Uqaqtittiji, Qulliq Alrujaqtuqtunik Ikumadjutiit aliahujktun tuhaqtittivlutik taimaa kuapaliisiujuq nutaaq havakvilluanga Qamanittuami angmaktuq havagiamingni. Alrujaqtuutinun titiqqijini havaktiit havaktaujanullu tadja hailijun talvani 3091 6th Apqutaa alrujaqtuqtunik atuqpaktunun akiliqhijumajunun akiligakhamingnik apiqhuriaqturiamiluuniin upautilutik. Hanajait naunaitkutaq QEC-kunun amihumik ikajuriami alrujaqtuqtunik atuqtunun nunami ikajurlugillu nunallaanginnun.
Nutaaq igluqpak naunaitkutiqaqtuq aghuungnaqtunik quviahuutinik kuapaliisinun havaktigijainullu. Pidjutaanun atauttikkut ihuaqtumullu havaktainun avatingni, nakuutqijamik ikajuutiginiaqtaat havaktiujunun havaktainun naunaittumiklu kuapaliisitkut akhuurutainun inikhaliuqhutik ihuaqhiutikhanun pijainun nakuutjutikhanullu. Uqaqtittiji, ikajuutikhat ihuaqtumik aturiami najugakhamun naunaitkutaujuq nakuujumik
havagvingmik auladjutikhanullu ihuaqpiaktunun pihimajunik mikhijuumidjutikhanun QEC-kut avatingnun pidjutainun.
Kuapaliisitkun pihimmaaqtun pinahurittugu uumunga Energy Star iglukpanun naunaitkutikhamik uumunga nakuuqpiaktumun iglukpakhamun. Nakuujumik pikpata qaangiutikpan 12-ni tatqiqhiutini naunaijainikkut hivituniani, hivulliuniaqtuq pijainnin Kanatami ukiuqtaqtumi nunainni nakuujumik pijaami qanuriliurutimun. Uqaqtittiji, iglukpap qajagijumik, havatiarnikkut, munaritiaqhugillu idjuhighaa havaakhap turaangajuq aalangajuq pidjutigijaa atuqhugit akiliruminaqtut igluqpait tamajait hanalrutillu. Aturaaqpaktakhami kikliqaqtut avatiinun maniliqinirmunlu ikajuutauniaqtut ilaujuq mighijuunirutit pujungmik maniktuluangilutiklu igluqpaup auladjutainun ihuaqhainirmunlu akiit.
Kuapaliisitkun qujagijumajain nunallaanga Qamanittuami utaqqivangmata hanatillugin havagvilluaqhamun hanavaktillugin tun’ngahuutivlugulu ihariagijaujamun igluqpamun, ihuaqtumun pijaami ihariagijaujamun havaktainun. Qujagijavun QEC-kut havaktiinun ikajuqhimmaaqpangmata pivlugu nuutirutikhamik pilvlugu. Niriuqtunga ilitarijaujamun angmaqtirutikhaanun quviahuutikhaanullu ilihimajaujakhamun pijainnun Qamanittuami, aturaaqpaktakhami pidjutauniaqtuq nunallaami avikturvingmilu alrujaqtuqtunun.
Quana Uqaqtittiji.