᒪᑭᐅᒪᐃᓐᓇᕈᑎᒃᓴᓂᑦ, ᐱᕕᒃᓴᓂᒡᓗ ᐱᕈᖅᐸᓪᓕᐊᑎᓪᓗᒍ ᓯᕗᓂᒃᓴᒧᑦ ᐊᔪᖅᓴᙱᓐᓂᖅ.
ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᑲᔪᓯᔪᒥᒃ ᓄᓇᒥ ᐃᑭᕐᔪᐊᖅᑐᓄᑦ ᐊᒃᓱᕈᕐᓇᖅᑐᒥᒃ ᐊᒻᒪᓗ ᐅᓗᕆᐊᓇᖅᑐᒥᒃ ᓯᓚᐅᑉ ᖃᓄᐃᓐᓂᖓᓄᑦ ᖃᓄᐃᓕᐅᕐᓂᐅᔪᑦ ᓄᓇᓕᖕᓄᑦ, ᒪᑭᒪᔾᔪᑎᒃᓴᓄᑦ ᐊᒻᒪᓗ ᐱᒻᒪᕆᐅᔪᓄᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ. ᐱᓕᕆᖃᑎᒌᖏᓐᓇᕐᓂᐊᖅᐳᑦ, ᒐᕙᒪᑐᖃᒃᑯᓐᓂᓪᓗ, ᐃᑲᔪᖅᑐᐃᓗᑎᒃ ᓄᓇᓕᖕᓂᒃ ᓇᓗᙱᑦᑎᐊᕈᒪᓂᕐᒧᓪᓗ ᓈᒻᒪᒃᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᒪᓂᒪᔪᖃᕋᓗᐊᕐᒪᖔᑦ ᐃᓄᐃᑦ ᖁᐊᖅᓵᕐᓇᖅᑐᒦᖁᓇᒋᑦ ᒥᑭᒡᓕᒋᐊᖅᑎᑦᑎᓗᑎᒡᓗ ᖁᐊᖅᓵᕐᓇᖅᑐᓂᒃ ᐊᖏᕐᕋᕆᔭᒥᓄᑦ ᐃᓅᓂᕐᒧᓪᓗ.
ᐅᐊᖕᓇᖓᓂᑦ ᓯᕗᓕᖅᑏᑦ ᐅᖃᖃᑎᖃᑦᑎᐊᓚᐅᖅᑐᑦ ᐊᒥᓱᓂᒃ ᑲᑐᔾᔭᐅᔪᓂᒃ ᓯᕗᓪᓕᖅᐸᐅᑎᔭᐅᔪᒪᔪᓂᒃ ᐃᓚᐅᓪᓗᑎᒃ: ᖃᓄᖅᑑᕈᑎᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪᓗ ᐊᖅᑯᑎᖏᑦ; ᓯᓚᐅᑉ ᖃᓄᐃᓕᐅᕐᓂᖓᓄᑦ ᑲᔪᓰᓐᓇᕈᓐᓇᖅᑐᓄᓪᓗ ᐱᕙᓪᓕᐊᓂᖅ; ᐆᒻᒪᖅᑯᑎᓄᑦ ᐊᑦᑕᕐᓇᖅᑐᒦᑎᑦᑕᐃᓕᓂᖅ; ᑲᓇᑕᐅᑉ ᓯᓚᑖᓂᙶᖅᑐᑦ; ᐃᖅᑲᓇᐃᔮᖃᕈᓐᓇᖅᑐᑦ ᐊᒻᒪ ᓄᒃᑕᕈᓐᓇᕐᓂᖅ; ᐅᑭᐅᖅᑕᖅᑐᒥᑦ ᐊᑦᑕᕐᓇᖅᑐᒦᑎᑦᑕᐃᓕᓂᖅ ᐊᒻᒪ ᐱᒋᔭᐅᓂᖓ; ᐊᒻᒪ ᓄᓇᓕᖕᓂ ᐊᑦᑕᕐᓇᖅᑕᐃᓕᒪᓂᖅ.
ᐱᓕᕆᐊᖑᔭᕆᐊᓕᒃ ᑲᒪᒋᔭᐅᖁᓪᓗᒋᑦ ᐊᒃᓱᕉᑕᐅᓲᑦ ᐅᐊᓕᓂᕐᒥᐅᑕᓄᑦ ᑲᓇᑕᒥᐅᓄᑦ. ᓂᕆᐅᒋᔭᖃᖅᐳᑦ ᒐᕙᒪᒃᑯᑦ ᐊᔾᔨᒌᒃᑎᑦᑎᓗᑎᒃ, ᐃᒃᐱᒍᓱᑦᑎᐊᕐᓗᑎᒃ ᐊᒻᒪ ᐱᓕᕆᔪᓐᓇᑦᑎᐊᕐᓗᑎᒃ ᐊᑭᑐᓗᐊᙱᓪᓗᑎᒃ ᐊᒻᒪ ᑲᓇᑕᒥ ᑮᓇᐅᔭᓕᐅᕋᓱᖕᓂᒃᑯᑦ ᓄᑖᙳᕆᐊᖅᑎᑦᑎᓗᑎᒃ ᐊᒻᒪ ᐊᔪᖅᓴᕈᓐᓃᕐᓗᑎᒃ. ᑕᒪᓐᓇ ᐃᓚᖃᖅᐳᖅ ᑭᐅᓯᓂᕐᒥᒃ ᐱᒻᒪᕆᐊᓗᖕᓂᒃ ᑮᓇᐅᔭᓄᑦ ᓇᑉᐸᖅᑎᖅᑕᐅᓯᒪᔪᓄᑦ ᐊᓂᒍᖅᑎᓐᓇᓱᒋᐊᓕᖕᓂᒃ ᐅᑭᐅᖅᑕᖅᑐᒥ.
ᐅᐊᓕᓂᕐᒥ ᓯᕗᓕᖅᑏᑦ ᖃᐅᔨᑎᑦᑎᓪᓗᑎᒃ ᑲᓇᑕᒥᐅᑦ ᐱᔨᑦᑎᕋᖅᑕᐅᑦᑎᐊᓛᖑᓂᖏᓐᓂᒃ ᐊᔾᔨᐅᙱᓐᓂᖏᓐᓂ ᐊᑐᓂ ᓄᓇᓕᕐᔪᐊᖑᓂᖅᓴᓂ ᐊᕕᒃᑐᖅᓯᒪᓂᐅᔪᓂ ᓄᓇᓕᕋᓛᖑᓂᖅᓴᓂᒃᓗ ᐃᓕᓴᕆᔭᐅᒃᐸᑦ. ᒐᕙᒪᑐᖃᒃᑯᑦ ᐃᒃᐱᒍᓱᑦᑎᐊᕆᐊᖃᖅᐳᑦ ᑲᓇᑕᒥ ᐊᕕᒃᑐᖅᓯᒪᔪᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ ᐱᔪᓐᓇᕐᓂᖃᕐᕕᐅᔪᓂᒃ, ᐊᒻᒪ ᑲᓇᑕᒥ ᐱᓕᕆᐊᑦ ᐃᑲᔪᕆᐊᖃᖅᐳᑦ ᐊᕕᒃᑐᖅᓯᒪᔪᓂᒃ ᐊᒻᒪ ᓄᓇᓕᖕᓂ ᓯᕗᓪᓕᐅᔾᔭᐅᔪᒪᔪᓂᒃ.
ᒪᑭᒪᔾᔪᑎᑦ ᐊᒻᒪ ᓱᓪᓗᑯᑖᖏᑦ
ᐅᐊᓕᓂᕐᒥ ᓯᕗᓕᖅᑏᑦ ᐱᓕᕆᐊᒃᓴᖃᖅᑐᑦ ᐱᓕᕆᖃᑎᒌᒡᓗᑎᒃ ᐋᖅᑭᒃᓯᓗᑎᒃ ᐱᐅᓯᒋᐊᖅᑎᑦᑎᓗᑎᒡᓗ ᑐᑭᒧᐊᒍᑎᒃᓴᓂᑦ ᒪᑭᒪᐃᓐᓇᕈᑎᒃᓴᓂᑦ ᐊᖏᖃᑎᒌᒡᖢᑎᒡᓗ ᖃᐅᔨᓗᑎᒃ ᐱᕕᒃᓴᓂᑦ ᐱᐅᓯᒋᐊᕐᓗᒍ ᑕᐅᖅᓰᖃᑎᒌᖕᓂᕐᒧᑦ ᐊᖅᑯᑎᑦ ᐃᑲᔪᕐᓗᒋᑦ ᐊᖏᒃᓕᒋᐊᕐᓗᒍ ᐃᖏᕐᕋᓂᖓ ᐱᕐᔪᐊᑦ ᐱᖁᑎᑦ ᑲᓇᑕᓕᒫᒥᓄᓇᕐᔪᐊᒥᓗ ᓂᐅᕕᐊᒃᓴᖃᖅᑎᓄᑦ. ᑲᓇᑕᒥ−ᐱᕈᖅᓴᐃᓂᖅ ᒪᑭᒪᔾᔪᑎᓂᒃ, ᓲᕐᓗ ᑐᓚᒃᑕᕐᕕᖕᓂᒃ, ᐊᖅᑯᑎᓂᒃ, ᒥᑦᑕᕐᕕᖕᓂᒃ, ᑐᓴᐅᒪᔪᓕᕆᔾᔪᑎᓂᒃ, ᐆᒻᒪᖅᑯᑎᑐᕈᓯᕐᓂᒃ ᐊᒻᒪ ᖃᕋᓴᐅᔭᒃᑯᑦ ᐊᒻᒪ ᓄᓇᓕᖕᓂ ᐊᐅᓚᔪᓐᓇᐅᑎᓂᒃ, ᐱᒻᒪᕆᐅᕗᖅ ᒪᑭᒪᔾᔪᑎᓄᑦ ᐱᕈᖅᐸᓪᓕᐊᔪᓄᑦ ᐊᒻᒪ ᐊᒃᑐᐊᖃᑦᑕᐅᑎᔪᓄᑦ ᐃᓄᖕᓄᑦ ᐊᒻᒪ ᓄᓇᓕᖕᓄᑦ. ᑕᑎᒋᔭᒃᓴᐅᔪᑦ ᐊᖅᑯᑎᑦ ᐊᒻᒪ ᐃᖏᕐᕋᑦᑎᐊᖅᑐᑦ ᑐᓚᒃᑕᕐᕕᖕᒥ ᐊᐅᓚᓂᕆᔭᐅᔪᑦ ᐃᑲᔪᖅᓱᐃᕗᑦ ᓄᓇᕐᔪᐊᕐᒥ ᓂᕆᔭᒃᓴᓂᒃ ᐊᒻᒪ ᐆᒻᒪᖅᑯᑎᑐᓗᐊᕐᓇᙱᑦᑐᓂᒃ ᐊᑐᐃᓐᓇᕈᖅᑎᑦᑎᓪᓗᑎᒡᓗ ᒪᑭᒪᔾᔪᑎᓄᑦ ᐱᔭᐅᔾᔭᐃᖅᓯᒪᔪᓂᒃ ᑲᓇᑕᒥ ᐃᓚᒌᓄᑦ. ᐱᐅᓯᕚᓪᓕᖅᓯᒪᔪᑦ ᐃᖏᕐᕋᑦᑎᐊᖅᑐᑦ ᐃᑲᔫᑕᐅᓂᐊᖅᐳᑦ ᓴᖅᑭᔾᔪᑕᐅᓗᑎᒃ ᐃᖏᕐᕋᐃᓐᓇᖅᑐᓄᑦ ᐊᑭᓕᖅᓱᒐᕐᓂᖅᑐᓄᑦ ᐊᒃᓱᕈᕐᓇᖅᑐᓄᑦ ᐊᒻᒪᓗ ᐱᐅᓯᒋᐊᖅᑎᓪᓗᒋᑦ ᑲᓇᑕᒥ ᖃᓄᖅᑑᕈᑎᓄᑦ ᐱᓕᕆᐊᒃᑯᒥᒋᔭᐅᔪᑦ ᐃᓚᓕᐅᔾᔭᐅᓗᑎᒃ ᐅᑭᐅᖅᑕᖅᑐᒥ ᐱᔭᐅᔾᔭᐃᖅᓯᒪᔪᑦ ᐊᒻᒪ ᓇᖕᒥᓂᕆᔭᐅᓂᖏᑦ.
ᒐᕙᒪᑐᖃᒃᑯᑦ ᐱᓕᕆᖃᑎᖃᕆᐊᖃᖅᐳᑦ ᑲᓇᑕᒥ ᐊᕕᒃᑐᖅᓯᒪᔪᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᓯᕗᓂᒃᓴᒥ ᐊᐅᓚᔪᓐᓇᐅᑎᒋᔭᕆᐊᖃᓛᖅᑕᖏᓐᓄᑦ. ᐱᐅᓯᒋᐊᕆᐊᖃᕆᕗᖅᑕᐅᖅ ᐱᓕᕆᐊᒃᓴᓄᑦ ᐊᖏᖅᑕᐅᓂᕐᒧᑦ ᖃᖓᒃᑰᕋᔭᕐᓂᖏᑦ, ᑕᐃᒪᐃᓕᐅᕐᓂᕐᒥᓂᓗ ᒥᑭᒡᓕᒋᐊᖅᑎᑦᑎᓗᓂ ᑐᓗᖅᑕᕈᑕᐅᕙᒃᑐᓂᒃ ᑭᐅᓯᔪᒪᓂᕐᒧᑦ ᑲᔪᓰᓐᓇᖅᑐᓂᒃ ᐱᓕᕆᐊᖑᔪᓄᑦ ᑭᖑᕙᕆᐊᖅᑎᑕᐅᔪᓄᑦ. ᓄᓇᓖᑦ ᐊᑐᖅᐳᑦ ᐊᑐᖅᑕᐅᓚᐅᖅᓯᒪᙱᑦᑐᒥᒃ ᑭᓱᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓄᑦ ᐊᒃᓱᕈᕐᓇᖅᓯᕙᒃᑐᓂᒃ ᐊᑭᖏᓐᓄᓪᓗ ᖄᖏᐅᑎᔪᓂᒃ ᐱᑕᖃᖅᐸᒌᖅᑐᓄᑦ ᐱᓕᕆᐊᖑᔪᓄᑦ ᑕᐃᒪᐃᔾᔪᑎᖃᖅᖢᑎᒃ ᐱᑎᑦᑎᕙᖕᓂᕐᒧᑦ ᐃᓱᒪᒋᔭᒃᓴᓄᑦ ᐃᓕᐅᖅᑲᖅᓯᓂᕐᒧᓪᓗ ᐊᑭᓄᑦ. ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᓂ ᑐᐊᕕᕐᓇᖅᑐᒥᒃ ᕿᓂᖅᐳᑦ ᓇᓗᓇᐃᔭᖅᓯᒪᔪᓂᒃ ᖃᓄᖅ ᑖᒃᑯᐊ ᐊᒃᓱᕈᕐᓇᖅᑐᑦ ᑲᒪᒋᔭᐅᓂᐊᕐᒪᖔᑕ ᐊᒻᒪ ᑭᓱᑦ ᐊᓯᔾᔨᖅᑕᐅᓂᐊᕐᒪᖔᑕ ᑲᓇᑕᒥ ᒪᑭᒪᔾᔪᑎᓄᑦ ᐱᓕᕆᐊᑦ (ICIP) ᓴᖅᑭᑕᐅᓂᐊᖅᑐᑦ. ᔫᓂ 15-ᖑᑎᓪᓗᒍ, ᑲᓇᑕᒥ ᓯᕗᓕᖅᑏᑦ ᑎᑎᕋᓚᐅᖅᐳᑦ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᐅᖃᐅᓯᖃᒃᑲᓐᓂᖁᔨᓪᓗᑎᒃ ᑲᓇᑕᒥ ᐊᒻᒪ ᓄᓇᕘᒥ ᐊᕕᒃᑐᖅᓯᒪᔪᓂᒃ ᓯᕗᓪᓕᐅᑎᔪᒪᔭᖏᓐᓂᒃ ᓄᓇᓖᑦ ᐊᐅᓚᔪᓐᓇᐅᑎᖏᓐᓄᑦ ᑮᓇᐅᔭᓂᒃ ᐊᒻᒪ ᐊᑐᐊᒐᕐᓂᒃ ᐱᑕᖃᙱᓐᓂᖓᓄᑦ ᑲᓇᑕᒥ ᑐᑭᒧᐊᒍᑎᒃᓴᓂᒃ ᐱᓕᕆᐊᒧᑦ ᐃᓇᖐᔾᔪᑎᒃᓴᓂᒃ ᑲᓇᑕᒥ ᒪᑭᒪᔾᔪᑎᓄᑦ ᐱᓕᕆᐊᓄᑦ. ᐅᐊᓕᓂᕐᒥ ᓯᕗᓕᖅᑏᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐃᒃᐱᒍᓱᑦᑎᐊᖁᔨᓚᐅᖅᑐᑦ ᑐᙵᕕᒋᔭᐅᔪᓂᒃ ᑭᖑᓪᓕᕐᒥ ᐱᓕᕆᓕᖅᐸᑕ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᖁᑎᕐᔪᐊᓕᕆᓂᕐᒧᑦ ᑮᓇᐅᔭᓂᒃ ᑕᐃᑲᓂ ᑎᑎᖅᑲᒥ.
ᓯᕗᓕᖅᑎᐅᓂᖅ ᑲᔪᓰᓐᓇᕈᓐᓇᖅᑐᓂᒃ ᐱᕙᓪᓕᐊᓂᖅ
ᓄᓇᕐᔪᐊᕐᒥ ᖃᓄᐃᓕᐅᕈᑕᐅᔪᖅ ᐱᕐᔪᐊᖑᖕᒪᑦ ᓯᓚᒧᑦ ᐅᖅᑰᓯᕙᓪᓕᐊᓐᓇᖅᑐᓄᑦ ᐳᔪᕐᓗᖕᓄᑦ ᐃᓯᐊᕿᔪᓄᑦ. ᑲᓇᑕᒥ ᐊᕕᒃᑐᖅᓯᒪᔪᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᐱᓕᕆᓯᒪᓕᖅᑐᑦ ᐊᒻᒪ ᐱᓕᕇᓐᓇᖅᖢᑎᒃ ᒥᒃᖠᒋᐊᖅᑎᑦᑐᒪᓪᓗᒋᑦ ᐊᒃᑐᐃᔾᔪᑕᐅᓲᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ.
ᑲᒪᒋᔭᖃᕐᓂᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐱᓕᕆᖃᑎᒌᒋᐊᖃᕐᓂᕐᒧᑦ ᓱᖏᐅᑎᕙᓪᓕᐊᓂᕐᒧᑦ ᐊᒻᒪ ᐊᒃᑐᐃᓗᐊᖅᑕᐃᓕᑎᑦᑎᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᑦ. ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᓂ ᓱᖏᐅᓴᐃᓐᓇᕐᓂᐊᖅᐳᑦ ᐸᕐᓇᐅᑎᒥᓂᒃ ᓴᖅᑭᔾᔪᑎᒃᓴᓂᒃ ᓄᓇᓕᖕᓂ ᐱᔭᕆᐊᖃᖅᑕᖏᓐᓄᑦ ᐊᒻᒪ ᓯᕗᓪᓕᐅᑎᔪᒪᔭᖏᓐᓄᑦ, ᐊᒻᒪᓗ ᒥᒃᖠᒋᐊᕈᑎᒃᓴᓂᒃ ᑲᓇᑕᒥ ᓯᓚᒧᑦ ᐅᖅᑰᓯᕙᓪᓕᐊᓐᓇᖅᑐᓄᑦ ᐳᔪᕐᓗᖕᓄᑦ ᐃᓯᐊᕿᔪᓄᑦ. ᐅᐊᓕᓂᕐᒥ ᓯᕗᓕᖅᑏᑦ ᐱᖁᔨᔪᑦ ᒐᕙᒪᑐᖃᒃᑯᓐᓂᑦ ᐃᓚᐅᑎᑦᑎᓗᑎᒃ ᑲᓇᑕᐅᑉ ᐅᑭᐅᖅᑕᖅᑑᓪᓗ ᐊᕕᒃᑐᖅᓯᒪᓂᖏᓐᓂᑦ ᐊᑕᐅᑦᑎᒃᑯᑦ ᐊᒻᒪᓗ ᐃᓄᑑᓗᑎᒃ ᐃᑲᔪᐃᓂᕐᒧᑦ ᑲᓇᑕᒥᑦ ᐊᕕᒃᑐᖅᓯᒪᔪᑦ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᓂᑦ ᓱᖏᐅᑎᓂᕐᒧᑦ ᐊᒻᒪᓗ ᒥᒃᖠᒋᐊᖅᑎᑦᑎᓂᕐᒧᑦ ᖃᓄᖅᑑᕈᑎᓂᒃ ᐊᒻᒪᓗ ᑭᖑᕙᙱᓪᓗᑎᒃ, ᐊᑯᓂᐅᔪᒧᑦ ᑮᓇᐅᔭᖃᖅᑎᑕᐅᓃᑦ ᓈᒻᒪᒡᓗᑎᒃ ᐊᑐᓕᖅᑎᑦᑎᓂᕐᒧᑦ ᑖᒃᑯᓂᖓ ᖃᓄᖅᑑᕈᑎᓂᒃ.
ᓄᓇᓕᕆᓂᖅ ᐱᔾᔪᑕᐅᓗᐊᖅᐳᖅ ᐊᒃᓱᕈᕐᓇᖅᑑᓪᓗᓂ ᐊᒻᒪ ᐱᕕᒃᓴᑦᑎᐊᕙᐅᓪᓗᓂ ᐊᓯᔾᔨᖅᐸᓪᓕᐊᓂᕐᒧᑦ ᐃᓯᐊᕿᓗᐊᙱᑦᑐᓄᑦ ᐆᒻᒪᖅᑯᑎᓄᑦ ᐱᕝᕕᐅᔪᓐᓇᖅᑐᓄᑦ ᐊᒻᒪ ᐊᓯᔾᔨᒐᒃᓴᐅᔪᓄᑦ. ᓄᓇᕐᔪᐊᕐᒥ ᑲᑐᔾᔨᖃᑎᒌᑦ, ᓲᕐᓗ ᐊᐅᓪᓚᖅᑎᑦᑎᖃᑦᑕᕐᓂᖅ ᐊᑦᑎᒃᑐᒥᒃ ᐅᕝᕙᓘᓐᓃᑦ 0-ᒥᒃ ᑲᓇᑕᒥ LNG-ᒥᒃ, ᐃᒪᕐᒨᖅᑐᓂᒃ, ᓄᖑᔪᐃᑦᑐᓂᒃ ᐊᒻᒪ ᐃᒪᕐᒨᖅᑐᓂᒃ ᐱᓕᕆᖃᑕᐅᔪᓐᓇᖅᐳᑦ ᒥᒃᖠᒋᐊᖅᑎᑦᑎᓂᕐᒥᒃ ᓄᓇᕐᔪᐊᕐᒥ ᐃᓯᐊᕿᔪᓂᒃ. ᓯᕗᓕᖅᑏᑦ ᓄᑖᙳᕆᐊᖅᑎᑦᑎᕗᑦ ᐱᔪᒪᓂᕆᔭᒥᓂᒃ ᒐᕙᒪᑐᖃᒃᑯᓐᓂ ᐃᑲᔪᖅᑐᐃᔪᒪᓪᓗᑎᒃ ᐃᓯᐊᕿᔪᓄᑦ
ᐊᑮᑦᑐᖅᑖᕆᔭᐅᕙᒃᑐᓂᒃ ᑕᐅᖅᓰᖃᑎᖃᖅᐸᖕᓂᕐᒥᒃ ᓄᓇᕐᔪᐊᓕᒫᒥ ᑭᒡᓕᒋᔭᐅᔪᓄᑦ ᐱᓕᕆᖃᑎᖃᕐᓗᑎᒡᓗ ᐊᕕᒃᓯᒪᓂᕆᔭᐅᔪᓂᒃ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᒥ ᑭᖑᓪᓕᖅᐹᖅᓯᐅᑎᓂᒃ ᒪᓕᒋᐊᓕᖕᓂᒃ ᑎᑎᕋᖅᓯᒪᓂᖓᑕ 6 ᐊᑖᒍᑦ ᓇᓗᙱᑦᑎᐊᕈᒪᓂᕐᒧᑦ ᐱᖃᑦᑕᕋᓗᐊᕐᒪᖔᑕ ᐊᑮᑦᑐᖅᑖᕆᔭᐅᕙᒃᑐᓂᒃ ᒥᑭᒡᓕᒋᐊᖅᑎᑦᑎᔪᒪᓂᕐᒧᑦ ᑕᐃᒪᐃᔾᔪᑎᖃᖅᖢᑎᒃ ᐱᓕᕆᐊᖑᓯᒪᔪᓂᑦ ᐱᔪᓐᓇᕐᕕᒋᔭᒥᓂ, ᑕᒪᓐᓇ ᐃᑲᔪᖅᑐᐃᔪᒪᓂᕐᒧᑦ ᐃᓯᐊᕿᔪᓄᑦ ᑐᕌᕆᔭᐅᔪᓄᑦ.
ᓴᖅᑭᓛᖅᑐᑦ ᐱᕐᓗᐊᕿᔪᓄᑦ ᑮᓇᐅᔭᑎᒍᑦ ᐃᑲᔫᑎᑦ ᐋᖅᑭᒃᑕᐅᔪᑦ ᒐᕙᒪᑐᖃᒃᑯᓐᓂ ᐱᐅᓯᒋᐊᖅᑕᐅᔭᕆᐊᖃᖅᐳᑦ ᐱᓕᕆᖃᑎᒌᑦᑎᐊᓕᕐᓗᑎᒃ ᑲᓇᑕᒥ ᐊᒻᒪ ᓄᓇᕘᒥ ᐊᕕᒃᑐᖅᓯᒪᔪᓂᒃ, ᐊᓯᔾᔨᖅᐸᙱᓪᓗᒋᓪᓗ ᐊᑦᑕᕐᓇᖅᑐᑦ ᐊᒻᒪ ᐊᑭᖏᑦ ᑲᓇᑕᒥ ᐊᕕᒃᑐᖅᓯᒪᔪᓂᒃ, ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ ᐊᒻᒪ ᕼᐋᒻᒪᓚᒃᑯᓐᓂ. ᓄᑖᙳᕆᐊᖅᓯᒪᔪᖅ DFAA−ᒋᔭᐅᔪᖅ ᐱᕕᒃᓴᐅᓪᓗᐊᖅᐳᖅ, ᑲᔪᓯᓂᖃᑦᑎᐊᕐᓗᓂ ᐊᓯᔾᔨᒋᐊᒐᒃᓴᐅᓗᓂᓗ ᐃᑲᔪᖅᑐᐃᓂᐊᕐᒪᑦ ᐅᐊᖕᓇᖅᐸᓯᖕᒥ ᑲᓇᑕᒥᐅᓂᒃ ᓄᓇᓕᖕᓂᒃ ᐊᒃᑐᖅᑕᐅᓯᒪᔪᓂᒃ ᐱᕐᕈᓗᐊᕿᔪᖃᕌᖓᑦ.
ᐆᒻᒪᖅᑯᑎᓄᑦ ᐊᑦᑕᕐᓇᖅᑐᒦᑎᑦᑕᐃᓕᓂᖅ
ᑲᓇᑕ ᐱᒻᒪᕆᐊᓗᖕᒥᒃ ᐱᔭᒃᓴᖃᖅᐳᖅ ᓄᓇᕐᔪᐊᓕᒫᒥ ᐆᒻᒪᖅᑯᑎᖃᕐᓂᕐᒧᑦ ᖁᐊᖅᓵᕐᓇᖅᑎᑦᑎᑦᑕᐃᓕᒪᓂᕐᒥᒃ, ᐃᓚᒋᔭᐅᓪᓗᓂ ᐱᑎᑦᑎᓂᒃᑯᑦ ᐃᓕᖅᑯᓯᑐᖃᒃᑯᑦ ᐆᒻᒪᖅᑯᑎᖃᕐᓂᕐᒧᑦ ᐱᕝᕕᐅᕙᒃᑐᓂᒃ, ᓲᕐᓗ ᐅᖅᓱᐊᓗᖕᒥᒃ ᑭᓂᖅᑐᒥᒃ, LNG−ᒥᒃ, ᓄᖑᔪᐃᑦᑐᒥᒃ ᐃᒪᕐᒧᓪᓗ ᐆᒻᒪᖅᑯᑎᖃᕐᓂᕐᒧᑦ, ᓴᖅᑭᑉᐸᓪᓕᐊᔪᓄᓪᓗ ᐱᓕᕆᔾᔪᑕᐅᕙᒃᑐᓄᑦ ᐋᖅᑭᒃᓯᒪᓕᕈᑕᐅᔪᓐᓇᖅᑐᓄᓪᓗ ᓲᕐᓗ ᐃᒪᕐᒨᖅᑐᓄᑦ ᐊᓯᔾᔨᒋᐊᒐᒃᓴᐅᔪᓄᓪᓗ ᐅᖅᓱᐊᓗᖕᓄᑦ.
ᑲᓇᑕᒥ ᐆᒻᒪᖅᑯᑎᑐᕈᓰᑦ ᑲᓇᑕᒥᐅᑕᓄᐊᕆᐊᖃᖅᐳᑦ ᐊᒻᒪ ᓄᓇᕐᔪᐊᕐᒥ ᓂᐅᕐᕈᑎᖃᖅᐸᒃᑐᓄᑦ. ᐆᒻᒪᖅᑯᑎᓕᕆᔩᑦ ᐊᓯᔾᔨᖅᐸᓪᓕᐊᖏᓐᓇᕐᓂᐊᖅᐳᑦ ᓱᖏᐅᓴᓗᑎᒡᓗ ᓄᑖᓄᑦ ᐱᓕᕆᔾᔪᑎᓄᑦ ᕿᓂᖅᑎᓪᓗᒋᑦ ᓄᑖᓂᒃ ᐊᑦᑎᒃᑐᒥ ᐅᖅᓱᐊᓗᒃᑐᓗᐊᙱᑦᑐᓂᒃ. ᒐᕙᒪᑐᖃᒃᑯᑦ ᐃᒃᐱᒍᓱᑦᑎᐊᕆᐊᖃᖅᐳᑦ ᐱᔪᓐᓇᕐᓂᖃᕐᕕᖏᓐᓂᒃ ᑲᓇᑕᒥ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ, ᐱᓕᕆᖃᑎᒋᓗᒋᓪᓗ ᒥᒃᖠᒋᐊᖅᑎᓐᓇᓱᒡᓗᒋᑦ ᐃᓯᐊᕿᔪᑦ ᐱᕙᓪᓕᐊᑐᐃᓐᓇᖅᑎᓪᓗᒋᑦ ᐱᑕᖃᖅᐸᒌᖅᑐᓂᒃ ᐊᒻᒪ ᓯᕗᓂᒃᓴᒥ ᐆᒻᒪᖅᑯᑎᑐᕈᓯᕐᓂᒃ. ᐅᓄᖅᓯᒋᐊᕐᔪᐊᖅᑐᑦ ᑲᓇᑕᒥ ᑮᓇᐅᔭᓕᐅᕈᑕᐅᓇᓱᒃᑐᑦ ᐱᔭᐅᔭᕆᐊᖃᕐᒪᑕ ᐅᐊᓕᓂᕐᒥ ᐊᕕᒃᑐᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ, ᒪᓕᒡᓗᑎᒃ ᑮᓇᐅᔭᓕᐅᕋᓱᐊᖅᑐᓂᒃ ᐊᓯᖏᓐᓂᒃ ᑲᓇᑕᒥ.
ᐅᐊᓕᓂᕐᒥ ᓯᕗᓕᖅᑏᑦ ᒐᕙᒪᑐᖃᒃᑯᓐᓂᑦ ᐱᓕᕆᖃᑎᖃᖁᔨᔪᑦ ᐱᔾᔭᐃᕐᓗᒍ ᓄᓇᕐᔪᐊᕐᒥᑦ ᐊᒪᓗ ᓄᓇᓕᖕᓂᑦ ᓂᐅᕕᐊᒃᓴᖃᕐᓂᕐᒧᑦ ᐱᔪᓐᓇᕐᓂᕐᒧᑦ ᐊᒻᒪᓗ ᑮᓇᐅᔭᓂᒃ ᐊᑐᕐᓂᐊᕐᓗᓂ ᐆᒻᒪᖅᑯᑎᓄᑦ ᐊᒻᒪᓗ ᐆᒻᒪᖅᑯᑎᓄᑦ ᐃᒡᓗᕐᔪᐊᓂᒃ ᐱᔭᕆᐊᖃᖅᑐᓂᒃ ᐅᔾᔨᕈᓱᓕᖅᑎᑦᑎᓂᕐᒧᑦ ᐊᕕᒃᑐᖅᓯᒪᔪᒥᑦ ᐱᕈᖅᐸᓪᓕᐊᓂᕐᒧᑦ ᐊᔪᙱᓐᓂᐅᔪᓂᒃ, ᐃᓚᐅᓪᓗᑎᒃ ᓱᒃᑲᒃᑎᒋᐊᖅᑎᑦᑎᓂᕐᒥᒃ ᐃᑲᔪᐃᓂᕐᒥᒃ ᐆᒻᒪᖅᑯᓯᐅᕐᓂᕐᒧᑦ ᐊᒪᓗ ᑐᓂᓯᓂᕐᒧᑦ ᐃᒡᓗᕐᔪᐊᓂᒃ. ᓯᕗᓕᖅᑏᑦ ᐃᓱᒫᓘᑎᒥᓂᒃ ᐅᖃᐅᓯᖃᓚᐅᖅᐳᑦ ᑲᓇᑕᒥ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᒪᓕᒐᐃᑦ ᐊᑐᒐᒃᓴᐅᙱᓐᓂᖏᓐᓂᒃ ᐊᒻᒪ ᐊᑭᑐᓗᐊᕐᓂᖏᓐᓂᒃ ᐃᓚᖏᓐᓄᑦ ᑭᒡᒐᖅᑐᐃᕕᐅᔪᓄᑦ ᒫᓐᓇ ᐱᓕᕆᔾᔪᑎᖏᑦ ᐊᒻᒪ ᐱᕕᒃᓴᖏᑦ ᐱᔾᔪᑎᒋᓪᓗᒋᑦ.
ᐅᐊᓕᓂᖅ ᑲᓇᑕᒥ ᐱᕝᕕᒋᔪᓐᓇᖅᑕᖓ ᐱᖃᖅᑎᑦᑎᔨᐅᓗᑎᒡᓗ ᐱᔭᕆᐊᖃᒻᒪᕆᒃᑐᓂᒃ ᐅᔭᕋᑦᑎᐊᕙᖕᓂᑦ ᐊᔾᔨᐅᙱᑦᑐᓂᒡᓗ ᓄᓇᒥ ᐃᓗᓕᖏᓐᓂ ᑲᓇᑕᒧᑦ ᓄᓇᕐᔪᐊᒥᓗ ᐱᓕᕆᖃᑎᖏᓐᓄᑦ. ᐅᐊᓕᓂᕐᒥ ᑲᓇᑕᒥᐅᑦ ᐱᕚᓪᓕᕈᑎᖃᓕᕇᖅᑐᑦ ᐱᕙᓪᓕᐊᓂᖏᓐᓂᒃ ᑲᓐᓄᔭᖅ, nickel, zinc, ᓄᖑᔪᐃᑦᑐᖅ, potash, molybdenum, lithium ᐊᒻᒪ helium, ᐊᒻᒪ ᓯᕗᓂᒃᓴᒥ ᐱᒻᒪᕆᐅᔪᑦ ᐅᔭᕋᖕᓂᐊᒐᒃᓴᑦ ᐲᔭᐃᓂᖅ ᐊᒻᒪ ᐱᕙᓪᓕᐊᑎᑦᑎᓂᖅ ᑲᔪᓯᓂᐊᖅᑐᑦ ᐊᐅᓚᔾᔭᒃᐸᓪᓕᐊᓗᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕐᒧᓪᓗ. ᐅᐊᓕᓂᕐᒥ ᓯᕗᓕᖅᑏᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑐᒃᓯᕋᖅᐳᑦ ᐊᖏᖅᑕᐅᓵᓕᖃᑦᑕᖁᓪᓗᒋᑦ ᓇᓗᓇᐃᖅᑕᐅᓯᒪᔪᑦ ᑮᓇᐅᔭᑦ ᐊᑐᖅᑐᒃᓴᑦ 2023-ᒥᑦ ᐊᑐᓕᖅᑎᑕᐅᓗᑎᒃ ᕿᓚᒻᒥᐅᔪᒃᑯᑦ.
ᐅᐊᓕᓂᕐᒥ ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᒐᕙᒪᑐᖃᒃᑯᑦ ᓴᓗᒪᔪᒥᑦ ᐅᖅᓱᐊᓗᖕᒧᑦ ᒪᓕᒐᖏᓐᓂᑦ, ᓴᖅᑭᑕᐅᔪᒪᔪᒥᑦ ᓴᓗᒪᔪᒥᑦ ᐆᒻᒪᖅᑯᑎᖃᕐᓂᕐᒧᑦ ᒪᓕᒋᐊᓕᖕᓂᑦ, ᐊᒻᒪᓗ ᐅᖅᓱᐊᓗᖕᒧᑦ ᐳᓪᓚᒃᓴᒧᓪᓗ ᐃᓯᐊᕿᔪᓄᑦ ᐃᓱᖃᕐᕕᐊᓂᑦ. ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᖅᓯᖁᔨᕗᑦ ᒐᕙᒪᑐᖃᒃᑯᑦ ᓯᓚᓕᕆᓂᕐᒧᑦ ᐊᑐᐊᒐᖏᓐᓂᒃ ᐃᓕᓴᖅᓯᖁᓪᓗᒋᑦ ᐱᒋᐊᓵᖅᑐᓂᒃ ᐊᒻᒪ ᐱᓕᕆᐊᖑᐃᓐᓇᖅᑐᓂᒃ ᑲᓇᑕᒥ ᐊᕕᒃᑐᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ ᑕᒪᒃᑯᓂᖓ. ᓯᕗᓕᖅᑏᑦ ᓇᓗᓇᐃᖅᓯᓪᓗᑎᒃ ᐆᒻᒪᖅᑯᑎᓄᑦ ᐆᒻᒪᖅᑯᑎᓄᓪᓗ ᐊᑐᐊᒐᖅ ᑭᑭᑕᐅᓪᓗᓂ ᐱᔪᓐᓇᕐᕕᖃᕐᕕᐅᓪᓗᓂ ᓄᓇᓕᒡᔪᐊᖑᓂᖅᓴᓂ ᐊᕕᒃᑐᖅᓯᒪᓂᐅᔪᓂ ᓄᓇᓕᕋᓛᖑᓂᖅᓴᓂᒡᓗ ᐊᕕᒃᑐᖅᓯᒪᓂᐅᔪᓂ, ᐱᓕᕆᐊᖃᖅᖢᑎᒡᓗ ᒥᒃᖠᒋᐊᖅᑎᓪᓗᒍ ᐃᓯᐊᕿᓃᑦ. ᒐᕙᒪᑐᖃᒃᑯᑦ ᐊᑐᐊᒐᖏᑦ ᓱᕋᐃᔭᕆᐊᖃᙱᓚᑦ ᐱᔪᓐᓇᐅᑎᒥᓂᒃ ᐃᓕᓴᖅᓯᔭᕆᐊᖃᖅᖢᑎᒡᓗ ᐊᔾᔨᖃᙱᑦᑐᓂᒃ ᐱᔭᕆᐊᖃᖅᑕᒥᓂᒃ ᖃᓄᐃᓕᖓᓂᕆᔭᒥᓂᒡᓗ.
ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᐊᒃᑐᐃᓂᖏᓐᓂᒃ ᑖᒃᑯᐊ ᒐᕙᒪᑐᖃᒃᑯᑦ ᐊᑐᐊᒐᖏᓐᓂᒃ ᐃᓚᐅᓪᓗᑎᒃ ᖃᓕᕇᒃᓯᓕᖅᓯᒪᔪᑦ, ᐊᑭᑐᓗᐊᙱᑦᑐᑦ ᐊᒻᒪ ᑭᓱᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓄᑦ ᐊᒃᑐᐃᔾᔪᑎᑦ, ᐊᓯᔾᔨᒐᒃᓴᐅᔪᑦ ᐊᒻᒪ ᐊᓂᒍᖅᑎᑕᐅᔪᓐᓇᕐᓂᖏᑦ.
ᑲᓇᑕᐅᑉ ᓯᓚᑖᓂᙶᖅᑐᑦ
ᑲᓇᑕᐅᑉ ᓯᓚᑖᓂᙶᖅᑐᑦ ᐱᒻᒪᕆᐅᕗᑦ ᐃᑲᔪᖅᓱᐃᔾᔪᑕᐅᓪᓗᑎᒃ ᑲᓇᑕᒥ ᐅᐊᓕᓂᕐᒥᐅᓄᑦ ᐊᔪᖅᓴᕈᓐᓃᖅᐸᓪᓕᐊᔪᓄᑦ ᐊᒻᒪ ᐆᒻᒪᕆᒃᑐᓄᑦ ᓄᓇᓕᖕᓄᑦ.
ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᓂ ᑐᑭᓯᐅᒪᑦᑎᐊᓛᖑᕗᑦ ᐃᖅᑲᓇᐃᔮᖃᕈᓐᓇᖅᑐᑦ ᐊᒻᒪ ᓄᓇᓕᖕᓂ ᐱᔭᐅᔭᕆᐊᓖᑦ. ᐅᐊᓕᓂᕐᒥ ᓯᕗᓕᖅᑏᑦ ᐊᖏᒡᓕᒋᐊᖅᑎᑦᑎᖁᔨᕗᑦ ᑲᓇᑕᒥ ᐊᕕᒃᑐᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ ᐱᓕᕆᐊᒃᓴᖏᓐᓂᒃ ᑮᓇᐅᔭᓕᐅᕋᓱᖕᓂᕐᒧᑦ ᑲᓇᑕᐅᑉ ᓯᓚᑖᓂᙶᖅᑐᓂᒃ ᐱᕈᖅᐸᓪᓕᐊᖏᓐᓇᕐᓗᑎᒃ ᑲᓇᑕᒥ ᐊᒻᒪ ᓄᓇᕘᒥ ᐊᕕᒃᑐᖅᓯᒪᔪᓂ ᓂᕈᐊᒐᒃᓴᙳᖅᑎᑕᐅᔪᑦ, ᐊᒻᒪ ᑲᓇᑕᒥ ᒐᕙᒪᒃᑯᑦ ᐃᓚᐅᑎᑉᐸᒡᓗᒋᑦ ᑲᓇᑕᒥ ᐊᒻᒪ ᓄᓇᕘᒥ ᐊᕕᒃᑐᖅᓯᒪᔪᓂᒃ ᐱᓕᕆᖃᑎᒌᒡᓗᑎᒃ ᑲᓇᑕᒥ ᑲᓇᑕᐅᑉ ᓯᓚᑖᓂᙶᖅᑐᓂᒃ ᐱᓕᕆᔾᔪᓯᕐᒥᒃ. ᓇᓗᓇᐃᕈᒪᓪᓗᑎᒃ ᐃᓚᓕᐅᔾᔨᑦᑎᐊᖃᑦᑕᕐᓂᖏᓐᓂᒃ, ᑲᓇᑕᒥ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᐱᓕᕆᖃᑎᖃᕈᒪᓪᓚᑦᑖᖅᐳᑦ ᑲᓇᑕᒥ ᒐᕙᒪᒃᑯᓐᓂ ᒪᓕᑦᑎᐊᖁᓪᓗᒋᑦ ᐸᕐᓇᒃᑕᐅᓯᒪᔪᓂᒃ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑲᓇᑕᒥ ᐊᕕᒃᑐᖅᓯᒪᔪᓂᒃ ᐊᒻᒪ ᓄᓇᓕᖕᓂ ᐱᔪᓐᓇᕐᓂᕆᔭᐅᔪᓂᒃ.
ᐅᐊᓕᓂᕐᒥᑦ ᓯᕗᓕᖅᑏᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓱᒃᑲᒃᑎᒋᐊᖁᔨᕗᑦ ᐱᓇᓱᐊᖅᑕᖏᓐᓂᑦ ᐱᐅᓯᕚᓪᓕᕋᓱᒡᖢᒋᑦ ᐱᓕᕆᐊᖑᓂᖏᑦ ᐊᕕᒃᑐᖅᓯᒪᔪᓂᑦ ᓂᕈᐊᒐᒃᓴᓕᐊᑦ ᐊᓯᖏᓪᓗ ᑲᓇᑕᐅᑉ ᓯᓚᑖᓂᙶᖅᑐᑦ ᐊᔾᔨᒌᖕᓂᖅᓴᐅᖁᓪᓗᒋᑦ, ᓈᒻᒪᖅᑰᑦᑎᕙᒡᓗᑎᒃ, ᑭᐅᓴᕋᐃᒡᓗᑎᒡᓗ. ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᖅ ᓄᓇᓕᖕᓄᑦ ᐱᔨᑦᑎᕋᐅᑎᓄᑦ ᓈᒻᒪᙱᒻᒪᑦ ᐱᐅᓯᒋᐊᖅᑕᐅᓪᓗᐊᖅᖢᓂᓗ ᐊᖏᒡᓕᒋᐊᖅᑕᐅᓗᓂᓗ. ᐊᒻᒪᓗᑦᑕᐅᖅ, ᐱᒻᒪᕆᐅᕗᖅ ᐱᔪᒪᔪᑦ ᓄᓇᓖᑦ ᐱᕕᖃᖅᑎᑕᐅᓗᑎᒃ ᐊᖏᓂᖅᓴᒥᑦ ᐱᓕᕆᐊᖃᕐᓂᕐᒥᑦ ᓄᓇᓕᖕᓄᑦ ᐱᔨᑦᑎᕋᕐᓂᕐᒥᑦ.
ᐅᐊᓕᓂᕐᒥ ᓯᕗᓕᖅᑏᑦ ᓇᓗᓇᐃᖅᓯᓪᓚᕆᓚᐅᖅᐳᑦ ᐃᑲᔪᖅᑐᐃᔪᒪᓂᕐᒥᓂᒃ Ukrainian-ᒥᐅᓂᑦ. ᓇᓗᓇᐃᖅᓯᓚᐅᕐᒪᑕ ᒫᓐᓇᐅᔪᖅ ᑲᓇᑕᒥ-ᐊᒃᓱᕈᕐᓇᖅᑐᒃᑯᑦ ᐊᖏᖅᑕᐅᓯᒪᓂᒃᑯᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖃᑦᑕᕐᓂᕐᒧᑦ (CUAET) ᐱᓕᕆᐊᒃᑯᑦ, ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᑎᑦᑎᐊᙱᒻᒪᑕ ᐊᒻᒪᓗ ᐃᑲᔪᖅᑐᐃᙱᖦᖢᑎᒃ. ᑐᐊᕕᖅᖢᑎᒃ ᑐᒃᓯᕋᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓴᖅᑮᖁᔨᓪᓗᑎᒃ ᐱᐅᓯᕙᓪᓕᖅᑐᒥᒃ ᐱᓕᕆᐊᒥᒃ ᓄᑖᒥᒃ ᑮᓇᐅᔭᖃᖅᑎᑦᑎᓂᕐᒧᑦ ᑲᑐᔾᔨᖃᑎᖃᕐᓗᑎᒃ, ᐱᓗᐊᖅᑐᒥᒃ ᔪᓚᐃ 15-ᒥ ᐃᓱᓕᒃᕕᒃᓴᖃᖅᑎᓪᓗᒋᑦ ᓯᓚᕐᔪᐊᒥ ᑐᒃᓯᕋᐅᑕᐅᔪᓄᑦ CUAET-ᑯᓐᓄᑦ.
ᐃᖅᑲᓇᐃᔮᖃᕈᓐᓇᖅᑐᑦ ᐊᒻᒪ ᓄᒃᑕᕈᓐᓇᕐᓂᖅ
ᑲᓇᑕᐅᑉ ᐅᑭᐅᖅᑕᖅᑑᓪᓗ ᐊᕕᒃᑐᖅᓯᒪᓂᖏᑦ ᐊᑐᖃᑦᑕᖅᐳᑦ ᐊᒃᑐᐃᔾᔪᑕᐅᓲᓂᒃ ᑲᓇᑕᓕᒫᒥ ᐃᖅᑲᓇᐃᔮᖃᕈᓐᓇᖅᑐᑦ ᐅᓄᙱᓗᐊᕐᓂᖏᓐᓄᑦ, ᐱᓗᐊᖅᑐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.
ᐅᐊᓕᓂᕐᒥ ᐱᔪᓐᓇᕐᓂᖃᕐᕕᐅᔪᑦ ᐊᖏᖅᓯᒪᔪᑦ ᕿᓂᕐᓂᕐᒥᒃ ᐱᕕᒃᓴᓂᑦ ᐋᖅᑭᑦᑎᐊᖅᓯᒪᓂᖅᓴᒃᑯᑦ ᐊᑎᓕᐅᕐᓂᕐᒧᑦ ᐊᑐᕋᓲᑎᓂᒃ ᐱᓕᕆᖃᑎᒌᒡᓗᑎᒡᓗ ᐲᔭᕐᓗᒋᑦ ᑐᓗᖅᑕᕈᑎᑦ ᐃᖅᑲᓇᐃᔭᖅᑎᓄᑦ ᓚᐃᓴᓐᓯᑖᕋᓱᒃᑐᓄᑦ ᐃᖅᑲᓇᐃᔭᕐᓗᑎᒃ ᐃᖅᑲᓇᐃᔮᖏᓐᓂ ᐱᓕᒻᒪᒃᓴᓂᕐᒥ.
ᐃᖅᑲᓇᐃᔭᕐᓂᖅ ᐊᒻᒪ ᐱᓕᒻᒪᒃᓴᕐᓂᖅ ᐃᑲᔪᖅᑐᐃᔾᔪᑏᑦ ᐱᒻᒪᕆᐅᕗᑦ ᐃᖅᑲᓇᐃᔮᖃᕈᓐᓇᑦᑎᐊᖅᑐᓄᑦ. ᐅᐊᓕᓂᕐᒥ ᓯᕗᓕᖅᑏᑦ ᑎᓕᐅᕆᔪᑦ ᒐᕙᒪᑐᖃᒃᑯᓐᓂᑦ ᐱᓕᕆᖃᑎᖃᖁᔨᓪᓗᑎᒃ ᑲᓇᑕᐅᑉ ᐊᕕᒃᑐᖅᓯᒪᔪᖁᑎᖏᓐᓂᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ ᓄᑖᙳᖅᑎᕆᓂᕐᒧᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᓅᑕᐅᓂᕐᒧᑦ ᐊᖏᕈᑎᓂᒃ (LMTAs) ᐃᒪᐃᑦᑎᐊᖁᔨᓂᕐᒧᑦ ᐊᑯᓂᐅᔪᒃᑯᑦ, ᑐᙵᓂᖃᑦᑎᐊᖅᑐᒥᒃ ᒐᕙᒪᑐᖃᒃᑯᑦ ᑮᓇᐅᔭᖏᓐᓂᒃ. ᓯᕗᓕᖅᑏᑦ ᐅᖃᐅᓯᖃᓚᐅᕐᒥᔪᑦ ᒐᕙᒪᑐᖃᒃᑯᑦ ᐸᕐᓇᐅᑎᖏᓐᓂᒃ ᓄᑖᙳᕆᐊᖅᑎᑦᑎᓂᕐᒧᑦ ᐃᖅᑲᓇᐃᔭᙱᑦᑐᖅᓯᐅᑎᓕᕆᓂᕐᒧᑦ ᐱᓕᕆᔾᔪᓯᕐᒥᒃ ᐊᒻᒪ ᑐᓴᖃᑎᒌᒃᖢᑎᒃ ᑕᐅᑐᖅᑰᖅᑕᐅᔪᓂᒃ ᐊᓯᔾᔨᑐᐃᓐᓇᕆᐊᓕᖕᓄᑦ, ᐃᓚᓕᐅᔾᔭᐅᓪᓗᑎᒃ ᐃᖅᑲᓇᐃᔭᖅᑎᓄᑦ ᐃᑲᔫᑎᑦ.
ᐅᑭᐅᖅᑕᖅᑐᒥ ᓇᐅᑦᑎᖅᓱᖅᑎᑦ ᐊᒻᒪ ᒐᕙᒪᒃᑯᑦ ᓄᓇᖁᑎᖓ
ᖃᖓᑦᑎᐊᓕᓴᑦ ᐱᓕᕆᐊᖑᖃᑦᑕᖅᓯᒪᔪᑦ ᐱᔾᔪᑎᓖᑦ ᑲᓇᑕᐅᑉ ᓯᓚᑖᓂᙶᖅᑐᓂᒃ ᐅᕝᕙᓘᓐᓃᑦ ᖃᐅᔨᒪᔭᐅᙱᑦᑐᓂᒃ ᖃᖓᑕᓲᒃᑯᑦ ᐊᒻᒪ ᐃᒪᕐᒥᐅᑕᓂᒃ ᓴᖅᑭᑉᐸᓪᓕᐊᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᓇᓗᓇᐃᖅᓯᓯᒪᕗᑦ ᐱᔾᔪᑕᐅᓗᐊᕐᓂᖏᓐᓂᒃ ᑲᓇᑕᒥ ᐅᔾᔨᕆᔭᐅᔭᕆᐊᖃᕐᓂᖏᓐᓂᒃ ᐅᑭᐅᖅᑕᖅᑐᒥ ᓇᐅᑦᑎᖅᓱᖅᑎᑦ.
ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ ᐊᒻᒪ ᑮᓇᐅᔭᓕᐅᕋᓱᐊᕈᑎᑦ ᐃᑲᔪᖅᓱᐃᔾᔪᑎᑦ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᒻᒪ ᓄᓇᖁᑎᖃᕐᓂᕐᒧᑦ ᑐᓴᐅᒪᑎᑕᐅᔭᕆᐊᖃᖅᐳᑦ ᐱᔭᐅᔭᕆᐊᓕᖕᓂᒃ ᐊᒻᒪ ᐱᓕᕆᐊᒃᑯᒥᒋᔭᐅᔪᓂᒃ ᐅᑭᐅᖅᑕᖅᑐᒥᐅᓄᑦ ᐊᒻᒪ ᐋᖅᑭᒃᓯᓗᑎᒃ ᐊᐅᓚᑦᑎᓂᕐᒧᑦ ᐊᔪᙱᓐᓂᕆᔭᐅᔪᓂᒃ ᐅᑭᐅᖅᑕᖅᑐᒥ ᐊᒻᒪ ᐅᑭᐅᖅᑕᖅᑐᒥ.
ᐅᑭᐅᖅᑕᖅᑐᖅ ᓄᓇᒥᐅᑕᓂᒃ ᐊᑐᖅᑐᒃᓴᓂᒃ ᐱᕐᔪᐊᒻᒪᕆᐊᓘᕗᖅ ᑲᓇᑕᐅᑉ ᓯᕗᓂᒃᓴᖓᓄᑦ ᐊᒻᒪ ᓴᓗᒪᔪᒥᒃ ᑮᓇᐅᔭᓕᐅᕈᑎᒃᓴᖃᖅᖢᑎᒃ. ᐅᐊᓕᓂᕐᒥ ᓯᕗᓕᖅᑏᑦ ᒐᕙᒪᑐᖃᒃᑯᓐᓂᑦ ᒪᕐᕈᐃᓕᖓᔪᓂᑦ ᐊᑐᖁᓪᓗᒋᑦ ᐱᕈᖅᓴᐃᔾᔪᓯᑦ ᑲᓇᑕᒥᑦ ᓴᐳᔾᔭᐅᓂᕐᒥᑦ ᓇᖕᒥᓂᖃᕐᓂᕐᒥᓪᓗ, ᐃᑲᔪᖅᑐᐃᓂᐊᕐᒥᔪᑦᑕᐅᖅ ᐱᕙᓪᓕᐊᓂᕐᒧᑦ ᐱᕕᒃᓴᓂᑦ ᐅᑭᐅᖅᑕᖅᑐᒥᑦ ᓴᙱᔫᓗᓂᓗ, ᐊᓯᔾᔨᖅᓴᕋᐃᓪᓗᓂ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ.
ᓄᓇᓕᖕᓂ ᐊᑦᑕᕐᓇᖅᑕᐃᓕᒪᓂᖅ
ᓯᕗᓕᖅᑏᑦ ᐱᓕᕆᐊᒃᓴᖃᖅᑐᑦ ᐱᐅᓯᒋᐊᖅᑎᑦᑎᓂᕐᒥᒃ ᐊᑦᑕᕐᓇᖅᑕᐃᓕᒪᓂᕐᒥᒃ ᖃᓄᐃᙱᑦᑎᐊᕐᓂᕐᒥᒡᓗ ᐊᑭᓐᓇᖓᓂ ᑲᓇᑕᐅᑉ ᓄᓇᓕᖏᓐᓂ. ᐊᑐᓂ ᐱᔪᓐᓇᕐᓂᖃᕐᕕᐅᔪᑦ ᐱᓕᕆᐊᖃᖅᑐᑦ ᐱᕋᔭᖃᑦᑕᖅᑐᑦ ᓄᖅᑲᖅᑎᓐᓇᓱᒡᓗᒋᑦ, ᑮᓇᐅᔭᓕᐅᕋᓱᐊᖅᖢᑎᒃ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᐅᐃᕆᓯᒪᔪᓄᑦ ᐃᑲᔪᖅᑐᐃᔾᔪᑎᓂᒃ, ᐊᒻᒪ ᐱᐅᓯᒋᐊᖅᑎᓪᓗᒋᑦ ᐊᑦᑕᕐᓇᖅᑕᐃᓕᒪᓂᖅ, ᐱᓗᐊᖅᑐᒥᒃ ᐊᒃᑐᖅᑕᐅᓴᕋᐃᑦᑐᓄᑦ ᓄᓇᓕᖕᓄᑦ, ᐃᓚᓕᐅᔾᔭᐅᓪᓗᑎᒃ ᓴᖅᑭᑕᐅᓗᑎᒃ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᖅᑕᐅᓲᑦ ᐊᒻᒪ ᐊᕐᓇᐃᑦ/ᐊᖑᑎᑦ ᒪᓕᒃᖢᒋᑦ ᐋᓐᓂᖅᓯᖅᑕᐅᕙᒃᑐᑦ, ᐊᒻᒪ ᐋᓐᓂᖅᓯᕆᖃᑦᑕᕐᓂᖅ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ, ᓂᕕᐊᖅᓵᓂᒃ, ᐊᒻᒪ ᐃᖅᑭᓕᖕᓄᑦ ᐃᓄᖕᓄᑦ.
ᐅᐊᓕᓂᕐᒥ ᓯᕗᓕᖅᑏᑦ ᑎᓕᐅᕆᔪᑦ ᒐᕙᒪᑐᖃᒃᑯᓐᓂᑦ ᐱᓕᕆᖃᑎᖃᑦᑎᐊᖁᔨᓪᓗᑎᒃ ᑲᓇᑕᐅᑉ ᐊᕕᒃᑐᖅᓯᒪᔪᖁᑎᖏᓐᓂᑦ ᐅᑭᐅᖅᑕᖅᑐᒥᓪᓗ ᐊᕕᒃᑐᖅᓯᒪᔪᓂᑦ ᓴᖅᑭᓪᓗᒋᑦ ᓄᓇᖃᖅᑳᖅᓯᒪᔪᑦ ᐸᓖᓯᓕᕆᓂᕐᒧᑦ ᒪᓕᒐᖏᑦ.
ᐅᐊᓕᓂᕐᒥ ᓯᕗᓕᖅᑏᑦ ᐊᔭᐅᖅᑐᐃᓯᒪᔪᑦ ᐊᓯᔾᔨᖁᔨᓪᓗᑎᒃ ᓴᙱᒃᑎᒋᐊᕐᓗᒍ ᑲᓇᑕᐅᑉ ᐊᓂᖅᓵᖅᑑᑎᖏᑦ. ᓯᕗᓕᖅᑏᑦ ᐊᐃᑦᑖᕈᓱᒻᒪᕆᒃᐳᑦ ᐊᓯᔾᔨᖅᑕᐅᔪᒪᔪᑦ ᐱᕋᔭᒃᑐᓄᑦ ᒪᓕᒐᓄᑦ ᑲᔪᓯᑎᑕᐅᓚᐅᙱᒻᒪᑕ. ᐱᒻᒪᕆᐅᕗᖅ ᒐᕙᒪᑐᖃᒃᑯᑦ ᓯᕗᓪᓕᐅᔾᔨᓗᑎᒃ ᐊᒻᒪᓗ ᑲᔪᓯᑎᑦᑎᓗᑎᒃ ᐋᖅᑭᒋᐊᕈᑎᓂᒃ ᐱᐅᓯᕚᓕᖁᓪᓗᒍ ᐊᓂᑦᑎᔾᔪᑎᐅᔪᖅ ᐊᒻᒪᓗ ᑐᕌᒐᖃᕐᓗᑎᒃ ᐋᓐᓂᖅᑎᕆᖃᑦᑕᓂᕐᒥᒃ ᐱᕋᔭᒃᐸᒃᑐᓂᒃ ᐊᒻᒪᓗ ᐱᒻᒪᕆᐊᓗᖕᓂᒃ ᐱᕋᔭᖕᓂᐅᔪᓂᒃ ᖁᑭᐅᑎᓂᒃ ᐊᒻᒪᓗ ᐊᓯᖏᓐᓂᒃ ᓱᒋᐅᑎᓂᒃ. ᐅᐊᓕᓂᕐᒥ ᓯᕗᓕᖅᑏᑦ ᐊᖏᖅᓯᒪᓂᖃᖅᑐᑦ ᓴᐳᔾᔨᓂᕐᒥᑦ ᑲᓇᑕᒥᐅᓂᑦ ᐋᓐᓂᖅᑎᕆᓂᕐᒧᑦ, ᐅᖃᐅᓯᖃᕐᓂᕐᒥᑦ ᑕᒪᐃᓐᓂᑦ ᓄᓇᓕᐸᐅᔭᕐᓂᑦ ᓄᓇᓕᐸᐅᔭᕐᓂᓪᓗ ᐱᕋᔭᖕᓂᕐᒧᑦ, ᐱᓕᕆᖃᑎᖃᕐᓂᕐᒥᓪᓗ ᒐᕙᒪᑐᖃᒃᑯᓐᓂᑦ ᐅᖃᐅᓯᖃᕐᓂᕐᒥᑦ ᑭᒡᒐᖅᑐᖅᑕᐅᓗᐊᕐᓂᖏᓐᓂᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑎᒍᔭᐅᒪᕕᖕᓂᑦ. ᐸᓖᓯᓕᕆᓂᖅ ᐃᓚᒋᔭᐅᓪᓗᐊᑕᖅᐳᖅ ᑭᒃᑯᑐᐃᓐᓇᐃᑦ ᖁᐊᖅᓵᕐᓇᖅᑐᒦᖁᓇᒋᑦ ᐅᐊᓕᓂᕐᒥᐅᓪᓗ ᓯᕗᓕᖅᑎᖏᑦ ᐱᓕᕆᖃᑎᖃᖁᓪᓗᒋᑦ ᑲᓇᑕᒥ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᑭᐅᓯᔪᒪᓪᓗᑎᒃ ᐸᓖᓯᓂᒃ ᐊᒥᒐᖅᓯᓂᐅᕙᒃᑐᓂᒃ ᐃᓚᒋᔭᐅᓪᓗᑎᒃ ᐱᑐᐃᓐᓇᐅᙱᑦᑐᑦ ᐱᓕᕆᕝᕖᑦ. ᑎᓕᐅᕆᕙᒃᑭᕗᑦ ᒐᕙᒪᑐᖃᒃᑯᓐᓂᑦ ᐱᓕᕆᐊᖃᖁᓪᓗᒋᑦ ᐊᖏᒡᓕᕙᓪᓕᐊᔪᒥᒃ ᐊᑲᐅᙱᓕᐅᕈᑎᒋᔭᐅᔪᒥᒃ ᐃᓛᒃᑰᖅᑐᓂᒃ ᖁᑭᐅᑎᓂᒃ ᓴᓇᔭᐅᓯᒪᔪᓂᒃ, ᐃᓚᒋᔭᐅᓪᓗᑎᒃ "ᖁᑭᐅᑎᙳᐊᑦ" ᓴᓇᔭᐅᓯᒪᔪᑦ 3D−ᓂᒃ ᑎᑎᕋᖅᓯᒪᓕᖅᑎᑦᑎᔾᔪᑎᓂᒃ.
ᑐᐹᖅᑕᐅᑎᓪᓗᒋᑦ ᒫᓐᓇᕋᑖᖅ ᐱᓂᕐᓗᖕᓂᐅᕋᑖᓚᐅᖅᑐᑦ ᐊᒃᑐᐃᓂᖃᖅᑐᑦ ᓄᓇᓕᖕᓂᑦ ᐊᒻᒪᓗ ᐸᓖᓯᓂᑦ, ᐅᐊᓕᓂᕐᒥᑦ ᓯᕗᓕᖅᑏᑦ ᐊᖏᖅᓯᒪᓂᖃᖅᑐᑦ ᓯᕗᓪᓕᐅᔾᔨᓂᕐᒥᑦ ᐸᓖᓯᖃᙱᑦᑐᓂᑦ ᓴᐳᔾᔨᔪᓂᑦ ᑭᒃᑯᑐᐃᓐᓇᕐᓂᑦ ᐊᒻᒪᓗ ᓯᕗᓪᓕᐅᔪᓂᑦ ᑭᐅᔨᓂᑦ.
ᐅᐊᓕᓂᕐᒥ ᓯᕗᓕᖅᑏᑦ ᐃᑲᔪᖅᑐᐃᔪᑦ ᓄᓇᓕᖕᒥᑦ ᒐᕙᒪᓂᑦ ᑭᒡᒐᖅᑐᐃᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑮᓇᐅᔭᑎᒍᑦ ᐃᑲᔪᐃᓂᕐᒥᒃ ᐊᑭᐅᔪᓄᑦ ᑐᕌᖓᔪᑦ ᑭᖑᓪᓕᖅᐹᓄᑦ ᐸᓖᓯᒃᑯᑦ ᐊᖏᖃᑎᒌᒍᑎᖏᓐᓄᑦ ᐊᒻᒪᓗ ᓂᕆᐅᒃᖢᑎᒃ ᑲᓇᑕᐅᑉ ᒐᕙᒪᒃᑯᖏᑦ ᐅᖃᖃᑎᖃᕐᓂᐊᕐᓂᖏᓐᓄᑦ ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓂᑦ ᐊᒻᒪᓗ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ ᐱᔾᔪᑎᖃᖅᑐᓂᒃ ᓯᕗᓂᒃᓴᒥᑦ ᐃᓚᐅᖃᑕᐅᔪᓂᒃ ᐊᖏᖃᑎᒌᒍᑎᓂᒃ ᓴᖅᑭᑦᑎᔪᓂᒃ ᑮᓇᐅᔭᑎᒍᑦ ᐊᑐᖅᑕᐅᔭᕆᐊᖃᖅᑐᓂᒃ ᑲᓇᑕᐅᑉ ᐊᕕᒃᑐᖅᓯᒪᔪᖏᓐᓄᑦ, ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᖏᓐᓄᑦ, ᐅᕝᕙᓘᓐᓃᑦ ᕼᐋᒻᒪᓚᐅᔪᓄᑦ.
ᔫᑳᓐ ᓇᓗᓇᐃᖅᑕᐅᓚᐅᖅᐳᖅ ᑲᑎᒪᑎᑦᑎᔨᐅᓂᐊᓕᕐᓂᖓᓂᒃ ᑭᖑᓪᓕᕐᒥ ᐅᐊᓕᓂᕐᒥ ᓯᕗᓕᖅᑏᑦ ᑲᑎᒪᓕᕐᒥᒃᐸᑕ 2024−ᒥ.