ᐃᖃᓗᐃᑦ, ᓄᓇᕗᑦ (ᒫᑦᓯ 28, 2023) − ᑮᓇᐅᔭᖃᖅᑎᑦᓯᒍᑕᐅᔪᑦ ᐃᓪᓗᓕᕆᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᐅᓪᓗᒥ ᓇᓗᓇᐃᖅᑕᐅᖅᑲᐅᔪᑦ ᑲᓇᑕᐅᑉ ᒐᕙᒪᒃᑯᖏᑕ ᑮᓇᐅᔭᐃᑦ ᐊᑐᖅᑐᑦᓴᖏᓐᓂ, ᑲᓇᑕᒥ ᓴᓇᔭᐅᓯᒪᔪᓂᒃ ᐸᕐᓇᐅᑎ: ᑐᙵᕕᖃᑦᓯᐊᖅᑐᑦ ᑭᒃᑯᑐᐃᓐᓇᕐᓄᑦ, ᐊᑭᑐᓗᐊᙱᑦᑐᒥᒃ ᑮᓇᐅᔭᓕᕆᓂᖅ, ᓯᕗᓂᑦᓴᖃᑦᓯᐊᕐᓂᖅ, ᐃᑲᔪᕐᓂᖃᕈᑕᐅᓂᐊᖅᑐᑦ ᐱᓗᐊᖑᐊᖅᑐᓂᒃ ᓯᕗᓪᓕᐅᑎᒍᒪᔭᖏᓐᓂᒃ ᑲᑐᔾᔨᓗᑕ ᑐᕌᒐᖏᓐᓂ, ᐅᖃᖅᑲᐅᔪᖅ ᓄᓇᕗᒻᒥ ᓯᕗᓕᖅᑎ, ᐱᔭᐃ ᐊᕿᐊᕈᖅ ᐊᒻᒪᓗ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦ, ᖁᐊᓴ ᑯᓱᒐᖅ.
“ᑎᑭᐅᑎᒍᓐᓇᖅᓯᖁᓪᓗᒍ ᐊᓯᔾᔨᓪᓚᑦᑖᖅᐸᓪᓕᐊᓂᕐᒧᑦ ᒐᕙᒪᒋᔭᑦᑕ ᑲᑐᔾᔨᓗᑕ ᑐᕌᒐᑦᑎᓐᓂ, ᖃᐅᔨᒪᓚᐅᖅᑐᒍᑦ ᑮᓇᐅᔭᖃᖅᑎᑕᐅᒋᐊᖃᒻᒪᕆᒐᔭᕐᓂᖏᓐᓂᒃ ᒐᕙᒪᑐᖃᒃᑯᓐᓂᒃ. ᐅᓪᓗᒥ ᒐᕙᒪᑐᖃᒃᑯᑦ ᑮᓇᐅᔭᐃᑦ ᐊᑐᖅᑐᑦᓴᖏᓐᓂᒃ ᓇᓗᓇᐃᖅᑲᐅᔭᖏᑦ ᐃᑲᔫᑎᖃᕐᓂᐊᖅᑐᑦ ᒐᕙᒪᒋᔭᑦᑕ ᐊᑦᓱᕉᑎᖏᓐᓄᑦ ᐱᐅᓯᕚᓪᓕᖅᑎᑦᓯᒐᓱᐊᕐᓂᕐᒧᑦ ᐊᑐᐃᓐᓇᖃᖅᑎᑦᓯᓂᕐᒧᑦ ᐃᓪᓗᓕᕆᓂᕐᒧᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔨᑦᓯᕋᐅᑎᓄᑦ ᐃᑲᔫᑎᓄᓪᓗ ᑕᒫᓂ ᓄᓇᕗᒻᒥ. ᓱᓕ ᐊᔭᐅᖅᑐᐃᒋᐊᖏᓐᓇᓂᐊᖅᑐᒍᑦ ᒐᕙᒪᑐᖃᒃᑯᓐᓂᒃ ᐱᓕᕆᒋᐊᒃᑲᓐᓂᖁᓗᒋᑦ ᑲᓇᑕᒥ ᑐᙵᕕᓕᐅᕆᐊᕐᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᓯᕗᒧᒋᐊᕈᑕᐅᖁᓪᓗᒋᑦ ᐃᓄᓕᕆᓂᕐᒧᑦ ᑮᓇᐅᔭᓕᐅᕈᓐᓇᓂᕐᒧᓪᓗ ᓴᐃᒻᒪᖃᑎᒌᒍᑎᑦᓴᓂᒃ ᐃᓅᓪᓗᑕ ᓄᓇᑦᑎᓐᓂ,” ᐅᖃᖅᓯᒪᔪᖅ ᓯᕗᓕᖅᑎ ᐱᔭᐃ ᐊᕿᐊᕈᖅ.
“ᒐᕙᒪᒋᔭᕗᑦ ᓴᐱᖏᑦᓯᐊᖅᑐᑦ ᐊᖑᒻᒪᑎᒋᐊᖅᐸᓪᓕᐊᓂᕐᒧᑦ ᐊᑭᑐᔫᑎᓂᒃ ᐊᒥᒐᖅᓯᓂᑦᑎᓐᓄᑦ ᓄᓇᓕᑦᑎᓐᓂ, ᑕᐃᒪᐃᒻᒪᑦ ᒐᕙᒪᒋᔭᕗᑦ ᓴᖅᑭᖅᑎᑦᓯᓚᐅᖅᑐᑦ ᓄᓇᕗᒻᒥ ᐊᖏᓂᖅᐹᖑᓯᒪᔪᓂᒃ ᑕᐃᒪᖓᓕᒫᖅ ᐊᑭᑐᔫᑎᓄᑦ ᑮᓇᐅᔭᐃᑦ ᐊᑐᖅᑐᑦᓴᓕᐊᕆᓯᒪᔭᖏᑦ 2023-24 ᐊᕐᕌᒍᖓᓂ. ᐱᓕᕆᖃᑎᒌᓐᓇᕐᓂᐊᖅᑕᕗᑦ ᒐᕙᒪᑐᖃᒃᑯᑦ ᓇᓗᓇᐃᖅᓯᒃᑲᓐᓂᖁᓪᓗᒋᑦ ᐃᓪᓗᓕᕆᓂᕐᒧᑦ ᐊᑭᑐᔫᑎᓄᓪᓗ ᑮᓇᐅᔭᖅᑖᒃᑲᓐᓂᕈᒪᓗᑕ ᑐᙵᕕᓕᐅᕈᒪᒐᑦᑕ ᓄᓇᕗᒻᒥ ᑕᑯᒍᒪᔭᑦᑎᓐᓂᒃ ᑲᑐᔾᔨᓗᑕ ᑐᕌᒐᑦᑎᓐᓂ − ᓄᓇᕗᑦ ᓴᙱᔫᓗᓂ, ᖃᓄᐃᙱᓐᓂᖃᑦᓯᐊᕐᓗᑕ ᖃᑭᓯᒪᓗᑎᓪᓗ ᓄᓇᓖᑦ ᓄᓇᕗᒻᒥᐅᑦ ᒪᑭᒪᒍᓐᓇᑦᓯᐊᕐᓂᖃᕐᓗᑎᒃ,” ᐅᖃᖅᓯᒪᔪᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦ, ᖁᐊᓴ ᑯᓱᒐᖅ.
2023-24 ᒐᕙᒪᑐᖃᒃᑯᑦ ᑮᓇᐅᔭᐃᑦ ᐊᑐᖅᑐᑦᓴᖏᑦ ᓇᓗᓇᐃᖅᓯᒍᑕᐅᖅᑲᐅᔪᑦ ᐊᔾᔨᒌᙱᑦᑐᓂᒃ ᑮᓇᐅᔭᖃᖅᑎᑦᓯᒍᑕᐅᓂᐊᖅᑐᓂᒃ ᓄᓇᕗᒻᒧᑦ, ᐅᑯᐊ ᐃᓚᒋᔭᐅᓪᓗᑎᒃ:
- $4 ᐱᓕᐊᓐ ᐊᕐᕌᒍᓄᑦ 7-ᓄᑦ ᓄᓇᓕᐸᐅᔭᓂ, ᓄᓇᓕᕋᓛᖑᓂᖅᓴᓂ ᐅᑭᐅᖅᑕᖅᑐᒥᓗ ᓄᓇᖃᖅᑳᖅᑐᒥᓂᕐᓄᑦ ᐃᓪᓗᓕᕆᓂᕐᒧᑦ ᐸᕐᓇᐅᑎ
- ᐊᕐᕌᒍᓄᑦ ᑕᓪᓕᒪᓄᑦ ᓄᑖᕐᖑᕆᐊᖅᑕᐅᓂᖓ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓄᑦ ᑮᓇᐅᔭᖃᖅᑎᑦᓯᓂᕐᒧᑦ ᐋᖅᑭᐅᒪᔾᔪᑎ, ᓄᓇᕗᒻᒥ ᒐᕙᒪᑐᖃᒃᑯᓐᓂ ᑮᓇᐅᔭᖅᑖᕆᓂᖅᐹᕆᕙᑦᑕᖏᑦ.
- ᐊᕐᕌᒍᓄᑦ ᖁᓕᓄᑦ ᓄᑖᕐᖑᕆᐊᖅᑕᐅᓂᖓ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᖑᕙᑦᑐᑦ, ᐱᒻᒪᕆᐅᓪᓗᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᕆᕙᑦᑕᖏᑦ ᓄᓇᕗᑦ.
- ᖄᒃᑲᓐᓂᖓᒍᑦ ᑮᓇᐅᔭᖅᑖᑦᓴᐃᑦ ᑲᓇᑕᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖅᑖᖑᕙᑦᑐᑦ ᐊᒻᒪᓗ ᐊᓯᖏᑦ ᒪᕐᕉᓐᓄᑦ ᑎᒥᐅᔫᓐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᕈᑎᒃᑯᑦ.
- $810.6 ᒥᓕᐊᓐ ᐊᕐᕌᒍᓄᑦ ᑕᓪᓕᒪᓄᑦ ᓇᓪᓕᐅᒃᑯᒫᖃᙱᑦᑐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᑲᔫᑎᓄᑦ, ᐊᑐᖅᑕᐅᕙᑦᑐᑦ ᐊᑭᖏᓐᓄᑦ ᐋᓐᓂᐊᕐᕕᓕᐊᖅᑐᑎᒃ ᐊᐅᓪᓚᖃᑦᑕᕆᐊᓕᓐᓄᑦ, ᑭᒍᑎᓕᕆᔭᐅᓂᕐᒧᑦ, ᐄᔭᒐᖅᑖᑦᓴᓄᑦ ᐊᓯᖏᓐᓄᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒨᖓᔪᓄᑦ ᐱᔨᑦᓯᕋᐅᑎᓄᑦ ᓄᓇᕗᒻᒥ ᐃᓄᓐᓄᑦ.
- $16.2 ᒥᓕᐊᓐ ᑐᕌᖅᑐᑦ ᐳᕙᓪᓗᓐᓇᖅᑐᓕᕆᓂᕐᒧᑦ ᐃᓄᐃᑦ ᓄᓇᓕᖏᓐᓂ.
- $250 ᒥᓕᐊᓐ ᐊᕐᕌᒍᓄᑦ ᐱᖓᓱᓄᑦ ᑭᒍᑎᓕᕆᓂᕐᒧᑦ ᑮᓇᐅᔭᖃᖅᑎᑕᐅᒍᑏᑦ ᐊᑐᐃᓐᓇᖃᑦᓯᐊᒃᑲᓐᓂᕈᓐᓇᖁᓪᓗᒋᑦ ᑭᒍᑎᓕᕆᔭᐅᒍᑎᓄᑦ ᑭᒍᑎᓕᕆᓂᕐᒧᓪᓗ ᐱᔨᑦᓯᕋᐅᑎᓄᑦ ᓄᓇᓕᓐᓂ ᒥᑭᓐᓂᓴᐅᔪᓂ ᐅᖓᓯᑦᑐᓂᓗ ᓄᓇᓕᓐᓂ.