ᐃᖃᓗᐃᑦ, ᓄᓇᕗᑦ (ᔪᓚᐃ 21, 2026) − ᓄᓇᑦᓯᐊᑉ ᒐᕙᒪᖓ ᐊᒻᒪ ᓄᓇᕗᑦ ᒐᕙᒪᖓ ᓴᙱᒃᑎᒋᐊᖅᑎᑦᑎᔪᒪᕗᑦ ᑕᐅᖅᓰᖃᑎᒌᒍᓯᕐᒥᒃ ᒥᒃᖠᒋᐊᖅᑎᑦᑎᔪᒪᓪᓗᑎᒡᓗ ᑐᓗᖅᑕᕈᑕᐅᔭᕆᐊᖃᙱᑦᑐᓂᒃ ᐊᔪᕐᓇᕐᓂᖅᓴᐅᓕᖅᐸᒃᑐᓂᒃ ᑲᓇᑕᒥᐅᓄᑦ ᓇᖕᒥᓂᕐᒥᓂ ᐱᓕᕆᐊᖃᕋᓱᒋᐊᒃᓴᖅ ᑲᓇᑕᓕᒫᒥ. ᐃᓕᓴᖅᓯᕗᒍᑦ ᐱᒻᒪᕆᐊᓗᖕᒥᒃ ᐱᓕᕆᐊᖑᔪᒥᒃ ᑲᑎᒪᔨᕋᓛᑎᒍᑦ ᑕᐅᖅᓰᖃᑎᒌᖕᓂᕐᒧᑦ ᐅᐱᒍᓱᒃᐳᒍᓪᓗ ᐱᓕᕆᖃᑕᐅᑦᑎᐊᕈᓐᓇᕐᓂᑦᑎᓐᓂᒃ ᑕᒪᒃᑯᓄᖓ ᐱᓇᔪᒃᑕᐅᔪᓄᑦ.
ᐃᑲᔪᖅᑐᐃᒐᓗᐊᖅᑎᓪᓗᑕ ᐊᖏᓂᖅᓴᒥᒃ ᑐᕌᒐᕆᔭᐅᔪᒥᒃ ᐱᐅᓯᕚᓪᓕᖅᑎᑦᑎᓂᕐᒥᒃ ᐃᓗᐊᓂ ᑕᐅᖅᓰᖃᑦᑕᕐᓂᕐᒥᒃ, ᐊᑎᓕᐅᓚᐅᙱᓚᒍᑦ ᐃᒥᐊᓗᖕᒧᑦ ᓂᐅᕕᖅᐸᒃᑐᓄᑦ ᐊᖏᖃᑎᒌᒍᑎᒥᒃ ᐊᔾᔨᐅᙱᓐᓂᖓᓄᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᑦᑎᓐᓂ. ᐊᖏᖃᑎᒌᒍᑎ ᐱᔪᓐᓇᖅᑎᑦᑎᕗᖅ ᓂᐅᕕᖅᐸᒃᑐᓂᒃ ᓂᐅᕕᕈᓐᓇᕐᓗᑎᒃ ᐃᒥᐊᓗᖕᓂᒃ ᐱᐊᓕᐅᕐᕕᖕᒥᑦ, ᐅᐊᐃᓂᑖᕐᕕᖕᒥᑦ, ᐅᕝᕙᓘᓐᓃᑦ ᐃᒥᐊᓗᓕᐅᕐᕕᖕᒥᑦ ᐊᖏᕐᕋᖏᓐᓄᓪᓗ ᐊᐅᓪᓚᖅᑎᑕᐅᓗᑎᒃ; ᑕᐃᒪᐃᒃᑲᓗᐊᖅᑎᓪᓗᒍ, ᐅᓄᖅᑐᑦ ᓄᓇᓖᑦ ᐋᖅᑭᒃᓯᓯᒪᖕᒪᑕ ᐃᒥᐊᓗᖕᒧᑦ ᑭᒡᓕᖃᖅᑎᑕᐅᔪᓂᒃ ᐅᕝᕙᓘᓐᓃᑦ ᐃᒥᐊᓗᖃᕆᐊᖃᙱᑎᑦᑎᔪᓂᒃ ᒪᓕᒃᑐᓂᒃ ᓄᓇᓕᖕᓂ ᓯᕗᓪᓕᐅᔾᔭᐅᖁᔭᐅᔪᓂᒃ ᐊᒻᒪ ᐃᓕᖅᑯᓯᒃᑯᑦ ᐱᒻᒪᕆᐅᒋᔭᐅᔪᓂᒃ.
ᐃᒃᐱᒋᑦᑎᐊᕐᓗᒋᑦ ᓄᓇᓖᑦ ᓇᖕᒥᓂᖅᓱᕈᓐᓇᕐᓂᖏᑦ ᑐᙵᕕᒋᔭᐅᕗᖅ ᖃᓄᖅ ᐃᒥᐊᓗᒃ ᐊᐅᓚᑕᐅᕙᖕᒪᖔᑦ ᐅᑭᐅᖅᑕᖅᑐᒥ. ᐅᒃᐱᕆᔭᖃᖅᐳᒍᑦ ᖃᓄᑐᐃᓐᓇᖅ ᐊᓯᔾᔨᕐᓂᕆᔭᐅᔪᑦ ᐃᒥᐊᓗᖕᒥᒃ ᑐᓂᐅᖅᑲᐃᕙᖕᓂᕐᒥᒃ ᒪᓕᑦᑎᐊᕆᐊᖃᕐᓂᖏᓐᓂᒃ ᑕᒪᒃᑯᓄᖓ ᓄᓇᓕᖕᓂ ᐋᖅᑭᒃᑕᐅᓯᒪᔪᓄᑦ ᐊᑐᖅᑕᐅᕙᒃᑐᓄᑦ ᓂᕈᐊᕆᔭᐅᕙᒃᑐᓄᓪᓗ ᓄᓇᓕᖕᒥᐅᓄᑦ.
ᓄᓇᑦᓯᐊᖅ ᐊᒻᒪ ᓄᓇᕗᑦ ᐊᖏᖅᓯᒪᐃᓐᓇᖅᐳᑦ ᐱᓕᕆᖃᑎᖃᕈᒪᓪᓗᑎᒃ ᑲᓇᑕᒥ ᐊᕕᒃᑐᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᒃ ᐱᓕᕆᖃᑎᒋᕙᒃᑕᑦᑎᓐᓂᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᑲᓇᑕᒥ ᑕᐅᖅᓰᖃᑎᒌᓂᒃ ᖃᐅᔨᒪᓗᑎᒡᓗ ᐅᑭᐅᖅᑕᖅᑐᒥ ᖃᓄᐃᓕᖓᓂᕆᔭᐅᔪᑦ ᐊᒻᒪ ᓄᓇᓕᖕᓂ ᐃᓱᒪᓕᐅᕈᑕᐅᕙᒃᑐᑦ ᐃᒃᐱᒋᔭᐅᑦᑎᐊᖏᓐᓇᕐᓗᑎᒃ.