ᑐᐊᕕᕐᓇᖅᑐᓄᑦ ᐱᕙᒌᔭᖅᓯᒪᓂᕐᒧᑦ ᐱᓇᓱᐊᕈᓯᐅᓂᐊᖅᐳᖅ ᒪᐃ 3−ᒥᑦ 9−ᒧᑦ, 2026, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑐᐊᕕᕐᓇᖅᑐᓕᕆᔨᒃᑯᖏᑦ ᑐᓴᖅᑎᑦᑎᕗᑦ ᑎᓕᐅᕆᕗᑦ ᓄᓇᓕᖕᒥᐅᓂᒃ ᓄᓇᕘᓕᒫᒥ ᐊᔪᕐᓇᙱᑦᑐᓂᒃ ᐱᓕᕆᖁᓪᓗᒋᑦ ᐱᕙᒌᔭᖅᓯᒪᔪᒪᓪᓗᑎᒃ ᑐᐊᕕᕐᓇᖅᑐᓄᑦ.
ᓄᓇᕗᒻᒥ, ᐃᓄᑑᓗᑕ ᐊᐅᓪᓚᖃᑦᑕᙱᓪᓗᑕ − ᐱᕙᒌᔭᖅᓯᒪᓪᓗᑕ ᐊᐅᓪᓚᖃᑦᑕᕐᓗᑕ. ᐱᕕᖃᖅᑎᑉᐸᒡᓗᑎᑦ ᐸᕐᓇᐃᓗᑎᑦ, ᐊᖏᕐᕋᖅᓯᓐᓂ ᐊᐅᓪᓚᖅᓯᒪᓗᑎᓪᓘᓐᓃᑦ, ᐊᓯᔾᔩᔪᓐᓇᖅᐳᑎᑦ ᐃᓕᖕᓄᑦ, ᐃᓚᖕᓄᑦ ᓄᓇᓕᖕᓄᓪᓗ.
ᑕᕝᕙᓂ ᐊᕐᕌᒍᒥ ᐱᔾᔪᑕᐅᓂᐊᖅᑐᖅ "ᐱᕙᒌᔭᖅᓯᒪᓗᑎᑦ. ᐊᑦᑕᕐᓇᖅᑐᑦ ᖃᐅᔨᒪᓗᒋᑦ., ᑎᓕᐅᕆᕙᒃᐳᖅ ᑭᒃᑯᑐᐃᓐᓇᓂᒃ ᑐᑭᓯᐅᒪᖁᓪᓗᒋᑦ ᐊᑦᑕᕐᓇᕈᓐᓇᖅᑐᓂᒃ ᐊᕙᑎᒥᓃᑦᑐᓂᒃ ᐱᓕᕆᓗᑎᒡᓗ ᐱᕙᒌᔭᕐᓗᑎᒃ.
ᐱᓇᓱᐊᕈᓯᓕᒫᖅ, ᓄᓇᕗᒻᒥ ᑐᐊᕕᕐᓇᖅᑐᓕᕆᓂᕐᒧᑦ ᐊᐅᓚᑦᑎᔨᑦ ᑐᓴᖅᑎᑦᑎᑲᑕᖕᓂᐊᖅᑐᑦ ᐃᑲᔫᑎᒃᓴᓂᒃ, ᐃᓚᒋᔭᐅᓗᓂ ᓴᖅᑭᑕᐅᓂᖓ ᓄᑖᖅ ᑕᕐᕆᔮᒃᓴᖅ ᖃᓄᖅ ᒫᓃᑉᐳᖔᕈᑎᑦ ᐃᑲᔫᑕᐅᔪᓐᓇᕐᒪᖔᑕ ᐊᑦᑕᕐᓇᙱᑦᑐᒃᑯᑦ ᓄᓇᒃᑯᑦ ᓄᒃᑕᕐᓂᕐᒧᑦ ᑐᓴᐅᒪᖃᑎᒌᖕᓂᕐᒧᓪᓗ ᐅᖓᓯᒃᑐᒦᑦᑐᓄᑦ.
ᐊᖏᕐᕋᑲᖅᑐᑦ ᑎᓕᐅᖅᑕᐅᕗᑦ ᐃᒪᓐᓇ:
ᐅᖃᐅᔾᔨᓗᑎᑦ ᓇᒧᙵᐅᓂᐊᕐᓂᕐᒥᓂᒃ ᐊᐅᓪᓚᓚᐅᙱᓐᓂᖓᓂ.
ᖃᐅᔨᒋᐊᕐᓗᒍ ᓯᓚ ᐊᒻᒪ ᓯᑯ ᖃᓄᐃᓕᖓᓂᖓ.
ᓇᒃᓴᖅᐸᒡᓗᑎᑦ ᓈᒻᒪᒃᑐᓂᒃ ᐱᖁᑎᓂᒃ, ᐃᓚᒋᔭᐅᓗᑎᒃ ᐱᖁᑎᒃᑲᓐᓂᕐᓂᒃ ᐊᑐᕈᓐᓇᑦᑎᐊᖅᑐᒥᒡᓗ ᑐᓴᐅᒪᑎᑦᑎᔾᔪᑎᒥᒃ.
ᑐᐊᕕᕐᓇᖅᑐᖅᓯᐅᑎᓂᒃ ᐱᓯᒪᕙᒡᓗᓯ ᐊᖏᕐᕋᔅᓯᓐᓂ ᐊᐅᓪᓚᖅᓯᒪᓂᐊᖅᑎᓪᓗᑎᑦᓗ.
ᐱᕙᒌᔭᖅᓯᒪᓂᖅ ᐊᔾᔨᒌᙱᑉᐳᖅ ᓄᓇᓕᓕᒫᓂᑦ, ᑭᓯᐊᓂ ᒥᑭᑦᑐᒥᑦ ᐱᓕᕆᓗᓂ ᒫᓐᓇ ᐊᓯᔾᔩᕐᔪᐊᕈᓐᓇᖅᑐᖅ ᐱᔭᕆᐊᖃᓪᓚᕆᒃᑎᓪᓗᒍ.
ᐊᑐᖅᑐᐊᕈᓐᓇᖅᑐᑎᑦ ᒫᓃᑉᐳᖔᕈᑎᒥᑦ ᕼᐋᒻᒪᓚᒃᑯᓐᓂ ᓄᓇᓕᖕᓂ ᐅᕝᕙᓘᓐᓃᑦ ᐆᒪᔪᕐᓂᐊᖅᑎᒃᑯᑦ ᑎᑎᕋᕐᕕᖓᓂ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐃᑲᔫᑎᒃᓴᓂᒡᓗ, ᐅᕗᙵᕐᓗᑎᑦ ᓄᓇᕗᑦ ᒐᕙᒪᖓᑕ ᐃᑭᐊᖅᑭᕕᖓ ᒪᓕᒡᓗᒋᓪᓗ ᕙᐃᔅᐳᒃ ᒪᒃᐱᖅᑐᒐᖓ.