ᐅᖃᖅᑎᑦᑎᔩ, ᓇᖏᖅᓯᔪᖓ ᓇᓗᓇᐃᕈᒪᓪᓗᒐ ᓄᓇᕐᔪᐊᒥ ᐊᕐᓇᐃᑦ ᐅᓪᓗᖓ, ᐃᓕᓴᖅᓯᒍᒪᓪᓗᖓᓗ ᓴᙱᔪᓂᒃ ᐃᓄᓐᓂᒃ ᐊᕐᓇᓂᒃ ᐃᔾᔪᐊᕋᑦᓯᑦᓯᐊᖑᕙᑦᑐᓂᒃ ᒪᒃᑯᑦᑐᓄᑦ ᓂᕕᐊᖅᓯᐊᓄᑦ ᐊᕐᓇᓄᓪᓗ ᓄᓇᕗᒻᒥ.
ᐋᑐᕙᒥ, ᑭᖕ ᑭᒡᒐᖅᑐᖅᑎᖓ ᒥᐊᓕ ᓴᐃᒪᓐ ᓯᕗᓪᓕᖅᐹᒥ ᐃᓅᓪᓗᓂ ᓯᕗᓪᓕᖅᐹᒥᓗ ᓄᓇᖃᖅᑳᖅᑐᒥᓂᐅᓪᓗᓂ ᐊᕐᓇᖅ ᐱᔨᑦᓯᕋᖅᑐᖅ ᑲᓇᑕᒥ ᑭᖕᒧ ᑭᒡᒐᖅᑐᖅᑎᐅᓪᓗᓂ.
ᑖᓐᓇᑦᑕᐅᖅ ᓗᐊᕆ ᐃᓪᓚᐅᑦ ᒪᓕᒐᓕᐅᕐᕕᔾᔪᐊᒥ ᑭᒡᒐᖅᑐᖅᑎᕗᑦ, ᑭᒡᒐᖅᑐᐃᓪᓗᓂ ᓂᐱᒋᔭᐅᓪᓗᓂ ᓄᓇᕗᒻᒥᐅᓄᑦ ᐋᑐᕙᒥ.
ᑕᒫᓂ ᓄᓇᑦᑎᓐᓂ, ᐄᕙ ᐋᕆᐊᒃ ᓄᓇᕗᒻᒥ ᑲᒥᓯᓇ ᓯᕗᓕᖅᑎᐅᓯᒪᓪᓗᓂᓗ. ᓯᕗᓪᓕᖅᐹᒥ ᓂᕈᐊᖅᑕᐅᓚᐅᖅᓯᒪᔪᖅ ᒪᓕᒐᓕᐅᖅᑎᐅᓂᕐᒧᑦ 2008-ᒥ, ᐊᔭᐅᖅᑐᐃᒍᑎᖃᖅᓯᒪᔪᖅ ᐊᕐᓇᓂᒃ ᓄᓇᕗᒻᒥ. ᐊᕐᓇᑑᓪᓗᓂ ᓂᕈᐊᖅᑕᐅᓚᐅᖅᓯᒪᔪᖅ ᑕᐃᑲᓂ ᐊᕐᕌᒍᖓᓂ, ᐅᒡᒍᐊᕈᑎᖃᕐᓂᕋᓚᐅᖅᓯᒪᔪᖅ ᐅᖃᐅᓯᖃᖅᑐᓂᓗ ᐱᐅᓯᕚᓪᓕᖅᑕᐅᑉᐸᑦ ᐸᐃᕆᕕᓕᕆᓂᖅ ᑲᔪᖏᕐᓂᖅᓴᐅᒐᔭᕐᓂᖏᓐᓂᒃ ᐊᕐᓇᐃᑦ ᓂᕈᐊᖅᑕᐅᓯᒪᓂᕐᒧᑦ ᒐᕙᒪᓕᕆᔨᐅᒍᓐᓇᖁᓪᓗᒋᑦ.
ᓄᓇᕗᑦ ᑐᙵᕕᒃᑯᓂᓪᓗ ᐊᖏᔪᖅᑳᖅ ᐊᓗᑭ ᑰᑦᑎᖅ, ᓴᙱᔫᓪᓗᓂ ᓂᐱᒋᔭᐅᔪᖅ ᓄᓇᕗᒻᒥ ᐃᓄᓐᓄᑦ ᓴᙱᔫᓪᓗᓂᓗ ᐊᔭᐅᖅᑐᐃᒍᔾᔨᔪᖅ ᐱᔪᓐᓇᐅᑎᖏᓐᓂᒃ ᐃᓄᐃᑦ ᓄᓇᕗᑦ ᐊᖏᕈᑎᒃᑯᑦ.
ᑖᓐᓇᑦᑕᐅᖅ ᓯᕗᓕᖅᑎᐅᓪᓗᖓ ᑐᒡᓕᕋ ᐸᒥᓚ ᕼᐊᑯᖓᒃ ᒍᕋᔅ, ᓂᕈᐊᖅᑕᐅᓯᒪᓂᕐᒧᑦ ᒐᕙᒪᓕᕆᓂᕐᒧᑦ ᐱᒋᐊᓚᐅᖅᓯᒪᔪᖅ ᒪᐃᔭᐅᓪᓗᓂ ᐃᖃᓗᑦᑑᑦᑎᐊᕐᒥ. ᒥᓂᔅᑕᐅᓪᓗᓂ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᑎᓯᐱᕆ 2022-ᒥ ᓇᓗᓇᐃᖅᓯᓚᐅᖅᑐᖅ $10 ᐅᓪᓗᒧᑦ ᐊᑭᖏᓐᓂᒃ ᐸᐃᕆᕕᓐᓄᑦ, ᓯᕗᓪᓕᖅᐹᖑᓪᓗᓂ ᑲᓇᑕᒥ. ᒪᒃᑯᑦᑐᓂ ᐊᓈᓇᐅᓪᓗᓂ, ᓇᓗᓇᐃᖅᓯᓚᐅᕐᒥᔪᖅ ᐊᕐᕌᒎᓂᐊᖅᑐᓂᒃ ᑕᓕᒪᓂᒃ, 238 ᓄᑖᑦ ᐸᐃᕆᕕᓐᓂ ᐃᓂᑖᖅᑲᐅᓂᒃ ᓴᖅᑭᖅᑕᐅᔪᖃᕐᓂᖓᕐᓂᖓᓂᒃ.
ᐊᒻᒪᓗ, ᐅᐱᓐᓇᕋᓂ, ᐃᓕᓴᕆᒍᒪᒻᒥᔮᒃᑲ ᒥᓂᔅᑕ ᒪᒍᓚ ᓇᑲᓱᒃ ᐊᒻᒪᓗ ᒥᓂᔅᑕ ᑭᐅᕋᓐ ᓄᑕᕋᖅ, ᐊᒻᒪᓗ ᐱᖓᓲᔪᖅᑐᖏᓐᓂ ᒪᓕᒐᓕᐅᖅᑎᐅᖃᑎᒃᑲ ᔮᓂᑦ ᐱᑦᓯᐅᓛᖅ ᐳᕈᔅᑐ, ᒥᐊᓕ ᕿᓕᖅᑎ, ᐊᒻᒪᓗ ᔪᐊᓇ ᖁᐊᓴ ᑐᓂᓯᒪᓂᖏᓐᓄᑦ ᑭᒃᑯᑐᐃᓐᓇᕐᓄᑦ ᐱᔨᑦᓯᕋᐅᑎᖃᕐᓂᕐᒧᑦ.
ᐅᖃᖅᑎᑦᑎᔩ, ᐃᓕᓴᕆᒍᒪᒻᒥᔭᕋ ᒥᓂᔅᑕᐅᓪᓗᖓ ᑐᒡᓕᕋ, ᐋᓇ ᕙᐅᓗ. ᒥᔅ ᕙᐅᓗ ᐱᔪᓐᓇᕐᓂᖃᑦᓯᐊᖅᑐᓂ ᖃᐅᔨᒪᓂᖃᑦᓯᐊᖅᑐᓂᓗ ᐃᓄᒃ ᐊᕐᓇᖅ ᐊᑦᓱᕉᑎᖃᖅᓯᒪᔪᖅ ᐃᖅᑲᓇᐃᔮᕆᓯᒪᔭᒥᓂ ᐱᔨᑦᓯᕋᕐᓂᕐᒧᑦ ᓄᓇᕗᒻᒥᐅᓂᒃ. ᐅᐱᒋᔭᕋ ᐱᓕᕆᖃᑎᒋᒍᓐᓇᕋᒃᑯ.
ᒐᕙᒪᒋᔭᕗᑦ ᐱᔪᓐᓇᕐᓂᖃᑦᓯᐊᖅᑐᓂᒃ ᖃᐅᔨᒪᓂᖃᑦᓯᐊᖅᑐᓂᓪᓗ ᐊᓯᖏᓐᓂᒃ ᐃᓄᓐᓂᒃ ᐊᕐᓇᓂᒃ ᐃᖅᑲᓇᐃᔭᖅᑎᖃᖑᐊᑕᖅᓯᓇᖅᑐᑦ ᐃᓚᒋᔭᐅᓪᓗᑎᒃ ᒥᓂᔅᑕᐅᑉ ᑐᒡᓕᐊ ᐅᓖᐱᑲ ᕼᐊᐃᓐᓄ, ᒥᓂᔅᑕᐅᑉ ᑐᒡᓕᐊ ᐃᕚᓐ ᓇᐃᒍ, ᒥᓂᔅᑕᐅᑉ ᑐᒡᓕᐊ ᑐᕆᓴ ᕼᐃᐅᔅ ᐊᒻᒪᓗ ᐊᖏᔪᖅᑳᖅ ᐅᓖᐱᑲ ᒨᓐᔅ. ᐃᓕᓴᕆᒍᒪᒻᒥᔭᒃᑲ ᐃᓄᐃᑦ ᒥᓂᔅᑕᐅᑉ ᑐᒡᓕᖏᑕ ᐃᑲᔪᖅᑎᖏᑦ, ᐃᓕᑉᐸᓪᓕᐊᔪᑦ ᑲᔪᖏᖅᑎᖃᖅᑐᑎᓪᓗ ᐊᔾᔨᒌᖏᑦᑐᓂᒃ ᐊᔪᖏᑦᓯᐊᖅᑐᓂᓪᓗ ᒥᓂᔅᑕᐅᑉ ᑐᒡᓕᖏᓐᓂᒃ: ᑯᕆᔅᑏᑦ ᐃᐅᓪᔅᕗᑦ, ᓵᓐᑎ ᖃᐅᓐᓇᖅ ᐊᒻᒪᓗ ᔮᑭᓕᓐ ᑰᓕ. ᑖᑯᐊ ᐊᕐᓇᐃᑦ ᐊᑦᓱᕉᑎᖃᑦᓯᐊᖅᑐᑎᒃ ᐅᓪᓗᑕᒫᑦ ᐃᖅᑲᓇᐃᔭᖅᐸᑦᑐᑦ ᑭᒡᒐᖅᑐᐃᓪᓗᑎᒃ ᓄᓇᕗᒻᒥᐅᓂᒃ.
ᑖᒃᑯᐊ ᐃᓚᐃᓐᓇᖏᑦ ᐃᔾᔪᐊᕋᑦᓯᐊᖑᔪᑦ ᓴᙱᔫᓪᓗᑎᒃ ᐊᕐᓇᐃᑦ ᓯᕗᓕᖅᑏᑦ.
ᓄᓇᕐᔪᐊᑎᓐᓂ ᓱᓕ ᐊᙳᑎᒋᐊᖃᒻᒪᕆᑦᑐᑦ ᐊᕐᓇᐃᑦ ᐊᖑᑏᓪᓗ ᓇᓕᒧᒌᓐᓂᖏᓐᓂᒃ, ᑭᓯᐊᓂ, ᑕᒫᓂ ᓄᓇᕗᒻᒥ, ᓱᓕᔪᖅᓴᖅᑐᖓ ᖃᐅᔨᒪᑦᓯᐊᕋᑦᑎᒍ ᑐᑭᖓ ᐃᓅᓇᓱᐊᕐᓂᕐᒧᑦ ᐊᑦᓱᕉᑎᖃᖅᐸᑦᑐᑕᓗ ᒪᓕᑦᓯᐊᕋᓗᐊᕐᒪᖔᑦᑎᒍ.
ᖁᔭᓐᓇᒦᒃ, ᐅᖃᖅᑎᑦᑎᔩ.