ᓄᓇᕗᒻᒥ ᓯᕗᓕᖅᑎ ᔮᓐ ᒪᐃᓐ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᔅᓴᓂᒃ:
“ᖁᕕᐊᓱᑉᐳᖓ ᓄᓇᕗᑦ ᑭᒡᒐᖅᑐᕐᓗᒍ ᐃᓚᐅᖃᑕᐅᔪᓐᓇᓚᐅᕋᒪ ᐱᒋᐊᖅᑎᑕᐅᑎᓪᓗᒍ ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᓂᖅ ᑐᕌᓐᑐᒥᑦ, ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᒫᒻ ᑳᓂᐅᒧᑦ ᑲᑎᒪᑎᑕᐅᓪᓗᑕ. ᓄᓇᕗᑦ ᐊᖏᔪᒻᒪᕆᒻᒥᑦ ᑐᓂᓯᖃᑕᐅᔪᓐᓇᖅᑐᖅ ᓄᓇᕐᔪᐊᕐᒥᑦ ᑮᓇᐅᔭᖃᖅᑎᑦᑎᔨᐅᔪᓄᑦ ᑖᓐᓇ ᓄᓇᕗᑦ ᓄᓇᖓ ᐱᑕᖃᓪᓚᕆᒻᒪᑦ ᐊᒻᒪᓗ ᐊᕙᑎᓕᕆᓂᕐᒧᓪᓗ ᐱᓕᕆᔾᔪᑎᔅᓴᓄᑦ ᐸᕐᓇᐅᑎᖃᑦᑎᐊᖅᑐᓂ ᓇᓗᓇᙱᑦᓯᐊᖅᑐᒥᒃ. ᐅᔭᕋᓐᓂᐊᕐᕕᕗᑦ, ᐃᖃᓗᓕᕆᓂᖅ, ᐳᓚᕋᑦᑐᓕᕆᓂᕐᒧᑦ ᐱᓕᕆᕝᕕᐅᔪᑦ ᑖᒃᑯᐊ ᐱᕈᖅᐸᓪᓕᐊᔪᓐᓇᑦᑎᐊᕐᒪᑕ ᑮᓇᐅᔭᖃᖅᑎᑕᐅᑦᑎᐊᑐᐊᖅᐸᑕ. ᑖᓐᓇ ᑲᑎᒪᓂᐅᔪᖅ ᐱᕕᔅᓴᖃᖅᑎᑦᑎᒍᑕᐅᓚᐅᖅᑐᖅ ᓴᖅᑭᔮᖅᑎᑦᑎᓂᕐᒥᑦ ᑮᓇᐅᔭᖃᖅᑎᑦᑎᔨᐅᔪᓂᑦ ᓇᑭᑐᐃᓐᓈᖓᔪᓂᑦ ᓄᓇᕐᔪᐊᕐᒥ ᑖᓐᓇᓗ ᓄᓇᕗᑦ ᒪᑐᐃᖓᓂᖓᓂ ᑮᓇᐅᔭᓕᐅᕋᓱᐊᖅᑎᓄᑦ ᐱᓕᕆᕝᕕᐅᓗᓂ.
ᒐᕙᒪᕗᑦ ᐱᓕᕆᖃᑎᒋᔭᕗᓪᓗ, ᓄᓇᕗᑦ ᑐᙵᕕᒃᑯᖅ ᑎᒥᖓ, ᓇᓗᓇᖅᓯᓯᒪᔪᑦ ᑎᓴᒪᓂᑦ ᐃᓄᓐᓄᑦ−ᐊᐅᓚᑕᐅᔪᓂᑦ ᑲᓇᑕᒥ−ᐱᕈᖅᐹᓪᓕᖅᑎᑦᑎᖃᑕᐅᓂᕐᒧᑦ ᐱᓕᕆᐊᖃᕐᒪᑕ ᐅᒃᐱᕈᓱᒃᐳᒍᑦ ᑕᑯᒃᓴᐅᑎᑦᑎᒻᒪᑦ ᐱᓕᕆᖃᑎᒌᑦᑎᓪᓗᑕ ᑲᓇᑕᐅᑉ ᑐᕌᒐᖓᓐᓄᑦ ᐃᑲᔪᖃᑕᐅᒻᒪᑦ ᐃᖏᕐᕋᓯᑎᑦᑎᓂᕐᒥᑦ ᐃᓄᓐᓄᑦ ᐊᒻᒪᓗ ᑲᓇᑕᐅᑉ ᓯᓚᑖᓅᖓᔪᑦ ᑮᓇᐅᔭᓕᐅᕋᓱᐊᓂᕐᒥᑦ.
ᑲᓇᑕᐅᑉ ᓲᕐᓗ ᒪᒃᑯᓛᖑᓪᓗᓂ ᒐᕙᒪᖃᕐᕕᖓᑕ ᐊᕕᑦᑐᖅᓯᒪᓂᖓ ᓱᓕ ᐊᑦᑐᖅᑕᐅᓯᒪᙱᑦᑐᑦ ᓄᓇᒦᖔᖓᔪᑦ ᐃᑲᔪᕈᓐᓇᖅᑐᑦ ᑲᓇᑕᒥ ᒪᑭᒪᒋᐊᖅᑎᑦᑎᑲᓐᓂᕐᓂᕐᒧᑦ ᐊᕐᕌᒍᒐᓚᐅᓂᐊᖅᑐᓄᑦ ᐊᒡᒋᖅᑐᓄᑦ, ᐃᑲᔪᖅᑎᖃᑦᑎᐊᑐᐊᕈᑦᑕ.
ᐅᖃᐅᓯᕆᒋᐊᑲᓐᓂᓚᐅᕐᒥᔭᕋᑦᑕᐅᖅ ᐊᑑᑎᖃᑦᑎᐊᕐᓂᖓᑕ ᐱᓕᕆᖃᑎᒌᓐᓂᐅᔪᖅ ᐊᒻᒪᓗ ᑮᓇᐅᔭᖃᖅᑎᑦᑎᓂᖅ ᓄᓇᖃᖅᑳᖅᓯᒪᔪᓄᑦ−ᐊᐅᓚᑕᐅᔪᓄᑦ ᐱᓕᕆᐊᔅᓴᓄᑦ ᐃᑲᔪᕐᓂᐊᕐᒪᑦ ᑕᒪᓐᓇ ᐅᑭᐅᖅᑕᖅᑐᒥ ᓴᐳᓐᓂᐊᕐᓂᕐᒥᑦ ᐱᖁᑎᖃᕐᓂᑎᓐᓂᓪᓗ.
ᓇᓗᓇᐃᔭᖅᑕᐅᓯᒪᒻᒪᑦ ᑕᕝᕙᓂ ᐃᑲᔪᖅᑎᒌᒃᑕ, ᒐᕙᒪᕗᑦ ᐊᖏᖅᓯᒪᔪᑦ ᑮᓇᐅᔭᖃᖅᑎᑦᑎᓂᕐᒥᑦ ᓯᕗᓂᔅᓴᕗᑦ ᐱᐅᓂᖅᓴᐅᖁᓪᓗᒍ ᓄᓇᕗᒻᒥᐅᓕᒫᓄᑦ. ᑲᔪᓰᓐᓇᕐᓂᐊᖅᑐᒍᑦ ᑖᓐᓇ ᑲᒪᒋᓗᑎᒍᑦ ᐱᓕᕆᐊᖑᖃᑕᐅᔪᖅ ᑮᓇᐅᔭᖃᖅᑎᑦᑎᓂᕐᒧᑦ ᐱᓕᕆᐊᔅᓴᐅᔪᓂᑦ ᓄᓇᕗᒻᒥ ᐃᑲᔫᑎᖃᕈᓐᓇᕐᒪᑦ ᑮᓇᐅᔭᓕᐅᕋᓱᐊᖅᑎᐅᔪᓂᑦ ᐊᒻᒪᓗ ᓄᓇᓕᓐᓂᑦ, ᐊᐅᓚᔪᓐᓇᐅᑎᑖᖅᑎᑦᑎᒃᑲᓐᓂᕈᑕᐅᓗᓂ ᓯᕗᓂᔅᓴᑎᓐᓄᑦ ᑭᖑᕚᒃᓴᑦᑎᓐᓄᑦ ᓄᓇᖃᖅᑎᐅᔪᓄᑦ.