ᐃᖃᓗᐃᑦ, ᓄᓇᕗᑦ (ᕕᕝᕗᐊᕆ 2, 2026) − ᓄᓇᕘᒥ ᒥᓂᔅᑕᐅᖃᑎᒌᑦ ᔮᓄᐊᕆᐅᑉ ᓄᙳᐊᓂ ᐋᑐᕚᒥ ᑭᒡᒐᖅᑐᐃᔭᖅᑐᓚᐅᖅᐳᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᐊᔾᔨᒋᔭᐅᙱᑦᑐᓂᒃ ᐱᔭᕆᐊᖃᖅᑕᖏᓐᓂᒃ ᐱᓕᕆᖃᑎᖃᖅᐸᓪᓕᐊᓗᑎᒡᓗ ᒐᕙᒪᑐᖃᒃᑯᓐᓂ ᒥᓂᔅᑕᐅᖃᑎᖏᓐᓂᒃ. ᓯᕗᓕᖅᑎ ᔮᓐ ᒪᐃᓐ ᐃᖅᑲᓇᐃᔭᖃᑎᖏᓪᓗ ᖃᔅᓰᖅᓱᑲᓪᓚᒃᖢᑎᒃ ᑲᑎᒪᖃᑦᑕᓚᐅᖅᐳᑦ ᑐᑭᓯᓇᖅᓯᑎᑦᑎᑦᑎᐊᖅᖢᑎᒡᓗ ᑮᓇᐅᔭᓕᐅᕈᑕᐅᓇᓱᒃᑐᑦ ᓄᓇᕗᒻᒥ ᐱᒋᐊᕆᐊᖃᕐᓂᖏᓐᓂᒃ ᐃᓅᓯᖃᑦᑎᐊᓕᒃᑲᓐᓂᕐᓗᑎᒃ ᐱᕕᒃᓴᖃᓕᒃᑲᓐᓂᕐᓗᑎᒡᓗ ᓄᓇᕗᒻᒥᐅᑦ.
"ᐱᒻᒪᕆᐅᓚᐅᖅᐳᖅ ᓄᓇᕗᒻᒥ ᒥᓂᔅᑕᖏᑦ ᑲᑎᖃᑎᖃᕐᓗᑎᒃ ᐃᓚᒋᔭᐅᓪᓗᐊᑕᖅᑐᓂᒃ ᑲᓇᑕᐅᑉ ᒥᓂᔅᑕᐅᖃᑎᒌᖏᓐᓂᒃ ᓇᓗᓇᐃᖅᓯᓪᓗᑎᒃ ᐊᑐᓪᓚᑦᑖᖅᑐᓂᒃ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ," ᐅᖃᓚᐅᖅᐳᖅ ᓯᕗᓕᖅᑎ ᒪᐃᓐ. "ᒥᓂᔅᑕᐅᖃᑎᒌᑦ ᓴᙱᔫᕗᑦ ᐱᓕᕆᖃᑎᒌᑦ, ᐊᒻᒪ ᓯᕗᒻᒧᐊᒃᑎᑦᑎᕙᓪᓕᐊᓂᖅ ᐃᓛᒃᑯᑦ ᐱᓕᕆᐊᒃᓴᑦᑎᓐᓂᒃ ᓴᙱᒃᑎᒋᐊᖅᑎᑕᐅᓚᐅᖅᐳᖅ ᓇᓗᓇᐃᖅᓯᓂᒃᑯᑦ ᐊᒃᑐᐊᖃᑎᒌᖕᓂᑦᑎᓐᓂᒃ ᐱᔭᕆᐊᖃᖅᑕᑦᑎᓐᓂᒃ. ᐅᔾᔨᕆᔭᐅᓕᖅᐸᓪᓕᐊᑎᓪᓗᒍ ᐅᑭᐅᖅᑕᖅᑐᖅ ᓴᐳᒻᒥᔭᐅᓂᖓᓂ, ᐱᒻᒪᕆᐊᓘᕗᖅ ᐊᔭᐅᖅᑐᐃᔭᕆᐊᖃᕐᓂᑦᑎᓐᓂᒃ ᐃᓄᐃᑦ ᓴᐳᒻᒥᔭᐅᖁᓪᓗᒋᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᓗᑦᑕᐅᖅ. ᓄᓇᕗᒻᒥᐅᑦ ᑭᙴᒪᔭᖏᑦ ᑕᐅᑐᒐᕆᔭᐅᖏᓐᓇᐅᔭᕐᓂᐊᖅᑐᑦ ᑖᒃᑯᓄᖓ ᒥᓂᔅᑕᓄᑦ."
ᖄᒃᑲᓐᓂᐊᒍᑦ ᑲᑎᒪᖃᑎᖃᖅᑐᑦ ᒐᕙᒪᑐᖃᒃᑯᓐᓂ ᒥᓂᔅᑕᓂᒃ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᓂᑦ, ᑯᐃᓐ ᑭᒡᒐᖅᑐᖅᑎᖓᓂ−ᓄᓇᖃᖅᑳᖅᑐᓄᑦ ᐱᓕᕆᖃᑎᒌᓂᑦ, ᓄᓇᖃᖅᑳᖅᑐᓄᑦ ᐱᔨᑦᑎᕋᖅᑎᓂᑦ, ᐃᖏᕐᕋᔪᓕᕆᓂᕐᒧᑦ, ᐱᓕᕆᕝᕕᖕᒥ ᑕᐅᖅᓰᖃᑎᒌᖕᓂᕐᒧᑦ, ᑲᓇᑕᓕᒫᒥᓗ ᓴᐳᓐᓂᐊᖅᑎᒃᑯᓐᓂ ᐊᓯᖏᓐᓂᓪᓗ, ᓯᕗᓕᖅᑎ ᒪᐃᓐ ᑲᑎᖃᑎᖃᓚᐅᖅᐳᖅ ᑲᓇᑕᐅᑉ ᐊᖓᔪᖅᑳᕐᔪᐊᖓᓂᒃ ᒫᒃ ᑳᕐᓂᒥᒃ ᑲᓇᑕᒥᐅᓪᓗ ᓯᕗᓪᓕᖅᐹᑦ ᒥᓂᔅᑕᖏᓐᓂᒃ. ᒥᓂᔅᑕᐅᖃᑎᒌᑦ ᐱᕕᒃᓴᖃᓚᐅᕆᕗᑦ ᓄᓇᕗᒻᒥ ᐃᑦᑐᒃᑯᕕᖕᒥ ᑲᑎᒪᔨᒥᒃ ᓈᓐᓯ ᖃᕆᑕᖅ−ᓕᓐᑎᐅᓪ ᐊᒻᒪ ᓄᓇᕗᒻᒧᑦ ᒪᓕᒐᓕᐅᖅᑎᕐᔪᐊᖅ ᓘᕆ ᐃᓪᓚᐅᑦ, ᐅᖃᐅᓯᖃᖅᖢᑎᒃ ᑲᑐᔾᔨᓪᓗᑎᒃ ᑕᐅᑐᖅᑰᖅᑕᐅᔪᒥᒃ ᓴᙱᔪᒥᒃ, ᐊᑦᑕᕐᓇᙱᑦᑐᒥᒃ ᐊᒻᒪ ᐱᕈᖅᐸᓪᓕᐊᑦᑎᐊᖅᑐᒥᒃ ᐅᑭᐅᖅᑕᖅᑐᒥ.
ᓯᕗᓕᖅᑎ ᒪᐃᓐ ᐊᒻᒪ ᒥᓂᔅᑕᐅᖃᑎᒌᑦ ᓂᕆᐅᒋᔭᖃᖅᐳᑦ ᐋᖅᑭᒃᓱᐃᕙᓪᓕᐊᔪᒪᓪᓗᑎᒃ ᑖᒃᑯᓂᖓ ᓯᕗᓪᓕᕐᒥ ᑲᑎᒪᓂᐅᓚᐅᖅᑐᓂᒃ ᓴᖅᑭᑎᑦᑎᓗᑎᒡᓗ ᐊᑐᔅᓲᔭᕐᓂᐊᖅᑐᒥᒃ, ᐊᑯᓂᐅᔪᒥ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐱᔨᑦᑎᕋᐅᑎᓂᒃ ᐱᓕᕆᐊᒃᓴᓂᒡᓗ ᓄᓇᕗᒻᒥᐅᓄᑦ.
