ᐃᖃᓗᐃᑦ, ᓄᓇᕗᑦ (ᔭᓄᐊᕆ 22, 2026) – ᒪᓕᒐᓕᐅᖅᑏᑦ ᓄᓇᕘᒥ ᐱᐊᓂᓚᐅᖅᐳᑦ ᒪᓕᒐᓕᐅᖅᑎᓕᒫᑦ ᑲᑎᒪᑎᓪᓗᒋᑦ ᐃᖃᓗᖕᓂ ᐅᖃᐅᓯᒃᓴᒥᓂᒃ ᑐᓴᖅᑎᑦᑎᓪᓗᑎᒃ ᐊᒻᒪ ᑐᑭᒧᐊᒃᑎᑦᑎᓪᓗᑎᒃ ᐱᕙᓪᓕᐊᑎᑕᐅᔪᒥᑦ ᐊᐅᓚᑦᑎᔩᑦ ᑲᑎᒪᔨᖏᑕ ᐱᓕᕆᐊᒃᓴᖏᓐᓂᒃ 7-ᒋᓕᖅᑕᖓᓂ ᒪᓕᒐᓕᐅᕐᕕᖕᒥ.
ᑲᑎᒪᑎᓪᓗᒋᑦ ᒪᓕᒐᓕᐅᖅᑎᓕᒫᓂᒃ ᑲᑎᓚᐅᖅᐳᑦ ᓄᓇᕗᒥᐅᑦ ᐱᔭᕆᐊᖃᖅᑕᖏᓐᓂᒃ ᐅᖃᐅᓯᖃᖅᖢᑎᒃ, ᐱᓕᕆᐊᒃᓴᓂᒃ ᐊᒻᒪ ᐊᒃᓱᕈᕐᓇᖅᑐᓂᒃ ᓄᓇᕘᒥ ᐅᖃᐅᓯᖃᖅᖢᑎᒃ, ᐊᒻᒪ ᑕᐅᑐᖅᑰᖅᑕᐅᔪᓂᒃ ᑐᓴᖅᑎᑦᑎᔪᒪᓪᓗᑎᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᒻᒪ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ ᐱᔾᔪᑎᖃᓪᓗᐊᑕᖅᖢᑎᒃ. ᐅᖃᐅᓯᐅᓚᐅᖅᑐᑦ ᑐᙵᕕᖃᓚᐅᖅᐳᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᓴᖅᑎᑕᐅᓪᓗᑎᒡᓗ ᐅᖃᖃᑎᒌᖕᓂᒃᑯᑦ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂᒃ. (ᓄᓇᕗᑦ ᑐᙵᕕᒃᑯᑦ ᑎᒥᖓᑦ) ᐃᓐᓇᐃᓪᓗ.
ᓄᓇᕘᒥ ᐊᖏᖃᑎᒌᖕᓂᒃᑯᑦ ᒐᕙᒪᖃᖅᑎᓪᓗᒋᑦ, ᑎᓕᔭᐅᓯᒪᔾᔪᑎᖏᑦ ᐋᖅᑭᒃᑕᐅᕙᒃᐳᑦ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ, ᑐᓴᕐᕕᖃᖅᖢᑎᒃ ᓂᕈᐊᖅᑕᐅᓯᒪᔪᓕᒫᓂᒃ. ᒪᓕᒐᓕᐅᖅᑎᓕᒫᑦ ᑲᑎᒪᑎᓪᓗᒋᑦ ᐱᕕᖃᖅᑎᑦᑎᓚᐅᖅᑐᑦ ᐃᓱᒪᖅᓱᖅᖢᑎᒃ ᐅᖃᖃᑎᒌᒃᖢᑎᒃ, ᐃᓱᒪᒋᔭᒥᓂᒡᓗ ᑐᓴᖅᑎᑦᑎᓪᓗᑎᒃ, ᐊᒻᒪᓗ ᓇᓕᒧᒌᒃᑎᓵᓕᓗᒋᑦ ᓯᕗᓕᖅᑏᑦ ᑲᑎᒪᔨᖏᑦ ᑲᔪᓯᓚᐅᙱᓐᓂᖏᓐᓂᒃ ᐱᓕᕆᐊᒥᓂᒃ ᐱᐊᓂᒐᓱᒡᓗᑎᒃ ᐱᔭᒃᓴᖅᑖᕆᓯᒪᔭᖏᓐᓂᒃ ᑎᑎᖅᑲᓂᒃ.
ᑲᑎᒪᑎᓪᓗᒋᑦ, ᐃᓚᒋᔭᐅᔪᑦ ᐅᖃᐅᓯᖃᓚᐅᖅᐳᑦ ᑕᐅᑐᙳᐊᖅᑕᒥᓂᒃ ᓄᓇᕗᒻᒧᑦ, ᓇᓗᓇᐃᖅᓯᓪᓗᑎᒃ ᓇᐅᒃᑯᑦ ᓇᓕᒧᒌᒃᑎᑦᑎᔪᓐᓇᕐᒪᖔᑦ, ᕿᒥᕐᕈᓪᓗᑎᒡᓗ ᓂᕈᐊᕆᔪᓐᓇᖅᑕᖏᓐᓂᒃ ᐊᒻᒪᓗ ᑕᐅᖅᓰᔾᔪᑎᒃᓴᓂᒃ ᐱᔭᐅᔭᕆᐊᓕᖕᓂᒃ ᑲᒪᒋᔭᐅᑦᑎᐊᖁᓪᓗᒋᑦ ᒐᕙᒪᒃᑯᑦ ᐱᓕᕆᐊᕆᓇᓱᒃᑕᖏᑦ ᐅᑭᐅᓄᑦ ᑎᓴᒪᓄᑦ ᐊᑐᕐᓂᐊᖅᑐᓄᑦ. ᑖᒃᑯᐊ ᑐᓴᖅᑕᐅᔪᑦ ᐃᑲᔫᑕᐅᓂᐊᖅᐳᑦ ᓯᕗᓕᖅᑎᑦ ᑲᑎᒪᔨᖏᓐᓂᒃ ᑎᑎᕋᖅᐸᓪᓕᐊᑎᓪᓗᒋᑦ ᐋᖅᑭᒋᐊᖅᓯᕙᓪᓕᐊᑎᓪᓗᒋᓪᓗ ᐱᓕᕆᐊᒃᓴᖏᓐᓂᒃ.
"ᑎᓕᔭᐅᓯᒪᔾᔪᑎᖏᑦ ᑲᑎᙵᓪᓗᑎᒃ ᒪᓕᒐᓕᐅᖅᑎᓕᒫᑦ ᑲᑎᒪᑎᓪᓗᒋᑦ ᐃᖃᓗᖕᓂ ᐱᒻᒪᕆᐅᓚᐅᖅᐳᖅ ᐱᓕᕆᕙᓪᓕᐊᑎᓪᓗᒋᑦ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ," ᓯᕗᓕᖅᑎ ᔮᓐ ᒪᐃᓐ ᐅᖃᖅᑐᖅ. "ᐱᕈᖅᓴᐃᓂᖅ ᐱᓕᕆᐊᖑᓚᐅᖅᑐᒥᒃ ᐊᕐᕕᐊᓂ ᒥᓂᔅᑕᐅᖃᑎᒌᑦ ᑲᑎᒪᑎᓪᓗᒋᑦ ᑎᓯᐱᕆᒥ ᐊᒻᒪ ᐃᑲᔪᖅᓱᖅᑕᐅᓪᓗᑕ ᐱᓕᕆᖃᑎᒋᔭᑦᑎᓐᓄᑦ ᓄᓇᕗᑦ ᑐᙵᕕᒃᑯᓐᓂ, ᑐᙵᕕᖃᑦᑎᐊᖅᐳᒍᑦ ᐱᕙᓪᓕᐊᔾᔪᑎᒋᓂᐊᖅᑕᑦᑎᓐᓄᑦ ᓄᓇᕘᒥ ᐅᑭᐅᓄᑦ ᑎᓴᒪᓄᑦ ᐊᑐᕐᓂᐊᖅᑐᓄᑦ."
"ᖁᔭᓕᔪᒪᕗᖓ ᓯᕗᓕᖅᑎᒧᑦ ᑐᙵᓱᒃᑎᑦᑎᑦᑎᐊᓚᐅᕐᒪᑦ ᒪᓕᒐᓕᐅᖅᑎᓕᒫᓂᒃ. ᓂᕆᐅᒃᐳᖓ ᑭᖑᓪᓕᖅᐹᖅᓯᐅᑎᒥᒃ ᐱᓕᕆᐊᒃᓴᕆᑎᑕᐅᔪᒥᒃ ᑎᑎᕋᖅᓯᒪᔪᒥᒃ ᓴᖅᑭᑎᑕᐅᓛᕐᓂᖓᓂᒃ ᒪᓕᒐᓕᐅᕐᕕᖕᒥ ᐊᒡᒋᖅᐸᓪᓕᐊᔪᒥ ᐅᑭᐅᒃᑯᑦ ᑲᑎᒪᓂᑦᑎᓐᓂ," ᐅᖃᖅᑐᖅ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑕ ᐃᒃᓯᕙᐅᑕᖓ ᑖᓂᐅᓪ ᖃᕝᕕᒃ, ᒪᓕᒐᓕᐅᖅᑎ ᓴᓂᑭᓗᐊᕐᒧᑦ.
ᓯᕗᓕᖅᑏᑦ ᑲᑎᒪᔨᖏᑦ ᑲᔪᓯᓂᐊᖅᑐᑦ ᐋᖅᑭᒋᐊᖅᓯᓂᕐᒥᑦ ᓯᕗᓪᓕᖅᐹᖅᓯᐅᑎᒥᑦ ᑎᓕᓯᔾᔪᑎᒥᑦ ᐱᓇᓱᐊᕈᓯᐅᓂᐊᖅᑐᓂᑦ. ᐱᔭᕇᖅᑕᐅᓯᒪᓕᖅᐸᑦ, ᑎᓕᔭᐅᓯᒪᔾᔪᑎᖓ ᓴᖅᑭᑕᐅᓂᐊᖅᑐᖅ ᑭᖑᓪᓕᕐᒥ ᒪᓕᒐᓕᐅᖅᑏᑦ ᑲᑎᒪᓕᖅᐸᑕ ᒫᑦᓯᒥ, ᖃᐅᔨᒪᔾᔪᑕᐅᓗᑎᒃ ᒐᕙᒪᒃᑯᑦ ᐸᕐᓇᐅᑎᖏᓐᓂᒃ, ᐊᑐᓕᖅᑎᑦᑎᓂᕐᒥᒃ, ᐊᒻᒪ ᐱᕙᓪᓕᐊᓂᖏᓐᓂᒃ ᐅᓂᒃᑳᓕᐅᕐᓂᕐᒥᒃ 7-ᒋᓕᖅᑕᖓᓂ ᒪᓕᒐᓕᐅᕐᕕᖕᒥ.