Iqaluit, Nunavut (April 28, 2023) – Nunavut Igluliqiijirjuatkut Kuapuraisinga (NHC mik naunaittut) taapkuatlu NCC Development Limited (NCCD) quviahuktut uqariami sainiutaa titiraujarnirmun-igluqhanut kaantraanggit nappaktiriami 150 nik nutaanik igluqhanik tamaani aitngujut (8) Nunavut nunagijainni. Nappaktiriniaqtut Ukiaqhami 2023.
Titiraujarnirmun-igluqhanut kaantraanggit ilaudjutigijait 2023-24 Inungnut Igluqhainnut Tuniqhainikkut Upalun’ngaijaidjutaata ataani Igluliuqatigiingniq, naunaijautigijauhimajuqlu imaa Nunavut 3000 Ihumaliutqiqtaujuqhaq.
Titiraujarnirmun-igluqhanut aivaktait nappaktirinirmun kaantraanggit 132 igluqhanik avataani Iqaluit ilaliutigiplugitlu 20 nutaanik igluqhanik tamainni Arviat, Kangiqlinir, Qamanittuaq, Ikpiarjuk, Uqhuqtuuq, Talojoak, ilaliutiplutiklu 12 lunit Iqaluktuuttiamun.
Atauttimut kaantrangmut akinga (unalu piliurninga najugaqhaalu akingit) hapkuat 132 nik igluqhanut $92.5 miliantaala – imaa ivjaqtuq $600 atauhirmut square foot mik nappaktirinirmun akiqhait. Aadlattauq 18 nik igluqhanut an’ngiqtaujutlu Iqalungnut atauttimun kaantraangnikkut akinga $12.8 miliantaala.
"Havaktauriami hapkua titiraujaqhimajut-igluqhanut kaantraanggit 150 nik igluqhanik naammagijaujut hivuniqhaan’nga Nunavut 3000 tautuqtujaagutipluni an’ngijuamik akiqhamun ukiumi tamaat nutaanik igluqhanik ihariahukpiaqtaujunik tamaani nunaptingni”, uqaqtuq NHC kunni Atan’ngujaq An’ngijuqqaaqlu Eiryn Devereaux. “Atauhiq hivuniqhaliurutiqhani talvani Paatnariingnikkut An’ngirutaata taamna NCCD takupkaqtitauviqhamik akia maniliqinikkut ilitturiplugu an’ngijuamik amigaiqjuummirnia piviqhaqariami nutaanik igluqhanik. Kaantraan’nga akia tautuqtuujagutijuq an’ngijuamik ikiqlinirmik nappaktirnirmun akiqhainni aadjikkuhiatigut tunihimajut kampaninit aqhuuqhajut havaaqhamun kaantraaviliqinirmun talvami malruuq ukiuni qan’ngiutihimajuni, ilihimajautiqhaq QALAGJUARNITIGUT-akiit atuqtaujut naunaijautigiplugit aadlatkiingnit akittuutinggit akiqhilaaqjuummiktutun iplutik”.
“Havakvikput aqhuuqtut Inuit-nanminirijaqhainnut Ukiuqtaqtumilu ikajuqtiujit igluqhaliuqlutik Nunavunmiunutlu pilutik. Nunavut 3000 Ihumaliutqiqtaujuqhaq ilaliutilik atuqtauqpiaqtuqhanik nakuuqpiaqtumik ilihaiviqhainnik piviqhaqaqlutik imaa pijaami uvagut hivuliqtiqluta pivallianirmun havauhiiqhanut Inuinnarnut havagumajunut havaariqtuni. Talvalluaqlu, piqaqluta Inuinnarnik havaktiqaqluni tikiutinahuaqlugu 30 pusan aivaktaudjutini paatnavut kaantraanggit inungnut igluqhainnut, takudjutilugulu piviqhaqarnia amigaiqjuummiriami ilihainikkut inuqarniatigutlu pivalliaviqhainnut Inuinnait talvani nappaktirinirmun havaariqtuqhanik havauhiinni”, uqaqtuq NCCD CEO An’ngijuqqaaqlu Clarence Synard. “Una kaantraaqtitaujuq piliurniaqtuqlu amigaittunik piviqhaqarnirmun NCCD kut havaqatigijaamingnik nunallaami avikturviinilu kampaniit havaliriamingnik aadlatkiingni havaarijaqhamun havauhiinni.”
Atauttimun nalautiqhimajuq akia Nunavut 3000 Ihumaliutqiqtauhimajuqhaq qanittuan’ngujuq $2.57 biliantaalamik piliuriami talvunamun 3,000 igluqhanik tamaani nunaptingni tikiutiliqqat 2030, qanittuan’ngujuqlu $890 miliantaala (35 pusan) turaan’ngajut maniliqtuutiqhatigun nanminiqaqtumin qanittuan’ngujuqlu $1.68 biliantaala (65 pusan) turaan’ngajuq maniliqtuutiqhatigun inungnut ikajuutijunit.
Naunaittiagumaguvit taaffuma miqhaatigun Nunavut 3000 Ihumaliutqiqtaujuqhamun, talvunggaulutin, www.igluliuqatigiingniq.ca