Iqaluit, Nunavut (Januali 22, 2026) – Ilaujun Maligavliurviani Nunavunmi iniqtaat Tamainni Katimajiinni katimadjutimik Iqalungni tunijaami uqautinik hivulliurutikhaniklu talvunga pivallialiurnirnun uumani Ministait Katimajiit pitquidjutaanik uvunga Saivauninganik Maligaliurvianik.
Katimadjuti katipkaqtait tamaita MLAkut ihumagijakhanik ihariagidjutainnik Nunavunmiut, uqautigilugin uuktuqvikhat ajurnavjaktullu atuqtaujuq nunami, tuniudjutigilugillu atuqatigiiktaujun ihumagidjutit ikajuriami kangiqhipkaidjutikhanik hivulliutiujukhanik turaangajukhanik uvani kamatkut pitquidjutaani. Uqautigijaujun tunngaviqaqtun uppirijaudjutini Inuit qaujimajatuqanginni kangiqhidjutihimajullu uqaqtigiigutikkut ukunani katimajiinni Nunavut Tunngavitkunni. (NTI) Inirnikhallu.
Uvani Nunavutim atauttikkut pidjutaani kavamaujuni, pitquidjuti pivallialiuqtauhimajuq Ministat Katimajiinnin, uqautainnillu tamainnin niruaqtauhimajunik katimajiinnin. Una Tamainni Katimajiinni katimadjuti tunijuq uuktuqvikhanik angmaumajunik uqaqatigiigutinik, atauttikkut ihumagidjtinik, qilamiklu ihuaqhainirnun hivuagun Ministat Katimajiit havakhimmaarutainnun iniqtirnikkut pitquidjutaani titiramik.
Pidjutaani katimadjutimi, katimajiit uqautigijait tautugutimingnik Nunavunmun, naunaijaqhimajuni kituni ihuaqhainirni, naunaijaqhugillu qanuriliurutikhat himmautikhallu pijukhat naunaijariami kavamatkut havagutainnik tikittukhani hitamani ukiuni. Ukuat uqautiit ikajurniaqtait hivulliurlugin Ministat Katimajiit havagutigihimmaaqtillugu ihuaqhaiplugulu pitquidjuti.
“Una pitquidjuti katimadjuti ukunani Tamainni Katimajiinni Iqalungni akhuurnaqtuq qanuriliuruti havagutimi pivallialiurnirmi kavamaptingni pitquidjutaani,” uqaqtuq Hivuliqti John Main. “Aulapkainiani havagutinik aullaqtiqhimajun Arviani uvuuna Ministani katimadjutaani Tisaibami ikajuutainnilu paannarijaptingni NTIkunni, piqaqtugun hakugiktumik pidjutikhamik hivumuudjutikhaptingnun nunagijaupluta ukunani tikittukhani hitamani ukiuni.”
“Uqarumajara quviahuutiga Hivuliqtimun tunngaqhuktidjutikkut uqautainnik tamainnin Katimajiinnin Maligaliurvingmin. Niriuktunga kingulliqpaamun pitquidjutimi uqautaani iliuraqtauliqtumi Maligaliurvingmi uvani pijukhami ukiumi katimadjutimi,” uqaqtuq Tamaat Katimajiinni ikhivautalik Daniel Qavvik, MLAngjuq Sanikiluarmun.
Una Ministait Katimajiit ihuaqhaqhimmaarniaqtaa iniqhimaittuq pitquidjuti tikittukhani havainirni. Iniqhimaliqqat, pitquidjuti iliuraqtauniaqtuq uvani tukliqmi katimadjutimi Maligaliurvingmi Maatsimi, hivulliurniaqtaillu kavamatkunni upalungaijautait, atuqtipkaidjutait, ukunanilu hivumuuqtuni unniudjutini tamaat hivituniani uvani Saivauninganik Maligaliurvianik.