ᓯᕗᓕᖅᑎ ᔮᓐ ᒪᐃᓐ, ᒥᓂᔅᑕ ᑲᒪᒋᔭᓕᒃ ᐃᓐᓇᕐᓄᑦ, ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᑦᓴᓂᑦ:
“ᑲᓇᑕᒥ ᐃᓐᓇᐃᑦ ᐅᓪᓗᖓᓂ, ᑎᓕᐅᖅᐸᒃᑲ ᓄᓇᕗᒻᒥᐅᓕᒫᑦ ᐅᐱᒍᓱᖁᑦᓱᒋᑦ ᐃᓐᓇᖁᑎᕗᑦ ᐅᓪᓗᖓᓂ ᖃᐅᑕᒫᓪᓗ. ᐃᓐᓇᖁᑎᕗᑦ ᐃᓕᓐᓂᐊᓚᐅᖅᑐᑦ ᖃᓄᖅ ᐊᓐᓇᐅᒪᔪᓐᓇᕐᓂᕐᒥᒃ ᓄᓇᒥᓗ ᑲᔪᓯᓂᖃᑦᓯᐊᖅᓱᑎᒃ, ᐃᑲᔪᓚᐅᖅᓱᑎᓪᓗ ᓄᓇᕗᓕᐅᖃᑕᐅᑦᓱᑎᒃ ᐊᑑᑎᔪᖅ ᐅᓪᓗᒥᐅᓕᖅᑐᒧᑦ. ᓇᑯᕐᒦᖅᑕᕗᑦ ᖃᓄᓕᒫᑦᓯᐊᖅ ᐱᓕᕆᖃᑦᑕᖅᓯᒪᓂᖏᓐᓄᑦ ᐱᓕᕆᔾᔪᔾᔨᖏᓐᓇᕋᑦᓯᓗ.
ᓇᓗᓇᐃᖅᓯᒪᔪᖅ ᐃᑲᔪᖅᑎᒌᒃᑕᒥ, ᒐᕙᒪᕗᑦ ᐊᑐᓕᖅᑎᑦᓯᕗᑦ ᐃᓐᓇᕈᖅᐸᓪᓕᐊᔪᑦ ᐃᑉᐱᒋᔭᖃᑦᓯᐊᕐᓗᑎᒃ ᐃᓐᓇᐃᑦ ᐃᓄᑐᖃᐃᓪᓗ ᖃᓄᐃᓕᐅᕈᑕᐅᔪᒪᔪᒥᒃ, ᐱᐅᓯᒋᐊᖅᑎᑦᓯᓪᓗᑎᒃ ᐊᑐᕈᓐᓇᕐᓂᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᓂᕐᒥᒃ ᐃᓐᓇᕐᓄᓪᓗ ᑲᒪᒋᔭᐅᓂᕐᒧᑦ ᐱᔨᑦᓯᕋᐅᑎᓂᒃ ᖃᓂᓐᓂᖅᓴᒧᑦ ᐊᖏᕐᕋᕆᔭᐅᔪᓄᑦ. ᐱᓕᕆᖃᖅᑐᒍᑦ ᐱᕈᖅᑎᑦᓯᓂᕐᒧᑦ ᐊᔪᙱᓐᓂᖃᕐᓂᑎᓐᓄᑦ ᐃᓐᓇᐃᑦ ᖃᓂᒃᓴᐃᓐᓇᖁᓪᓗᒋᑦ ᐃᓚᒥᓄᑦ ᐱᖃᓐᓇᕆᔭᒥᓄᓪᓗ ᓄᓇᕗᒻᒥ, ᐸᕐᓇᑦᓯᒪᓂᕐᒧᑦ ᐊᑯᓂᐅᔪᒧᑦ ᑲᒪᒋᔭᖃᖅᐸᓐᓂᕐᒧᑦ ᐃᓂᒋᔭᐅᖃᑦᑕᕐᓂᐊᖅᑐᓂᒃ ᐃᖃᓗᒃᑑᑦᑎᐊᒥ ᐃᖃᓗᓐᓂᓗ ᐊᖏᓪᓕᒋᐊᖅᑎᑦᓯᔪᒪᓂᕐᒧᑦ ᑲᔪᓯᓂᖃᑦᓯᐊᕐᓂᖓᓂᒃ ᑭᕙᓪᓕᕐᒥ ᐊᑯᓂᐅᔪᒧᑦ ᑲᒪᒋᔭᐅᙱᓐᓇᑦᑐᒃᑯᕕᒻᒥ ᑲᖏᖅᖠᓂᕐᒥ.
ᐃᓇᑦᓯᕗᖓ ᐃᓕᓐᓂᒃ ᐱᕕᑦᓴᖃᕐᓂᕐᒧᑦ ᐅᓪᓗᒥ ᖃᐅᔨᒋᐊᕐᓗᓯ ᐃᓐᓇᕐᒥᒃ, ᐳᓛᕆᐊᕐᓂᐊᕐᓗᓯ, ᓂᕆᖃᑎᒌᓪᓗᓯ, ᐅᖃᓪᓚᖃᑎᖃᑐᐃᓐᓇᕐᓗᓯᓪᓘᓐᓃᑦ. ᐃᓐᓇᖁᑎᕗᑦ ᐃᓚᒋᔭᐅᓪᓚᕆᒻᒪᑕ ᐃᓅᖃᑎᒌᓐᓂᑦᑎᓐᓄᑦ, ᓯᓚᑐᓂᖃᖅᓱᑎᓪᓗ ᐱᓯᒪᐃᓐᓇᕆᐊᖃᖅᑕᑦᑎᓐᓂᒃ ᓯᕗᒻᒧᐊᑉᐸᓪᓕᐊᑎᓪᓗᑕ. ᒪ'ᓇ."