ᐅᖃᖅᑎᑦᑎᔩ, ᕕᕝᕗᐊᕆ 8-ᖑᑎᓪᓗᒍ ᐊᓕᐊᓇᐃᒍᓱᓚᐅᖅᐳᖓ ᐊᑎᓕᐅᖃᑎᖃᕆᐊᒃᓴᖅ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᒃ ᓂᐅᕙᓐᓛᓐ ᐊᒻᒪ ᓛᐸᑐᐊ ᒐᕙᒪᖓᓂ.
ᐊᑯᓂᐊᓗᒃ ᐱᓕᕆᖃᑎᒌᓕᖅᑐᑦ ᐊᕕᒃᑐᖅᓯᒪᓂᑦᑎᓐᓂ ᑐᙵᕕᖃᖅᐳᖅ ᐊᔾᔨᒌᓂᒃ ᐱᒻᒪᕆᐅᒋᔭᐅᔪᓂᒃ, ᐃᓕᖅᑯᓯᑦᑎᓐᓂ ᐊᒻᒪ ᐱᐅᓯᑐᖃᑦᑎᓐᓂ, ᐅᑭᐅᖅᑕᖅᑐᒥ ᐊᒻᒪ ᐅᑭᐅᖅᑕᖅᑑᑉ ᓄᓇᖓᓂ, ᐊᒻᒪ ᑲᑐᔾᔭᐅᓪᓗᓂ ᐃᒪᕕᖕᒥ ᐱᓕᕆᖃᑎᒌᒃᐸᓚᐅᖅᑐᓂᑦ.
ᐊᔾᔨᐸᓗᖏᓐᓂᑦᑕᐅᖅ ᐊᒃᓱᕈᕈᑎᖃᖅᐸᒃᐳᒍᑦ ᒐᕙᒪᐅᓪᓗᑕ, ᐅᖃᖅᑏ. ᑖᓐᓇ ᓄᑖᙳᕆᐊᖅᓯᒪᔪᖅ ᐱᓕᕆᖃᑎᒌᖕᓂᖅ ᐃᑲᔪᕐᓂᐊᖅᑐᖅ ᐅᕙᑦᑎᓐᓂᒃ ᑲᑐᔾᔨᖃᑎᒌᒡᓗᑕ ᓯᕗᒻᒧᐊᒃᑎᑦᑎᓂᕐᒥᒃ ᓄᑖᓂᒃ, ᐱᐅᓯᒋᐊᖅᑎᑦᑎᓗᓂ ᒪᑭᒪᔾᔪᑎᒃᓴᑦᑎᐊᕙᑦ ᐃᓅᖃᑎᒌᓄᓪᓗ ᐱᕙᓪᓕᐊᑎᑦᑎᓂᖅ, ᓴᖅᑭᔮᖅᑎᒃᑲᓐᓂᕐᓗᒋᓪᓗ ᐊᔾᔨᒌᖏᕈᓘᔭᖅᑐᑦ ᐃᓚᓕᐅᔾᔨᔪᓪᓗ ᓴᖅᑭᑎᑦᑎᖁᓪᓗᒋᑦ ᑲᔪᓯᑎᑦᑎᓗᑎᒡᓗ ᐋᖅᑭᑦᑎᐊᖅᓯᒪᔪᓂᑦ ᐆᒻᒪᕆᒃᑐᓂᓪᓗ ᓄᓇᓕᖕᓂ.
ᐅᖃᖅᑎᑦᑎᔩ, ᓯᔾᔭᖅᐸᓯᖕᒥ, ᑖᒃᑯᐊ ᑲᑐᔾᔨᖃᑎᒌᒃᑐᑦ ᒐᕙᒪᒃᑯᓐᓂ ᐅᕙᑦᑎᓐᓂᒃ ᐱᓕᕆᖃᑎᒌᒍᑕᐅᖕᒪᑦ ᐊᖏᒡᓕᒋᐊᖁᓪᓗᒋᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓲᕐᓗ ᐃᖃᓗᒐᓱᖕᓂᖅ, ᐳᓚᕋᖅᑐᓕᕆᓂᖅ, ᐊᒻᒪᓗ ᓄᑖᑦ ᐃᕐᙲᓐᓈᖅᑕᐅᒃᑰᕈᓐᓇᐅᑎᑦ. ᑲᑐᔾᔨᓗᑕ ᐊᔪᕈᓐᓃᖅᓴᑎᑦᑎᒃᑲᓐᓂᕈᓐᓇᖅᐸᕗᑦ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᒡᓗᑕ ᐃᓕᓐᓂᐊᕐᓂᕐᒧᑦ ᐱᓕᒻᒪᒃᓴᕐᓂᕐᒧᓪᓗ ᐊᒃᑐᐊᓂᓕᖕᓂᑦ ᐊᑐᐃᓐᓇᐅᓗᑎᒡᓗ ᐅᖓᓯᒋᔭᑦᑎᓐᓄᑦ ᓄᓇᓕᖕᓄᑦ. ᐱᓕᕆᖃᑎᒌᒍᓐᓇᖅᑐᒍᑦ ᓄᓇᓖᑦ ᒪᑭᒪᔾᔪᑎᖏᓐᓂ ᐱᕈᖅᐸᓪᓕᐊᑎᑦᑎᔪᓂᑦ ᐃᓪᓗᓕᕆᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᐃᑲᔫᑕᐅᔪᓂᓪᓗ ᑲᓇᑕᒥᐅᑦ ᓄᓇᖁᑎᖓᓂ.
ᒐᕙᒪᕗᑦ ᐊᖏᖅᓯᒪᕗᑦ ᓴᖅᑮᔪᒪᓪᓗᑎᒃ ᑲᑐᔾᔨᖃᑎᒌᒃᑐᓂᑦ ᐊᒻᒪ ᐊᑐᓕᖅᑎᑕᐅᕙᓪᓕᐊᔪᑦ ᑲᑎᒪᔨᕋᓛᑦ. ᑲᑎᒪᔨᕋᓛᑦ ᑲᑐᔾᔨᓗᑎᒃ ᐋᖅᑭᒃᓯᓂᐊᖅᑐᑦ ᑲᑐᔾᔨᖃᑎᒌᓄᑦ ᐱᓕᕆᔾᔪᑕᐅᓂᐊᖅᑐᒥᒃ ᐊᒻᒪᓗ ᑐᑭᒧᐊᒃᑎᑦᑎᓗᑎᒃ ᒐᕙᒪᒃᑯᑦ ᒪᓕᒡᓗᒋᑦ ᑕᒪᐃᓐᓄᑦ ᐱᔪᒥᒋᔭᐅᔪᓂᑦ.
ᒪᓕᒐᓕᐅᖅᑎ ᐋᓐᓄᓘ ᕘᕆ ᐅᕙᖓᓗ ᐊᑎᓕᐅᓚᐅᖅᐳᒍᑦ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥ ᐊᖅᓴᕐᓃᑦ ᑲᑎᒪᕕᒡᔪᐊᖅᑎᓪᓗᒋᑦ ᐋᑐᕚᒥ. ᐊᑎᓕᐅᖃᑕᐅᓚᐅᖅᑐᖅ ᓯᕗᓕᖅᑎᐅᑉ ᑐᖏᓕᖓ ᐹᒥᓚ ᕼᐊᑯᖓᒃ ᒍᕉᔅ ᐊᒻᒪᓗ ᐊᕕᒃᑐᖅᓯᒪᓂᖓᓄᑦ ᒥᓂᔅᑕᖓ ᓛᐸᑐᐊᕆᐅᑉ, ᒪᓕᒐᓕᐅᖅᑎ ᓖᓴ ᑎᒻᔅᑐᒧᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.