Uqaqtittiji, Katujjiluta nainaijaqtaa Inirnikhat unalu “inirningulirniq ihumagittiaqtauluni Nunavumi” imaatun hivulliutijaujukhaq taamna. Havagutikput pitquijuq piliuquipluni angijumik Inirnikhanun angajukhiinnullu munarinikkut parnaqutikhamik atuqtipkailirnirmiklu hivunikhamik piqarluni amigaittunik uqautainnik Inirnikhanin, ilagiiktunin, nunallaanin, paannnarijaujunillu.
Quviahuktunga tuhaqtitiplunga, Uqaqtittijii, havaliqtuq uumunga Parnaqutikhakkut Hulinikkut Hivunikhamun Inirnikhanun Nunavunmi. Kaantraaqtitijugut Iqalungni qaujihaiji Mary Wilman havaqatigijumaplugu Iqalungni-ittunik havagviujuq Lichen Consulting taimailiuriami una ihivriuqhidjutikhaq. Inirniarhimajaqqut nutaaq pidjutikhat Tisaipakkut. Iningnikhat katimayiit ilauliqtut aviktungniini katimadjutini Tunungani Qikiqtaalungmi, Hivuraani Qikiqtaalungmi, Kivallirmi, Kitikmeoni, Ottawamilu. Hivuliq katimadjutit katimayut Kangiqlinirmi, Iidjirurvia 14 unalu 15.
Uqaqtittiji, una ilauniq tunijauliqtuq Inuktut aulapkaqtitauliqtuqlu ikajurutimik Inirnikhanun uqaudjinik Ilisapi Davidee Angingmiuq, Miriam Aglukkaq, unalu Rosemary Sandy.
Tukliq qaujihaidjutikhaat piniaqtait:
• Qiqaijalirvia 8 unalu 9 Iqaluktuutiami
• Havainirmi Qiqaijalirvia 20 Mittimatalingmi
• Qitiqqautijuq 18-19 Iqalungni
• Havainirmi Qiqaijarluarvia 8mi Ottawami
Havaktilluta angmariami takijunik-hivituniqaqtunik munarivingnik aggitijaami inirnikhat nunamingnun, ilihimajugullu piqangittullu havagutikhanik ikajuutikhanilu inirnikhaptiknun hamaniittun tadja. Una parnaqutikhaq qinirniaqtuq ihuarhailuni tahamaniittunik ikajuutinik nunallaani ikajurlugillu Inirnikhat naunaijarlugin pinahuarutikhat havagutikhallu tuniuhimajun GN-kunnin, Inuit Timiqutainnin, haamlatkunnin, ukunanngalu maniliurniarhimangittunin havagviinnin.
Nunavunmiutat inirninguliqtun takujukhat pimmarigharutinik ubluq tamaat inuuhirmingni. Una aullaqtiqtuq qangaraaluk hivuagun ihariagiliqtinnagin aallangajunik munaridjutikhanik. Hivulliuqtaupluta Katujjiluta havagutiptiknin, kavamakput havangniaqtuq pipkaijaami angajuqqaavun ataattiavut anaanattiavullu inirninguliqtaaqtun niamgilutik qajangnaittumilu aihimavingmingni.
Quana, Uqaqtittiji.