July 12, 2023
Iqaluit, Nunavut
Ublumi Nunavut Hivuliqtia P.J. Akeeagok unalu Hivuliqtiup Tuklia Pamela Hakongak Gross tunijaa una atauttikkut uqauti ilitaridjutikkut pulaarutaanun uumani U.S. Kivgaanun Kanadamun, una Nanngarijaujuq David L. Cohen:
“Tujurumajavun quviahuutigijavun uumunga U.S. Kivgaanun Kanadam pulaarutaanun Nunavunmun talvanga July 9-12mun, 2023. Nanngarijaujuq David L. Cohen nuliangalu Rhonda akhuuqtuk katimaqatigijumavlugin Nunavunmiutat kangiqhijumaplutik aallangajunun atuqpiarutainnun nunallaaptingni.
Una pulaaruti tautuktijuq hakugikhijuummiqtumik pidjutiqatigiingnirnun Nunavunmi United States-milu, pidjutiniaqtuq amigiaqtijuummiqtunik havaqatigiigutinik Ukiuqtaqtumi. Piqaqtugun atauttikkut pijumadjutinik taapkunani imaa hilaup aallanguqtirutaani, atanniqtuidjutini qajangnaidjutikhanilu, ingilradjutikkut, ihariagijaujuni ujaraujani, hapummidjutikkullu atauttikkut atuqpaktaptikni imarnik. Ilitarijumajaralu anginiqarniaq Nunavutip pidjutiqatigiignia Alaskamun taapkunuunga atadjutiptikni Inuinnarni aallanilu ukiuqtaqtuni Nunaqaqqaaqhimajuni nunallaani.
Nanngarijaujun aquijun ilauvaktun uvan Nunavunmi Ublungani hulidjutainnun tunngahuktitauvaktullu Nunavutim Kamisinaanin, Katimajiinnin Maligaliurvingmin, Iqaluit Miijaanin, Kanadamin Angujaqtinguanin, ilaujunillu havagvingnin nunaanin.
Kivgarijaujun aullaarutaa pilik hivuagun uuminga North Americamin Ukiuqaqtumi Ujaraujani Piqutinik Havagvini Maliktakhanik Naunaijautinik Katimadjutimik ihuaqhaqtauhimajun uumanga U.S Havagvianin Amialicami, pihimajuq kingulirmi Aprilmi Iqalungni Kangiqlinirmilu. Una ilauhimajuq pulaarutainnun uumanga U.S. Havagvianin Iqalungnun Mittimatalingmullu Aprilmi, uvanilu U.S. Consul General Iqalungnun aippaangani Akatuupami. Kavamakput niriuktuq aulapkaijaami pidjutiqatigiiptingni uvani U.S. Embassy-mi naammagijaillu paannaqatigiigutit ukunani Americamin nuatqatiptiknin.”