ᒪᐃ 2, 2023 ᐋᑐᕚ, ᐋᓐᑎᐅᕆᐅ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᑎᑎᕋᕐᕕᖓ
ᐅᓪᓗᒥ, ᑲᓇᑕᐅᑉ ᐊᖓᔪᖅᑳᕐᔪᐊᖓ, ᔭᔅᑎᓐ ᑐᕉᑑ, ᐊᒻᒪ ᓯᕗᓕᖅᑎ ᓄᓇᕗᒻᒧᑦ, ᐸᐅᓗᓯ ᐊᕿᐊᕈᖅ ᐅᑯᓂᖓ ᑲᑐᔾᔨᓪᓗᑎᒃ ᐅᖃᐅᓯᖃᖅᑲᐅᕗᑦ:
"ᐅᓪᓗᒥ ᑲᑎᒪᑎᓪᓗᑕ ᐱᕙᓪᓕᐊᑎᑦᑎᖅᑲᐅᔪᒍᑦ ᐃᓚᖏᓐᓂᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᓯᔾᔩᓪᓚᕆᖕᓂᐊᖅᑐᓂᒃ ᓄᓇᕗᒻᒥᐅᑦ ᐃᓅᓯᖏᓐᓂ, ᓄᓇᕗᒻᒥᐅᑕᑦ. ᒪᕐᕉᒃ ᒐᕙᒪᓕᕆᔩᒃ ᑲᑎᒪᓚᐅᖅᐴᒃ ᐃᓚᒋᔭᐅᓪᓗᓂ 'ᓄᓇᕗᑦ ᒪᓕᒐᓕᐅᕐᕕᒡᔪᐊᖓᓂ', ᐅᓪᓘᖕᓄᑦ ᒪᕐᕉᖕᓄᑦ ᐳᓛᕐᖢᑎᒃ ᒪᓕᒐᓕᐅᕐᕕᒡᔪᐊᕐᒧᑦ ᓄᓇᕘᑉ ᒥᓂᔅᑕᖏᑦ ᑲᑎᒪᖃᑕᐅᓪᓗᑎᒃ ᒐᕙᒪᑐᖃᒃᑯᓐᓂ. ᐱᓗᐊᖅᑐᒥ ᐃᓪᓗᓕᕆᓂᖅ, ᐋᓐᓂᐊᖅᑐᓕᕆᓂᖅ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᐅᑭᐅᖅᑕᖅᑐᒥ ᓴᐳᔾᔨᓂᖅ ᐊᒻᒪ ᓇᖕᒥᓂᖃᕐᓂᖅ, ᐊᒻᒪ ᓄᓇᕗᒻᒥ ᓴᙱᓂᖅᑖᖅᑎᑕᐅᓂᖅ, ᒐᕙᒪᕗᑦ ᒪᓕᒃᐳᑦ ᐊᖏᖅᓯᒪᓪᓗᑎᒡᓗ ᐱᓕᕆᖃᑎᒌᒍᒪᓪᓗᑎᒃ ᓴᖅᑮᓪᓚᑦᑖᖁᓪᓗᒋᑦ ᓄᓇᕗᒻᒥᐅᓄᑦ ᐅᖓᑖᓄᓪᓗ.
"ᐃᓅᓯᖅ ᐱᐅᓯᕚᓪᓕᖅᑎᓐᓂᐊᕐᓗᒍ ᐃᓄᖕᓄᑦ ᐱᒋᐊᕈᑎᖃᖅᐳᖅ ᑭᒃᑯᓕᒫᑦ ᐊᑦᑕᕐᓇᙱᑦᑐᒥᑦ ᐊᑭᑐᓗᐊᙱᑦᑐᒥᒡᓗ ᐃᓂᖃᖅᑎᓪᓗᒋᑦ. ᑮᓇᐅᔭᓂᒃ ᐊᑐᕐᓗᑕ ᐊᒻᒪ ᐱᓕᕆᖃᑎᒌᒡᓗᑕ ᐃᒡᓗᑭᒃᓴᕐᓂᖅ ᐃᓱᓕᑎᑦᑐᓐᓇᖅᐸᕗᑦ, ᐱᐅᓯᒋᐊᖅᑎᓪᓗᒋᑦ ᐃᓄᐃᑦ ᖃᓄᐃᙱᑦᑐᑦ ᐃᑲᔪᖅᑐᐃᓗᑕᓗ ᒪᒥᓴᕐᓂᕐᒥᒃ. ᓄᓇᕗᑦ ᐋᖅᑭᒃᓯᓯᒪᓕᖅᑐᑦ ᐸᕐᓇᐅᑎᒥᒃ ᐱᓕᕆᖃᑎᖃᕈᒪᓪᓗᑎᒃ ᐃᓄᖕᓂᒃ, ᑲᓇᑕᐅᑉ ᒐᕙᒪᖓᓂ, ᐊᒻᒪ ᓴᓇᕝᕕᖕᓂ ᐱᓕᕆᔨᐅᖃᑕᐅᔪᓂᒃ ᐃᒡᓗᓕᐅᖃᑎᖃᕈᒪᔪᓂᒃ 3,000-ᓂᒃ ᓄᓇᕘᒥ 2030-ᒧᑦ ᑎᑭᓪᓗᒍ. ᑖᒃᑯᐊ ᐱᓕᕆᖃᑎᒌᒃᑐᑦ ᐱᕕᖃᖅᑎᑦᑎᓯᒪᕗᑦ ᓄᓇᕗᑦ ᒐᕙᒪᖓᓂ ᓴᓇᓯᒋᐊᕈᓐᓇᖅᖢᑎᒃ 150−ᓂᒃ ᓄᑖᓂᒃ ᐃᒡᓗᓂᒃ ᑕᒪᑐᒪᓂ ᐊᕐᕌᒍᒥ. ᓄᓇᕘᑉ ᐸᕐᓇᐅᑎᖏᑦ ᑲᓇᑕᐅᑉ ᑮᓇᐅᔭᖅᑑᑎᒃᓴᖏᓐᓂ 2023−ᒥ ᒪᓕᒃᐳᑦ, ᑐᓴᖅᑎᑦᑎᓚᐅᖅᑐᑦ $4 ᐱᓕᐊᓐ−ᑲᓐᓂᕐᓂᒃ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐊᑐᓕᖅᑎᑦᑎᔪᒪᓪᓗᑎᒃ ᓄᓇᓕᒡᔪᐊᖑᓂᖅᓴᓂᒃ, ᓄᓇᓕᒡᔪᐊᖑᙱᑦᑐᓂᒃ, ᐊᒻᒪ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᐃᒡᓗᓕᕆᓂᕐᒧᑦ ᐸᕐᓇᐅᑎᖓᓂᒃ, ᒫᓐᓇ ᐱᕙᓪᓕᐊᑎᑦᑎᖃᑎᖃᖅᖢᑎᒃ ᓄᓇᖃᖅᑳᖅᓯᒪᔪᑦ ᐱᓕᕆᔨᐅᖃᑎᖏᓐᓂᒃ. ᑖᓐᓇ ᐸᕐᓇᐅᑎ ᐱᔾᔪᑎᖃᖅᐳᖅ ᐱᔭᕇᕈᑕᐅᖁᓪᓗᒍ ᒫᓐᓇ ᐊᔾᔨᒌᙱᓐᓂᖏᑦ−ᑐᙵᕕᒋᓪᓗᒋᑦ ᐃᒡᓗᓕᕆᓂᕐᒧᑦ ᐸᕐᓇᐅᑎᓕᖕᓂᑦ ᐃᑲᔫᑕᐅᔪᓐᓇᖅᖢᑎᒡᓗ ᐊᓂᒍᕈᑕᐅᓗᑎᒃ ᓄᓇᕘᒥ ᐃᒡᓗᓕᕆᓂᕐᒧᑦ ᑐᕌᒐᖏᓐᓄᑦ.
"ᑲᓇᑕᒥ, ᖃᐅᔨᒪᔪᒍᑦ ᖃᓄᖅ ᐱᒻᒪᕆᐅᑎᒋᖕᒪᖔᑦᑕᒪᐃᓐᓄᑦ ᓄᓇᕐᔪᐊᓕᒫᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᔾᔪᓯᕐᓄᑦ ᓴᙱᔫᖏᓐᓇᕐᓂᐊᕐᓗᓂ. ᑭᓯᐊᓂ ᐱᓕᕆᔾᔪᓯᕗᑦ ᐊᑑᑎᖃᕆᐊᖃᕐᒪᑦ ᑭᒃᑯᓕᒫᓄᑦ. ᓄᓇᕗᒻᒥ ᓄᓇᓕᖕᓂ ᐋᓐᓂᐊᕖᑦ ᒪᑐᓯᒪᔭᕆᐊᖃᓕᖅᐳᑦ ᐃᖅᑲᓇᐃᔭᖅᑎᑭᒃᓴᕐᓂᖏᓐᓄᑦ, ᐊᒻᒪ ᓱᓕ ᐊᔪᕐᓇᖅᑐᖅᓯᐅᕈᑕᐅᒃᑲᓐᓂᖅᖢᓂ ᐋᓐᓂᐊᕕᖕᒥ ᑲᒪᒋᔭᐅᑎᑦᑎᒋᐊᒃᓴᖅ ᓄᓇᓕᖕᓄᑦ ᖃᖓᑕᓲᒃᑯᑦ ᑭᓯᐊᓂ ᐅᐸᒃᑕᐅᔪᓐᓇᖅᑐᓂᒃ. ᐃᓚᒋᔭᐅᓪᓗᓂ ᑲᓇᑕᐅᑉ ᒐᕙᒪᖏᑕ ᖃᖓᑦᑎᐊᖅ, ᐊᖏᔪᑲᓪᓚᖕᒥᒃ ᑮᓇᐅᔭᓕᐅᕈᑕᐅᓇᓱᒃᑐᓂᑦ ᐱᐅᓯᒋᐊᖅᑎᑦᑎᔪᒪᓪᓗᓂ ᐋᓐᓂᐊᕐᕕᖕᒥ ᑲᒪᒋᔭᐅᕙᒃᑐᓂᑦ ᐃᓄᖕᓄᑦ − ᐅᓄᖅᓯᒋᐊᖅᖢᒋᑦ ᑮᓇᐅᔭᓕᐅᕈᑕᐅᓇᓱᒃᑐᑦ $198−ᐱᓕᐊᓐ ᐅᖓᑖᓄᑦ ᐊᕐᕌᒍᓄᑦ ᖁᓕᓄᑦ ᐊᑐᕐᓂᐊᖅᑐᓄᑦ − ᑲᓇᑕᒥ ᒐᕙᒪᒃᑯᑦ ᓄᓇᕗᒻᒥᓗ ᐅᖃᖃᑎᒌᒃᐸᓪᓕᐊᖏᓐᓇᕐᓂᐊᖅᐳᑦ ᐋᓐᓂᐊᖅᑐᓕᕆᓂᕐᒧᑦ ᓅᑎᑕᐅᔪᓄᑦ ᐊᖏᖃᑎᒌᒍᑕᐅᔪᓄᓪᓗ ᐊᖑᒻᒪᑎᔪᓄᑦ ᐊᕕᒃᑐᖅᓯᒪᔪᓂ ᐊᔾᔨᖃᙱᑦᑐᓄᑦ ᖃᓄᐃᓕᖓᓂᖏᓐᓂ, ᐃᑲᔪᖅᑐᐃᓗᑎᒃ ᓄᓇᕗᒻᒥᐅᓂᒃ ᐃᓐᓇᕈᖅᐸᓪᓕᐊᔪᓂᒃ, ᐃᓐᓇᐃᑦ ᐊᖏᕐᕋᒥᓂᒃ ᐱᑦᑎᐊᓕᔪᓐᓇᑦᑎᐊᕐᓗᑎᒃ, ᐊᒻᒪ ᓯᕗᓪᓕᐅᑎᔭᕆᐊᓕᖕᓂᒃ ᐋᖅᑭᒃᓱᐃᕙᒡᓗᑎᒃ ᑲᑎᖅᓱᖅᑕᐅᔪᓂᒃ ᐋᓐᓂᐊᖅᑐᓕᕆᓂᐅᑉ ᒥᒃᓵᓄᑦ ᑐᑭᓯᒋᐊᕈᑎᓂᒃ ᑲᒪᒋᔭᐅᑦᑎᐊᕈᓐᓇᕐᓂᖅᓴᐅᖁᓪᓗᒋᑦ ᓄᑖᖑᓂᖅᓴᓂᓪᓗ ᐋᓐᓂᐊᖃᕐᓇᙱᑦᑐᓕᕆᔨᑦ ᒪᑭᒪᔾᔪᑎᖏᓐᓂᒃ.
"ᑲᓇᑕᐅᑉ ᐱᓇᔪᒃᑕᖏᑦ ᓴᐳᒻᒥᓗᒍ ᐅᑭᐅᖅᑕᖅᑐᖅ ᓯᒡᔭᖓ ᐃᓚᐅᑎᑦᑎᖏᓐᓇᕆᐊᓕᒃ ᐅᑭᐅᖅᑕᖅᑐᒥᐅᑦ ᐃᓱᒪᒋᔭᖏᓐᓂ. ᑲᓇᑕᒥ ᐊᒻᒪ ᐊᒥᐊᓕᒐᐃᑦ ᓄᓇᖓᓐᓂ ᓄᑖᙳᕆᐊᖅᑎᑦᑎᑎᓪᓗᒋᑦ ᐊᒥᐊᓕᒐᑦ ᐅᐊᖕᓇᖓᓂ ᖃᖓᑕᓲᓕᕆᔨᒃᑯᓐᓂ ᐊᖓᔪᖅᑳᖓᓂ, ᐱᓕᕆᖃᑎᖃᕐᓂᐊᖅᐳᑦ ᐱᓕᕆᖃᑎᒌᒃᑐᓂᒃ, ᓄᓇᓕᖕᓂ, ᐊᓯᖏᓐᓂᒡᓗ ᒐᕙᒪᓂᒃ, ᓇᓗᓇᐃᖅᓯᖁᓪᓗᒋᑦ ᓄᑖᑦ ᐊᐅᓚᔪᓐᓇᐅᑎᑦ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ ᒪᓕᑦᑎᐊᖁᓪᓗᒋᑦ ᐊᒻᒪ ᐃᑲᔪᖅᑐᐃᓗᑎᒃ ᑮᓇᐅᔭᓕᐅᕋᓱᖕᓂᕐᒧᑦ ᐋᖅᑭᒋᐊᕈᑎᒃᓴᓂᒃ ᐃᓄᖕᓄᑦ.
"ᒐᕙᒪᕗᑦ ᐱᓕᕆᖃᑎᒌᖏᓐᓇᖅᐳᑦ ᐱᓕᕆᖃᑎᒋᔭᒥᓂᒃ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎᒥᒃ ᓄᓇᕗᑦ ᒐᕙᒪᒃᑯᓐᓂ ᐱᔪᓐᓇᐅᑎᖃᖅᑎᑦᑎᓇᔭᖅᑐᒥᒃ ᐊᐅᓚᑦᑎᔪᓐᓇᕐᓂᕐᒥᒃ ᑭᒃᑯᑐᐃᓐᓇᑦ ᓄᓇᖁᑎᖏᓐᓂᒃ, ᐃᒪᑦᑎᐊᕙᖕᒥᒃ, ᐊᒻᒪ ᓄᓇᒥᙶᖅᑐᓂᒃ. ᓇᓕᐊᑐᐃᓐᓇᖅ ᐊᖏᖃᑎᒌᒍᑕᐅᓯᒪᔪᖅ ᐃᑲᔪᖅᑐᐃᓇᔭᖅᐳᖅ ᑲᔪᓯᑦᑎᐊᖅᑐᒥᒃ ᓅᑉᐸᓪᓕᐊᓂᕐᒥᒃ ᐅᑯᖕᓄᙵ, ᒐᕙᒪᒃᑯᑦ ᐊᐅᓚᑦᑎᔨᖏᓐᓄᑦ ᐊᓯᔾᔨᖅᑕᐅᓯᒪᔪᒧᓪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᓄᓇᕗᒻᒥᐅᑦ ᐱᔪᓐᓇᐅᑎᖏᓐᓂ ᐃᒃᐱᒍᓱᑦᑎᐊᕋᔭᖅᐳᑦ.
"ᑖᒃᑯᐊ ᓯᕗᓪᓕᐅᔾᔭᐅᓯᒪᔪᑦ ᐅᖓᑖᓄᓪᓗ, ᒐᕙᒪᕗᑦ ᐱᓕᕆᖃᑎᒌᖏᓐᓇᕐᓂᐊᖅᐳᑦ ᑎᑭᐅᑎᓇᓱᒡᓗᑎᒃ ᓴᖅᑭᑕᐅᔪᓐᓇᓪᓚᕆᒃᑐᓂᑦ ᓄᓇᕗᒥᐅᓄᑦ ᐊᒻᒪ ᑲᓇᑕᒥᐅᓕᒫᓄᑦ."