ᒫᓂᑑᐸᒥ ᓯᕗᓕᖅᑎ ᐅᐊᑉ ᑭᓂᐅ ᐊᒻᒪ ᓄᓇᕗᒻᒥ ᓯᕗᓕᖅᑎ ᔮᓐ ᒪᐃᓐ, ᐃᓚᖃᖅᖢᑎᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᓂᒃ ᑯᓄ ᑕᑦᑐᐃᓂ, ᑲᑎᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ ᐅᐃᓂᐸᐃᖕᒥ ᐅᖃᐅᓯᖃᕆᐊᖅᑐᖅᖢᑎᑦ ᓇᓕᒧᒌᒃᑎᑦᑎᓂᕐᒥᒃ ᐊᒻᒪ ᐱᓕᕆᐊᖑᔪᒃᓴᓂᒃ ᑭᕙᓪᓕᕐᒥ ᐃᒪᕐᒧᑦ ᐊᓕᒎᔭᙳᐊᖅ ᑲᓱᕐᕕᒃᓴᒥᑦ ᖃᓄᖅᑑᕈᑕᐅᓗᓂ ᑮᓇᐅᔭᓕᐅᕋᓱᖕᓂᕐᒧᑦ ᐊᒻᒪ ᐆᒻᒪᖅᑯᑎᓄᑦ ᐊᖅᑯᑎᒋᔭᐅᓗᓂ ᒫᓂᑑᐸᒥ ᐊᒻᒪ ᓄᓇᕗᒻᒧᑦ.
ᑖᓐᓇ ᑭᕙᓪᓕᕐᒥ ᐃᒪᕐᒧᑦ ᐊᓕᒎᔭᙳᐊᖅ ᑲᓱᕐᕕᒃᓴᖅ ᐃᓄᖕᓄᑦ−ᐊᐅᓚᑕᐅᓪᓗᓂ ᑲᓇᑕᓕᒫᒥ−ᐋᖅᑭᒃᓱᐃᕙᓪᓕᐊᓂᕐᒧᑦ ᐱᓕᕆᐊᖑᕗᖅ ᐊᑕᓕᖅᑎᑦᑎᓂᐊᖅᖢᓂ ᓄᓇᓕᖕᓂᒃ ᐅᔭᕋᖕᓂᐊᕐᕕᖕᓂᒡᓗ ᑭᕙᓪᓕᕐᒥ ᐊᕕᒃᓯᒪᓂᕆᔭᐅᔪᒥ ᓄᓇᕗᒻᒥ ᐊᓯᔾᔨᒋᐊᒐᒃᓴᐅᔪᒥᒃ ᐃᒪᕐᒧᑦ ᐆᒻᒪᖅᑯᓯᐅᕐᓂᕐᒥᒃ ᐊᓕᒎᔭᙳᐊᒃᑯᓪᓗ ᑲᓱᕐᕕᐅᔪᓐᓇᖅᑐᒥᒃ ᒫᓂᑑᐸᒥ ᐆᒻᒪᖅᑯᒻᒧᑦ ᐊᑐᖅᑕᐅᕙᒃᑐᒥᒃ.
ᐊᐃᕆᓕ 2025-ᒥ, ᒫᓂᑑᐸ ᑐᓂᓯᓚᐅᖅᑐᑦ 50 ᒥᒐᕚᑦᓂᒃ ᐆᒻᒪᖅᑯᑎᓂᒃ ᑭᕙᓪᓕᕐᒥ ᐃᒪᕐᒧᑦ ᐊᓕᒎᔭᙳᐊᖅ ᑲᓱᕐᕕᒃᓴᒥᑦ ᐃᓚᒋᔭᐅᓪᓗᓂ ᑎᓕᓯᔾᔪᑕᐅᔪᒧᑦ ᒫᓂᑑᐸᒥ ᐆᒻᒪᖅᑯᑎᓕᕆᔨᒃᑯᓐᓄᑦ ᐅᑎᖅᑎᑦᑎᖁᓪᓗᒋᑦ ᐃᓚᖏᓐᓂᒃ ᐆᒻᒪᖅᑯᑎᓂᒃ ᐊᐅᓪᓚᖅᑎᑦᑎᖃᑦᑕᕐᓂᖏᓐᓂᒃ ᐊᒥᐊᓕᑲᓄᑦ ᐃᑲᔪᕈᒪᓪᓗᑎᒃ ᐆᒻᒪᖅᑯᑎᖃᖅᑎᑦᑎᓂᕐᒧᑦ ᑲᓇᑕᒥ ᐱᕈᖅᑎᑦᑎᕙᓪᓕᐊᓂᕐᒧᑦ ᐱᓕᕆᐊᖑᔪᓂᒃ ᑲᓇᑕᒥ.
ᒫᓂᑑᐸ ᐊᒻᒪ ᓄᓇᕗᑦ ᐊᖏᖅᓯᒪᑦᑎᐊᖅᑐᑦ ᑲᑐᔾᔨᔪᒪᓪᓗᑎᒃ ᑖᒃᑯᓂᖓ ᐊᐅᓚᔪᓐᓇᐅᑎᓂᒃ ᐃᑲᔪᖅᑐᐃᓂᐊᖅᑐᓂᒃ ᐅᑭᐅᖅᑕᖅᑑᑉ ᐱᒋᔭᐅᓂᖓᓄᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᒻᒪ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᐱᕙᓪᓕᐊᓂᕆᔭᐅᔪᒧᑦ. ᑕᒪᓐᓇ ᐃᓚᖃᖅᐳᖅ ᑲᔪᓰᓐᓇᖅᑐᒥᒃ ᒐᕙᒪᑐᖃᒃᑯᓐᓂᒃ ᐃᑲᔪᖅᑐᐃᖁᔨᓪᓗᑎᒃ ᐊᑭᑐᔫᑎᓄᑦ ᑮᓇᐅᔭᖁᑎᒋᔭᐅᔪᓂᒃ ᑭᕙᓪᓕᕐᒥ ᐃᒪᕐᒧᑦ ᐊᓕᒎᔭᙳᐊᖅ ᑲᓱᕐᕕᒃᓴᒥᑦ ᐊᒃᑐᐊᓂᓕᖕᓄᓪᓗ ᐃᒪᕐᒧᑦ ᐆᒻᒪᖅᑯᓯᐅᕐᓂᕐᒧᑦ ᓄᑖᙳᕆᐊᖅᑎᑦᑎᓂᕐᒥᒃ ᒫᓂᑑᐸᒥ.
ᑭᕙᓪᓕᕐᒥ ᐃᒪᕐᒧᑦ ᐊᓕᒎᔭᙳᐊᖅ ᑲᓱᕐᕕᒃᓴᖅ ᐊᑦᑕᑕᖅᑎᑦᑎᓂᐊᖅᐳᑦ ᒫᓂᑑᐸᒥ ᐆᒻᒪᖅᑯᑎᓕᕆᔨᑦ ᐆᒻᒪᖅᑯᑎᖃᕐᕕᖓᓄᑦ ᑰᒡᔪᐊᕌᓗᒃ ᖃᓂᒋᔮᓂ. ᐱᓕᕆᐊᖅ ᐃᑲᔫᑕᐅᓂᐊᖅᐳᖅ ᐱᐅᓯᒋᐊᖅᑎᑦᑎᓗᓂᓗ ᐱᕙᓪᓕᐊᑎᑕᐅᔪᒥᒃ ᑰᒡᔪᐊᕌᓗᖕᒥ ᐃᑲᔫᑕᐅᓗᓂ ᐅᑭᐅᖅᑕᖅᑐᒥ ᐃᑲᔫᑎᒃᓴᓂᒃ ᐊᒻᒪ ᐱᕕᒃᓴᐅᔪᓐᓇᖅᑐᓂᒃ, ᐃᑲᔪᖅᓯᓐᓈᑦ ᐱᐅᓯᒋᐊᖅᑎᓪᓗᒍ ᐋᖅᑭᒋᐊᕈᑎᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᐅᕈᑕᐅᔪᒪᔪᑦ ᐅᖅᓱᐊᓗᖕᒧᑦ ᑐᙵᕕᖃᙱᓐᓂᖅᓴᐅᓕᕐᓗᑎᒃ.
"ᓄᓇᕗᑦ ᐊᒻᒪ ᒫᓂᑑᐸ ᐱᓕᕆᖃᑎᒌᑦᑎᐊᖅᑑᒃ," ᐅᖃᖅᑐᖅ ᓯᕗᓕᖅᑎ ᑭᓂᐅ. "ᓯᕗᒻᒧᐊᒃᐸᓪᓕᐊᑎᓪᓗᑕ ᑐᓚᒃᑕᕐᕕᖕᒥ ᑰᒡᔪᐊᕌᓗᖕᒥ, ᑕᒪᓐᓇ ᐱᓕᕆᐊᕆᓂᐊᖅᑕᕗᑦ ᐱᓕᕆᖃᑎᒋᓗᒋᑦ ᐊᓪᓚᐃᑦ ᐊᓯᖏᓪᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᑦ ᒫᓂᑑᐸᒥ, ᓲᖃᐃᒻᒪ ᓴᓇᔭᕌᖓᑦᑕ ᐅᑭᐅᖅᑕᖅᑐᒥᒃ, ᐊᑕᐅᑦᑎᒃᑯᑦ ᐱᓕᕆᐊᕆᐊᕆᓲᕆᒐᑦᑎᒍᑦ.”
"ᖁᔭᓕᔪᒪᕙᕋ ᓯᕗᓕᖅᑎ ᑭᓂᐅ ᐊᒻᒪ ᐊᖓᔪᖅᑳᖅ ᑕᑦᑐᐃᓂ ᓯᕗᓕᖅᑎᐅᓂᖏᓐᓄᑦ ᑕᐅᑐᖅᑰᖅᑕᖏᓐᓄᓪᓗ ᓴᙱᓂᖅᓴᒧᑦ, ᐱᕈᖅᐸᓪᓕᐊᑦᑎᐊᖅᑐᒧᑦ ᐅᑭᐅᖅᑕᖅᑐᒧᑦ," ᐅᖃᖅᑐᖅ ᓯᕗᓕᖅᑎ ᒪᐃᓐ. "ᓄᓇᕗᑦ ᐊᒻᒪ ᒫᓂᑑᐸ ᓴᙱᓂᖅᓴᐅᕗᑦ ᐊᑕᐅᑦᑎᒃᑯᑦ, ᓂᕆᐅᒃᐳᖓᓗ ᐱᓕᕆᖃᑎᒋᓂᐊᕋᒃᑭᑦ ᑕᒪᕐᒥᒃ ᓯᕗᒻᒧᐊᒃᑎᑦᑎᓇᓱᒡᓗᑕ ᐱᓕᕆᐊᒃᓴᓂᒃ ᑕᒪᐃᓐᓄᑦ ᐱᓕᕆᐊᒃᑯᒥᒋᔭᐅᔪᓂᒃ. ᓂᕆᐅᒃᐳᖓ ᓯᕗᓕᖅᑎ ᑭᓅ ᒥᓂᔅᑕᐃᓪᓗ ᐅᑭᐅᖅᑕᖅᑐᓕᐊᓛᕐᓂᖏᓐᓂᒃ ᓄᑖᙳᕆᐊᖅᑎᑦᑎᔭᖅᑐᕐᓗᑎᒃ ᑲᓇᑕᒥ ᐊᕕᒃᓯᒪᓂᐅᔪᓂ ᓄᓇᕗᒻᒥ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ.”
"ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᓱᒃᑎᑦᑎᕗᑦ ᓄᑖᙳᕆᐊᖅᓯᒪᔪᒥᒃ ᐱᓕᕆᐊᖃᓪᓚᕆᒍᒪᓂᕐᒥᒃ ᑕᑯᒃᓴᐅᑎᑕᐅᔪᒥᒃ ᐅᓪᓗᒥ ᓯᕗᓕᖅᑎᒋᔭᐅᔪᓄᑦ ᓄᓇᕗᒻᒥ ᒫᓂᑑᐸᒥᓗ," ᑕᐃᒪᓐᓇ ᐊᖓᔪᖅᑳᖅ ᑕᑦᑐᐃᓂ ᐅᖃᖅᖢᓂ. "ᑭᕙᓪᓕᕐᒥ ᐃᒪᕐᒧᑦ ᐃᒐᓚᐅᔭᙳᐊᖅ ᑲᓱᕐᕕᒃᓴᖅ ᐃᓄᖕᓄᑦ−ᐊᐅᓚᑕᐅᕗᖅ, ᑲᓇᑕᒥ−ᐱᕈᖅᓴᐃᓂᕐᒧᑦ ᐱᓕᕆᐊᖑᓪᓗᓂ ᑕᑯᒃᓴᐅᑎᑦᑎᓪᓗᓂ ᑲᑐᔾᔨᓪᓗᑕ ᓯᕗᓪᓕᖅᐸᐅᑦᑎᐅᑎᓯᒪᔭᑦᑎᓐᓂᒃ ᐃᓱᒪᒋᔪᓐᓇᐃᖃᑎᒌᖕᓂᒃᑯᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᕐᓂᕐᒥᒃ, ᐅᑭᐅᖅᑕᖅᑐᒥᓗ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ. ᑕᒪᓐᓇ ᐱᓕᕆᖃᑎᒌᖕᓂᖅ ᑕᑯᒃᓴᐅᑎᑦᑎᕗᖅ ᖃᓄᖅ ᐊᔪᕐᓇᙱᒻᒪᖔᑦ ᒐᕙᒪᒃᑯᑦ ᐱᓕᕆᖃᑎᖃᑦᑎᐊᕌᖓᑕ ᐃᓄᖕᓂᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐱᒻᒪᕆᐊᓗᖕᓂᒃ ᓇᑉᐸᖅᑎᖅᑕᐅᓯᒪᔪᓂᒃ ᓴᙱᒃᑎᒋᐊᖅᑎᑦᑎᓇᔭᖅᑐᓂᒃ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕆᔭᐅᔪᒥᒃ, ᒥᑭᒡᓕᒋᐊᖅᑎᑦᑎᓇᔭᖅᑐᒥᒃ ᐊᑐᓪᓚᕆᒋᐊᖃᕐᓂᕐᒥᒃ ᐅᖅᓱᐊᓗᖕᒥᒃ ᓴᖅᑭᑎᑦᑎᓗᑎᒡᓗ ᐊᕗᖓᑲᓪᓚᒃ ᐱᕕᒃᓴᓂᒃ ᓄᓇᓕᑦᑎᓐᓄᑦ ᓯᕗᓂᒃᓴᑦᑎᓐᓄᓪᓗ ᑭᖑᕚᕆᓂᐊᖅᑕᑦᑎᓐᓄᑦ. ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ ᓂᕆᐅᒃᐳᑦ ᐱᓕᕆᖃᑎᒌᖏᓐᓇᕐᓂᐊᕐᓂᕐᒥᒃ ᑕᒪᓐᓇ ᐱᒻᒪᕆᐊᓗᒃ ᐱᓕᕆᐊᒃᓴᖅ ᓯᕗᒻᒧᐊᒃᐸᓪᓕᐊᑎᓪᓗᒍ."
ᓄᑭᒃ ᑯᐊᐳᕇᓴᓐ, ᐃᓄᖕᓄᑦ−ᓇᖕᒥᓂᕆᔭᐅᓪᓗᓂ ᐱᓇᔪᒃᑐᖅ ᑭᕙᓪᓕᕐᒥ ᐃᒪᕐᒧᑦ ᐃᒐᓚᐅᔭᙳᐊᖅ ᑲᓱᕐᕕᒃᓴᒥᑦ, ᑐᓂᓯᓚᐅᖅᐳᑦ ᓄᑭᓪᓚᐅᑎᓄᑦ ᐱᔨᑦᑎᕋᐅᑎᓄᑦ ᑐᒃᓯᕋᐅᑎᒥᒃ ᒫᓂᑑᐸᒥ ᐆᒻᒪᖅᑯᑎᓕᕆᔨᒃᑯᓐᓄᑦ ᐱᓕᕆᕙᓪᓕᐊᓕᖅᖢᑎᒡᓗ ᓴᖅᑭᑎᑦᑎᔪᒪᓪᓗᑎᒃ ᐊᑐᖅᑕᐅᕙᒃᑐᒥᒃ ᐊᒃᑐᖅᓯᓂᕐᒧᑦ ᖃᐅᔨᓴᕐᓂᕐᒥᒃ.