Niruagutiqhat ammaumaliqtut 2023 Katimajiita Kavamatuqait Taiguangnirmun Titirangnirmunlu Ilitaqhidjut. Hivuliqti P.J. Akeeagok piliqtuq uuktuutinik ilitaqhijaami inungmik ikajujuktumik, aqhuuqhaipluni, tuniutihimaplunilu qanuqtun hakugingniqhainnik taiguangnirmun titirangnirmun havauhiit Nunavunmi.
2023 Nunavut Katimajiita Kavamatuqait Taiguarnirmun Titirangnirmunlu Ilitaqhidjut aittuqtauniaqtuq inungmun ikajujuktumun pipkaiplunilu aadlanut atuquplugit Inuktut ajuirjuummiqhaiplunilu taiguangnirmun titirangnirmun – uqaqhutik, titiraqhutik aadlangngajunikluunniit min’nguungnikkut titiraujarnikkutluunniit.
Niruaqlutin kimik havakpiaqpaktumik ikajuqhuni pipkaiplunilu aadlanut nakuuhivalliajaamingnik taiguangnirmun titirangnirmunlu havauhiit. Taamna ilihaqtiujaaqtuq, ilihaiji, nunallaami ikajujuktuq, Inirniqhaaqluunniit havaqatitluunniit aqhuuqhaivaktumik ikpingnia ajuirhanirmun atadjutikkutlu.
Akimajuq ilitarijauniaqtuq tunijauluni haviqutimik titiraqmiklu tunijauluni Hivuliqtimin Akeeagok ukiaqhangguqqat. Tuniyauniaqtutlu $300.00 ikayuutimik.
Niruangniqhamun titiraa ilaliutihimajuq paqiinnariaqaqtuqlu Hivuliqtip qaritaujakkuugutaanni.
Umikviqhaa uuktuutinut Qiqaiyaluarvia 31, 2023. Tuyuqtaaqtat titiraq qaritaujaqvigilugit communications@gov.nu.ca.