Iqaluit, Nunavut (Fibjuali 14, 2024) – Nunavut Kavamanga (GN), Nunavut Tunngavik Inc., unalu Kanadaup Kavamanga ublumi aullaqtiqtaa una Inunnguqsaivik: Ajuiqharniq hulidjutikhanun.
Una nutaaq ajuiqharnikkut ikajututikkut piniaqhimadjuti ikajurniaqtait Nunavunmin Inuit pijaami ajuiqhimadjutikhanik qaujihimanirnik havagiami munarinikkut Nunavutim nunait, imait, piqutaillu taimaatun hapkuat havaakhat munarijakhallu nuutiqtaugumik kavamatuqatkunnin GNkunnun. Ikajurniaqtaillu havaqatigilugillu ukuat amigaittun aularaanginnaqtun Inuinnarnin-hivulliuqtaujun nunainni piqutainnilu munaridjutiit piniaqhimanirnun Nunavunmi.
Inunnguqsaivik ikajurniaqtaa Nunavuni Inuinnait naunaijaqlutik pilirlugillu iliharutit, ajuiqharniit, havaakkullu aturutkhanik iharigijaujun piniaqhimajaami havaakhanik ukunani nunakkut munaridjutini piqutinilu munaridjutainnik. Ajuiqhaqtun pijaaqtun amigaittunun iliharutikhanun ingmingnullu ikajuutikhanik pipkaijaami piqaqtait aturutikhatik ihariagijait nakuujumik iniqhijaamingni.
Ilaulirumik Inunnguqsaivingmi, ajuiqhaqtun atadjutikhaqarniaqtun qaritaujakkuurutinun uuktuqvikhaqarlutik takudjutikkut uqaqagidjutikkullu aallanun piliriamilu pinahuarutikhanun hulidjutikhanullu pidjutilgit ajuiqhautimingnun. Piqangittuq kiklikhaqaqtunik ilihautini puqtuniinnun ukunaniluunniit havaakkut ajuiqhimanirnin pihimajariaqangittun aullaqtiriami. Naliit ilihaqjuummirutait pidjutilgillu iliharvigjuani pinahuarutini pihimajun hailihimajun hakugiktunik ikajuutikhanik Nunaqaqqaaqtunun ilihaqtunun talvaniittullu humilu piqaqtuni Inuinnaqaqtuni.
Aakassi 2019mi, Angirutigiiguti Ihumagijakkut (AIP) sainiaqtauhimajuq pingahunin ilaujunin, piliuqhuni apqutikhamik nanminiqhuurnirmun munarijakhanik pidjutilgit munaridjujtikkut uvanilu munaridjutainni Nunavutip kavamtkunni nunanik, imainnik, piqutainnilu Nuanvunmiittuni talvanga kavamatuqatkunnin uvunga GNkunnun.
Angiruti pipkaijuq pivallianirmun uumani Hivumuunirmun Havaktiliqinirnun Pivallianirnun Parnaqutikhamik Nanminiqhurnirmun. Pipkaqtilluarumania imaatun amigaitqijaujumapkainirnun Inuinnarnik havakliqtukhanik tamainni qaliriiktuni talvani havaakhani piliuqtauniaqtuni GNkunni pidjutaanin nanminiqhuurnirmin, huli ikajuqhimmaaqhugin GNkut havaktuliqijiit angummadjutait tuniqhaijaami havaakhait pihimajait Kanadaup Kavamanganin. Inunnguqsaivik piliuqtauhimajuq ikajuriami pijaami turaangajait tikiutijumajaillu uumani parnaqutikhami.
Una kingulliqpaaq Nunavunmi Nunainni Piqutainnilu Nanminiqhuunirmi Angirutimi qangannuaq atauttikkut-sainiqtauhimajuq taapkunanga pinahunin ilaujunin uvani Januali 18, 2024mi. Nanminiqhaqhuurniq tautuktitait ikajuqtaillu hivulliutijaujumajait Nunavunmin, tuniluni angitqijaujunik amiridjutinik ihumaliurutinun nunani piqutinilu, angmarlugulu ukkuaq nutaanun maniliurutikhanun piangaijarnikkullu pivalliadjutikhanun uukturutikhanun nunaptikni.
“Quviahuktunga havaqatigiigutiptingnun paannariikhuta Kanadaup Kavamanganun Nunavut Tunngavitkunnilu uvani Inunnguqsaiviup pinahuarutaani. Atuliqtipkainaiq uumani Nunavunmi Nunainni Piqutainnilu Nanminiqhuurnikkut Angirutaani ihuaqtukkut aullaqtiqtuq pipkianirnun Inuinnait tamaitalu Nunavunmiutat upalungaiqhimajun havaakhanun tikittukhanun. Sainiutaa angirutimi uvani Nanminiqhuurnirmun ihariagijaujuq qanurliuruti ukunani kavamaliqijikkut pivalliadjutiptingni, kihimi ublumi tautuktaqqut hivunikhamvun aullaqtipkaidjutaani una pinhuariti ilihaqtunun apqutaani havaakhanun nunani piqutinilu munaridjutainni Nunavunmi.”
Maligaliuqti P.J. Akeeagok, Nunavutim Hivuliqtia
"Akhuuqtatkat Inuit piquplugin ikajuutinik hailihimajun uumanga Inunnuqsaivingmin, hivummudjutiinnik ilihaqtamingnik naunaijarlugillu quvianaqtun uuktuqvikhat havaakhanun nunani piqutinilu munaridjutainni hailihimanialiqtun tikittukhani ukiuni."
Angijuqqaaq Aluki Kotierk, Nunavut Tunngavik Inc.
"Kanadami Kavamatkut quviahuktuq ikajuriami Inunnguqsaivik pipkaijaami Inuit tunihimajun ajuiqhautikhanik ihariagijaujunik pipkainirnun tautungnaqtunik havaktikhanik. Havaqatigihimmaarniaqtavun paannariikluta ukunani tikittukhanik pingahuni ukiuni ukununga Nunavut Tunngavik unalu Nunavut Kavamanga atuqtipkailirnirmun Nunavunmi Nanminirhuurnirmun Angirutimi pipkaujaamilu ihuaqtumik nuutirutimik. Una puiruqtaulimaittuq Angiruti ikajurniaqtaa piliuriami Ukiuqtaqtumin-hivulliqtaujumin havaakhanik, uuktuqvikhanik, maniliurutikhanik, piangaiqjuumirutikhaniklu Inuinnarnun tamainnullu Nunavunmiunun, tavungaalungmun.”
Maligaliuqti Dan Vandal, Minista Ukiuqtaqtumi Kavamaliqidjutainni
Kitkut ilaujumajun ajuiqharnirmun havaakhamun nunani piqutinilu munaridjutainni qaritaujakkut-titiqqijaaqtun inunnguqsaivik@gov.nu.ca. Ilitturijuummirutikhanun, uumingalu qaritaujakkuuqtukkut ilaujaami titiramik uumanilu Inunnguqsaivik 2023-24 Iliharutainnun Naunaijautimik atuqtakhamik, takulugu https://www.gov.nu.ca/inunnguqsaivik.