Iqaluit, Nunavut (Qiqaijarvia 24, 2026) – Nunavut Kavamanga (GN) Nunavut Tunngavitkutlu (NTI) naunaijaqtaat Nunarjuami Tiibiirnikkut Ublua imaa uqautigiffaaqhugit inmi havaqatigiingnikkut akhuurutitik piqangnairlugu tibiirniq (TB) Nunavunmi hamunga 2030-mun. Atauttikkut, hakugikhaliqtavut TB-kut aannialaqittailinikkut, ihivriurutinun, havautikhainnun qaujihimanikkullu qanuqtun pidjutiqaqtun Inuit ihariagijainnik, hivulliutijumajainnik nunallaanilu qaujihimanirnik tamaani nunaptingni.
Nutqaqtitiniq TB-mik akhuurutit ikajurlugit ilagiit, munarittiarlugit hivuniptingni kingulivut, havaqatigilugillu nunallaat.
"GN-kut akhuuqhimmaaqtut uminga havaakhamik," uqaqtuq Aanniaqtailinikkut Minista Janet Pitsiulaaq Brewster. "Atautikkut NTI-kut, aulahimaarniaqtugut nangiqatigilugit tamaita iligiit pijaangini tamaita inuit pijaangnirit munaridjutinun ikajuutinunlu ihariagijamingnik. Tamapta, hivumuuqpalliajugut TB-qangittaangani Nunavunmi."
TB aulahimaanginaqtuq nunalaani inuuhirinikkut ihumagijaunginaqtuq Nunavunmi. Kihimi, qaffiuniit inuit TB-qaqtut Nunavunmi ikiklijuumiqtut qanganuaq ukiuni, ilanga pidjutigijaat amigaiqjuumijut TB-mik ihivriurutit amigairjuumijullu mamitiidjutit Tiibiirnirmun aanniarutit (hiniktuq TB). NTI-kut tunihijut angijumik maniliqtuinirmik GN-kunun ikajuutighat hapkununga akhuurutinun, haamlatkununlu nunamingni hivuliqhuqtut kiudjutit nunallaani TBiirnirmun hiamitiqtut.
"Nutqaqtinnaqhijaqqut TB Nunavunmi," uqaqtuq NTI-kut Angijuqaanga Paul Irngaut. "Inuit tigumiaqtaat ajuqhaut TBiirnirmun qan'ngaraaluk. Aulahimaaqtuq hulaqutaa itqaumadjutaujuq ulurianaqtunik atuqhimajaptingnik tapkua pidjutigijaat ilaptingnun nunallaaptingnunlu ingilraanin. NTI-kut nangiqatigijait nunallaavut ukualu GN-kut ikajurlugit mamiharlugit hapkua uluriahuutit havaqatigiikhuta hakugikhijuumiriangani ihuaqhijuumirlugulu pijaangnirit TBiirnirmun munaridjutit havaglugillu upautidjutikhat atadjutiqaqtut Inuit akhuurutainun."
GN-kut ukualu NTI-kut hivumuuliqtut hivitujumik-kikliqaqtut ihuaqhaidjutikhat ikajuutighat TBiirnirmun pinahuarutinun, ilaujut nunallaat ilauqatigiingnirit inuuhiqattiarnirmunlu pinahuarutit. Una tautuktitaa atauttikkut kangiqhimadjutimik piiqtirnikkut TB-mik pidjutiqaqtuq kiunikkut tamangnik havautikkut ihariaginiit ukunanilu inungni hulaqutivaktun aanniaqtailinirni, imaatun iglukhani, niqailliurnaittumik, pijaanginnilu aanniaqtailinikkut munaridjutinik.
Aulahimaaqtumik havaqatigiingnikkut, nunallaat hivuliqhuutait, pitquhikullu tungaviqaqtut upautiniit, TBiiqangitluni hivuniptingni Inuit nunallaanginun tikitaaqtait.