ᓯᕗᓕᖅᑎ ᐊᕿᐊᕈᖅ ᓇᓗᓇᐃᖅᓯᔪᖅ ᐱᓗᐊᖑᐊᖅᑐᓂᒃ ᑎᒃᑯᐊᖅᑕᐅᔪᓂᒃ

ᐱᕙᓪᓕᐊᔪᑦ ᑐᓴᕋᑦᓴᑦ

ᓯᕗᓕᖅᑎ ᐊᕿᐊᕈᖅ ᓇᓗᓇᐃᖅᓯᔪᖅ ᐱᓗᐊᖑᐊᖅᑐᓂᒃ ᑎᒃᑯᐊᖅᑕᐅᔪᓂᒃ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 22, 2021) − ᓯᕗᓕᖅᑎ ᐱᔭᐃ ᐊᕿᐊᕈᖅ ᖁᕕᐊᑦᑐᖅ ᓇᓗᓇᐃᖅᓯᒍᓐᓇᕋᒥ ᑎᒃᑯᐊᖅᑕᐅᓂᖏᓐᓂᒃ ᔫ ᑯᓄᒃ ᓯᕗᓕᖅᑎᒧᑦ ᐊᓪᓚᑦᑎᐅᓂᖓᓂ ᐊᒻᒪᓗ ᕗᔨᓂᐊ ᒨᓐᔅ ᒥᓂᔅᑕᐅᑉ ᑐᒡᓕᐊᓄᑦ ᒐᕙᒪᓕᕆᔨᒃᑯᓐᓄᑦ ᐊᒻᒪᓗ ᒥᓂᔅᑕᐅᖃᑎᒌᓄᑦ ᑎᑎᕋᖅᑎᐅᓂᕐᒧᑦ, ᒫᓐᓇᑲᐅᑎᒋ ᐱᒋᐊᕐᓗᑎᒃ.

“ᖁᔭᓕᔪᖓ ᒥᔅᑕ ᑯᓄᒃ ᐃᑲᔪᕐᓂᐊᕐᖓᑦ ᑐᑭᒧᐊᖅᑎᓪᓗᓂᖓ ᐃᓂᑖᖅᑲᐅᕆᔭᓐᓂ. ᖃᐅᔨᒪᓂᖏᑦ ᐊᑑᑎᒋᓯᒪᔭᖏᓪᓗ ᐊᑑᑎᖃᑦᓯᐊᕐᓂᐊᖅᑐᑦ,” ᐅᖃᖅᓯᒪᔪᖅ ᓯᕗᓕᖅᑎ ᐊᕿᐊᕈᖅ. “ᒥᔅ ᒨᓐᔅ ᐱᓕᕆᑦᓯᐊᖅᓯᒪᔪᒻᒪᕆᒃ ᐃᓂᒋᓚᐅᖅᑕᒥᓂ, ᖁᕕᐊᒻᒪᕆᑦᑐᖓᓗ ᑐᕌᒐᕆᓂᐊᓕᕋᒃᑯ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᐅᓚᑦᓯᔨᖏᓐᓄᓪᓗ.”

ᒥᔅᑕ ᑯᓄᒃ ᐱᔨᑦᓯᕋᖃᑦᑕᖅᓯᒪᔪᖅ ᐊᒥᓱᓂ ᖁᑦᑎᑦᑐᓂ ᐃᓂᐅᔪᓂ, ᐃᓚᒋᔭᐅᓪᓗᓂ ᐊᔾᔨᒌᙱᑦᑐᓂ ᐊᖏᔪᖅᑲᐅᑎᑦ ᐃᖅᑲᓇᐃᔮᖏᓐᓂ ᓄᓇᕗᑦ ᒐᕙᒪᒃᑯᖏᓐᓂ, ᐊᐅᓚᑦᓯᔨᒻᒪᕆᐅᓯᒪᓪᓗᓂ ᐃᓄᐃᑦ ᓯᓚᕐᔪᐊᒥ ᑲᑎᒪᔨᖏᓐᓄᑦ ᒫᓐᓇᒫᖑᓚᐅᖅᑐᕐᓗ ᐊᔩᖅᑎᓄᑦ ᐊᖏᔪᖅᑳᖑᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ. 2018-ᒥᓂᑦ, ᒥᔅ ᒨᓐᔅ ᓯᕗᓕᖅᑎᒧᑦ ᑎᑎᕋᖅᑎᐅᓯᒪᔪᖅ ᓯᕗᓕᖅᑎ ᓴᕕᑲᑖᕐᒧᑦ, ᐊᒻᒪᓗ ᒥᓂᔅᑕᐅᑉ ᑐᒡᓕᐊᓄᑦ ᐃᑲᔪᖅᑎᐅᓯᒪᔪᖅ ᒐᕙᒪᓕᕆᔨᒃᑯᓐᓄᑦ, ᐱᓕᕆᐊᑦᓴᖃᖅᑐᓂ ᖃᓄᖅᑑᕐᓂᒃᑯᑦ ᐊᑐᐊᒐᓕᕆᓂᕐᒧᑦ ᐸᕐᓇᐃᓂᕐᒧᑦ ᑐᑭᒧᐊᖅᑎᑦᓯᓂᕐᒧᓪᓗ ᓄᓇᕗᑦ ᒐᕙᒪᒃᑯᖏᓐᓄᑦ.

ᔨᐊᕝ ᑦᓴᐅᓐ ᐅᑎᖅᑐᖅ ᐃᓂᖓᓄᑦ ᒥᓂᔅᑕᒧᑦ ᑐᒡᓕᐅᓂᕐᒧᑦ ᑮᓇᐅᔭᓕᕆᔨᒃᑯᓐᓄᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ ᐊᐅᓚᑦᓯᓂᕐᒧᑦ ᑲᑎᒪᔨᖏᓐᓄᑦ ᑎᑎᕋᖅᑎᐅᓂᕐᒧᑦ, ᒥᓂᔅᑕᒧᑦ ᑐᒡᓕᐅᓚᐅᖅᑐᓂ ᒐᕙᒪᓕᕆᔨᒃᑯᓐᓄᑦ ᐊᒻᒪᓗ ᒥᓂᔅᑕᐅᖃᑎᒌᓄᑦ ᑎᑎᕋᖅᑎᐅᓚᐅᖅᑐᓂ ᓯᑎᐱᕆᒥᓂᑦ.

“ᖁᔭᓐᓇᒦᕈᒪᔭᕋ ᒥᔅᑕ ᑦᓴᐅᓐ ᐱᓕᕆᑦᓯᐊᓚᐅᕐᓂᖓᓄᑦ ᑎᑭᐅᑎᕙᓪᓕᐊᑎᓪᓗᒋᑦ ᐊᒻᒪᓗ ᒐᕙᒪᐃᑦ ᐊᓯᔾᔨᖅᐸᓪᓕᐊᑎᓪᓗᒋᑦ. ᐊᑑᑎᖃᑦᓯᐊᖅᓯᒪᔪᖅ ᐱᒋᐊᓕᖅᑎᓪᓗᖓ ᐃᓂᒋᔭᕐᓂᒃ, ᑲᔪᓯᑦᓯᐊᕈᔾᔭᐅᖁᕙᕋ ᐅᑎᕐᓂᐊᖅᑎᓪᓗᒍ ᑮᓇᐅᔭᓕᕆᔨᒃᑯᓐᓄᑦ,” ᐅᖃᖅᓯᒪᔪᖅ ᓯᕗᓕᖅᑎ ᐊᕿᐊᕈᖅ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎᐅᑲᐃᓐᓇᖅᑐᖅ
ᓯᕗᓕᖅᑎ ᐊᕿᐊᕈᖅ ᐊᓪᓚᕝᕕᖓ
867-975-5059
cmacleod6@gov.nu.ca