ᐊᕐᕕᐊᑦ, ᓄᓇᕗᑦ (ᑎᓯᐱᕆ 19, 2025) − ᓄᓇᕗᑦ ᒐᕙᒪᖓᑕ ᓯᕗᓕᖅᑏᑦ ᑲᑎᒪᔨᖏᑦ ᑲᑎᒪᓚᐅᖅᐳᑦ ᐊᕐᕕᐊᓂ ᑎᓯᐱᕆ 15−ᒥᑦ 19−ᒧᑦ ᐋᖅᑭᒃᓱᐃᕙᓪᓕᐊᔪᒪᓪᓗᑎᒃ ᓯᕗᓪᓕᖅᐸᐅᔾᔭᐅᔭᕆᐊᓕᖕᓂᒃ ᐅᑯᓄᖓ 7−ᓄᑦ ᒪᓕᒐᓕᐅᕐᕕᐅᑉ ᐱᓕᕆᐊᒃᓴᖏᓐᓂᑦ, ᓴᖅᑭᑕᐅᓛᖅᑐᖅ 2026-ᒥ.
"ᒪᓕᒐᓕᐅᖅᑎᐅᓪᓗᖓ ᐊᕐᕕᐊᑦ ᐅᐊᖕᓇᖓᓄᑦ−ᑎᑭᕋᕐᔪᐊᕐᒧᑦ, ᐅᐱᒍᓱᒃᐳᖓ ᐊᕐᕕᐊᑦ ᑲᑎᒪᑎᑦᑎᓚᐅᕐᓂᖓᓂᒃ ᓯᕗᓕᖅᑏᑦ ᑲᑎᒪᔨᖏᓐᓂᒃ ᑕᒪᑐᒪᓂ ᐱᓇᓱᐊᕈᓯᕐᒥ, ᖁᔭᓕᔪᒪᕙᒃᑲᓗ ᓄᓇᓕᖕᒥᐅᑦ ᑐᙵᓱᒃᑎᑦᑎᑦᑎᐊᓚᐅᕐᓂᖏᓐᓄᑦ ᐃᑲᔪᕈᒪᑦᑎᐊᕐᓂᖏᓐᓄᓪᓗ ᑕᑯᒃᓴᐅᑎᑕᐅᓪᓗᑎᒃ ᑲᑎᙵᓂᓕᒫᑦᑎᓐᓂ," ᑕᐃᒪᓐᓇ ᓯᕗᓕᖅᑎ ᔮᓐ ᒪᐃᓐ ᐅᖃᖅᐳᖅ. "ᑖᓐᓇ ᑲᑎᒪᓂᐅᓚᐅᖅᑐᖅ ᐱᒻᒪᕆᐅᓚᐅᖅᐳᖅ ᓯᕗᓪᓕᖅᐹᖑᓪᓗᓂ ᑎᑎᕋᖅᑕᐅᒋᐊᕐᖓᖅᑎᓪᓗᒍ ᐱᓕᕆᐊᒃᓴᕆᑎᑕᐅᔪᑦ ᓯᕗᓪᓕᐅᔾᔭᐅᔪᒪᔪᑦ ᑐᙵᕕᖃᖅᖢᑎᒃ ᓄᓇᕗᑦ ᐱᔭᕆᐊᖃᓛᖏᓐᓂᒃ, ᓂᕆᐅᒃᐳᖓᓗ ᒪᓕᒐᓕᐅᖅᑎᓕᒫᑦ ᐱᓕᕆᖃᑎᒋᓂᐊᕋᒃᑭᑦ ᑕᒪᓐᓇ ᑕᐅᑐᒃᑕᐅᑦᑎᐊᒃᑲᓐᓂᖁᓪᓗᒍ. ᑕᒪᓐᓇ ᐱᔾᔪᑎᖃᖅᐳᖅ ᐱᐅᓂᖅᓴᒥᒃ ᓯᕗᒻᒧᐊᒃᐸᓪᓕᐊᓂᕐᒥᒃ, ᑐᑭᓯᓇᑦᑎᐊᖅᑐᓂᒃ ᓯᕗᓪᓕᖅᐸᐅᑦᑎᐅᑎᔭᕆᐊᓕᖕᓂᒃ, ᑲᒪᒋᔭᒃᓴᓂᒃ ᐱᓕᕆᐊᖃᖅᑐᐃᓐᓇᐅᓗᑎᒃ, ᑲᔪᓯᑎᓪᓗᒋᓪᓗ ᐱᐅᓯᒋᐊᖅᑕᐅᑐᐃᓐᓇᕆᐊᓖᑦ ᐃᓄᖕᓄᑦ ᑕᐅᑐᒃᑕᐅᔪᓄᑦ."
- ᓯᕗᓕᖅᑏᑦ ᑲᑎᒪᔨᖏᑦ ᐅᖃᐅᓯᖃᓚᐅᖅᑐᑦ ᐱᔾᔪᑕᐅᔪᓐᓇᖅᑐᓂᑦ ᐃᑲᔪᕐᓂᕐᒧᑦ ᐋᖅᑭᒃᓱᐃᓂᕐᒥᑦ ᑐᕌᒐᖃᕐᓂᕐᒥᓪᓗ ᐱᓕᕆᐊᒃᓴᓂᑦ ᓯᕗᓪᓕᐅᔾᔨᓂᕐᒥᑦ, ᐃᓚᒋᔭᐅᓪᓗᑎᒃ:
- ᐃᑲᔪᖅᑐᕐᓗᒋᑦ ᓴᙱᓂᖅᑖᖅᑎᓪᓗᒋᓪᓗ ᖃᑕᙳᑎᒌᑦ ᓄᓇᓖᓪᓗ.
- ᐃᖏᕐᕋᑎᓪᓗᒋᑦ ᓄᓇᓕᖕᓂ ᑮᓇᐅᔭᓕᐅᕋᓱᖕᓂᒃᑯᑦ ᐱᕈᖅᐸᓪᓕᐊᔪᓄᑦ ᐊᒻᒪ ᐃᖅᑲᓇᐃᔮᒃᓴᓄᑦ.
- ᐱᐅᓯᕚᓪᓕᑎᓪᓗᒋᑦ ᑲᔪᓯᓂᖃᑦᓯᐊᖅᑐᑦ ᓴᙱᓕᑎᒋᐊᕐᓗᒋᓪᓗ ᐱᓕᕆᖃᑎᒌᒍᓯᑦ.
- ᓴᙱᓂᖅᓴᒥᒃ ᓯᕗᓂᒃᓴᓕᐅᕐᓗᑕ ᓄᓇᕗᒻᒥᐅᓕᒫᓄᑦ.
ᑕᒪᓐᓇ ᑲᑎᒪᓂᐅᓚᐅᖅᑐᖅ ᐃᓚᖃᓚᐅᖅᐳᖅ ᐅᓪᓗᕐᒥ ᑲᑎᒪᖃᑎᖃᕐᓂᕐᒥᒃ ᐃᓄᐃᑦ ᑲᑐᔾᔨᖃᑎᒌᖏᑕ ᓯᕗᓕᖅᑎᖏᓐᓂᒃ, ᑕᒪᓐᓇᓗ ᐃᓱᓕᓚᐅᖅᖢᓂ ᓄᑖᙳᕆᐊᖅᑎᑦᑎᓂᕐᒥᒃ ᐱᓕᕆᖃᑎᒌᖕᓂᕐᒧᑦ ᓱᓕᓂᕋᕈᑎᒥᒃ ᓄᓇᕗᑦ ᑐᙵᕕᒃᑯᓐᓂ. ᓯᕗᓕᖅᑎ ᒪᐃᓐ ᓂᕆᕕᒡᔪᐊᖅᑎᑦᑎᓚᐅᕆᕗᖅ ᒥᓂᔅᑕᐃᓪᓗ ᐊᔾᔨᒌᙱᑦᑐᓄᑦ ᐃᖅᑲᓇᐃᔭᕐᕕᖕᓄᑦ ᐳᓛᕆᐊᕈᓐᓇᓚᐅᖅᖢᑎᒃ ᓄᓇᓕᖕᓂ.
ᔭᓄᐊᕆᒥ, ᒥᓂᔅᑕᐅᖃᑎᒌᑦ ᐋᖅᑭᒋᐊᖅᓯᓂᐊᖅᐳᑦ ᑎᑎᕋᖅᑕᐅᒋᐊᕐᖓᖅᑐᓂᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ, ᓇᓗᓇᐃᖅᓯᓗᑎᒃ ᖁᑦᑎᒃᑐᒦᓐᓂᖅᓴᓂᒃ ᐱᓕᕆᐊᒃᓴᓂᒃ ᐊᑐᓂ ᐱᔾᔪᑕᐅᔪᓄᑦ, ᓇᓗᓇᐃᖅᓯᓗᑎᒡᓗ ᖃᓄᖅ ᐱᕙᓪᓕᐊᓂᕆᔭᐅᔪᖅ ᐆᒃᑐᕋᖅᑕᐅᖃᑦᑕᕐᓂᐊᕐᒪᖔᑦ ᐅᓂᒃᑲᐅᓯᐅᓂᐊᕐᒪᖔᓪᓗ.
ᓯᕗᓕᖅᑎ ᒪᐃᓐ ᓴᖅᑭᑎᑦᑎᓂᐊᖅᐳᖅ ᐱᓕᕆᐊᒃᓴᕆᔭᐅᔪᓂᒃ ᑎᑎᕋᖅᓯᒪᔪᓂᒃ ᒪᓕᒐᓕᐅᕐᕕᖕᒥ ᒫᔾᔨ 2026−ᒥ, ᐃᓚᒋᔭᐅᓗᓂ ᑲᒥᓯᓇᐅᑉ ᒪᑐᐃᖅᐸᓪᓕᐊᓕᖅᑎᓪᓗᒍ ᐅᖃᐅᓯᕐᖓᐅᑎᖏᑦ ᒪᑐᐃᖅᑕᐅᑎᓪᓗᒍ ᐊᐃᑉᐸᖓᓂ ᑲᑎᒪᓂᕆᔭᐅᔪᒥ 7−ᒋᓕᖅᑕᖓᓂ ᒪᓕᒐᓕᐅᕐᕕᖕᒥ.