ᐋᑐᕚ (ᕕᕝᕗᐊᕆ 11, 2026) – ᓯᕗᓕᖅᑎ ᔮᓐ ᒪᐃᓐ ᐊᒻᒪ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐊᒻᒪ ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ ᑕᐃᕕᑦ ᐊᕿᐊᕈᖅ ᐅᓪᓗᒥ ᑐᙵᓱᒃᑎᑦᑎᖅᑲᐅᕗᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑐᓴᖅᑎᑦᑎᔾᔪᑎᖓᓂ ᐊᕐᕕᐊᑦ, ᓄᓇᕗᑦ, ᐊᖏᕐᕋᕆᔭᐅᓂᐊᓕᕐᓂᖓᓂᒃ ᓄᑖᒧᑦ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᕐᒧᑦ.
ᐃᓄᖕᓄᑦ−ᐊᐅᓚᑕᐅᔪᖅ ᓯᓚᑦᑐᖅᓴᕐᕕᒡᔪᐊᖅ ᓄᓇᕗᒻᒥ ᐅᔾᔨᕐᓇᖅᑐᒥᒃ ᐃᓚᑰᔪᒥᑦ ᓴᖅᑭᑎᑦᑎᕗᖅ ᐃᓄᖕᓄᑦ ᐃᓕᓐᓂᐊᖅᑎᑦᑎᓂᕐᒥᒃ, ᓄᓇᕗᑦ ᓯᓚᑖᓄᐊᕆᐊᖃᔾᔮᔪᓐᓃᖅᑐᑦ ᐅᕝᕙᓘᓐᓃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᖁᑦᑎᖕᓂᖅᓴᒥᒃ ᐃᓕᓐᓂᐊᕈᒪᒍᑎᒃ ᐃᓄᐃᑦ ᐅᖃᐅᓯᖓᓐᓂᒃ, ᐃᓄᐃᑦ ᓄᓇᕐᔪᐊᒥ ᑕᐅᑐᖅᑰᖅᑕᖏᓐᓂᒃ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ. ᐃᓄᐃᑦ ᓯᓚᑦᑐᖅᓴᕐᕕᒡᔪᐊᖓᑦ ᓄᓇᕗᒻᒥ ᑭᖑᕚᕇᓄᑦ ᓴᖅᑭᑦᑎᕙᓪᓕᐊᓇᓱᒃᐳᑦ ᐋᖅᑭᖃᑎᒌᖕᓂᕐᒧᑦ ᐅᑭᐅᖅᑕᖅᑐᒥᓗ ᓇᖕᒥᓂᖃᕐᓂᕐᒧᑦ ᐱᕙᓪᓕᐊᔾᔪᑕᐅᓂᐊᕐᓗᓂ ᓄᓇᓕᖕᓂ ᐱᔪᓐᓇᕐᓂᕆᔭᐅᔪᓂᒃ ᐱᕐᔪᐊᖑᓪᓗᑎᒃ ᐱᓕᕆᕝᕕᖕᓂ ᓲᕐᓗ ᐃᓕᓐᓂᐊᕐᓂᓕᕆᓂᖅ, ᐋᓐᓂᐊᖃᕐᓇᙱᑦᑐᓕᕆᓂᖅ, ᐊᐅᓚᑦᑎᕝᕕᖃᕐᓂᖅ, ᐊᕙᑎᒥᒡᓗ ᑲᒪᒋᔭᖃᑦᑎᐊᕐᓂᖅ, ᐃᓄᐃᑦ ᓯᕗᓕᖅᑎᐅᔪᑦ ᐋᖅᑭᒃᓱᐃᔪᓐᓇᑦᑎᐊᕐᓗᑎᒃ ᓄᓇᓕᒋᔭᒥᓂᒃ ᓄᓇᒥᓂᒡᓗ.
"ᐱᒃᑯᒋᕙᒃᑲ ᐊᒃᓱᕈᐃᓐᓇᖅᖢᑎᒃ ᐱᓕᕆᖃᑦᑕᖅᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᕐᕌᒍᒐᓴᖕᓄᑦ ᑕᒪᓐᓇ ᑕᐅᑐᙳᐊᖅᑕᐅᔪᖅ ᓴᖅᑭᑕᐅᓪᓚᑦᑖᖁᓪᓗᒍ. ᑖᓐᓇ ᓯᓚᑦᑐᖅᓴᕐᕕᒡᔪᐊᖅ ᐊᖏᔪᒻᒪᕆᖕᒥᒃ ᐊᒃᑐᐃᓂᐊᖅᐳᖅ ᐊᖏᕐᕋᕆᔭᒪ ᐅᖓᑖᓄᑦ ᐊᕐᕕᐊᕐᒥ ᐃᓂᒋᓂᐊᖅᑕᖓᓂ," ᑕᐃᒪᓐᓇ ᓯᕗᓕᖅᑎ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ−ᑎᑭᕋᕐᔪᐊᕐᒥᐅᓄᑦ ᐅᖃᖅᑐᖅ. "ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ ᑕᑯᒃᓴᐅᑎᑦᑎᕗᖅ ᓴᙱᓂᕆᔭᖏᓐᓂᒃ ᐃᓄᐃᑦ ᓇᖕᒥᓂᖅᓱᕈᓐᓇᕐᓂᖏᓐᓂᒃ ᐃᓕᓐᓂᐊᕐᓂᓕᕆᓂᕐᒥ. ᓴᖅᑭᖅᑕᐅᓂᖓ ᓯᓚᑦᑐᖅᓴᕐᕕᔾᔪᐊᖅ ᓄᓇᕗᒻᒥ, ᓴᖅᑭᑦᑎᕙᓪᓕᐊᔾᔪᑕᐅᓂᐊᕐᒪᑦ ᐃᓄᖕᓄᑦ ᓄᓇᓕᖕᓄᓪᓗ ᐃᓄᐃᑦ ᖃᐅᔨᒪᓂᖏᑦ ᐱᒻᒪᕆᐅᒋᔭᖏᓪᓗ ᑐᑭᒧᐊᒍᑕᐅᓂᐊᖅᑎᓪᓗᒋᑦ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᒧᓪᓗ."
"ᒥᓂᔅᑕᐅᓪᓗᖓ ᑲᒪᒋᔭᒃᓴᖃᖅᖢᖓ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ, ᖁᔭᓕᕗᖓ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᖅ ᐱᐅᔪᒃᑯᑦ ᐊᓯᔾᔨᖅᓯᔪᓐᓇᕐᓂᖓᓂᒃ ᐃᓕᓐᓂᐊᖅᑎᓂᒃ, ᐃᓕᓐᓂᐊᖅᑕᒥᓂᒃ ᐊᓂᒍᐃᔪᓂᒃ, ᖃᑕᙳᑎᖏᓐᓂᒃ ᓄᓇᓕᖏᓐᓂᒡᓗ," ᑕᐃᒪᓐᓇ ᒥᓂᔅᑕ ᐊᕿᐊᕈᖅ ᐅᖃᖅᑐᖅ. "ᑐᙵᓱᒃᑎᑉᐸᕋ ᐱᕙᓪᓕᐊᔪᑦ ᐊᖓᔪᖅᑳᖃᕐᕕᖓ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᖅ ᓄᓇᕗᒻᒦᓐᓂᐊᕐᓂᖓᓂᒃ, ᐊᖏᖅᓯᒪᐃᓐᓇᖅᐳᖓᓗ ᑖᒃᑯᐊ ᒪᕐᕉᒃ ᓯᓚᑦᑐᖅᓴᕐᕕᖕᒥ ᐱᓇᔪᒃᑕᐅᔪᑦ ᒪᓕᑦᑎᐊᖁᓪᓗᒋᑦ ᐱᔭᐅᔭᕆᐊᓕᖕᓄᑦ ᓄᓇᕗᒻᒥ, ᐃᓄᐃᑦ ᓄᓇᖓᑦ, ᐅᑭᐅᖅᑕᖅᑐᒥ ᓄᓇᕐᔪᐊᒥ, ᐅᖓᑖᓄᓪᓗ. ᐊᑐᖅᓯᒪᔭᖏᑦ ᓄᓇᕗᑦ, ᐃᓄᐃᑦ ᓄᓇᕗᒻᒥᐅᓪᓗ ᑐᓴᖅᑎᑦᑎᕙᓪᓕᐊᖏᓐᓇᕐᓂᐊᖅᐳᑦ ᖃᓄᖅ ᐃᓕᓐᓂᐊᖅᑎᑦᑎᕙᖕᒪᖔᑦᑕ ᓄᓇᕐᔪᐊᕐᒥᐅᓂᒃ ᐃᓅᓯᑦᑕ ᒥᒃᓵᓄᑦ, ᐅᕙᑦᑎᓐᓂᒡᓗ ᐃᑲᔪᕐᓂᐊᖅᖢᓂ ᐋᖅᑭᒃᓱᐃᕙᓪᓕᐊᑎᓪᓗᑕ ᓯᕗᓂᒃᓴᑦᑎᓐᓂᒃ."
ᖃᐅᔨᒃᑲᓐᓂᕈᒪᒍᕕᑦ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒡᔪᐊᑉ ᒥᒃᓵᓄᑦ, ᐅᕗᙵᕐᓗᑎᑦ ITK ᐃᑭᐊᖅᑭᕕᖓᓄᑦ.