Uqaqtittijii, quviagijaangat akhuurhainikkut quviahuutigiplugillu Nunavunmiut tautuktivaktun nakuujunik, aallangajunik, nanminighaliurnirnik, piliurnikkullu. Quvianaqtuq ublumi, Uqaqtittijii, quviahuutigiplugu Nunavutim kingulliqpaat akimajullu uvani hivuagun Ukiuqtaqtumi Pilaarhuutikkut Taktakhami.
Uqaqtittijii, una Ukiuqtaqtumi Pilaarhuutikkut Taktakhaq tunivaktuq ihariagijauqpiaqtunik naalaanginnikkut maniliqtuutikhaniklu havaktaujukhanun ikajuqpaktun pimmarikharnikkut nunallaaptiknik inuuhiptiknilu inuptikni, angikliharnikkut qaujihimajaptiknik, pijumanikkullu aallanguqtirutinik havagutikhanik iliharnikkut, aanniaqtailinikkut, pitquhikkut, avatikkut munarinirnik, piangaijarnikkullu.
Ilauvakhimayunga uvani ukiumi aituutikharnik quviahuutikharnik Iidjirurvia 8mi talvani Northern Lightsnik katimayuarutmi Ottawami, taima pingahuuyut Kinguliuyut havaktiit talvanga Nunavunmi pigiaqaqtun taktarutikharnik, ilauyut Kitikmeot Ilitquhiliqiyikkut Katimayiit, Ilitaqsiniq, unalu Nunavunmi Inulramiit Hanayukharnik Katitiqhimayut.
Uqaqtitiyi, hapkua pingahut katimayut, malguk tuniyauyut manikmik. Nan'ngaruhuktunga tunihiplunga mianikharmik $100,000-mit talvunga Nunavunmi Inulrammiit Piliurnirmik Katittugit, tamna inungnun havagviuyuq amigaigjuumidjutikhanik Inuit kivgaqtuijut takupkaidjutikhanik, tuhagakhanut imaalu aallanik qaritaujakkut titiraqtakhanik havaktikhaqhiurnikkut ajuitamingnik Nunavunmi inulrammiit.
Unuami, qulaani taktakhaq $1 miliataala tuniyauyuq hapkununga Nunavunmi havaaghamun, Ilitaqsiniq Pilimmaksaijuliriniq Havaaghaq.
Una havaaqhaq Inuit havakhimayuq hivuliqtigivakhimayuqlu kiudjutikharnik Nunaqyuaptingni Inuit Inminiiqtailiqinikkut Hanaqidjutikharnik, tamna Innusivut Anninaqtuq Nunavunmi Inminiiqtailiqinikkut Hanaqidjutikharnik unalu Alianait Inuit Ihumarluliqiyunik Hanaqidjutikharnik Upalungairutikharnik. Tamna havauhikhaq piyuq piliuriami ihumamitigut aaniarutilgit ayuitaminik, hakugikninnga unalu Inuit nakurudjutimut qangaraaluknitat ilihapkaqtuq pinahuarutinginnut tamainni Inuit Nunangani.
Uqaqtittiji, Nunavut Kavamanga quviahuktut kivgaktuiplutik imaalu havaqatigiplugit ukuat Ukiuqtaqtumi Akhuurutikhanut Taktakhaq, imaalu quviahuktugut takuplugit Nunavunmi havaakhat ilitarijauhimajut ikajuqtauplutiklu.
Uqaqtittijii, akhuurhaqtavun tamaita Nunavunmiut niriuktun akhuurhainikkut aallanguqtirutikhanik nunallaamingni uuktuquplugin takunikkut-maniliqtuutikhanik uumannga Ukiuqtaqtumi Pilaarhungnikkut Taktakhamingnik piniarhimadjutimingnun havaktakhanunlu.
Quana, Uqaqtittiji.