ᑐᕌᓐᑐ, ᐋᓐᑎᐅᕆᐅ (ᒫᑦᓯ 3, 2026) − ᒥᓂᔅᑕᐃᑦ ᑲᒪᒋᔭᒃᓴᓖᑦ ᐅᔭᕋᖕᓂᐊᕐᓂᕐᒧᑦ ᑲᓇᑕᒥ ᐱᖓᓱᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᑲᑎᓚᐅᖅᐳᑦ ᒫᑦᓯ 1, 2026−ᒥ, ᐅᑭᐅᖅᑕᖅᑐᓕᒫᒥ ᒥᓂᔅᑕᐃᑦ ᑲᑎᒪᓚᐅᙱᓐᓂᖏᓐᓂ ᐅᔭᕋᒃᓯᐅᖅᑏᑦ ᐱᕙᓪᓕᐊᑎᑦᑎᔩᓪᓗ ᑲᑐᔾᔨᖃᑎᒌᑦ ᑲᓇᑕᒥ ᑲᑎᒪᕐᔪᐊᕐᓇᒥ ᐅᖃᐅᓯᖃᕈᒪᓪᓗᑎᒃ ᐅᓄᖅᓯᒋᐊᖅᓯᒪᔪᓂᒃ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐊᐅᓚᔪᓐᓇᐅᑎᓄᑦ ᐊᒃᑐᐊᓂᓕᖕᓂᒃ ᐱᕐᔪᐊᓄᑦ ᐅᔭᕋᖕᓂᐊᒐᒃᓴᓄᑦ ᐅᑭᐅᖅᑕᖅᑐᒥ.
ᐃᒃᓯᕙᐅᑕᕆᔭᐅᓪᓗᓂ ᔫᑳᓐ ᒥᓂᔅᑕᖓᓄᑦ ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᕐᒧᑦ ᐊᒻᒪ ᐃᑲᔫᑎᒃᓴᓄᑦ ᑎᐊᑦ ᓚᑭᖕ, ᐅᑭᐅᖅᑕᖅᑐᒥᐅᑦ ᒥᓂᔅᑕᖏᑕ ᑲᑎᒪᔪᑦ ᐱᔾᔪᑎᖃᓗᐊᓚᐅᖅᐳᑦ ᐅᖃᐅᓯᖃᖅᖢᑎᒃ ᑲᑐᔾᔨᓂᒃᑯᑦ ᐱᓕᕆᐊᖑᕙᓪᓕᐊᔪᒪᔪᓂᑦ ᑲᑐᔾᔨᖃᑎᒌᓕᒃᑲᓐᓂᕈᒪᓪᓗᑎᒃ ᐱᖓᓱᓂᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᑦ.
ᐅᔭᕋᖕᓂᐊᕐᓂᕐᒧᑦ ᒥᓂᔅᑕᐃᑦ ᔫᑳᓐᒥ, ᓄᓇᑦᑎᐊᒥ ᓄᓇᕘᒥᓗ ᑭᒡᒐᖅᑐᐃᑦᑎᐊᓚᐅᖅᐳᑦ ᐅᑭᐅᖅᑕᖅᑐᒧᑦ, ᐅᖃᐅᓯᖃᓪᓚᕆᒃᖢᑎᒃ ᐸᕐᓇᒃᑕᐅᓯᒪᔪᑦ ᐱᒻᒪᕆᐅᓂᖓᓂᒃ 40 ᐳᓴᓐᑎ ᑲᓇᑕᐅᑉ ᓄᓇᖓ ᐊᖏᓂᖓ ᐅᑭᐅᖅᑕᖅᑐᒥ 60−ᒥᑦ. ᒥᓂᔅᑕᐃᑦ ᓇᓗᓇᐃᖅᓯᓚᐅᖅᐳᑦ ᐅᑭᐅᖅᑕᖅᑐᖅ ᐱᓕᕆᐊᒃᓴᓪᓗᐊᑕᖓᓂᒃ ᑲᓇᑕᒥ ᐅᔭᕋᖕᓂᐊᒐᒃᓴᓂᒃ ᓯᕗᓪᓕᐅᑎᑕᐅᔪᒪᔪᓂᒃ ᐊᒻᒪ ᑐᐊᕕᕐᓇᖅᑐᒥᒃ ᐱᔭᕆᐊᖃᕐᓂᖏᓐᓂᒃ ᑲᓇᑕᒥ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐊᐅᓚᔪᓐᓇᐅᑎᑦ ᐱᑕᖃᙱᓐᓂᖏᑦ ᒪᑐᔭᐅᖁᓪᓗᒋᑦ ᓴᙱᒃᑎᒋᐊᕐᓗᒋᓪᓗ ᐃᓛᒃᑰᖅᑐᑦ ᑮᓇᐅᔭᓕᐅᕈᑕᐅᓇᓱᒃᑐᑦ.
ᒥᓂᔅᑕᐃᑦ ᐊᖏᖅᓯᒪᕗᑦ ᕿᒥᕐᕈᔪᒪᓪᓗᑎᒃ ᐱᕕᒃᓴᓂᑦ ᖃᐅᔨᒪᔭᒥᓂᑦ ᑐᓴᖅᑎᑦᑎᓗᑎᒃ ᐊᔪᙱᑕᖏᓐᓂᓪᓗ ᓴᙱᒃᑎᒋᐊᖅᑎᓪᓗᒋᑦ ᐱᓕᕆᔾᔪᓯᑦᑎᐊᕙᐅᓛᑦ ᐅᔭᕋᖕᓂᐊᕐᓂᕐᒥᑦ ᒪᓕᑦᑎᐊᕐᓗᑎᒃ ᐊᑐᓕᖅᑎᑦᑎᓗᑎᒡᓗ. ᑕᒪᓐᓇ ᑲᑐᔾᔭᐅᓪᓗᓂ ᐱᓇᔪᒃᑕᐅᔪᖅ ᐃᑲᔪᖅᑐᐃᓂᐊᖅᐳᖅ ᐃᖏᕐᕋᑦᑎᐊᕐᓂᖅᓴᒥᒃ, ᒪᓕᑦᑎᐊᖅᑐᒥᒃ ᐊᒻᒪ ᐱᕙᓪᓕᐊᑦᑎᐊᖅᑐᒥᒃ ᓴᓇᕝᕕᖕᒥ ᐅᑭᐅᖅᑕᖅᑐᓕᒫᒥ.
ᒥᓂᔅᑕᐃᑦ ᐱᖁᔨᕗᑦ ᐱᐅᓯᒋᐊᖅᓯᒪᔪᒥᒃ ᒐᕙᒪᑐᖃᒃᑯᓐᓂ ᕿᓂᖁᓪᓗᒋᑦ ᑖᒃᓰᔭᕈᑕᐅᔪᓂᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂᑦ ᓇᓗᓇᐃᖅᓯᒃᑲᓐᓂᖅᖢᑎᒡᓗ ᑲᔪᓯᔪᒥᒃ ᓴᖅᑭᑎᑕᐅᖁᔨᓪᓗᑎᒃ ᐱᓕᕆᐊᖃᓪᓚᕆᒍᒪᔪᒥᒃ ᐅᑭᐅᖅᑕᖅᑐᒥ 60−ᒥᑦ ᑖᒃᓰᔭᕈᑕᐅᔪᓄᑦ.
ᑖᒃᑯᐊ ᐱᖓᓱᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᐊᖏᖃᑎᒌᓚᐅᖅᐳᑦ ᐱᓕᕆᖃᑎᒌᒍᒪᓪᓗᑎᒃ ᖃᓄᖅᑑᕈᑎᒃᓴᒥᒃ ᐋᖅᑭᒃᓱᐃᓗᑎᒃ ᐱᒻᒪᕆᐊᓗᖕᓂᒃ ᐅᔭᕋᖕᓂᐊᕐᓂᕐᒧᑦ ᐱᓕᕆᐊᒃᓴᓂᒃ ᓴᖅᑭᑎᑦᑎᓇᔭᖅᑐᓂᒃ ᐱᕚᓪᓕᕈᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒧᑦ ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᓗᑎᒃ ᑲᔪᓰᓐᓇᕈᓐᓇᖅᑐᓂᓪᓗ ᑮᓇᐅᔭᓕᐅᕋᓱᖕᓂᖅ ᐱᕈᖅᐸᓪᓕᐊᓗᓂ.
ᒥᓂᔅᑕᐃᑦ ᐊᖏᖅᓯᒪᔪᑦ ᐃᑲᔪᖅᑐᐃᔪᒪᓪᓗᑎᒃ ᑲᔪᓰᓐᓇᖅᑐᒥᑦ ᐅᑭᐅᖅᑕᖅᑐᓕᒫᒥᑦ ᑮᓇᐅᔭᓕᐅᕋᓱᐊᕐᓂᖅ ᐅᑭᐅᖅᑕᖅᑐᖅ 60−ᒥᑦ ᓂᐅᕐᕈᑎᖃᕐᓂᕐᒧᑦ ᐱᓕᕆᐊᖑᔪᒥᑦ ᓴᖅᑭᔮᖅᑎᑦᑎᓂᕐᒥᑦ ᑲᔪᓰᓐᓇᕈᓐᓇᖅᑐᓂᑦ ᐅᔭᕋᖕᓂᐊᕐᓂᕐᒥᑦ ᐅᑭᐅᖅᑕᖅᑐᒥ ᐃᑲᔪᖅᑐᐃᓗᑎᒡᓗ ᓄᓇᖃᖅᑳᖅᓯᒪᔪᓂᑦ, ᐃᓄᖕᓂᑦ ᐊᓪᓚᖓᔪᓂᓪᓗ ᕿᓂᖅᑐᓂᑦ, ᑮᓇᐅᔭᓕᐅᕋᓱᖕᓂᕐᒧᑦ ᐅᑎᖅᑐᒃᓴᓂᓪᓗ.
ᐱᖓᓱᑦ ᒥᓂᔅᑕᐃᑦ ᐊᖏᖃᑎᒌᓚᐅᖅᐳᑦ ᑲᑎᖃᑦᑕᕈᒪᓪᓗᑎᒃ ᓈᒻᒪᒃᓯᔭᕌᖓᑦ ᐃᖏᕐᕋᐃᓐᓇᖅᑎᑦᑎᔪᒪᓪᓗᑎᒃ, ᐱᓕᕆᖃᑎᒌᓕᒃᑲᓐᓂᕈᒪᓪᓗᑎᒡᓗ ᓯᕗᒻᒧᐊᒃᑎᑦᑎᔪᒪᓪᓗᑎᒡᓗ ᑲᑐᔾᔨᓗᑎᒃ ᐱᕕᒃᓴᓂᒃ ᐅᑭᐅᖅᑕᖅᑐᒧᑦ.
ᐅᖃᐅᓯᐅᔪᑦ
"ᐅᑭᐅᖅᑕᖅᑐᖅ ᐱᒻᒪᕆᐊᓗᖕᓂᒃ ᐅᔭᕋᖕᓂᐊᒐᒃᓴᖃᖅᐳᖅ ᐱᖃᑎᒋᔭᑦᑕ ᐱᔭᕆᐊᖃᖅᑕᖏᓐᓂᒃ, ᑭᓯᐊᓂ ᐱᕙᓪᓕᐊᓂᖅ ᑲᔪᓯᔪᓐᓇᖅᐳᖅ ᑐᙵᕕᖏᑦ ᑕᒻᒪᙱᑐᐊᖅᐸᑕ. ᑕᒪᓐᓇ ᐃᓚᖃᖅᐳᖅ ᐊᑐᖅᑕᐅᑦᑎᐊᕈᓐᓇᖅᑐᒥᒃ ᐅᑭᐅᒃᑯᑦ ᐆᒻᒪᖅᑯᑎᖃᕐᓂᕐᒥᒃ, ᓇᑉᐸᖅᑎᖅᑕᐅᓯᒪᔪᓂᒃ, ᑐᑭᓯᓇᑦᑎᐊᖅᑐᓂᒃ ᒪᓕᑦᑎᐊᖅᑐᓂᒃ ᒪᓕᒋᐊᓕᖕᓂᒃ, ᐃᒃᐱᒋᔭᖃᑦᑎᐊᕐᓂᕐᒥᒡᓗ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ. ᐱᓕᕆᖃᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ, ᐊᔪᙱᓐᓂᑦᑎᓐᓂ ᖃᐅᔨᑎᑦᑎᕙᒡᓗᑕ, ᑲᒪᒋᔭᖃᑦᑎᐊᓕᒃᑲᓐᓂᕈᓐᓇᖅᐳᒍᑦ ᐅᑭᐅᖅᑕᖅᑐᕐᓗ ᐱᓇᔪᒡᕕᐅᓂᖅᓴᐅᓕᕐᓗᓂ ᑮᓇᐅᔭᓕᐅᕋᓱᖕᓂᕐᒧᑦ. ᑲᓇᑕ ᐱᓪᓚᑦᑖᕈᓂ ᐅᔭᕋᖕᓂᐊᒐᒃᓴᓂᒃ, ᐊᖏᖅᓯᒪᓂᕆᔭᖓ ᐃᓚᖃᕆᐊᖃᖅᐳᖅ ᐃᑲᔪᖅᑐᐃᓪᓚᕆᖕᓂᕐᒥᒃ ᐅᑭᐅᖅᑕᖅᑐᒥ ᒪᑭᒪᔾᔪᑎᓂᑦ. ᑐᕌᒐᖃᖅᐳᒍᑦ ᑕᒪᑐᒥᖓ ᐋᖅᑭᑦᑎᐊᖅᓯᒪᖁᔨᓪᓗᑕ: ᑲᒪᒋᔭᖃᑦᑎᐊᕐᓗᑕ, ᑲᔪᓯᑦᑎᐊᖅᑐᒃᑯᑦ ᐊᑐᕐᓗᑕᓗ ᓴᖅᑭᑎᑦᑎᓇᔭᖅᑐᒥᒃ ᐱᓪᓚᕆᒃᑐᓂᒃ ᐊᑯᓂᐅᔪᖅ ᐱᕚᓪᓕᕈᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᓄᓇᓕᖏᓐᓄᑦ."
ᒥᓂᔅᑕ ᐆᒻᒪᖅᑯᑎᓕᕆᔨᒃᑯᓐᓄᑦ, ᐅᔭᕋᖕᓂᐊᕐᓂᕐᒧᑦ ᐊᒻᒪ ᐊᑐᖅᑐᒃᓴᓄᑦ ᑎᐊᑦ ᓚᑭᖕ, ᔫᑳᓐ ᒐᕙᒪᖓ.
"ᐅᑭᐅᖅᑕᖅᑐᖅ ᓯᕗᒻᒧᐊᒃᑎᑦᑎᕙᓪᓕᐊᑎᓪᓗᒍ ᐅᔭᕋᖕᓂᐊᒐᒃᓴᓂᒃ ᐱᓕᕆᐊᒃᓴᓂᒃ, ᑐᕌᒐᖃᐃᓐᓇᖅᐳᒍᑦ ᑲᑐᔾᔨᓗᑎᒃ ᓯᕗᓪᓕᐅᑎᑕᐅᔪᒪᔪᓂᒃ ᐱᓕᕆᐊᖑᓕᕐᓗᑎᒃ. ᖃᐅᔨᒪᔭᕗᑦ ᑐᓴᖅᑕᐅᑎᑉᐸᒡᓗᒋᑦ ᓇᓕᒧᒌᓕᖅᑎᓪᓗᒋᓪᓗ ᐱᓕᕆᐊᕆᔭᕗᑦ ᐱᔭᕆᐊᖃᕐᓂᖅᐹᒧᑦ, ᓴᙱᒃᑎᒋᐊᖅᑎᑦᑎᕗᒍᑦ ᐊᔪᙱᓐᓂᕆᔭᑦᑎᓐᓂᒃ ᐱᔪᒥᓇᖅᓯᑎᑦᑎᔪᓐᓇᕐᓂᕐᒥᒃ ᑮᓇᐅᔭᓕᐅᕈᑕᐅᒃᑲᓐᓂᕋᓱᒃᑐᓂᒃ ᑲᔪᓯᕙᓪᓕᐊᓂᑦᑎᓐᓂᒡᓗ ᐊᖏᔪᓂᒃ ᒪᑭᒪᔾᔪᑎᓂᑦ ᐱᓕᕆᐊᖑᔪᓂᑦ ᐅᑭᐅᖅᑕᖅᑐᒥ ᑐᙵᕕᒋᔭᑦᑎᓐᓄᑦ ᑲᒪᒋᔭᖃᑦᑎᐊᕐᓂᒃᑯᑦ ᒪᑐᐃᖅᑎᑦᑎᓗᑕ ᐅᑭᐅᖅᑕᖅᑐᒥ ᐅᔭᕋᖕᓂᐊᒐᒃᓴᖅᑕᖃᑐᐃᓐᓇᕆᐊᓕᖕᓂᒃ ᓴᖅᑭᑎᑦᑎᔪᓂᒃ ᓄᑖᓂᒃ ᐱᕕᒃᓴᓂᒃ ᐅᑭᐅᖅᑕᖅᑐᒥᐅᓄᑦ."
ᒥᓂᔅᑕ ᓴᓇᔪᓕᕆᔪᓄᑦ, ᐳᓚᕋᖅᑐᓕᕆᔪᓄᑦ ᐊᒻᒪ ᑮᓇᐅᔭᓕᐅᕋᓱᖕᓂᕐᒧᑦ, ᓄᓇᑦᓯᐊᑉ ᒐᕙᒪᖓ.
"ᐃᒃᓯᕙᐅᑕᐅᖃᑕᐅᓂᖅ ᑲᓇᑕᒥ ᐊᐅᓚᔪᓐᓇᐅᑎᓄᑦ ᐅᔭᕋᖕᓂᐊᕐᕕᖕᓄᓪᓗ ᒥᓂᔅᑕᐃᑦ ᑲᑎᒪᑎᓪᓗᒋᑦ ᑕᒪᑐᒪᓂ ᐊᕐᕌᒍᒥ ᑕᑯᒃᓴᐅᑎᑦᑎᕗᖅ ᐅᑭᐅᖅᑕᖅᑐᖅ ᐊᖏᖅᓯᒪᓂᖓᓂᒃ ᐋᖅᑭᒃᓱᐃᔪᒪᓪᓗᑎᒃ ᑲᓇᑕᒥ ᐆᒻᒪᖅᑯᑎᓄᑦ ᐊᒻᒪ ᐃᑲᔫᑎᒃᓴᓄᑦ ᓯᕗᓂᒃᓴᑦᑎᓐᓂ. ᑐᕌᒐᖃᖅᐳᒍᑦ ᑲᔪᓯᑎᑦᑎᔪᒪᓪᓗᑕ ᐱᒻᒪᕆᐊᓗᖕᓂᒃ ᒪᑭᒪᔾᔪᑎᒃᓴᓄᑦ ᐱᓕᕆᐊᖑᔪᓂᒃ ᓯᕗᒻᒧᐊᒃᑎᑦᑎᓗᑕ, ᓴᙱᒃᑎᒋᐊᖅᑎᑦᑎᓗᑕ ᓱᓇᒃᑯᑖᖃᖅᑎᑦᑎᕙᒃᑐᓂᑦ, ᐋᖅᑭᒃᓱᐃᕙᓪᓕᐊᓗᑕᓗ ᐆᒻᒪᖅᑯᑎᓕᕆᔾᔪᑎᓂᒃ ᐱᔭᐅᔭᕆᐊᓕᖕᓂᒃ ᐱᕈᖅᐸᓪᓕᐊᓂᐊᖅᑐᓄᑦ ᑕᐅᕗᖓ. ᐱᓕᕆᖃᑎᒋᑦᑎᐊᕐᓗᒋᑦ ᒐᕙᒪᑐᖃᒃᑯᑦ, ᑲᓇᑕᒥ ᐊᕕᒃᑐᖅᓯᒪᔪᑦ, ᐅᑭᐅᖅᑕᖅᑐᒥᐅᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒋᔭᖏᑦ, ᐊᒻᒪᓗᑦᑕᐅᖅ ᓴᓇᕝᕕᐊᓗᐃᑦ, ᐱᕈᖅᓯᐊᒃᓴᓕᐅᖅᐳᒍᑦ ᐱᕈᖅᓯᐊᒃᓴᑦᑎᐊᕙᖕᓂᒃ ᓴᖅᑭᑦᑎᔪᓐᓇᖅᓯᖁᓪᓗᒋᑦ ᐱᕙᓪᓕᐊᑎᑦᑎᑦᑎᐊᕐᓂᕐᒥᒃ. ᑲᑎᙵᓂᖅᓴᐅᓗᑎᒃ ᑲᑐᔾᔨᖃᑎᒌᖕᓂᖅᓴᐅᓗᑎᒡᓗ ᐅᑭᐅᖅᑕᖅᑐᒥ ᐱᓕᕆᐊᖑᔪᓂᑦ ᐃᑲᔫᑕᐅᔪᓐᓇᖅᐳᖅ ᓄᓇᑦᑎᐊᕐᒥᐅᓂᒃ, ᐊᒻᒪ ᑲᓇᑕᒥ, ᓄᓇᕐᔪᐊᓕᒫᒥ ᐱᓇᔪᖃᑕᐅᔪᓐᓇᕐᓗᑎᒃ ᐃᑲᔫᑎᒃᓴᓂᒃ ᐊᑯᓂᐅᔪᖅ ᓄᓇᓕᑦᑎᓐᓄᑦ."
ᒥᓂᔅᑕ ᑲᒪᒋᔭᒃᓴᖃᖅᖢᓂ ᖃᓄᐃᓕᐅᖅᑕᐅᕙᓪᓕᐊᔪᒪᔪᑦ ᒪᑭᒪᔾᔪᑎᒃᓴᓄᑦ, ᐆᒻᒪᖅᑯᑎᒧᑦ ᐱᖁᑎᖃᖅᑎᑦᑎᕙᒃᑐᓄᓪᓗ ᐊᑐᖅᑕᐅᕙᒃᑐᓄᑦ ᑭᐅᕈᓚᐃᓐ ᐅᐊᓵᔭᒃ, ᓄᓇᑦᑎᐊᑉ ᒐᕙᒪᖓ.
"ᐅᑭᐅᖅᑕᖅᑐᖅ ᐱᓕᕆᖃᑎᖃᑦᑎᐊᕈᒪᕗᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᐱᓕᕆᖃᑎᒋᕙᒃᑕᑦᑎᓐᓂᒃ ᑲᒪᒋᔭᖃᑦᑎᐊᕐᓂᖅᓴᐅᓕᕐᓗᑎᒃ ᐅᔭᕋᖕᓂᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ. ᐅᔭᕋᖕᓂᐊᒐᒃᓴᑦᑎᐊᕙᐃᑦ ᑭᒡᒐᖅᑐᐃᕗᑦ ᐱᒻᒪᕆᐊᓗᖕᒥᒃ ᐱᕕᒃᓴᐅᔪᓐᓇᖅᑐᒥᒃ ᐊᕕᒃᑐᖅᓯᒪᔪᓂᑦ, ᑭᓯᐊᓂ ᑲᔪᓯᑦᑎᐊᕈᓐᓇᖅᐳᖅ ᐊᐅᓚᑦᑎᔾᔪᑎᑦᑎᐊᕙᖕᒥᒃ ᐊᑐᕐᓗᑎᒃ, ᐊᐅᓚᑕᐅᑦᑎᐊᕐᓗᑎᒃ ᒪᑭᒪᔾᔪᑎᒃᓴᑦ ᑮᓇᐅᔭᓕᐅᕈᑕᐅᒃᑲᓐᓂᕋᓱᒃᑐᓂᒃ ᐱᓕᕆᖃᑎᒌᑦᑎᐊᕐᓗᑎᒡᓗ ᓄᓇᖃᖅᑳᖅᑐᑦ ᒐᕙᒪᖏᓐᓂᒃ ᓄᓇᓕᖏᓐᓂᒡᓗ. ᐊᔪᙱᓐᓂᑦᑎᓐᓂ ᖃᐅᔨᑎᑦᑎᖃᑦᑕᕐᓗᑕ ᓇᓕᒧᒌᓕᖅᑎᑦᑎᓗᑕᓗ ᐊᑐᖅᑕᑦᑎᓐᓂᒃ, ᑲᒪᒋᔭᖃᑦᑎᐊᓕᒃᑲᓐᓂᕈᓐᓇᖅᐳᒍᑦ, ᐊᖏᒡᓕᒋᐊᖅᑎᑦᑎᓗᓂ ᑮᓇᐅᔭᓕᐅᕋᓱᒃᐸᒃᑐᓂᒃ ᓇᓗᓇᐃᖅᓯᓗᑕᓗ ᐱᕙᓪᓕᐊᓂᕆᔭᐅᔪᖅ ᐃᑲᔪᖅᑐᐃᓂᖏᓐᓂᒃ ᐊᑯᓂᐅᔪᖅ ᑲᔪᓯᑦᑎᐊᕈᓐᓇᖅᑐᒥᒃ ᐅᑭᐅᖅᑕᖅᑐᒥ. ᐱᓕᕆᖃᑎᒌᖕᓂᖅ ᓄᓇᕘᓕᒫᒥ ᓴᙱᒃᑎᒋᐊᖅᑎᑦᑎᕙᒃᐳᖅ ᑲᑐᔾᔨᓪᓗᑕ ᓂᐱᑦᑎᓐᓂᒃ ᓴᙱᒃᑎᒋᐊᖅᑎᑦᑎᓪᓗᓂᓗ ᐅᑭᐅᖅᑕᖅᑐᒥ ᑐᙵᑦᑎᐊᖅᑐᒥᒃ ᑲᒪᒋᔭᖃᑦᑎᐊᖅᑐᒥᓪᓗ ᐃᓂᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ."
ᒥᓂᔅᑕ ᑲᒪᔪᖅ ᐅᔭᕋᖕᓂᐊᕐᓂᕐᒧᑦ, ᑯᕋᐃᒡ ᓯᒪᐃᓚᒃ, ᓄᓇᕗᑦ ᒐᕙᒪᖓ.