ᓄᓇᕗᑦ ᐲᕐᓯᓛᓕᕐᑐᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑐᐊᕕᕐᓇᖅᑐᖅ ᐊᐃᕆᓕ 11-ᒥᑦ

ᐃᖃᓗᐃᑦ, ᓄᓇᕗᑦ (ᐊᐃᕆᓕ 6, 2022) − ᔮᓐ ᒪᐃᓐ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᓄᓇᕗᑦ ᒐᕙᒪᒃᑯᖏᑦ ᐲᕐᓯᓛᓕᕐᒪᑕ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑐᐊᕕᕐᓇᕐᓂᖓᓂ, ᐱᒋᐊᕐᓗᓂ ᐊᐃᕆᓕ 11. ᑕᐃᒪᓕ, ᑕᒪᖕᒥᑦᑎᐊᖅ ᐊᒥᐊᒃᑯᐃᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑭᒡᓕᒋᔭᐅᔪᑦ ᓄᓇᕗᒻᒥᑦ ᓄᖅᑲᖅᑎᑕᐅᓂᐊᕐᓕᕐᑐᑦ.


“ᐊᕐᕌᒎᖕᓄ ᒪᕐᕉᖕᓄ, ᓄᓇᕗᒻᒥᐅᑦ ᐊᒥᓱᐊᓗᖕᓂᑦ ᓴᒃᑯᑦᑎᓯᒪᔭᕆᐊᖃᓚᐅᕐᑐᑦ ᓴᐳᔾᔨᓂᐊᕐᖢᑎᒃ ᓄᓇᓕᑦᑎᓐᓂᑦ ᐅᓗᕆᐊᓇᖅᑐᒥᑦ ᓄᕙᒡᔪᐊᕐᓇᖅ-19−ᒧᑦ. ᐅᓪᓗᒥ, ᐃᓕᑦᑎᓯᒪᒻᒪᕆᓕᕐᑐᒍ ᑖᑉᓱᒥᖓ ᖁᐱᕐᕈᐊᕐᔪᖕᒥᑦ ᖃᓄᐃᓕᐅᕈᑎᖃᓕᕐᖢᑕᓗ, ᓲᕐᓗ ᖃᐅᔨᓴᕐᑕᐅᓂᖕᓂᑦ ᓇᓖᕌᒐᒃᓴᑦ ᐋᓐᓂᐊᓕᕇᒃᑯᑎᓪᓗ ᐃᑲᔫᑎᔪᐃᑦ ᐊᑦᑕᕐᓇᓗᐊᕈᓐᓃᕐᓂᖓᓂᑦ,” ᐅᖃᓚᐅᕐᑐᖅ ᒥᓂᔅᑕ ᒪᐃᓐ. “ᐅᖃᖃᑎᒋᐊᓪᓚᓚᐅᕐᖢᒍ ᓄᓇᕘᑉ ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᐊ, ᓄᓇᕗᑦ ᒐᕙᒪᒃᑯᖏᑦ ᐅᒃᐱᕈᓱᖕᒪᑕ ᐅᓗᕆᐊᓇᕈᓐᓃᕐᒪᑦ ᐲᕐᑕᐅᓗᑎᒃ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑐᐊᕕᖕᓇᕐᓂᖓ ᐊᐅᓚᓐᓂᐊᕐᓗᒍᓗ ᓄᕙᒡᔪᐊᕐᓇᖅ-19 ᓲᕐᓗ ᑕᐃᒪᐃᑦᑐᑐᐃᓐᓇᕐᑐᖅ ᐊᐃᑦᑑᑕᐅᕙᒃᑐᑎᑐ ᖃᓂᒻᒪᓯᕐᑐᑦ.”

ᐱᒋᐊᕐᓗᓂ ᐊᐃᕆᓕ 11, 2022:

  • ᒪᑐᐊᕐᓯᒪᔭᕆᐊᖃᕈᓐᓃᖅᑐ ᑭᒃᑯᑐᐃᓇᑦ.
    • ᓇᖕᒥᓂᖁᑎᒋᔭᐅᔪᖅ ᓱᓕ ᐃᖅᑲᓇᐃᔭᕐᑎᒥᓂ ᐱᔨᑦᑎᕐᑕᒥᓂᓪᓗ ᒪᑐᐊᕐᓯᒪᖁᔨᔪᓐᓇᕐᑐᑦ.
    • ᓄᓇᕗᑦ ᒐᕙᒪᒃᑯᖏᑦᑕ ᑎᑎᕋᕐᕕᖏᓐᓂᑦ ᒪᑐᐊᕐᓯᒪᖃᑦᑕᕆᐊᓕᑦ.
    • ᒪᑐᐊᕐᓯᒪᔭᕆᐊᖃᓪᓚᕆᒃᑐᑦ ᐋᓐᓂᐊᕕᖕᓂᑦ, ᐃᓐᓇᒃᑯᕕᖕᓂᑦ, ᐊᑲᐅᓯᓴᕐᕕᖕᒥᑦ, ᐋᓐᓂᐊᕕᓕᐊᕐᓯᒪᔪᓂ ᐊᒻᒪᓗ ᐃᖃᓗᐃᑦ ᐅᖁᒪᐃᓐᓂᖕᓂᐊᕐᕕᐊᓂᑦ.
  • ᑭᒡᓕᖃᖅᑎᑕᐅᙱᑦᑐᖅ ᑲᑎᓐᓂᕆᔭᐅᕙᒃᑐᓂᑦ.
  • ᑭᒡᓕᖃᖅᑎᑕᐅᙱᑦᑐᑦ, ᓲᕐᓗ ᐃᓄᒋᐊᖕᓂᖏᓐᓂᑦ ᐅᖓᓯᒋᐊᖃᕐᓂᖏᓐᓂᑦ, ᓇᖕᒥᓂᖁᑎᒋᔭᐅᔪᓂᑦ, ᕿᑎᒃᕕᖕᓂᑦ, ᑕᑯᔭᒐᖃᕐᕕᖕᓂᑦ, ᐅᖃᓕᒫᒐᖃᕐᕕᖕᓂᑦ, ᕿᒥᕐᕈᓇᒡᕕᖕᓂᓪᓗ.
  • ᐊᓂᑦᑕᐃᓕᔭᕆᐊᖃᕈᓐᓃᑦᑐᑦ ᓄᕙᒡᔪᐊᕐᓇᖅ-19−ᖃᕐᑐᐃᑦ. ᐃᓄᒃ ᖃᓂᒪᒃᐸᑦ ᓄᕙᒡᔪᐊᕐᓇᖅ-19−ᖃᕐᓗᓂᓘᓐᓃᑦ, ᐊᐃᓯᒪᒋᐊᖃᖅᐳᖅ.
  • ᓄᓇᕗᑦ ᒐᕙᒪᒃᑯᖏᑦ ᐅᓂᒃᑳᓕᐅᖃᑦᑕᔾᔮᕈᓐᓃᕐᑐᑦ ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎᓕᑦ ᐊᒥᓲᓂᖏᓐᓂᓪᓘᓐᓃᑦ ᓯᓚᒡᑕᓂ ᐱᔭᕆᐊᓕᑐᐃᓐᓇᕐᑐᑦ ᐅᓂᒃᑳᓕᐊᖑᕙᒃᑐᑐ ᖃᓂᒻᒪᓯᕐᓂᑦ.
  • ᐋᓐᓂᐊᕕᓕᐊᕐᑐᓄᑦ ᐊᓂᑦᑕᐃᓕᒪᕝᕕᐅᓲᑉ ᒪᑐᔪᑦ.
    • ᐋᓐᓂᐊᕕᓕᐊᕐᓯᒪᔪᑦ ᓄᕙᒡᔪᐊᕐᓇᖅ-19−ᓕᑦ ᐊᓯᐊᓂᖔ ᐊᓂᑦᑕᐃᓕᕝᕕᖃᕐᓂᐊᕐᑐᑦ ᒪᓕᒃᓗᑎᒃ ᒪᓕᒋᐊᓕᖏᓐᓂᑦ ᐱᔪᓐᓇᖕᓂᖃᕐᕕᒋᔭᓂᑦ.

“ᑭᒡᓕᖃᖅᑎᑕᐅᔪᓐᓃᕋᓗᐊᕐᑎᓪᓗᓂ, ᓄᕙᒡᔪᐊᕐᓇᖅ-19 ᐱᑕᖃᕈᓐᓃᙱᑦᑐᖅ,” ᐅᖃᓚᐅᕐᑐᖅ ᓘᒃᑖ ᒪᐃᑯ ᐹᑐᓴᓐ, ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᒃ. “ᑲᔪᖏᖅᓴᕐᐸᒃᑲ ᓄᓇᕗᒻᒥᐅᓕᒫᑦ ᐅᔾᔨᖅᓱᑦᑎᐊᖏᓐᓇᕐᓗᑎᒃ ᓴᐳᑎᓯᒪᓗᑎᒃ ᐃᒻᒥᓂᒃ, ᐃᓚᒥᓂᒃ, ᓄᓇᓕᖁᑎᖏᓐᓂᓪᓗ. ᑕᐃᒪᓕ ᐊᐃᓯᒪᓗᑎᑦ ᖃᓂᒪᒍᕕᑦ, ᒪᑐᐊᕐᓯᒪᓗᑎ ᐱᔭᕆᐊᖃᕌᖓᑦ ᐊᒻᒪᓗ ᑲᑎᖃᑕᐅᙱᓪᓗᑎᒃ ᓄᕙᒡᔪᐊᕐᓇᖅ-19−ᓕᖕᒥᑦ ᖃᓂᓐᓂᕈᕕᑦ. ᑲᔪᖏᕐᓱᖅᐸᒃᑲ ᓄᓇᕗᒻᒥᐅᓕᒫᑦ ᑲᐱᔭᐅᖁᓪᓗᒋᑦ. ᐋᓐᓂᐊᓕᕇᒃᑯᑎ ᐊᑲᐅᓛᑦ ᓴᐳᑎᓂᐊᕐᓗᑕ ᖁᐱᕐᕈᐊᕐᔪᖕᒥᑦ.”


ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎᑦ ᐊᑐᐃᓐᓇᐅᔪᑦ ᓄᓇᕗᓕᒫᒥ ᓄᓇᕗᒻᒥᐅᓕᒫᓄᑦ ᐅᑭᐅᓕᑦ 5 ᐅᖓᑖᓄᓪᓗ. ᐋᓐᓂᐊᕐᕕᖕᒧᑦ ᐅᖁᒪᐃᓐᓂᖕᓂᐊᕐᕕᖕᒧᓪᓘᓐᓃᑦ ᐅᖃᓛᑐᐃᓐᓇᕐᓗᓯ ᐃᓂᒃᓴᓕᐅᖅᑕᐅᔪᒪᓗᓯ.


ᓄᓇᕗᑦ ᒐᕙᒪᒃᑯᖏᑦᑕ ᓄᕙᒡᔪᐊᕐᓇᖅ-19−ᒧᑦ ᐊᓂᑦᑕᐃᓕᓂᖕᒧᑦ ᓂᕿᓂ ᐃᑲᔪᐃᓐᓇᕐᓂᐊᕐᑐᑦ ᑭᓯᐊᓂ ᒪᐃ ᓄᙳᓐᓇᓱᖕᓂᖓᓂ. ᓄᓇᕗᒻᒥᐅᑦ ᐃᕐᖐᓈᖅᑕᐅᑎᒃᑯᑦ ᑎᑎᕋᕈᓐᓇᕐᑐᑦ isolationSupports@gov.nu.ca ᐱᒋᐊᕐᓂᐊᕐᓗᑎᒃ.


ᑭᓯᐊᓂ ᖃᐅᔨᒃᑲᖅᑕᐅᒃᑲᓐᓂᓚᐅᖅᑎᓪᓗᒋᑦ, ᓄᓇᕗᑦ ᒐᕙᒪᒃᑯᑦ ᐊᐅᓚᑦᑏᓐᓇᕐᓂᐊᖅᐳᑦ ᑐᑭᓯᒋᐊᒐᒃᓴᖏᓐᓂᒃ ᑕᑯᒋᐊᖅᑕᐅᔪᓐᓇᖅᑐᓂᒃ ᐃᑲᔪᖅᓱᐃᔾᔪᑎᒃᓴᑦ ᓄᓇᕗᒥᐅᓄᑦ. ᓄᕙᒡᔪᐊᕐᓇᖅ-19 ᐱᔾᔪᑎᒋᓗᒋᑦ ᐊᐱᖅᑯᑎᑦ, ᐃᓚᒋᔭᐅᓪᓗᑎᒃ ᑐᑭᓯᒋᐊᒐᒃᓴᑦ ᐋᓐᓂᐊᕈᑕᐅᖃᑦᑕᖅᑐᑦ, ᖃᐅᔨᓴᕈᑎᑦ, ᑲᒪᒋᔭᐅᔾᔪᑎᑦ ᐊᒻᒪ ᐅᖃᐅᔾᔪᖅᓱᖅᑕᐅᔾᔪᓯᑦ ᖃᓂᒻᒪᓯᖅ ᓯᐊᒻᒪᒃᑎᑦᑕᐃᓕᓗᒍ, ᐅᕗᖓ ᐅᖄᓚᔪᓐᓇᖅᐳᓯ 1-888-975-8601 10:00-ᒥ ᐅᓪᓛᒃᑯᑦ 8:00-ᒧᐊᖅᓴᓂᖓᓄᑦ ᐅᓐᓄᒃᑯᑦ ᑲᓇᖕᓇᐅᑉ ᖃᐅᔨᓴᐅᑖ ᒪᓕᒡᓗᒍ.


ᑐᑭᓯᒋᐊᕈᒪᒍᔅᓯ ᐊᐅᓪᓚᖃᑦᑕᕐᓂᖕᒧᑦ ᒪᓕᒃᑕᐅᔭᕆᐊᓕᖕᓂᑦ, ᐅᖃᓗᒃᓗᑎᑦ ᐊᐅᓪᓚᕐᓂᖕᒧ ᐅᖄᓚᕕᖕᒧᑦ 1-833-524-0735 9 ᐅᓪᓛᒥᑦ 5−ᓗ ᐅᓐᓄᒃᓴᐅᑉ ᐊᑯᓐᓂᖓᓂ ᑲᓇᖕᓇᖓᓂ, ᓇᒡᒐᔾᔭᒥᑦ ᐅᓪᓗᑐᐃᓐᓇᒧᑦ.


ᓄᕙᒡᔪᐊᕐᓇᖅ-19−ᒧᑦ ᐊᐱᖅᑯᑎᑐᐃᓐᓇᕐᓄᑦ, ᐋᓐᓂᐊᕕᖕᓄᑦ ᐅᖃᓗᒃᑕᐃᓕᒋᔅᓯ, ᐅᖁᒪᐃᓐᓂᕐᓂᐊᕐᕕᖕᒧᓪᓘᓐᓃᑦ ᑭᓯᐊᓂ ᑐᐊᕕᖕᓇᖅᐸᑦ. ᑐᑭᓯᒋᐊᕈᒪᑐᐃᓐᓇᕐᑐᑦ ᓄᕙᒡᔪᐊᕐᓇᖅ-19 ᒥᒃᓵᓄ ᐊᐅᓪᓚᖃᑦᑕᕐᓂᖕᒧᓪᓗ, ᐅᖃᓗᒡᕕᒋᓗᒋᑦ ᐅᖄᓚᕕᒃᓴᐃᑦ ᖁᓛᓃᑦᑐᑦ. ᖃᓄᐃᒃᑯᕕᑦ ᖃᐅᔨᓴᖅᑕᐅᔭᕆᐊᖃᕐᓗᑎᓪᓗ, ᐅᖃᓗᒋᑦ ᓄᕙᒡᔪᐊᕐᓇᖅ-19−ᒧᑦ ᐅᖄᓚᕕᖕᒧᑦ ᐅᕝᕙᓘᓐᓃᑦ ᐊᑐᕐᓗᑎᑦ ᓇᖕᒥᓂᖅ ᖃᐅᔨᓴᕈᑎᓂᑦ ᐊᑐᐃᓐᓇᐅᔪᑦ ᓄᓇᕗᒻᒥᑦ ᓂᐅᕕᖅᑎᒃᑯᑎᒍ.


ᒥᓂᔅᑕ ᒪᐃᓐ, ᒫᒡᒍᓛ ᓇᑲᓱᒃ, ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ, ᐊᒻᒪᓗ ᓘᒃᑖᖅ ᐹᑐᓴᓐ ᐱᕙᓪᓕᐊᔪᓂᒃ ᑐᓴᖅᑎᑦᑎᓛᕐᑐᑦ ᖃᕆᑕᐅᔭᒃᑯᑦ ᕿᑎᖅᑰᒻᒥᑦ, ᐊᐃᕆᓕ 7 11−ᒧᐊᕐᐸᑦ ᐅᓪᓛᒃᑯᑦ.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᑯᕆᔅ ᐴᒡᓕᐊ ᐊᐅᓚᑦᑎᔨ,
ᑐᓴᒐᒃᓴᓕᕆᔨᒃᑯᓐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca