ᐃᖃᓗᐃᑦ, ᓄᓇᕗᑦ (ᒫᔾᔨ 24, 2026) −ᓄᓇᕗᑦ ᒐᕙᒪᖓᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ. (NTI) ᓇᓗᓇᐃᖅᓯᕗᑦ ᓄᓇᕐᔪᐊᓕᒫᒥ ᐳᕙᒡᓗᖕᓇᐅᑉ ᐅᓪᓗᖓᓂ ᓇᓗᓇᐃᖅᓯᒃᑲᓐᓂᖅᖢᑎᒃ ᑲᑐᔾᔨᓪᓗᑎᒃ ᐊᖏᕈᑎᒋᓯᒪᔭᖓᓂᒃ ᐱᑕᖃᕈᓐᓃᖅᑎᑦᑎᔪᒪᓪᓗᑎᒃ ᐳᕙᒡᓗᖕᓇᒥᒃ ᓄᓇᕗᒻᒥ 2030 ᑎᑭᓚᐅᙱᓐᓂᖓᓂ. ᐊᑕᐅᑦᑎᒃᑯᑦ, ᓴᙱᒃᑎᒋᐊᖅᑎᑦᑎᕗᒍᑦ ᐳᕙᒡᓗᒃᑕᐃᓕᒪᑎᑦᑎᓂᕐᒥᒃ, ᖃᐅᔨᓴᕐᓂᕐᒥᒃ, ᑲᒪᒋᔭᖃᕐᓂᕐᒥᒃ ᐅᔾᔨᕈᓱᒃᑎᑦᑎᓂᕐᒥᒡᓗ ᐊᑐᕐᓗᓂ ᐃᓄᐃᑦ ᐱᔭᕆᐊᖃᖅᑕᖏᓐᓂᒃ, ᓯᕗᓪᓕᐅᑎᑦᑐᒪᔭᖏᓐᓂᒃ ᐊᒃᑐᐊᓂᓕᖕᓂᑦ ᓄᓇᓖᓪᓗ ᖃᐅᔨᒪᔭᖏᓐᓂᒃ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ
ᐳᕙᒡᓗᖕᓇᖅ ᓄᖅᑲᖅᑎᑦᑐᒪᓪᓗᒍ ᐃᑲᔪᖅᑐᐃᓪᓚᕆᒃᐳᖅ ᐃᓚᒌᓂᒃ, ᓴᐳᔾᔨᓯᒪᔪᒪᓪᓗᑎᒃ ᑭᖑᕚᒃᓴᑦᑎᓐᓂ, ᐱᓕᕆᖃᑎᖃᕐᓗᑎᒡᓗ ᓄᓇᓕᖕᓂ.
"ᓄᓇᕗᑦ ᒐᕙᒪᒃᑯᑦ ᑕᒪᑐᒥᖓ ᐱᓕᕆᐊᖃᐃᓐᓇᕈᒪᕗᑦ," ᐅᖃᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓇᑦ ᐱᑦᓯᐅᓛᖅ ᐳᕉᔅᑐ. "ᑲᑐᔾᔨᖃᑎᒋᓗᒋᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦ, ᑲᔪᓯᓂᐊᖅᐳᒍᑦ ᓇᖏᖃᑎᖃᕐᓗᑕ ᐱᓕᕆᖃᑎᒋᔭᓕᒫᑦᑎᓐᓂᒃ ᐃᓄᓕᒫᑦ ᑲᒪᒋᔭᐅᔪᓐᓇᖁᓪᓗᒋᑦ ᐃᑲᔪᖅᑐᖅᑕᐅᓗᑎᒡᓗ ᐱᔭᕆᐊᖃᖅᑕᖏᓐᓂᒃ. ᐊᑕᐅᑦᑎᒃᑯᑦ, ᓯᕗᒻᒧᐊᒃᐸᓪᓕᐊᕗᒍᑦ ᐳᕙᒡᓗᖕᓇᖅ ᐱᑕᖃᕈᓐᓃᖁᓪᓗᒍ ᓄᓇᕗᒻᒥ."
ᐳᕙᒡᓗᖕᓇᖅ ᓱᓕ ᐱᕐᔪᐊᖑᓪᓗᓂ ᐋᓐᓂᐊᖃᕐᓇᙱᑦᑐᓕᕆᔨᓂᑦ ᐃᓱᒫᓘᑕᐅᖏᓐᓇᖅᐳᖅ ᓄᓇᕗᒻᒥ. ᑭᓯᐊᓂᓕ, ᖃᔅᓯᐅᓂᖏᑦ ᐃᓄᐃᑦ ᐆᒻᒪᕆᒃᑐᒥᒃ ᐳᕙᒡᓗᒃᑐᑦ ᓄᓇᕗᒻᒥ ᐅᓄᕈᓐᓃᖅᐸᓪᓕᐊᖏᓐᓇᖅᐳᑦ ᐊᕐᕌᒍᓂ ᐊᓂᒍᓵᖅᑐᓂᒃ, ᐃᓚᖓᒍᑦ ᐱᔾᔪᑕᐅᓪᓗᓂ ᐳᕙᒡᓗᖕᓇᒧᑦ ᖃᐅᔨᓴᖅᑕᐅᔪᑦ ᐃᓚᒋᐊᖅᓯᒪᓂᖏᓐᓄᑦ ᐅᓄᖅᓯᒋᐊᖅᖢᑎᒡᓗ ᐳᕙᒡᓗᖕᓇᒧᑦ ᐃᓅᓕᓴᖅᑕᐅᔪᑦ (ᐆᒻᒪᐅᙱᑦᑐᒥᒃ ᐳᕙᒡᓗᖕᓇᒥᒃ). ᓄᓇᕗᑦ ᑐᙵᕕᒃᑯᑦ ᐊᖏᔪᑲᓪᓚᖕᓂᒃ ᑮᓇᐅᔭᖅᑖᖅᑎᑦᑎᓯᒪᕗᑦ ᓄᓇᕗᑦ ᒐᕙᒪᖓᓄᑦ ᐃᑲᔪᖅᑐᐃᓪᓗᑎᒃ ᐱᓇᔪᒃᑕᐅᔪᓂᒃ, ᕼᐋᒻᓚᒃᑯᓐᓄᓪᓗ ᐊᐅᓚᑕᐅᔪᓂᒃ ᓄᓇᓕᖕᓂ ᖃᓄᐃᓕᐅᕈᑕᐅᔪᓂᑦ ᐳᕙᒡᓗᖕᓇᒥ ᐊᐃᑦᑐᐃᖃᑦᑕᐅᑎᔪᓄᑦ.
"ᐳᕙᒡᓗᖕᓇᖅ ᓄᖅᑲᖅᑎᑦᑕᕆᐊᖃᓕᖅᑕᕗᑦ ᓄᓇᕗᒻᒥ," ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐹᓪ ᐃᕐᖓᐅᑦ ᐅᖃᖅᑐᖅ. "ᐃᓄᐃᑦ ᐊᒃᓱᕉᑎᖃᖅᓯᒪᕗᑦ ᐳᕙᒡᓗᖕᓇᒧᑦ ᐊᑯᓂᓗᐊᕌᓗᒃ. ᐊᒃᑐᐃᕙᓪᓕᐊᖏᓐᓇᕐᓂᖓ ᐃᖅᑲᐃᓯᔾᔪᑕᐅᕗᖅ ᐋᓐᓂᕐᓇᖅᑐᓂᒃ ᐊᑐᖅᑕᐅᖃᑦᑕᖅᓯᒪᔪᓂᒃ ᐃᓚᑦᑎᓐᓂᒃ ᓄᓇᓕᑦᑎᓐᓂᒡᓗ ᐊᕐᕌᒍᒐᓴᖕᓄᑦ ᐋᖅᑭᒃᑕᐅᓯᒪᔪᒥᑦ. ᓄᓇᕗᑦ ᑐᙵᕕᒃᑯᑦ ᐃᑲᔪᖅᑐᐃᕗᑦ ᓄᓇᓕᑦᑎᓐᓂ ᓄᓇᕗᑦ ᒐᕙᒪᖓᓂᒡᓗ ᒪᒥᑎᑦᑎᖃᑕᐅᔪᒪᓪᓗᑎᒃ ᑕᒪᒃᑯᓂᖓ ᐋᓐᓂᕈᑕᐅᓯᒪᔪᓂᒃ ᐱᓕᕆᖃᑎᒌᒃᑎᓪᓗᑕ ᓴᙱᒃᑎᒋᐊᖅᑎᑦᑎᓗᑕ ᐱᐅᓯᒋᐊᖅᑎᓪᓗᒋᓪᓗ ᐊᑐᖅᑕᐅᔪᓐᓇᖅᑐᑦ ᐳᕙᒡᓗᖕᓇᒧᑦ ᑲᒪᒋᔭᐅᓂᖅ ᐋᖅᑭᒃᓱᐃᕙᓪᓕᐊᓗᑕᓗ ᐊᑐᖅᑕᐅᔪᓐᓇᖅᑐᓂᒃ ᑐᙵᕕᓕᖕᓂᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ."
ᓄᓇᕗᑦ ᒐᕙᒪᖓ ᓄᓇᕗᑦ ᑐᙵᕕᒃᑯᓪᓗ ᓯᕗᒻᒧᐊᒃᑎᑦᑎᕙᓪᓕᐊᕗᑦ ᐋᖅᑭᒋᐊᕈᑕᐅᑯᑖᖕᓂᐊᖅᑐᓂᒃ ᐃᑲᔪᖅᑐᐃᓗᑎᒃ ᐳᕙᒡᓗᖕᓇᒧᑦ ᐱᓕᕆᐊᒃᓴᕆᔭᐅᔪᓂᒃ, ᐃᓚᒋᔭᐅᓪᓗᓂ ᓄᓇᓕᖕᓂ ᐃᓚᐅᑎᑦᑎᓂᖅ ᐊᒻᒪᓗ ᐃᓅᓯᖃᑦᑎᐊᕐᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᑦ. ᑕᒪᓐᓇ ᑕᑯᒃᓴᐅᑎᑦᑎᕗᖅ ᑐᑭᓯᐅᒪᖃᑎᒌᖕᓂᕐᒥᒃ ᐳᕙᒡᓗᖕᓇᖅᑐᒥᒃ ᐱᑕᖃᕈᓐᓃᖅᑎᑦᑎᓂᐊᕐᓗᓂ ᑲᒪᔭᕆᐊᖃᖅᐳᑦ ᑕᒪᐃᓐᓂᒃ ᐋᓐᓂᐊᕐᕕᖕᒥ ᐱᔭᐅᔭᕆᐊᓕᖕᓂᒃ ᐃᓅᖃᑎᒌᓄᓪᓗ ᐊᒃᓱᕉᑕᐅᓕᓲᓂᒃ ᖃᓄᐃᙱᑦᑐᓂᑦ, ᓲᕐᓗ ᐃᒡᓗᖃᕐᓂᖅ, ᓂᕿᒃᓴᖃᑦᑎᐊᕐᓂᖅ, ᐋᓐᓂᐊᕐᕕᖕᒥᓪᓗ ᑲᒪᒋᔭᐅᔪᓐᓇᕐᓂᖅ.
ᑲᑐᔾᔨᖃᑎᒌᖕᓂᒃᑯᑦ, ᓄᓇᓕᖕᓂ ᓯᕗᓕᖅᑎᓂᑦ, ᐊᒻᒪᓗ ᐃᓕᖅᑯᓯᑦᑎᓐᓂ ᑐᙵᕕᓕᖕᓂᒃ ᐱᓕᕆᔾᔪᓯᕐᓂᒃ, ᐳᕙᒡᓗᖕᓇᖅ ᐱᑕᖃᕈᓐᓃᖅᑎᑦᑐᓐᓇᖅᐸᕗᑦ ᓯᕗᓂᒃᓴᑦᑎᓐᓂ ᐃᓄᐃᑦ ᓄᓇᓕᖏᓐᓄᑦ ᑎᑭᑕᐅᔪᓐᓇᖅᐳᖅ.