ᑕᓪᓕᒪᑦ ᐃᓕᓐᓂᐊᕐᕖᑦ ᓂᕈᐊᖅᑕᐅᓯᒪᔪᑦ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ

ᐃᖃᓗᐃᑦ, ᓄᓇᕗᑦ (ᒪᐃ 15, 2023) – ᐃᓕᓐᓂᐊᕐᓂᓕᕆᔨᒃᑯᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐊᔪᕐᓇᙱᒻᒪᖔᑦ ᐊᑐᓕᖅᑎᑦᑎᓂᐊᕐᓗᓂ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᐃᓕᓐᓂᐊᕈᑎᖏᓐᓂᒃ ᓄᓇᕗᒻᒥ.

ᓇᓄᖅ ᐃᓕᓐᓂᐊᕐᕕᒃ (ᓂᐊᖁᙴ), ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᒃ (ᐃᒡᓗᓕᒑᕐᔪᒃ), ᖃᖅᑲᓕᒃ ᐃᓕᓐᓂᐊᕐᕕᒃ (ᑭᒻᒥᕈᑦ), ᔨᒥ ᕼᐃᑯᒃ ᐃᓕᕼᐊᒃᕕᒃ (ᖁᕐᓗᖅᑐᖅ), ᐊᒻᒪ ᐃᓄᒡᓚᒃ ᐃᓕᓐᓂᐊᕐᕕᒃ (ᑎᑭᕋᕐᔪᐊᖅ) ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᐆᒃᑑᑕᐅᓛᖅᑐᑦ ᐅᑭᐊᒃᓵᖅ ᐱᒋᐊᕐᓗᒍ.

ᑖᒃᑯᐊ ᐃᓕᓐᓂᐊᕐᕖᑦ ᓂᕈᐊᖅᑕᐅᓚᐅᖅᐳᑦ ᓯᕗᓪᓕᖅᐹᒥ ᐱᓕᕆᐊᖑᓂᐊᖅᑐᒧᑦ ᑐᙵᕕᖃᖅᖢᑎᒃ ᐊᑭᑐᔪᑦ ᓄᑖᙳᕆᐊᖅᑕᐅᔪᑦ ᐊᑐᓂ ᐃᑲᔪᖅᑐᐃᔭᕆᐊᖃᕋᔭᕐᒪᑕ ᐱᓕᕆᐊᒥᒃ ᑭᒡᒐᖅᑐᕐᓗᒋᓪᓗ ᐊᑐᓂ ᐊᕕᒃᑐᖅᓯᒪᔪᓂ.

ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐹᒥᓚ ᕼᐊᑯᖓᒃ ᒍᕉᔅ, ᐃᓚᒋᓪᓗᒋᑦ ᐃᖃᓗᐃᑦ-ᓂᐊᖁᙴᒧᑦ ᒪᓕᒐᓕᐅᖅᑎ ᐊᒻᒪ ᓯᕗᓕᖅᑎ ᐲᔭᐃ. ᐊᕿᐊᕈᖅ, ᑲᑐᔾᔨᖃᑎᒌᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓂᐊᖁᙴᒥᓗ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑲᑎᓚᐅᖅᑐᑦ ᓇᓄᖅ ᐃᓕᓐᓂᐊᕐᕕᒻᒥ ᓂᐊᖁᙴᒥ ᑕᖅᑭᐅᑉ ᐱᒋᐊᖓᕐᓂᖓᓂᑦ ᑕᑯᓇᓱᐊᕐᓂᕐᒥᑦ ᓴᓇᒋᐊᖅᑕᐅᕋᑖᖅᑐᓂᑦ ᐃᑲᔪᖅᑐᕐᓂᕐᒥᑦ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᓂᑦ.

"ᐅᒃᐱᕈᓱᒃᑲᑦᑕ ᐊᑑᑎᖃᕐᓂᖓᓂᒃ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᓂᒃ ᐃᑲᔪᖅᓱᐃᔾᔪᑎᒃᓴᓂᒃ ᐱᕙᓪᓕᐊᑎᑕᐅᔪᓄᑦ ᐊᒻᒪ ᐅᖃᐅᓯᓕᕆᓵᓕᓐᓇᖅᑐᓄᑦ ᐃᓕᓐᓂᐊᖅᑎᓄᑦ, ᐱᕚᓪᓕᖅᑎᓪᓗᒋᓪᓗ ᐱᓕᕆᐊᖑᖔᕈᓐᓇᖅᑐᑦ ᐱᕕᒃᓴᐃᓪᓗ ᐃᖅᑲᓇᐃᔭᖅᑎᓪᓗᒋᑦ ᐊᖓᔪᖅᑳᑦ ᐊᒻᒪ ᐃᓚᒌᑦ," ᐅᖃᓚᐅᖅᐳᖅ ᒥᓂᔅᑕ ᒍᕉᔅ. "ᐊᓕᐊᓇᐃᑦᑎᐊᓚᐅᖅᑐᖅ ᑕᑯᓪᓗᓂ ᐃᓕᓐᓂᐊᓕᓵᖅᑐᑦ ᐃᓕᓐᓂᐊᖅᑏᑦ ᓇᓄᖅ ᐃᓕᓐᓂᐊᕐᕕᖕᒥ ᑎᑎᕋᐅᔭᖅᑎᓪᓗᒋᑦ ᐃᓄᒃᑎᑐᑦ ᖃᓂᐅᔮᖅᐸᐃᑐᑦ ᐳᓛᖅᓯᒪᑎᓪᓗᑕ ᐊᑐᖅᖢᑕ ᐅᓄᖅᑐᓂᒃ ᐃᓄᒃᑐᑦ ᐱᔾᔪᑎᒃᓴᓂᒃ ᐊᑐᐃᓐᓇᐅᔪᓂᒃ."

ᐱᔾᔪᑎᖓ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐃᓚᖃᖅᐳᖅ ᓇᓗᓇᐃᖅᓯᓂᕐᒥᒃ ᐱᓕᕆᕝᕕᖕᒥ ᐃᑲᔫᑎᒃᓴᓂᒃ ᐱᔭᐅᔭᕆᐊᓕᖕᓂᒃ ᐃᑲᔪᖅᓱᐃᓂᕐᒧᑦ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᐱᓕᕆᐊᒃᓴᖏᓐᓂᒃ, ᖃᐅᔨᓴᕐᓂᕐᒥᒃ ᐱᓕᕆᐊᒃᓴᒥᒃ, ᐃᓕᑦᑎᓂᕐᒥᒃ ᖃᓄᖅ ᐱᓕᕆᐊᖑᔪᖅ ᑐᕌᖓᑎᒋᖕᒪᖔᑦ ᐃᓅᓯᓪᓚᑦᑖᒧᑦ ᑕᑯᓐᓇᙳᐊᖅᑕᐅᔪᓄᑦ, ᐱᐅᓯᒋᐊᖅᑎᖦᖢᒋᑦ ᐱᓕᕆᐊᒃᓴᑦ ᓴᖅᑭᑕᐅᓚᐅᙱᓐᓂᖏᓐᓂᒃ, ᐊᒻᒪ ᓂᐅᕕᕐᓗᑎᒃ ᐊᒃᑐᐊᓂᓕᖕᓂᒃ ᓇᖕᒥᓂᖃᖃᑕᐅᔪᓂᒃ. ᐊᑯᓂᐅᓂᖅᓴᒃᑯᑦ, ᐱᓕᕆᕝᕕᐅᔪᖅ ᕿᒥᕐᕈᓂᐊᕐᒥᔪᑦ ᐊᒃᑐᐃᓂᐅᕙᒃᑐᓂᑦ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᐱᓕᕆᐊᕐᒥ ᐃᓄᒃᑐᑦ ᐅᖃᐅᓯᕐᒥᑦ ᐃᓕᓐᓂᐊᕐᓗᑎᒃ ᐃᓕᓐᓂᐊᓕᓵᕐᓂᖏᓐᓂᒡᓗ.

ᑲᔪᓯᑦᑎᐊᕐᓂᖓ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᐆᒃᑐᕋᖅᑕᐅᓂᐊᖅᑐᖅ ᑭᐅᔭᐅᓂᒃᑯᑦ ᐃᓕᓴᐃᔨᓂᑦ ᖃᑕᙳᑎᒌᓂᒡᓗ. ᑖᒃᑯᐊ ᑐᓴᖅᑕᐅᔪᑦ ᖃᐅᔨᔾᔪᑕᐅᓂᐊᖅᐳᑦ ᐱᓕᕆᐊᖑᖃᑦᑕᕐᓂᐊᕐᒪᖔᑕ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᑦ ᐃᓕᓐᓂᐊᓕᓵᖅᑐᓂᒃ ᓄᓇᕘᓕᒫᒥ.