ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔾᔪᑎᖃᖅᐳᖓ ᐅᖃᕈᒪᓪᓗᖓ ᐃᓚᒋᔭᐅᖃᑕᐅᓚᐅᕐᓂᓐᓂ ᐅᑭᐅᖅᑕᖅᑐᒥᐅᑕᐅᖃᑎᒌᑦ ᑲᑎᒪᓂᖓᓐᓄᑦ ᐋᖕᑯᕆᔾ, ᐊᓛᔅᑲᒥ.
ᐊᐃᕆᓕ 7 ᐊᒻᒪ 8−ᒥ, ᐱᕕᖃᖃᑕᐅᓚᐅᕋᒪ ᐃᓚᒋᔭᐅᔭᕆᐊᒃᓴᖅ ᐅᑭᐅᑦᑎᓐᓂ ᑲᑎᒪᓂᕐᒧᑦ ᐅᓂᒃᑳᖃᑕᐅᓪᓗᖓᓗ ᓈᓚᒃᑎᒐᓴᖕᓄᒃ ᑕᐃᔭᐅᓪᓗᓂ “ᓄᓇᓖᑦ ᖃᓄᐃᙱᑦᑎᐊᕐᓗᑎᒃ, ᑲᑕᒃᓴᕋᐃᙱᓪᓗᑎᒃ ᓄᓇᓖᑦ: ᖃᐅᔨᔾᔪᑕᐅᓯᒪᔪᑦ ᐅᑭᐅᖅᑕᖅᑐᒥᐅᓄᑦ”. ᑲᑎᒪᑎᓪᓗᑕ ᐅᖃᖃᑎᒌᓚᐅᖅᑐᒍᑦ ᖃᐅᔨᕚᓪᓕᕈᑎᒋᔭᑦᑎᓐᓂ ᓄᕙᒡᔪᐊᕐᓇᖅ-19 ᐱᑕᖃᖅᑎᓪᓗᒍ ᐊᒻᒪᓗ ᖃᓄᖅ ᑕᒪᒃᑯᐊ ᖃᐅᔨᔾᔪᑎᒋᔭᕗᑦ ᐊᑐᒃᑲᓐᓂᕈᓐᓇᕋᔭᕐᒪᖔᑦᑎᒍᑦ ᐊᓯᖏᓐᓄᑦ ᐱᓇᔪᒃᑕᐅᔭᕆᐊᖃᕐᓂᐊᖅᑐᓄᑦ, ᓲᕐᓗ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᓲᖑᓴᒃᑕᐅᔭᕆᐊᖃᙱᓐᓂᖅ ᓴᐳᑎᔭᐅᓯᒪᔭᕆᐊᖃᕐᓂᕐᓗ.
ᐅᖃᖅᑎᑦᑎᔩ, ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᓂᖓᑦ ᐊᖏᓛᑦᑎᐊᖑᔪᖅ ᐊᕐᕌᒍᑕᒫᖅ ᐅᑭᐅᖅ ᑕᖅᑐᒧᑦ ᐊᑐᐊᒐᓕᐅᖅᑎᐅᓪᓗᑎᒃ ᒥᐊᓕᒐᐃᑦ ᓄᓇᖓᓐᓃᖦᖢᑎᒃ. ᑎᒥᐅᔪᖅ ᓴᖅᑭᑕᐅᓂᑰᔪᖅ 2013−ᒥ, ᑖᓐᓇ ᑲᑎᒪᓂᐅᔪᖅ ᓵᙵᔭᖃᖅᐸᒃᑐᖅ ᐱᒻᒪᕆᐅᒋᔭᐅᔪᓂᒃ ᐃᓱᒫᓘᑎᒋᔭᐅᔪᓂᒡᓗ ᓄᓇᖅᔪᐊᕐᒥᐅᓕᒫᖑᔪᑦ ᐃᓱᒪᒋᕙᒃᑕᖏᑦ ᐅᑭᐅᖅᑕᖅᑑᑉ ᒥᒃᓵᓄᑦ.
ᑲᑎᒪᓂᖃᖅᑎᓪᓗᑕ ᖃᔅᓯᑲᓪᓚᖕᓂᒃ ᑭᒡᒐᖅᑐᐃᔨᐅᖃᑕᐅᔪᓂᒃ ᑲᑎᖃᑎᖃᕈᓐᓇᓚᐅᖅᓯᒪᕗᒍᑦ ᐅᑯᐊ ᐃᓚᐅᓪᓗᑎᒃ ᓄᓇᑦᓯᐊᑉ ᒐᔭᒪᒃᑯᖏᓐᓄᑦ ᓯᕗᓕᖅᑎ ᑭᐅᕈᓚᐃᓐ ᑳᒃᕈᐃᓐ, ᑲᓇᑕᐅᑉ ᑭᒡᒐᖅᑐᐃᔨᖓ ᒥᐊᓕᒐᐃᑦ ᓄᓇᖓᑕ ᑎᑎᕋᕐᕕᐊᓄᑦ ᐊᑎᓕᒃ ᑭᐅᔅᑕᓐ ᕼᐃᐅᓪᒪᓐ, ᑲᓇᑕᐅᑉ ᓯᕗᓪᓕᖅᐸᐅᓪᓗᓂ ᑭᒡᒐᖅᑐᐃᔨᖁᑎᖓᑦ ᑕᓪᓗᕈᑎᐅᑉ ᐊᖅᑯᑎᖓᓄᑦ ᐊᒻᒪᓗ ᐊᓛᔅᑲᒧᑦ ᐊᑎᓕᒃ ᒥᐊ ᔭᓐ, ᑲᒥᓯᓇᐅᑉ ᑐᒡᓕᖓ ᐅᑭᐅᖅᑕᑐᒧᑦ ᐊᑎᓕᒃ ᓂᐅᓪ ᐅᕈᐊᒃ, ᐃᓄᐃᑦ ᓯᓚᕐᔪᐊᕐᒥ ᑲᑎᒪᔨᖏᑦᑕ ᐃᒃᓯᕙᐅᑕᖓᑦ ᐊᑎᓕᒃ ᓘᒃᑖ ᑏᓕ ᓵᒻᐴ ᑐᕈ ᐊᒻᒪᓗ ᖃᔅᓯᑲᓪᓚᖕᓂᒃ ᑭᒡᒐᖅᑐᐃᔨᖃᓚᐅᕆᓪᓗᑎᒃ ᑲᓛᖠᑦ ᓄᓈᓐᓂᕐᒥᐅᑦ.
ᐃᒡᓗᓕᕆᓂᖅ, ᓱᓇᒃᑯᑖᓄᑦ ᒪᑭᒪᔾᔪᑎᓕᕆᓂᖅ, ᐅᑭᐅᖅᑕᖅᑐᖅ ᑲᓇᑕᒧᑦ ᓄᓇᖁᑎᒋᔭᐅᓂᖓ ᐊᒻᒪ ᓴᐳᑎᓯᒪᔭᕆᐊᖃᕐᓂᖓ ᐅᖃᐅᓯᐅᓪᓗᐊᑕᖃᑦᑕᓚᐅᖅᑐᑦ ᑲᑎᒪᓂᖃᖅᑎᓪᓗᑕ.
ᐅᖃᖅᑎᑦᑎᔩ, ᓂᕆᐅᖕᓂᖃᑦᑎᐊᖅᐳᖓ ᐅᖃᒪᔭᖃᑎᒌᖃᑦᑕᕐᓂᐊᕐᓂᑦᑎᓐᓂ ᑖᒃᑯᓂᖓ ᑭᒡᒐᖅᑐᐃᔨᒐᓴᖕᓂᒃ ᑕᕝᕙᓂ ᑲᑎᒪᓂᖃᖅᑎᓪᓗᑕ ᑎᒎᑎᖃᑎᒋᓚᐅᖅᓯᒪᔭᓐᓂ − ᖃᐅᔨᒪᓕᖅᑐᖓ ᓄᓇᕗᒻᒥ ᐊᒃᓲᕈᑎᒋᔭᕗᑦ ᑐᕌᒐᕆᖃᑦᑕᖅᑕᕗᓪᓗ ᐊᔾᔨᒋᔭᐅᓂᖏᓐᓂᒃ ᐊᓯᖏᓐᓄᑦ ᐅᑭᐅᖅᑕᖅᑐᒥᐅᑕᐅᖃᑎᑦᑎᓐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.