Uqaqtittiji, nangiktunga ublumi ilitugipkagianganik maligaliqatigijatka talvuuna Ukiuqtaqtumi Avalunnguanga Katimarjuarutmi, taima nanngadjutivakhimajaga ilauvakama talvani Nuuk, Greenlandmi.
Uqaqtittiji, Yukon Hivuliqti Sandy Silver, Nunatsiarmi Hivuliqti Caroline Cochrane uvangalu tunijauvakhimajugut pidjutikharnik uqagianganik akhurhaidjutikharnik qajangnairutikharnik Kavamakkut Atanniqtuinniqarniq Angirutiqarnikharnik Kanatam Tunnunganirmi.
Talvuuna katimajuarnikkut ilituqhaivakhimajugut piqaqtukharnik maniliqtuutiit ihariagijaujuni aulapkaidjutikhani pipkainikkut aulahimmaaqtaaqtuni auladjutikkut pidjutainnik, nakuujunik ingilradjutikhanik alrujaqtuqtunilu-tuhaumapkaidjutainnik pipkaijaaqtuq malruungnik qanuriliurutikhanik havagutainnik akiraqtuidjutinik nunallaanilu ihariagijainnik.
Uqaqtittiji, naunaijaqhimajavun nunaptikni tautugutaanik amirijaujumik Ukiuqtaqtumik pijumajaptikniklu nunallaani maniliurutikhanik akhuurutikhat nakuutqijaujunik aanniaqtailinikkut munaridjutiknanik, iliharutikhanik piangaijarnikkullu uuktuqvikhanik.
Uqautigivaktavun qanuqtun ihariagijaujun ujaraghiurutit talvannga tununngani Kanadami Ukiuqtaqtumillu pidjutiniaqtuq anginiqaqtumik havagutimik piliurnikkut auladjaritqijaujumullu hivunikhamik. Nunarjuaq qinirhimaliqtuq ukiuqtaqtumun taapkununga piqutikhanun mikhilaaqtirutikhanun nunarjuami ihagiagiinnaqtainnun pivikhanin ikajurutiqangittun qulvahiktuni avatikkut inuuqatigiingnikkullu aturutinik nunagijaujun atuqpaktunullu pijumajainnik.
Uqaqtittiji, nigiukhimaniaqtunga auladjutikharnik havaanganik Kanatam tununganirmi hivuliqtikhat nunarjuamilu havaqatigiiktakharnik panaqatigiikharniklu aulatitijaangat inuuhirikharnik, atuguminaqtunik ihagiahugunaigianganiklu nunaryuaptingni Tununganirmi.
Quana, Uqaqtittijii.