ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔾᔪᑎᖃᖅᑐᖓ ᓇᓗᓇᐃᕈᒪᓪᓗᒍ ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ, ᑖᓂᐅᓪ ᕚᓐᑐᓪ ᓂᐅᕐᕈᓚᐅᕐᒪᑦ ᐃᖃᓗᖕᓄᑦ.
ᐊᐃᕆᓕ 12 ᐊᒻᒪ 13−ᒥ ᑲᑎᒪᖃᑎᒋᔪᓐᓇᖅᓯᓚᐅᕋᒃᑯ ᒥᓂᔅᑕ ᕚᓐᑐᓪ ᐃᖃᓗᖕᓄᐊᖅᑎᓪᓗᒍ ᑲᑎᒪᔾᔪᑎᖃᕆᐊᖅᑐᖅᖢᓂ 2022 ᑮᓇᐅᔭᖅᑑᑎᒃᓴᐃᑦ ᓄᓇᕗᒻᒧᑦ ᑐᖅᑯᖅᑕᐅᔭᖅᑐᖅᖢᑎᒃ.
ᐅᖃᖅᑎᑦᑎᔩ, ᐃᖃᓗᖕᓄᑦ ᓂᐅᕐᕈᓯᒪᑎᓪᓗᒍᓕ, ᒥᓂᔅᑕ ᕚᓐᑐᓗ ᐅᕙᒍᒃ ᕿᒥᕐᕈᐊᖅᑎᑕᐅᓚᐅᖅᑐᒍᑦ ᓴᓇᔭᐅᕌᓂᓵᖅᑐᕕᓂᕐᒥᒃ ᓄᓇᕗᑦ ᒐᕙᒪᒃᑯᖏᑕ ᐃᓄᑐᖃᕐᓄᑦ ᑐᕌᖓᓪᓗᓂ ᐃᒡᓗᒥᒃ. ᑖᓐᓇ ᐃᒡᓗ ᕿᒥᕐᕈᐊᖅᑕᕗᒃ ᐱᔭᕆᐊᒃᖠᓕᖅᓯᒪᔪᖅ ᑎᒥᒃᑯᑦ ᐱᒡᒐᕈᑎᓕᖕᓄᑦ, ᓲᕐᓗ ᐃᓄᑐᖃᐅᓂᖅᓴᓄᑦ ᐃᒡᓗᒋᔭᒃᓴᐅᔪᖅ. ᑖᓐᓇ ᐃᒡᓗᑯᓗᒃ ᕿᒥᕐᕈᐊᓚᐅᖅᑕᕗᑦ 100−ᓄᑦ ᐃᓚᒋᔭᐅᖃᑕᐅᔪᖅ ᓴᓇᔭᐅᓵᕐᓂᑯ ᓄᓇᕗᒻᒥ, ᑲᑐᔾᔨᖃᑎᒌᒃᖢᑎᒃ ᒐᕙᒪᑐᖃᒃᑯᓐᓂ ᓴᓇᔭᐅᕌᓂᓚᐅᖅᑐᖅ.
ᐃᒡᓗᒥᒃ ᕿᒥᕐᕈᐊᓂᒃᑲᑕ, ᑕᐃᒪᓕ ᑐᓴᒐᒃᓴᓕᐅᖅᑎᓄᑦ ᐅᓂᒃᑳᓕᓚᐅᖅᐳᒍᑦ ᐃᓚᖃᖅᖢᑕ ᐊᓗᑭ ᑰᑎᖅ, ᐊᖓᔪᖅᑳᖑᔪᖅ ᓄᓇᕗᑦ ᑐᙵᕕᒃ ᑎᒥᖓᓐᓄᑦ ᐊᒻᒪᓗ ᑲᓂ ᐱᐅᓪᒥᒃ, ᒪᐃᔭ ᐃᖃᓗᐃᑦ ᓄᓇᓕᐸᐅᔭᖓᓄᑦ. ᑕᓐᓇ ᑐᓴᖅᑎᑦᑎᓂᕆᔭᕗᑦ ᓇᓗᓇᕈᓐᓃᖅᑎᑦᑎᓚᐅᕐᒥᔪᖅ ᒐᕙᒪᐅᖃᑎᒌᙱᑦᑐᑦ ᑲᑐᔾᔨᖃᑎᒌᖃᑦᑕᕆᐊᖃᕐᓂᖏᓐᓂᒃ, ᑖᒃᑯᐊᓗ ᐃᓄᐃᑦ ᑎᒥᖁᑎᒋᔭᖏᑦ ᐃᓚᐅᖃᑕᐅᓗᑎᒃ, ᑖᓐᓇ ᑐᕌᒐᕆᔭᕗᑦ 1000−ᓂᒃ ᐃᒡᓗᒃᓴᓂᒃ ᓴᓇᔪᒪᓂᕐᒧᑦ ᓄᑖᓂᒃ ᓄᓇᕗᒻᒥ ᓴᓇᔭᐅᖁᔨᓪᓗᑕ.
ᓂᐅᕐᕈᖅᑲᓂᕐᒥᓂᒃ ᒥᓂᔅᑕ ᕚᓐᑐᓪ ᓇᓗᓇᐃᒃᑲᓐᓂᓚᐅᕐᒥᔪᖅ ᐊᒃᓱᕉᑎᖃᕐᓂᕋᖅᖢᓂ ᓄᓇᕗᒻᒥ ᐱᔭᐅᔭᕆᐊᓕᖕᓄᑦ ᐊᒥᒐᖅᓯᓗᐊᕐᓂᕐᒧᑦ ᐃᒡᓗᒃᓴᓂᒃ ᖃᓄᒃᑲᓐᓂᕐᓗ ᐱᕕᖃᒃᑲᓐᓂᕈᓐᓇᕐᒪᖔᑦᑎᓐᓂᒃ ᕿᒥᕐᕈᒃᑲᓐᓂᕆᐊᖃᕆᓪᓗᑕ ᓇᐅᒃᑯᑦ ᑲᑐᔾᔨᖃᑎᒌᖕᓂᖅ ᐊᑲᐅᓛᖑᓇᔭᕐᒪᖔᖅ.
ᐅᖃᖅᑎᑦᑎᔩ, ᑲᖐᓱᖕᓂᖃᑦᑎᐊᖅᐳᖓ ᐊᑲᐅᔪᓂᒡᓗ ᓂᕆᐅᒃᖢᖓ ᑲᑎᒪᖃᑎᒌᖃᑦᑕᒃᑲᓐᓂᕐᓂᐊᕋᑦᑕ ᒐᕙᒪᑐᖃᒃᑯᓐᓂ, ᐃᓄᐃᑦ ᑎᒥᖁᑎᖏᓐᓂᒃ, ᓄᓇᓕᖕᓂ ᕼᐋᒻᒪᓚᐃᑦ ᑎᒥᖁᑎᖏᓐᓂᒃ ᑕᒪᑐᒥᖓ ᐃᒡᓗᓂᒃ ᐊᒥᒐᖅᓯᓗᐊᕐᓂᕐᒧᑦ ᖃᓄᖅᑑᕈᑎᒃᓴᓕᐅᖃᑎᒋᓗᒋᑦ.
ᖁᔭᓐᓇᒦᒃ, ᐅᖃᖅᑎᑦᓯᔩ.