ᓯᕗᓕᖅᑎ ᑭᐅᕗᖅ ᐃᓄᖕᓂᒃ ᐃᖅᑲᓇᐃᔭᖅᑎᓂᒃ ᐊᖏᖃᑎᒌᒃᑎᑦᑎᓇᓱᖕᓂᕐᒧᑦ ᐃᓱᒪᓕᐅᕈᑕᐅᔪᓂᒃ

ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᖃᐅᓯᒃᓴᒥᑦ ᑭᐅᓪᓗᓂ ᐊᖏᖃᑎᒌᒃᑎᑦᑎᓇᓱᒃᑎᓄᑦ ᐃᓱᒪᓕᐊᖑᓚᐅᖅᑐᒥᒃ ᐅᖃᓕᒫᖅᓯᒪᔪᒥᑦ 23−ᒥᑦ ᐱᔾᔪᑎᓕᒃ ᐃᓄᐃᑦ ᐃᖅᑲᓇᐃᔭᖕᓂᖏᑦ ᒐᕙᒪᒃᑯᓐᓂᑦ:

“ᓄᓇᕗᑦ ᒐᕙᒪᖓ (GN) ᐱᔪᒪᓂᖃᑦᑎᐊᖅᐳᑦ ᐱᕙᓪᓕᐊᑎᑦᑎᔪᒪᓪᓗᑎᑦ ᐃᖅᑲᓇᐃᔭᖅᑎᔅᓴᖃᕐᓂᕐᒥᑦ ᑭᒡᒐᖅᑐᐃᔪᓐᓇᑦᑎᐊᖁᓪᓗᒋᑦ ᓄᓇᕗᑦ ᐃᓄᒋᐊᓐᓂᖏᑦ ᒪᓕᓪᓗᒋᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂᑦ, ᐅᖃᖅᓯᒪᓂᖓ ᒪᓕᓪᓗᒍ ᑎᑎᕋᖅᓯᒪᔪᖅ 23ᒥᑦ ᓄᓇᕗᒻᒥ ᐊᖏᕈᑎᒥᒃ. ᐱᓕᕆᖃᑎᖃᐃᓐᓇᖅᐳᒍᑦ ᓄᓇᕗᑦ ᑐᙵᕕᒃᑯᓐᓂᒃ. ᓄᓇᕗᑦ ᑐᙵᕕᒃᑯᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᑦ ᑐᕌᒐᒃᓴᕗᑦ ᓯᕗᒻᒧᐊᒃᑲᓐᓂᖁᓪᓗᒋᑦ ᑕᒪᑐᒧᖓ.

ᓄᓇᕗᑦ ᒐᕙᒪᒃᑯᑦ ᓴᖅᑭᑦᑎᕙᓪᓕᐊᖏᓐᓇᕐᓂᐊᖅᐳᑦ ᐊᑐᓕᖅᑎᑦᑎᕙᒡᓗᑎᒡᓗ ᓇᓗᓇᐃᖅᓯᒪᔪᓂᒃ, ᓇᓗᓇᐃᖅᓯᒪᔪᓂᒃ, ᐊᒻᒪ ᐱᓇᔪᒍᑕᐅᔪᓂᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑎᓂᒃ ᑐᕌᒐᖃᖅᑐᓂᒃ ᐅᓄᖅᓯᕚᓪᓕᖅᑎᖦᖢᒋᑦ ᐃᓄᐃᑦ ᐃᓚᐅᖃᑦᑕᖅᑐᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ ᑭᒡᒐᖅᑐᐃᔪᓄᑦ.
ᐃᑲᔪᖅᑐᕐᓂᐊᕐᓗᒋᑦ ᑖᒃᑯᐊ ᐸᕐᓇᐅᑎᑦ, ᒐᕙᒪᕗᑦ ᓴᖅᑭᑦᑎᓯᒪᓕᖅᑐᑦ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖏᓐᓂᒃ ᐃᓄᖕᓂᒃ ᓯᕗᓕᖅᑎᙳᒃᑲᓐᓂᖁᓪᓗᒋᑦ. ᓯᕗᓪᓕᐅᔾᔨᓯᒪᔪᒍᑦ ᐃᓪᓗᑖᖅᑎᑕᐅᓂᖏᓐᓂᑦ ᐃᖅᑲᓇᐃᔭᖅᑏᑦ ᐃᓪᓗᖁᑎᖏᓐᓂᑦ ᓇᓗᓇᐃᖅᓯᓂᕐᒥᑦ ᐊᑯᓂᐅᔪᒧᑦ ᐃᖅᑲᓇᐃᔮᖃᐃᓐᓇᕐᓂᐊᖅᑐᓂᑦ ᐃᓄᓐᓂᑦ ᐃᖅᑲᓇᐃᔭᖅᑎᓂᑦ ᐅᑕᖅᑭᔪᓂᑦ ᐱᔾᔪᑎᒋᑦᓱᒍ ᐊᑐᐃᓐᓇᐅᓂᖏᓐᓄᑦ ᐃᖅᑲᓇᐃᔭᖅᑎᓄᑦ ᐃᓪᓗᐃᑦ. ᓯᕗᓪᓕᖅᐸᐅᑦᑎᐅᔾᔨᓯᒪᕗᒍᑦ ᑎᒃᑯᐊᖅᓯᓯᑲᐅᑎᒋᓂᕐᒥᒃ ᐃᓄᖕᓂᒃ ᐅᓄᕐᓂᖅᓴᓂᒃ ᐃᖅᑲᓇᐃᔭᖅᑎᓪᓚᕆᙳᖁᓪᓗᒋᑦ. ᕿᓂᕐᒥᔪᒍᑦ ᖃᓄᖅ ᐃᑲᔪᖅᑐᐃᒍᓐᓇᕐᒪᖔᑦᑕ ᓯᐊᒻᒪᖅᑎᕆᓂᕐᒥᒃ ᐊᒻᒪᓗ ᐱᑕᖃᖅᑎᑦᓯᑲᓐᓂᕐᓗᑕ ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓂᒃ ᐃᖅᑲᓇᐃᔭᕈᓐᓇᖁᓪᓗᒋᑦ ᓇᑭᑐᐃᓐᓇᖅ ᓄᓇᓕᓐᓂ ᐃᓗᐊᓂ ᒐᕙᒪᒃᑯᑦ ᓄᓇᕗᒻᒥ ᐊᓪᓚᕝᕕᖏᓐᓂ.

ᐊᖏᖅᐸᕗᑦ ᐊᖏᖃᑎᒌᒃᑎᑦᑎᓇᓱᒃᑎᐅᑉ ᖃᐅᔨᔭᖏᑦ ᒫᑦᓯ 25−ᒥᑦ ᐃᓱᒪᓕᐊᖑᓚᐅᕐᑐᒥᑦ. ᓄᓇᕗᑦ ᒐᕙᒪᒃᑯᖏᑦ ᐊᖏᖅᓯᒪᔪᑦ ᑭᐅᓂᐊᕐᓗᑎᒃ ᐅᓪᓗᑦ 60 ᐃᓗᐊᓂᑦ ᓄᓇᕗᑦ ᑐᙵᕕᒃᑯᑦ ᑐᒃᓯᕌᖏᓐᓄᑦ ᐋᖅᑭᒋᐊᕈᑎᒃᓴᓂᑦ, ᐅᖃᐅᓯᖃᒃᑲᓐᓂᓛᖅᖢᑕᓗ ᑕᐃᑲᓂ."