Uqaqtittiji, Nangiktunga ublumi uqallagumaplunga Faalamiutat Minihitaqpak Francis’ pulaaqtilunik Iqalungmun Taaqhivaliavia 29, 2022mi.
Hivuliqpaarmi quyagiumaplugit Inuit Tapiriit Kanatami Nunavut Tunngavikkutlu hivuliqtiuvakamik ihuahaqidjutikharnik uminga hulilukaarniaqtunik.
Uqaqtittiji, Nunavut Kavamangit havaagivakhimayait talvuuna papal Minihitaqpak pulaaqtiluni ilaudjutiqaqhimajuq tunngahuktitauvikharnik Faalamiutaq Minihitaqpak Nunavunmun tingmivikharniklu qimaqtilugu Kanata. Ilaudjutigijaptingni malikhautivakhimajuq talvuuna hivuliqtikhatigun tautuktuujaarnikkutlu katimajijiujunun ilihagiaqtuqhimajunun aihini anaktauhimajunun.
Talvuuna Iningnikhavut uqaudjijut havaqatigiikpakhimajaqqut naunaijaijaangat pitquhivut, uqauhivut, ilitquhivutlu pulaaqtiluni.
Agligivaktatka havakpakhimajaingit Iningnikhavut Uqaudjigijaingit ilitugipkagumaplugit talvuuna itqumadjutit talvuuna Inuit aulatitivakhimajut ilihagiaqtuqtunik aihinun. Quyagiumajatka Alexina Kublu, Andrea Tautu, Jack Anawak unalu Piita Irniq uqautigingmagit qaujihimadjutigijaingit unipkaatmingnik uvamnun.
Uqaqtittiji, apqutikhaq mamikharnik nanminikkut aulaniqaqhimajuq aallanun aallanunlu aulaviqarman tamangnun inungnun kituliqaak. Kihiani, tuhaavaktunga amigaitunik Iningnikharnin tamna papal pulaarviani mamiahuutikharniklu aituijuq ajungnautitivakhimajuq nanmnikharnik inungnun hivunikharnik mamitirvikharnik.
Quana, Uqaqtittijii.