30 ᐊᕐᕌᒍᕐᓄᑦ ᖁᕕᐊᓲᑎᖃᕐᓂᖅ ᓄᓇᕗᒻᒥ ᐊᖏᕈᑎᒥ

ᐅᖃᖅᑎᑦᓯᔩᑦ, ᖁᕕᐊᓲᑎᖃᖅᑎᓪᓗᑕ ᓄᓇᕗᒻᒥ ᕿᑲᕐᓇᐅᑎᓪᓗᒍ ᑕᕝᕙᓂ ᐊᕐᕌᒍᒥ, ᓇᓗᓇᐃᖅᓯᓂᐊᖅᐳᒍᑦ 30-ᓂ ᐊᕐᕌᒍᓂᒃ ᓄᓇᕗᒻᒥ ᐊᖏᕈᑎᒥ ᐱᖁᔭᕐᒥ ᐊᒻᒪ ᓄᓇᕗᒻᒥ ᐱᖁᔭᖓ ᑲᔪᓯᑎᑕᐅᓚᐅᕐᒪᑦ ᒪᓕᒐᓕᐅᕐᕕᕐᔪᐊᕐᒥ ᔪᓚᐃ 9, 1993-ᒥ.

ᑕᐃᑲᓂ ᐅᓪᓗᖓᓂ, ᑯᐃᓐ ᑭᒡᒐᖅᑐᖅᑎᖓ ᐃᓕᑕᖅᓯᓚᐅᖅᑐᖅ ᓄᓇᕗᒻᒥ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᓄᓇᒥᒃ ᐊᒻᒪᓗ ᓄᓇᒥᐅᑕᓂᒃ ᐊᐅᓚᑦᓯᓂᕐᒧᑦ ᐱᔪᓐᓇᐅᑎᓂᒃ ᐅᖓᑖᓄᑦ 1.9 ᒥᓕᐊᓐ ᑭᑉᐹᕆᒃᑐᑦ ᑭᓚᒦᑕᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑲᓇᑕ ᑐᓂᓯᓚᐅᓚᐅᕆᕗᖅ ᓄᓇᖁᑎᑖᖅᑎᑦᑎᓪᓗᑎᑦ 351,000−ᓂᒃ ᑭᑉᐹᕆᒃᑐᓂᒃ ᑭᓗᒦᑕᓂᒃ ᓄᓇᒥᒃ ᐃᓄᖕᓄᑦ.

ᐅᖃᖅᑎᑦᓯᔩ, ᓄᓇᑖᕈᑎᕗᑦ ᐅᕙᑦᑎᓃᑦᑐᖅ ᖃᐅᑕᒫᑦ. ᓇᓗᓇᐃᖅᓯᒍᑕᐅᔪᖅ ᒐᕙᒪᒃᑯᑦ ᐱᖁᔭᖏᓐᓂᒃ, ᐱᓕᕆᖃᑎᒌᓐᓂᖏᓐᓂᒃ ᒐᕙᒪᒃᑯᑦ ᐃᓄᐃᓪᓗ, ᐊᒻᒪᓗ ᐱᓕᕆᐊᕗᑦ ᓴᐳᔾᔨᓂᕐᒥᒃ ᓄᓇᑦᑎᓐᓂᒃ, ᐃᒪᑦᑎᓐᓂᒃ, ᐆᒪᔪᓂᓪᓗ.

ᐅᓪᓗᒥ, ᐃᓕᓴᖅᓯᔪᒪᕗᖓ ᓄᓇᕗᑦ ᑐᙵᕕᒃᑯᓐᓂᒃ ᐱᓕᕆᐊᖃᓚᐅᕐᓂᖏᓐᓄᑦ ᓴᖅᑭᑎᑦᑎᓂᕐᒥᒃ ᓄᓇᑦᑎᓐᓂᒃ ᐊᑐᓕᖅᑎᑦᑎᓂᕐᒥᒡᓗ ᓄᓇᕗᒻᒥ ᐊᖏᖃᑎᒌᒍᑎᒥ. ᑲᑐᔾᔨᓗᑕ ᖁᕕᐊᓲᑎᖃᖅᐳᑦ ᒐᕙᒪᒃᑯᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᖃᑎᒌᓂᒃ.

ᐊᕐᕌᒍ, ᐄᐳᓗ 1-ᒥ, ᖁᕕᐊᓲᑎᖃᕐᓂᐊᖅᑐᒍᑦ 25-ᓂ ᐊᕐᕌᒍᖃᓕᕐᓂᖓᓂᒃ ᓄᓇᕘᖑᓕᖅᑎᓪᓗᒍ ᓇᒻᒥᓂᖅ ᒐᕙᒪᒋᔭᐅᓗᓂ − ᐱᓪᓗᐊᑕᐅᓪᓗᓂ ᐊᓂᒍᖅᑕᐅᔪᖅ ᓄᓇᕗᒻᒥ ᐊᖏᕈᑎᒧᑦ ᐊᒻᒪ ᑲᓇᑕᒥ ᐱᖁᔭᕐᔪᐊᑉ ᐱᐅᓯᕆᕙᓚᐅᖅᑕᖏᓐᓂᒃ.

ᐅᖃᖅᑎᑦᓯᔩ, ᓄᓇᕗᑦ ᐅᓪᓗᖓ, 30-ᓂ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᐊᑎᓕᐅᖅᑕᐅᓚᐅᖅᓯᒪᔪᒥᑦ ᓄᓇᕗᒻᒥ ᐊᖏᕈᑎᒥᑦ, ᓄᓇᕗᒻᒥᐅᓕᒫᑦ ᖃᐃᖁᕙᒃᑲ ᖁᕕᐊᓲᑎᖃᖅᑎᓪᓗᑕ ᐃᓕᖅᑯᓯᑦᑎᓐᓂᑦ, ᐅᖃᐅᓯᑦᑎᓐᓂᑦ, ᒪᑭᒪᔪᓐᓇᕐᓂᑦᑎᓐᓂᓪᓗ ᓄᓇᓕᑦᑎᓐᓂᑦ.

ᐃᖅᑲᐅᒪᓂᐊᖅᐳᒍᑦ ᓴᙱᔪᓂᒃ ᓯᕗᓕᖅᑎᓂᒃ ᐋᔩᖃᑎᒌᓚᐅᖅᑐᓂᒃ ᓄᓇᕗᑦᑎᓐᓄᑦ, ᓂᕆᐅᒋᔭᖃᖅᓱᑕᓗ ᓯᕗᓂᒃᓴᒥ ᒐᕙᒪᕗᑦ ᐊᑕᖏᑦᓯᐊᕐᓗᓂ ᐱᔪᓐᓇᐅᑎᖃᓕᖅᐸᑦ ᐊᐅᓚᑦᓯᕙᓐᓂᕐᒥᒃ ᑕᒪᑐᒥᖓ ᓄᓇᒥᒃ − ᓄᓇᕗᑦ − ᐊᖏᕐᕋᕆᓂᕋᖅᑕᕗᑦ.

ᓇᑯᕐᒦᒃ, ᐅᖃᖅᑎᑦᓯᔩ.

Date