ᐅᓪᓗᒥ, ᓯᕗᓕᖅᑎ ᔮᓐ ᒪᐃᓐ ᐊᒻᒪ ᒥᓂᔅᑕ ᑲᒪᒋᔭᓕᒃ ᐊᕐᓇᐃᑦ ᑲᑎᒪᔨᖏᓐᓂᒃ ᓘᒃᑖᖅ ᒍᐃᓐ ᕼᐄᓕ ᐊᕿᐊᕈᖅ ᓴᖅᑭᑦᑎᖅᑲᐅᔫᒃ ᐆᒥᖓ ᐅᖃᐅᓯᒃᓴᒥᒃ ᑲᓇᑕᒥ ᐅᓪᓗᕆᔭᐅᑎᓪᓗᒍ ᐃᖅᑲᐅᒪᓐᓇᐅᑉ ᖃᓄᐃᓕᐅᕐᓂᕐᒧᓪᓗ ᐊᕐᓇᐃᑦ ᐋᓐᓂᖅᓯᖅᑕᐅᕙᒃᑐᑦ ᐱᔾᔪᑎᒋᓪᓗᒋᑦ.
"ᓄᓇᑦᑎᓐᓂ ᐋᓐᓂᖅᓯᕆᔪᖃᕆᐊᖃᙱᓚᖅ. ᑲᓇᑕᒥ ᐃᖅᑲᐅᒪᓐᓇᐅᑉ ᐅᓪᓗᖓ ᐊᒻᒪ ᐊᕐᓇᐃᑦ ᐋᓐᓂᖅᓯᖅᑕᐅᕙᒃᑐᑦ ᐱᔾᔪᑎᒋᓪᓗᒋᑦ ᖃᓄᐃᓕᐅᖅᑎᑦᑎᕙᒃᑐᑦ ᐊᕐᕌᒍᑕᒫ ᐃᖅᑲᐃᓯᔾᔪᑕᐅᕙᒃᐳᖅ ᓄᓇᕗᒻᒥᐅᓕᒫᑦ, ᐱᓗᐊᖅᑐᒥ ᐊᖑᑎᑦ, ᓂᓪᓕᐊᖃᑦᑕᕆᐊᖃᕐᓂᖏᓐᓂᒃ ᐊᒻᒪ ᖃᐅᑕᒫᑦ ᐋᓐᓂᖅᓯᕆᑎᑦᑎᑦᑕᐃᓕᕙᒡᓗᑎᒃ ᐊᕐᓇᓂᒃ, ᓂᕕᐊᖅᓵᓂᒃ ᐊᒻᒪ ᐊᕐᓇᓂᒃ/ᐊᖑᑎᓂᒃ ᐊᔾᔨᒌᙱᑦᑐᓂᒃ ᐃᓄᖕᓂᒃ.
ᑮᓇᐅᔭᖃᖅᑎᑕᐅᓪᓗᑎᒃ ᑲᓇᑕᒥ ᖃᓄᐃᓕᐅᕈᑎᒃᓴᓄᑦ ᐸᕐᓇᐅᑎᒥᒃ ᓄᖅᑲᖅᑎᑦᑎᔪᒪᓪᓗᑎᒃ ᐊᕐᓇᐃᑦ/ᐊᖑᑎᑦ ᒪᓕᒃᖢᒋᑦ ᐋᓐᓂᖅᓯᖅᑕᐅᕙᒃᑐᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᒋᕙᒃᑕᕗᓪᓗ ᒪᓂᒪᑎᑦᑎᕗᑦ ᑭᐅᔾᔪᑎᖃᕈᓐᓇᖅᑐᓂᒃ, ᐃᓕᖅᑯᓯᑦᑎᓐᓂ ᑐᙵᕕᓕᖕᓂᒃ ᐃᑲᔪᖅᑐᐃᔾᔪᑎᓂᒃ ᐋᓐᓂᖅᓯᖅᑕᐅᖃᑦᑕᕈᕕᑦ ᖃᐅᔨᒪᔭᕐᓂᓪᓘᓐᓃᑦ ᐋᓐᓂᖅᓯᖅᑕᐅᔪᖃᖃᑦᑕᖅᐸᑦ.
ᐱᓕᕆᖃᑎᒌᓚᐅᖅᑕ ᓯᕗᓂᒃᓴᓕᐅᕐᓗᑕ ᑭᒃᑯᓕᒫᑦ − ᐱᓗᐊᖅᑐᒥ ᐊᕐᓇᐃᑦ ᓂᕕᐊᖅᓵᓪᓗ − ᐃᓅᔪᓐᓇᕐᓂᐊᕐᒪᑕ ᐊᑦᑕᕐᓇᙱᑦᑐᒥᒃ, ᐱᑦᑎᐊᕐᓗᑎᒃ ᓂᕆᐅᖕᓂᖃᕐᓗᑎᒡᓗ.”
- ᓯᕗᓕᖅᑎ ᔮᓐ ᒪᐃᓐ
"ᐊᒥᓱᑎᒍᑦ ᓄᓇᕗᒻᒥ ᐊᒃᑐᖅᑕᐅᓯᒪᕗᒍᑦ ᐋᓐᓂᖅᓯᕆᓂᐅᕙᒃᑐᒧᑦ − ᓇᖕᒥᓂᖅ ᐃᓅᓯᑦᑎᓐᓂ ᐊᑐᖅᓯᒪᔭᑦᑎᓐᓄᓪᓘᓐᓃᑦ ᐃᓚᑦᑎᓐᓄᑦ, ᐱᖃᓐᓇᕆᔭᑦᑎᓐᓄᑦ, ᓯᓚᖅᑲᑎᑦᑎᓐᓄᓪᓘᓐᓃᑦ. ᑕᒪᓐᓇ ᓱᓕᓂᐅᔪᖅ ᐅᕙᑦᑎᓐᓄᑐᐊᖅ ᑐᕌᖓᓪᓚᕆᒃᐳᖅ ᓄᓇᑦᑎᓐᓂ, ᐃᖅᑲᐃᔾᔪᑎᒋᓪᓗᑎᒍᓪᓗ ᖃᓄᐃᒻᒪᑦ ᑕᒪᓐᓇ ᐱᓕᕆᐊᖑᔪᖅ ᐱᒻᒪᕆᐊᓘᖕᒪᖔᑦ.
ᐅᐱᒋᕙᕗᑦ ᐊᓂᒍᐃᓯᒪᔪᑦ ᐅᐱᒋᕙᕗᓪᓗ ᑕᐃᒃᑯᐊ ᐃᓅᔪᓐᓃᖅᓯᒪᔪᑦ ᐊᖏᖅᓯᒪᑦᑎᐊᖅᖢᑕ ᐊᑐᓪᓚᕆᒃᑐᓄᑦ, ᐊᓯᔾᔩᓂᐊᖅᑐᒧᑦ ᑕᐅᕗᖓᑲᓪᓚᒃ. ᑕᒪᕐᒥᑦᑎᐊᖅ ᐊᕐᓇᐃᑦ, ᓂᕕᐊᖅᓵᑦ, ᐊᒻᒪ ᐊᕐᓇᐃᑦ/ᐊᖑᑎᑦ ᐊᔾᔨᒌᙱᑦᑐᑦ ᐃᓅᔭᕆᐊᖃᖅᐳᑦ ᐊᑦᑕᕐᓇᙱᑦᑐᒥ ᐊᒻᒪ ᐱᑦᑎᐊᖅᑕᐅᓗᑎᒃ.”
- ᒥᓂᔅᑕ ᐊᕐᓇᐃᑦ ᑲᑎᒪᔨᖏᓐᓄᑦ, ᓘᒃᑖᖅ ᒍᐃᓐ ᕼᐄᓕ ᐊᕿᐊᕈᖅ